Rri Inievo Ra nọ I Diezọ Ghaghae!

IDIBO Ọghẹnẹ nẹnẹ yọ uviuwou ulogbo orọ inievo abọ-ẹzi nọ i bi lele oriruo ezae gbe eyae erọ oke anwae nọ e jẹ gọ Ọghẹnẹ. Ejọ rai họ Samuẹle, Devidi, Samsin, Rehab, Mosis, Abraham, Sera, Noa, gbe Ebẹle. Enọ i diezọ buobu a be gọ Jihova nẹnẹ. Wọhọ oriruo, imava ọsosuọ nọ i zihe ruọ Isẹri Jihova evaọ Mongolia yọ ọzae jọ avọ aye riẹ nọ i diezọ. Yọ fiki ẹgbakiete inievo mai nọ i diezọ evaọ obọ Russia, a bruoziẹ kẹ omai evaọ ẹdhọ nọ ma gu evaọ okọto nọ a re se European Court of Human Rights.

Evaọ oke mai na, ‘ọrigbo nọ o wo ẹrọwọ avọ areghẹ na’ a siobọno ividio nọ a jọ r’obọ t’ẹme no, yọ a rehọ ikoko gbe ikokohọ obọ rọ t’ẹme mu no. (Mat. 24:45) Enọ i diezọ a wo erere gaga no enana ze no. * Rekọ who roro epanọ enọ i diezọ a je ro wuhrẹ kpahe Ọghẹnẹ uzẹme na je wo ẹnyaharo evaọ ukoko na ababọ ividio gbe ikokohọ nana? Kọ who roro kpahe oware nọ whọ rẹ sai ru no re who fi obọ kẹ enọ i diezọ evaọ oria ra?

Epanọ A je Ro Wuhrẹ Kpahe Ọghẹnẹ

Kọ ẹvẹ otẹrọnọ whọ nọ inievo jọ nọ e kpako no, enọ i diezọ kpahe epanọ a ro kurẹriẹ? A sae ta kẹ owhẹ epanọ eva e were rai te nọ a kaki yo inọ Ọghẹnẹ o wo odẹ—epanọ uwuhrẹ ọvo yena u ro nwene uzuazọ rai jẹ lẹliẹ ai kru oma ga ikpe buobu taure ma te ti wo ividio nọ a ro wuhrẹ eware nọ i diwi ziezi. A sae ta kẹ owhẹ epanọ o jọ okenọ a je ru iwuhrẹ ababọ ẹvẹrẹ obọ rọ t’ẹme. Ukpoye, ohwo jọ ọ jẹ hae keria gbai o ve kere eme fihọ ẹwẹ-obe kẹ ai re a riẹ ẹme nọ a be ta. Enẹ o jọ kẹ oniọvo jọ ikpe ihrẹ bẹsenọ ohwo jọ nọ ọ rẹ rehọ obọ fa eme na kẹe ọ rọ nyaze.

Inievo nọ e kpako no, enọ i diezọ a gbẹ be kareghẹhọ epanọ o bẹ te re a ta usiuwoma. A re kru ekade nọ a kere eme Ebaibol jọ fihọ obọ jọ. A ve je kru emagazini ekpokpọ mai họ obọ ọdekọ. O jọ bẹbẹ re oniọvo mai nọ o diezọ o wuhrẹ Ebaibol kugbe omọfa nọ o diezọ keme aimava na a wo otoriẹ eme nọ e rrọ ebe na ziezi hi. Inievo nana jọ a kareghẹhọ uzou nọ o jẹ hai dhe ai nọ ahwo nọ a nyaku a jẹ sai wo otoriẹ ẹme nọ a bi dhesẹ kẹ ai hi. A tẹ jẹ riẹ epanọ o rẹ da te re ohwo ọ riẹ Jihova rekiyọ ọ riẹ epanọ ọ rẹ rọ eriariẹ yena fi obọ họ kẹ amọfa ha. Eme jabọ? Keme u mu rai ẹro ho inọ a gine wo otoriẹ ẹme na gbagba.

Ghelọ ezadhe yena kpobi, inievo mai nọ i diezọ a kru ẹgbakiete rai. (Job 2:3) Jihova a rẹro rai so. (Ol. 37:7) Yọ ọ be ghale ae enẹna vi epanọ ibuobu rai a rẹro riẹ.

Roro kpahe uye nọ o jẹ bẹ oniọvo jọ nọ o diezọ, ọnọ o wo aye gbe emọ. Taure ukoko na u te ti ru ividio ẹvẹrẹ obọ rọ t’ẹme, oniọvo nana ọ jẹ hai ru uwuhrẹ uviuwou riẹ. Ọmọzae riẹ ọ ta nọ: “Uwuhrẹ  uviuwou na o jẹ hae jọ bẹbẹ kẹ ọsẹ mẹ, keme ebe ọvo e jariẹ nọ ọ jẹ hai ro wuhrẹ omai. Ẹsibuobu, o re wo otoriẹ eme nọ e rrọ obe na ha. Mai emaha na ma je ru eware lọhọ kẹe gbe he. Ma jẹ hae sa mu ei nọ o gbe wuhrẹ oware jọ gbagba ha. Ghele onana, ẹsikpobi ọ jẹ hai ru uwuhrẹ na. Ọ jẹ hai roro inọ re ma wuhrẹ kpahe Jihova o roja vi oma nọ ma be hai ru vo ẹe ẹsejọ fikinọ ọ riẹ obe tere he.”

Ma te je wo oriruo oniọvo ọfa, Richard, ọnọ ọ vrẹ ikpe 70 no, ọnọ o diezọ je tuaro nọ ọ be rria Brooklyn, New York. A riẹ Richard fihọ ohwo nọ ewuhrẹ o re vo ho. Re o kpohọ ewuhrẹ, ọye ọvo ọ rẹ ruọ itreni, o ve kele unu eria nọ itreni na o bi jo fi ahwo h’otọ, ọ vẹ rọ enẹ riẹ oria nọ o re jo nwrotọ. Ẹdẹjọ, ofou o fou gaga te epanọ a rọ va ewuhrẹ. A vuẹ uwou se ahwo ukoko na kpobi, rekọ a kareghẹhọ vuẹ Richard he. Nọ inievo na a vuhumu nnọ a vuẹ oniọvo nana ha, a te mu ei họ ẹgwọlọ, a tẹ ruẹ Richard nọ o dikihẹ otafe Ọgwa Uvie na be hẹrẹ okenọ a re rovie ethẹ na. Nọ a nọe oware nọ o lẹliẹ e riẹ ziọ ewuhrẹ dede nọ ofou o bi fou, ọ tẹ ta nọ, “Me you Jihova.”

Eme Whọ Rẹ Sai Ru?

Kọ ahwo nọ a diezọ a be rria kẹle owhẹ? Kọ whọ sai wuhrẹ ẹvẹrẹ obọ rọ t’ẹme re whọ sae rọ abọ lele ai t’ẹme? O rẹ were ahwo nọ a diezọ gaga re a wuhrẹ amọfa ẹvẹrẹ rai, yọ a rẹ rọ odiri ru ere. Whọ rẹ sae nyaku ohwo nọ o diezọ, o sae jọ okenọ whọ rrọ usiuwoma. Eme whọ rẹ sai ru? Daoma r’obọ lele iei t’ẹme. Whọ sai kere eme fihọ obe kẹe hayo tube dhesẹ iwoho kẹe. Ọ gbẹ maki dhesẹ isiuru kpahe ovuẹ Ebaibol na ha, ta kẹ oniọvo jọ nọ o diezọ hayo ọnọ ọ riẹ ẹvẹrẹ obọ rọ t’ẹme kpahe ohwo nana. Ẹsejọhọ ovuẹ mai o te mae were ọnọ o diezọ na otẹrọnọ a rọ ẹvẹrẹ obọ rọ t’ẹme ta usiuwoma kẹe.

Ẹsejọhọ who bi wuhrẹ ẹvẹrẹ obọ rọ t’ẹme hayo whọ rrọ ukoko ẹvẹrẹ obọ rọ t’ẹme. Ẹvẹ whọ sai ro wuhrẹ ẹvẹrẹ na ziezi? O tẹ make rọnọ inievo nọ i diezọ họ e rrọ ukoko ra, kọ wha gbẹ r’obọ t’ẹme kẹ ohwohwo ẹsejọ? Onana o te lẹliẹ ẹvẹrẹ na reria owhẹ oma. Ẹsejọ, ukpenọ whọ rẹ r’obọ t’ẹme, whọ te gwọlọ rọ unu ta keme oye o mae lọhọ. Rekọ who te bi wuhrẹ ẹvẹrẹ ọkpokpọ, who re wo ithihakọ re whọ sae riẹ ẹvẹrẹ nana ziezi.

Whọ tẹ be daoma re whọ hae rọ ẹvẹrẹ obọ rọ t’ẹme lele enọ i diezọ t’ẹme u re dhesẹ inọ who you inievo mai nọ i diezọ, who te je wo adhẹẹ kẹ ae. Dai roro ofu nọ o be hai dhe enọ i diezọ fikinọ a bi wo otoriẹ ẹme nọ ahwo a be ta ha evaọ obọ iruo gbe obọ isukulu. Oniọvo  jọ nọ o diezọ ọ ta nọ: “Kẹdẹ kẹdẹ ahwo nọ a wariẹ omẹ họ a rẹ ta ẹme. Ẹsibuobu oma o rẹ jọ omẹ goli, eva e rẹ tubẹ dh’omẹ ẹsejọ. Mẹ rẹ sai dhesẹ oghẹrẹ nọ oma o rẹ j’omẹ ẹsejọ họ.” U fo re iwuhrẹ mai e jọ oria ufuoma nọ inievo mai nọ i diezọ a rẹ jọ re emu abọ-ẹzi a vẹ jẹ reawere usu kugbe amọfa.—Jọn 13:34, 35.

Amọfa nọ ma re roro kpahe họ inievo mai nọ i diezọ enọ e rrọ ikoko nọ ahwo a bi jo yo ẹme. A rẹ rọ abọ fa eme nọ a bi ru rọ kẹ ae. Re a ruẹsi wo otoriẹ eme na ziezi, u re woma re enọ i diezọ na a keria obaro Ọgwa Uvie na. Onana u re ru ei lọhọ re a ruẹ ọnọ ọ be r’obọ t’ẹme kẹ ae na gbe oniọvo nọ o bi ru ẹme na evaọ oke ovo na. Dede nọ onana o te rehọ iroro ahwo edekọ na evaọ oke ọsosuọ, ma ruẹ nnọ u re kri hi re o tẹ reria ai oma. Enẹ u fo nnọ o rẹ jọ evaọ ikokohọ nọ a jo wo ọruẹrẹfihotọ ẹvẹrẹ obọ rọ t’ẹme. Ma bi yere inievo nọ e be daoma r’obọ fa eme nọ a be jọ iwuhrẹ ru kẹ enọ i diezọ na.

Ẹsejọhọ whọ rrọ ukoko nọ u wo utu ẹvẹrẹ obọ rọ t’ẹme hayo ukoko nọ u wo umutho ahwo nọ i diezọ nọ a rẹ r’obọ fa eme kẹ nọ a te bi ru ewuhrẹ. Eme who re ru rọ whẹtiẹ inievo nana họ oma ziezi? Zizie ai kpohọ uwou ra. O tẹ lọhọ, wuhrẹ epanọ a rẹ r’obọ ta umutho eme jọ. Ozọ u mu owhẹ hẹ inọ whọ te sai lele ai t’ẹme ziezi hi. Wha te rọ oghẹrẹ jọ t’ẹme, yọ uyoyou utioye nọ who dhesẹ kẹ ai na o te thọrọ owhai ẹro ho. (1 Jọn 4:8) Ma rẹ sai wuhrẹ eware buobu mi inievo mai nọ i diezọ. A rẹ gwọlọ gbiku gaga, a re muẹrohọ otọ ziezi, yọ a rẹ sasa oma gaga. Oniọvo jọ nọ ọsẹgboni riẹ a diezọ ọ ta nọ: “Mẹ rria kugbe ahwo nọ a diezọ no oke emaha mẹ ze, yọ mẹ rẹ sai kele eware nọ me wuhrẹ mi ai no ho. Ma rẹ sai wuhrẹ eware buobu mi inievo mai nọ i diezọ.”

Jihova o you idibo riẹ kpobi, te enọ i diezọ. Oriruo ẹrọwọ gbe ithihakọ rai u bi fiba oghọghọ nọ o rrọ ukoko Jihova. Joma rri inievo mai nọ i diezọ ghaghae.

[Oruvẹ-obotọ]

[Uwoho nọ o rrọ ẹwẹ-obe avọ 31]

Ovuẹ Uvie na o rẹ mai te enọ i diezọ udu nọ a tẹ rọ ẹvẹrẹ obọ rọ t’ẹme ro wuhrẹ ai

[Uwoho nọ o rrọ ẹwẹ-obe avọ 32]

U fo re iwuhrẹ mai e jọ oria nọ inievo mai nọ i diezọ a re jo wo uduotahawọ