Okẹ nọ U No Eva Ze

PỌL ukọ na o kere kpahe okẹ unevaze nọ: “Ohwo o re ru wọhọ epanọ o roro evaọ eva riẹ,” o te fibae nọ: “O jọ o rọ obọ okẹkẹ hẹ hayo ọgbahọ họ, keme Ọghẹnẹ o re you ohwo nọ ọ rẹ kẹ okẹ-evawere.” (2 Kọr. 9:7) Jihova ọ be gba uvumọ ohwo họ họ re ọ kẹ okẹ. Ọ kẹ idibo riẹ kpobi uvẹ re a rọ unevaze dhesẹ nnọ a se egagọ riẹ gboja. N’otọ avọ otọ ze, ahwo riẹ a be rọ ọwhọ ru unevaze. Joma rehọ iriruo esa.

Nọ Jihova o su emọ Izrẹl no Ijipti no, ọ tẹ ta kẹ ae inọ a bọ uwou-udhu. A tẹ ta kẹ emọ Izrẹl re a zọhọ eware nọ a te rọ bọ uwou na. Koyehọ “ohwo kpobi nọ o dhẹ ruọ oma” ọ tẹ rọ igoru avọ isiliva, ifiare gbe eware efa ze. Eware nọ a zọhọ i bu te epanọ a ro woro inọ onọ a zọhọ u te no.—Ọny. 35:5, 21; 36:6, 7.

Okenọ a jẹ gwọlọ bọ etẹmpol na, ahwo Ọghẹnẹ a tẹ wariẹ wo uvẹ nọ a re ro dhesẹ  inọ a be tha egagọ uzẹme uke. Devidi Ovie na ọ zọhọ eware buobu nọ a te rọ bọ uwou na, ọ tẹ ta kẹ amọfa re a ru azọhọ. Ahwo na a rọ ọwhọ ru ere. A tẹ zẹ igoru gbe isiliva nọ a zọhọ nẹnẹ, igho na i re bu te edọla ima-idu udhusoi (100,000,000,000). Eva e were ahwo na fikinọ a zọhọ eware kẹ Jihova.—1 Irv. 29:3-9; 2 Irv. 5:1.

Epọvo na re, ilele Jesu Kristi erọ ikpe-udhusoi ọsosuọ a rọ evawere ru unevaze. Evaọ ẹdẹ Pẹntikọst 33 C.E., ahwo nọ i bu te oware wọhọ idu esa (3,000) eye e họ-ame, ibuobu rai erara nọ e ziọ Jerusalẹm. Re enọ eware e jọ oma gaga a sae daji okpẹwho na re a gbe wuhrẹ ziezi kpahe egagọ nọ a kurẹriẹ ze na, inievo na a te ru okẹ unevaze. A zẹ eware rai jọ, a tẹ rọ igho na bru ikọ na ze re a ro fi obọ họ kẹ enọ eware e rrọ oma gaga. Dai roro epanọ o were Jihova te nọ ọ ruẹ ẹrọwọ gbe uyoyou inievo nana!—Iruẹru 2:41-47.

Nẹnẹ, Ileleikristi a gbẹ be rọ oke rai, ẹgba, gbe ugho rọ wha egagọ uzẹme haro, yọ a bi ru onana avọ evawere. Ẹkpẹti nọ ọ rrọ obaro na o ti dhesẹ idhere nọ whọ rẹ sai ro ru onana.

[Ẹkpẹti nọ ọ rrọ ẹwẹ-obe avọ 18]

Idhere Nọ Otujọ A Bi Ro Ru Azọhọ Unevaze

AZỌHỌ UNEVAZE KẸ IRUO AKPỌ-SOSO

Ahwo buobu a wo omaa unuigho jọ nọ a re ro ru azọhọ unevaze fihọ ẹkpẹti nọ a kpoka họ nnọ “Iruo Akpọ-Soso.”

Kamara kamara ikoko i re vi igho nọ a jọ ekpẹti nana ruẹ se uwou ogha Isẹri Jihova nọ o rrọ orẹwho rai. Ohwo ọ rẹ sai je vi azọhọ unevaze ovavo ro se uwou ogha Isẹri Jihova nọ o rrọ orẹwho riẹ. Ohwo nọ o bi vi echẹke o re kere fihọ iẹe inọ a hwa ugho na kẹ “Watch Tower.” A rẹ sae jẹ zọhọ ifiare hayo oghẹrẹ eware eghaghae itieye na efa. Ohwo nọ ọ zọhọ eware itieye na o re kere obe-ovuẹ okpẹkpẹe lele eware itieye na onọ u re dhesẹ inọ onana yọ okẹ unevaze riẹ.

IDHERE SA-SA NỌ A SAI RO RU AZỌHỌ UNEVAZE

U te no ugho nọ a re ro ru azọhọ unevaze no, idhere efa e riẹ nọ a re ro ru azọhọ unevaze nọ a rẹ rọ wha iruo Uvie na haro evaọ akpọ-soso. Usu rai họ:

Insurance [Azọhọ kẹ Okpẹtu Idudhe]: Ahwo jọ a rẹ hwa igho fihọ ekọmpene Ishọranse n’oke t’oke, re a te whu ekọmpene na e vẹ hwa unuigho nọ a ta mu kẹ ohwo nọ a kere nọ a hwa igho na kẹ. Ahwo jọ a rẹ sai kere inọ a hwa igho na kẹ Watch Tower. Amọfa a rẹ sai je kere inọ a hwa igho arutẹriọ rai kẹ Watch Tower.

Igho nọ A Fihọ Ebanke: Ahwo jọ a re kere inọ a te whu a hwa igho jọ nọ a wo fihọ ebanke hayo erere nọ u bi no igho rai jọ ze kẹ Watch Tower.

Stocks and Bonds: Ahwo jọ a rẹ jẹ igho fihọ ebanke, ekọmpene, hayo iruẹru egọmeti jọ nọ ebanke hayo ekọmpene itieye a re kugbe rọ thueki rai, a ve kere inọ a hwa erere nọ o ti te ai kẹ Watch Tower.

Etọ Hayo Iwou: A rẹ sae zọhọ etọ hayo iwou nọ a rẹ sae zẹ; kpahe otọ nọ a bọ iwou fihọ no, ohwo ọ rẹ sae rehọ iwou na ru azọhọ kẹ ukoko na ọ vẹ nya siọ ofẹ nọ ọ gwọlọ rria ba bẹsenọ o re whu, o je whu no a vẹ rehọ uwou nọ ọ jẹ rria na kugbe. Re whọ tẹ te whobọhọ obe jọ inọ whọ gwọlọ rehọ uwou hayo otọ ra jọ ru azọhọ kẹ iruo akpọ-soso na, whọ rẹ jọ uwou ogha riẹ tao.

Obe Uku-Oghale gbe Oware nọ A rẹ Kẹ Ohwo Kru: Ohwo ọ rẹ sai kere inọ o te whu no a rehọ igho hayo ekwakwa riẹ jọ kẹ Watch Tower.

Ẹme na “idhere sa-sa nọ a sai ro ru azọhọ unevaze” u dhesẹ inọ oghẹrẹ azọhọ unevaze itienana o gwọlọ nnọ ohwo o re roro iei te.

Rọkẹ evuẹ efa, whọ rẹ sae rehọ adrẹse nọ ọ rrọ obotọ na kere se Uwou Ogha Isẹri Jihova nọ o rrọ Nigeria hayo whọ rẹ sae rehọ ifonu lele ai t’ẹme hayo kere se uwou ogha nọ o rrọ orẹwho ra.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: 07080662020