Ghọghọ Makọ Evaọ Oke Obẹbẹ
Ghọghọ Makọ Evaọ Oke Obẹbẹ
“Jọ enọ e dhẹgbalọ [Jihova] a ghọghọ, a hẹ so ile aghọghọ ẹsikpobi.”—OL. 5:11.
1, 2. (a) Eware jọ vẹ e be lẹliẹ uye bẹ ahwo nẹnẹ? (b) U te no ebẹbẹ nọ i bi te ahwo-akpọ kpobi no, eware vẹ uvi Ileleikristi a bi thihakọ rai?
IDABOLO nọ e vọ akpọ na nẹnẹ i bi te Isẹri Jihova oma re. Ethube, ẹmo, gbe idabolo efa i kpomahọ ahwo Ọghẹnẹ buobu no. Uvuhu, ẹyao, uwhu, gbe eware wọhọ etọ nọ i bi nuhu gbe ame nọ o bi ku raha eware ahwo e wha uye-oruẹ buobu ze no. Pọl ukọ na ọ ta gba nọ o kere nọ: “Ma riẹ nọ enama na soso i bi dimẹ eva [ọyawọ] usuovo na rifi enẹna.” (Rom 8:22) Ẹsejọ mai ọvo ma re si uye se omobọ mai. Wọhọ Devidi Ovie na, ma rẹ sae ta nọ: “Eyoma mẹ o kie ruru uzou mẹ wọhọ owha ogbẹgbẹdẹ; o gbẹdẹ vi omẹ.”—Ol. 38:4.
2 U te no ebẹbẹ nọ i bi te ahwo-akpọ kpobi no, uvi Ileleikristi a be ruẹ uye fiki Ọghẹnẹ nọ a be gọ. (Luk 14:27) Ẹhẹ, wọhọ epanọ a mukpahe Jesu je kpokpo iei na, ere a bi ru ilele riẹ nẹnẹ. (Mat. 10:22, 23; Jọn 15:20; 16:2) Fikiere, re ma lele Kristi o gwọlọ nọ ma rẹ dawo utho ẹgba mai kpobi ma ve je thihakọ nọ ma be hẹrẹ eghale akpọ ọkpokpọ na.—Mat. 7:13, 14; Luk 13:24.
3. Ẹvẹ ma rọ riẹ nnọ Ileleikristi a re yere uzuazọ uye-oruẹ hẹ re a te ru Ọghẹnẹ eva were?
3 Kọ onana u dhesẹ nọ uvi Ileleikristi a rẹ sae jọ akpọ nana wo evawere he? Kọ uweri ọvo ma rẹ jọ evaọ akpọ nana bẹsenọ urere akpọ na u re te? O rọ vevẹ inọ Jihova ọ gwọlọ re ma wereva nọ ma be hẹrẹ erugba eyaa riẹ na. Ebaibol e jọ eria buobu dhesẹ nọ ahwo Ọghẹnẹ a be wereva. (Se Aizaya 65:13, 14.) Olezi 5:11 o ta nọ: “Jọ enọ e dhẹgbalọ [Jihova] a ghọghọ, a hẹ so ile aghọghọ ẹsikpobi.” Ẹhẹ, ma rẹ sae ghọghọ, wo udu udhedhẹ avọ evevọwẹ evaọ udevie idabolo. Joma rri epanọ Ebaibol na e sai ro fi obọ họ kẹ omai wereva dede nọ ma be ruẹ uye.
Jihova—Ọghẹnẹ Evawere
4. Ẹvẹ o rẹ jọ Ọghẹnẹ oma nọ a tẹ raha uzi riẹ?
4 Joma rehọ oriruo Jihova. Fikinọ ọye họ Ọghẹnẹ Erumeru, ọye o wo ehrugbakpọ na. Oware ovo o kare riẹ hẹ, yọ ababọ amọfa ọ rẹ wereva ghele. Rekọ, dede nọ o wo ogaga thesiwa, ababọ avro o da Jihova nọ ọmọ ẹzi riẹ jọ o veghe uzou je zihe ruọ Setan. O da Ọghẹnẹ re okenọ ikọ-odhiwu efa a kuomagbe Setan wọso. Je roro epanọ o da Ọghẹnẹ te okenọ Adamu avọ Ivi, emama otọakpọ riẹ nọ e mai woma, a kiemu ku ei. No anwọ oke yena ze, emọ rai gbidi gbidi a siọ esuo Jihova no.—Rom 3:23.
5. Eme o da Jihova gaga no?
5 Ọwọsuọ nọ Setan ọ wha ze na o gbẹ rrọ otọ nẹnẹ. Anwọ oware wọhọ ikpe idu ezeza na (6,000), Jihova o muẹrohọ ẹdhọgọ, ozighi, ahwo-okpe, gbe ọfariẹ-ogbe no. (Emu. 6:5, 6, 11, 12) Ofariẹ, ahwo a la riẹ eka no, yọ a ta erue kpahe iẹe no. Makọ uvi idibo riẹ a ru rie eva dha no ẹsejọ. Ebaibol i dhesẹ oriruo otiọye na nọ e ta nọ: “Bro ẹse a wo udu kẹ e eva obọ igbrẹwọ, je ru ei eva dha eva obọ ẹwọ! Kẹse kẹse a jẹ dawo iẹ, a tẹ rariẹ ofu Ọrẹri Izrẹl.” (Ol. 78:40, 41) O rẹ da Jihova gaga nọ ahwo riẹ a te kiuke ku ei. (Jeri. 3:1-10) Eware iyoma e be ginẹ via, yọ e rẹ da Jihova gaga.—Se Aizaya 63:9, 10.
6. Eme Ọghẹnẹ o re ru nọ eware iyoma e tẹ via?
6 Ghele na, edada itieye na i ru Jihova r’abọ muoma ha. Nọ oware nọ u yoma thesiwa o tẹ via, Jihova ọ rẹ j’owọ kpata kpata re ọ kpọ eware vi. Ọ rẹ jẹ ruẹrẹ eware họ re ẹjiroro riẹ o sai rugba evaọ obaro. Fikinọ Jihova ọ rẹ j’owọ nọ eware iyoma e tẹ via, ọ be rọ evawere rẹro ẹkpare kpehru esuo riẹ gbe eghale nọ onana o te wha se enọ e be gọe. (Ol. 104:31) Ẹhẹ, ghelọ eme iyoma nọ a ta kpahe Jihova no, ọ gbẹ rrọ Ọghẹnẹ evawere.—1 Tim. 1:11; Ol. 16:11.
7, 8. Nọ eware e tẹ nya thọ, ẹvẹ ma sae rọ raro kele Jihova?
7 Ginọ uzẹme, ma rẹ sae rehọ oma mai wawo Jihova ha evaọ oghẹrẹ nọ o re ro ku ebẹbẹ họ. Rekọ ma rẹ sae raro kele Jihova nọ ma tẹ rẹriẹ ovao ku idabolo. Ma rẹ sae ginẹ jọ ọkora nọ eware e tẹ nya thọ, rekọ u fo re ma jọ ọkora ribri hi. Fikinọ uwoho Jihova a rọ ma omai, ma wo ẹgba iroro gbe areghẹ, onọ u re fi obọ họ kẹ omai kiẹ ebẹbẹ mai riwi ma vẹ jẹ j’owọ nọ u fo.
8 Oware jọ nọ u re fi obọ họ kẹ omai thihakọ ebẹbẹ uzuazọ họ, ma rẹ riẹ inọ eware jọ e rẹ via nọ ma rẹ sai ru oware ovo kpahe he. Ma tẹ kuvẹ re eware itieye e wha ọkora họ omai oma, e sai mi omai oghọghọ nọ ma hae jọ ukoko na wo. Ma tẹ dawo uthoma mai no re ma ku ẹbẹbẹ na họ, o rẹ mai woma re ma vu ei wa je ru eware nọ e rẹ kẹ omai erere. Oriruo Ebaibol nọ o rrọ obaro na u ti dhesẹ onana via.
O Roja re Ma Dhesẹ Areghẹ
9. Ẹvẹ Hana o ro dhesẹ inọ o wo areghẹ?
9 Rehọ oriruo Hana, oni Samuẹle ọruẹaro na. Okenọ o ri yẹ Samuẹle he ọ jọ ọkora fiki epanọ ọ jẹ kaki yẹ hẹ. Fikinọ ọ jọ ọga, a je sei ẹkoko. Ẹsejọ, Hana ọ jẹ hae jọ ọkora te epanọ ọ rẹ rọ viẹ ọ vẹ jẹ siọ emu ba. (1 Sam. 1:2-7) Ẹdẹjọ nọ Hana o kpohọ aruẹri Jihova, “o tẹ yayiẹ gaga, ọ jẹ lẹ ỌNOWO na avọ oviẹ.” (1 Sam. 1:10) Nọ Hana o horie eva riẹ kẹ Jihova no, Ilai ozerẹ okpehru na ọ tẹ nya bru ei jẹ ta nọ: “Nya avọ udhedhẹ, Ọghẹnẹ Izrẹl ọ kẹ owhẹ ayare ra nọ whọ yare riẹ na.” (1 Sam. 1:17) Evaọ oke nana, Hana ọ ruẹ inọ o ru utho nọ ọ rẹ sai ru kpobi no. Hana o dhesẹ inọ o wo areghẹ. “O te kpo nya e re emu, o gbe mu ovao họ ofa ha.”—1 Sam. 1:18.
10. Uruemu vẹ Pọl o dhesẹ nọ ọ ruẹ nnọ ẹbẹbẹ riẹ ọ sai ti kuhọ họ?
10 Pọl ukọ na omariẹ o dhesẹ inọ o wo areghẹ okenọ uye o jariẹ oma. O wo ẹbẹbẹ jọ nọ o jẹ kẹe idhọvẹ gaga. O se rie “edada eva oma.” (2 Kọr. 12:7) Pọl o ru oware nọ ọ rẹ sai ru kpobi re o si edada nana no, ọ lẹ se Jihova re o si ei no. Bro ẹse Pọl ọ yare Jihova kpahe ẹbẹbẹ riẹ na? Isiasa. Ọrọ avọ isiasa, Ọghẹnẹ ọ ta kẹ Pọl inọ ọ be rehọ edhere igbunu si “edada” riẹ na no ho. Eva e dha Pọl ho, ukpoye ọ rehọ oma riẹ kpobi kẹ egagọ Jihova.—Se 2 Ahwo Kọrint 12:8-10.
11. Ẹvẹ olẹ o sai ro fi obọ họ kẹ omai thihakọ ebẹbẹ?
11 Orọnikọ iriruo nana i bi dhesẹ nọ ma rẹ siọ olẹ ba ha nọ oware jọ o tẹ be kẹ omai uye. (Ol. 86:7) Ukpoye, Ebaibol e ta udu họ omai awọ nọ: “Wha ruawa oware ovo ho; rekọ eva koware koware rọ olẹ gbe olẹ-ayare, te uyere-okẹ he ro ruẹ, nọ iyei epanọ whọ guọlọ kẹ Ọghẹnẹ.” Eme Jihova o re ru kpahe ayare otiọye na? Ebaibol i fibae nọ: “Udhedhẹ Ọghẹnẹ nọ uvi eriariẹ kpobi, ote yọrọ eva gbe iroro rai eva Kristi Jesu.” (Fil. 4:6, 7) Ẹhẹ, ẹsejọ Jihova o re si ẹbẹbẹ mai no ho, rekọ ọ rẹ sae yọrọ iroro mai. Nọ ma tẹ lẹ kpahe ẹbẹbẹ mai no, ma te ruẹ inọ u du fo ho re ma gbẹ ruawa kpahe iẹe.
Wo Evawere Evaọ Eruo Oreva Ọghẹnẹ
12. Fikieme ọkora nọ ohwo ọ rẹ jọ oke krẹkri o rẹ rọ wha enwoma ze?
12 Itẹ 24:10 o ta nọ: “Otẹrọnọ udu u no owhẹ awọ oke uye, yọ ogaga ra utuloho.” Itẹ ọfa o ta nọ: “Eva nọ i wo uweri e rẹ lọhọ ẹzi oma.” (Itẹ 15:13) Udu u no Ileleikristi jọ awọ no te epanọ a ro gbabọ kẹ isase Ebaibol omobọ rai gbe eroro kpahe eme nọ e rrọ Ebaibol. A gbẹ be lẹ elẹ nọ i no udu ze he, a te bi je siomano ibe Ileleikristi efa. U re vevẹ inọ re a jọ ọkora oke krẹkri o rẹ wha enwoma ze.—Itẹ 18:1, 14.
13. Iruẹru vẹ e rẹ k’omai uduotahawọ gbe evawere?
13 Evaọ abọdekọ riẹ, ma tẹ be tẹrovi eghale nọ ma wo no gbe enọ ma ti wo evaọ obaro o rẹ lẹliẹ omai wo evawere evaọ uzuazọ. Devidi o kere nọ: “Mẹ gwọlọ ru orọeva ra, O Ọghẹnẹ mẹ.” (Ol. 40:8) Ma tẹ rẹriẹ ovao ku ebẹbẹ evaọ uzuazọ, u fo ho re ma siọ eware abọ-ẹzi ba. Evaọ uzẹme, iruẹru abọ-ẹzi nọ ma rẹ rọ oma kẹ o rẹ wha omosasọ se omai nọ ma tẹ rọ ọkora. Jihova ọ ta kẹ omai nọ ma rẹ sai wo uvi evawere nọ ma tẹ be hai se Ẹme riẹ kẹse kẹse. (Ol. 1:1, 2; Jem. 1:25) Ma rẹ jọ Ikereakere Efuafo na ruẹ ma vẹ jẹ jọ iwuhrẹ yo “eme ewewere” nọ e rẹ k’omai uduotahawọ gbe evawere.— Itẹ 12:25; 16:24.
14. Imuẹro vẹ Jihova ọ k’omai nọ o be wha evawere s’omai nẹnẹ?
14 Ọghẹnẹ o ru eware buobu no nọ e rẹ k’omai evawere. Esiwo nọ ọ ya eyaa riẹ k’omai na o wha oghọghọ ulogbo s’omai no. (Ol. 13:5) Ma riẹ inọ dede nọ ma wo ebẹbẹ buobu nẹnẹ, Ọghẹnẹ ọ te ghale enọ i bi yoẹme kẹe evaọ obaro. (Se Ọtausiwoma Na 8:12.) Habakuk ọruẹaro na ọ dhesẹ imuẹro nana vevẹ nọ o kere nọ: “Makinọ ure fig o wha ivo họ họ, hayo evaene e mọ ibi hi, Olivi o gbẹ mọ gbe he, idhu i gbe je wo emu hu, nọ erao e te maki whu no uthuru na ọvuọvo ọ gbẹrọ owa erao na ha, [yọ] omẹ rẹ ghọghọ eva ỌNOWO na ghele, mẹ rẹ ghọghọ eva Ọghẹnẹ usiwo mẹ.”—Hab. 3:17, 18.
“Oghọghọ U Te Ahwo nọ ỌNOWO Ọ rọ Ọghẹnẹ Rai!”
15, 16. Fodẹ ekẹ Ọghẹnẹ jọ nọ ma rẹ sae reawere rai nọ ma be hẹrẹ eghale nọ e rrọ obaro tha na.
15 Nọ ma be hẹrẹ eware igbunu nọ e rrọ obaro tha na, Jihova ọ gwọlọ nọ ma reawere eware ezi nọ ọ be k’omai nẹnẹ. Ebaibol e ta nọ: “Mẹ riẹ nọ oware ofa nọ uwoma kẹ [ahwo-akpọ] vi oghọghọ gbe evawerọ nọ a rọ uzuazọ na o rọhọ. O tẹ jẹ rọ okẹ Ọghẹnẹ kẹ ohwo kpobi nọ ọ rẹ re da, je wo evawere eva iruo riẹ.” (Ọtausi. 3:12, 13) Jesu ọ ta nọ ẹkẹ oghọghọ o mae rọ vi emio. Eware ezi nọ ma re ru kẹ ọrivẹ-orọo mai, emọ mai, esẹgbini mai gbe imoni mai e rẹ wha uvi evevọwẹ ze. (Itẹ 3:27) Nọ ma te bi dhesẹ uyoyou kẹ inievo mai evaọ ukoko na, dede ai rehọ jẹ rọ vrẹ rai nọ a te ru omai thọ, o rẹ were Jihova jẹ wha oghọghọ ulogbo se omai. (Gal. 6:10; Kọl. 3:12-14; 1 Pita 4:8, 9) Yọ ma tẹ be rọ oma mai kpobi kẹ iruo odibọgba na, o rẹ wha eghale buobu ze.
16 Eware wọhọ emuọriọ gbe udi-oda nọ Ọtausiwoma Na ọ fodẹ na yọ eware nọ ohwo kpobi ọ rẹ sae reawere rai. Ẹhẹ, ma tẹ make rẹriẹ ovao ku ebẹbẹ, ma rẹ sai wo evawere no eware nọ Jihova ọ k’omai ze. Ofariẹ, erru ọre nọ o re kiediwi, igbehru nọ e rrọ wowoma, emọ erao nọ e be zaharo, gbe eware igbunu efa nọ Ọghẹnẹ ọ ma a rẹ hwa igho fihọ ae he, rekọ e rẹ wha evawere s’omai. Nọ ma bi roro kpahe eware itieye na yọ uyoyou mai kẹ Jihova o be rro keme Ọye ọ kẹ omai eware ezi kpobi.
17. Eme ma re ru re ma sai wo ufuoma no okpẹtu kpobi, kọ bọo oke yena, eme o rẹ sae kẹ omai omosasọ?
17 Ukuhọ riẹ, uyoyou nọ ma wo kẹ Ọghẹnẹ, ẹmeoyo kẹ ijaje riẹ, gbe ẹrọwọ nọ ma re fihọ idhe ẹtanigbo na eye i ti ru omai wo ufuoma no okpẹtu nọ sebaẹgba o wha ze, je wo oghọghọ nọ o rẹ jọ bẹdẹ. (1 Jọn 5:3) Bọo oke oyena, ma wo omosasọ nọ ma rọ riẹ nọ Jihova ọ be ruẹ ebẹbẹ kpobi nọ i bi te omai. Devidi o kere nọ: “Mẹ rẹ te wereva ghọghọ fiki uvi uyoyou ra, keme whọ ruẹ ẹbẹbẹ mẹ, who ghine vuhu uye mẹ na mu,” (Ol. 31:7) Uyoyou nọ Jihova o wo kẹ omai o te wọe siwi omai no ukpokpoma.—Ol. 34:19.
18. Fikieme oghọghọ o jẹ da ahwo Ọghẹnẹ oma fia?
18 Nọ ma be hẹrẹ erugba eyaa riẹ na, jọ ma raro kele Jihova Ọghẹnẹ evawere na. Ajọ ma kẹ awaọruọ uvẹ hẹ re u ru omai whrehe evaọ ẹgọ Ọghẹnẹ. Nọ ebẹbẹ e tẹ roma via, jọ ẹgba iroro gbe areghẹ nọ u w’iruo i fi obọ họ kẹ omai. Jihova o ti fi obọ họ kẹ omai yọrọ iroro mai re ma sai ru oware nọ u fo kpobi re ebẹbẹ e siọ omai ba ewhrehe. Jọ eware iwoma nọ o ru kẹ omai no e k’omai evawere. Ma te wereva otẹrọnọ ma bigba Ọghẹnẹ keme “oghọghọ u [re] te ahwo nọ ỌNOWO ọ rọ Ọghẹnẹ rai!”—Ol. 144:15.
Eme Who Wuhrẹ No?
• Ma tẹ be ruẹ uye, ẹvẹ ma sae rọ raro kele Jihova?
• Ẹvẹ uvi iroro o sai ro fi obọ họ kẹ omai thihakọ uye?
• Ma tẹ rrọ uye, ẹvẹ ma sae rọ wereva evaọ eruo oreva Ọghẹnẹ?
[Enọ Uwuhrẹ]
[Uwoho nọ o rrọ ẹwẹ-obe avọ 16]
Eware iyoma nọ e be via nẹnẹ e be kẹ Jihova uye
[Uwoho nọ o rrọ ẹwẹ-obe avọ 16]
© G.M.B. Akash/Panos Pictures
[Uwoho nọ o rrọ ẹwẹ-obe avọ 18]
Jihova ọ kẹ omai eware nọ e rẹ wha evawere se omai no