Kọ Whọ Sai Kpohọ Obọ Masidonia?

OKENỌ Pọl ukọ na ọ jọ ẹwho nọ a re se Troas evaọ obọ Esia Minor, ọ jọ eviavia ruẹ oware jọ. Ọ ruẹ ọzae Masidonia jọ nọ ọ jẹ lẹe inọ: “Wha nyaze obọ Masẹdonia re wha fiobọhọ kẹ omai.” Nọ Pọl ọ ruẹ eviavia na no, tei te egbẹnya riẹ a tẹ nwane rehọ iẹe inọ ‘Ọghẹnẹ o se rai re a nyai whowho usiuwoma na’ kẹ ahwo Masidonia. Eme o no rie ze? Eva okpẹwho Masidonia jọ nọ a re se Filipai, Lidia avọ uviuwou riẹ a kurẹriẹ. Amọfa evaọ unuakpọ yena a kurẹriẹ re.—Iruẹru 16:9-15.

Isẹri Jihova nẹnẹ a wo oghẹrẹ ọwhọ otiọye na. Ibuobu rai a raha igho obọ rai rọ kwa kpohọ eria nọ a mae jọ gwọlọ etausiuwoma. Wọhọ oriruo, oniọvo-ọmọtẹ nọ a re se Lisa ọ gwọlọ roma kẹ iruo usiuwoma ota na ziezi. Ọ tẹ kwa no Canada kpobọ Kenya. Trevor avọ Emily, enọ e rrọ ahwo Canada re, a tẹ kwa kpobọ Malawi re a wo obọ ziezi evaọ iruo usiuwoma ota na. Nọ Paul avọ Maggie a nwrotọ no iruo egọmeti no, a tẹ rehọ onana wọhọ uvẹ nọ a re ro wo obọ ziezi evaọ egagọ Jihova, a tẹ kwa no England ziọ obọ Africa. Kọ who wo ẹzi omarodheidhe? Kọ whọ sae kwa kpohọ oria nọ a jọ gwọlọ etausiuwoma? Otẹrọ ere, ehri-izi Ebaibol vẹ e rẹ sai fi obọ họ kẹ owhẹ kparobọ?

Kiẹ Udu Ra Riwi

U fo re who roro kpahe oware nọ o be wọ owhẹ gwọlọ jẹ owọ yena. Jesu ọ ta nnọ ujaje nọ o mae rro họ: “Whọ rẹ rehọ eva ra  kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra.” Fikiere, oware nọ o rẹ wọ owhẹ kwa kpohọ ẹkwotọ ọfa họ uyoyou kẹ Ọghẹnẹ gbe obọ nọ whọ gwọlọ fihọ kẹ ahwo kurẹriẹ. Jesu ọ ta haro nọ: “O rọ avivẹ o wọhiẹ e re nọ, You omọfa epanọ who you oma ra.” Uyoyou nọ who wo kẹ erivẹ ra o rẹ wọ owhẹ gwọlọ fi obọ họ kẹ ae. (Mat. 22:36-39; 28:19, 20) Re ohwo ọ ta usiuwoma evaọ ẹkwotọ ọfa o rẹ gwọlọ iruo buobu gbe ẹzi omarodheidhe. Orọnikọ erẹ akpọriọ họ. Uyoyou o rẹ wọ owhẹ. Remco avọ Suzanne nọ a kwa no obọ Netherlands kpobọ Namibia, a ta nọ, “Uyoyou họ oware nọ o lẹliẹ omai rrọ obonẹ.”

Willie, ọnọ ọ rrọ ọsẹro okogho evaọ obọ Namibia, ọ ta nọ: “Enọ e kwa ziọ orẹwho mai na a bi rẹro ho inọ inievo nọ e rrọ obonẹ a te rẹro te ai. A nyaze ti fi obọ họ kẹ omai evaọ iruo usiuwoma ota na.”

Whọ tẹ kiẹ udu ra riwi no, nọ oma ra nọ: ‘Eriariẹ vẹ me wo nọ me ti ro fi obọ họ kẹ ahwo evaọ obonọ mẹ be gwọlọ kwa kpohọ na? Kọ mẹ yọ ọgbodibo nọ o wo ona ziezi? Didi ẹvẹrẹ mẹ rẹ jẹ? Kọ o te were omẹ re me wuhrẹ ẹvẹrẹ ọkpokpọ?’ Rehọ ẹme nana jiroro kugbe uviuwou ra. Ta ẹme na kẹ ekpako ukoko ra. Rehọ ẹme na lẹ se Jihova. Ọkiẹriwo otiọnana o ti fi obọ họ kẹ owhẹ riẹ sọ who gine wo ona gbe ọtamuo nọ whọ sae rọ ta usiuwoma evaọ ẹkwotọ ọfa.—Rri ẹkpẹti na “Kiẹ Oma Ra Riwi.”

 Oria nọ Whọ Sae jọ Ta Usiuwoma

Evaọ eviavia a jọ zizie Pọl kpobọ Masidonia. Nẹnẹ, Jihova ọ be rehọ edhere otiọye na kpọ omai bru ahwo ho. Ghele na ahwo Ọghẹnẹ a be rọ ẹkwoma emagazini nana gbe ebe efa riẹ kpahe eria nọ a jọ gwọlọ etausiuwoma. Kaki kere edẹ eria itieye na fihọ otọ. Whọ gbẹ gwọlọ wuhrẹ ẹvẹrẹ ọkpokpọ họ hayo otẹrọnọ whọ te jọ ẹkwotọ ọkpokpọ na kri hi, roro kpahe ekpohọ oria nọ ahwo a be jọ jẹ ẹvẹrẹ nọ whọ rẹ sae jẹ. Whọ vẹ nọ kpahe epanọ a re ro wo ebe egọmeti nọ e rẹ kẹ owhẹ udu rria orẹwho na, oghẹrẹ nọ a re ro no oria ruọ oria, epanọ ufuoma o rrọ orẹwho na te, epanọ eware e ghare te, gbe epanọ orẹwho na o dhẹ hayo roro te. O rẹ sai fi obọ họ re whọ ta ẹme kugbe enọ e ta usiuwoma no evaọ erẹwho efa. Lẹ se Ọghẹnẹ re o fi obọ họ kẹ owhẹ. Kareghẹhọ inọ “Ẹzi Ẹri ọ whahọ [Pọl avọ egbẹnya riẹ] nọ a jọ [evaọ] Esia ta ẹme na ha.” Dede nọ a daoma re a kpobọ Bithinia, “Ẹzi Jesu ọ rọwo kẹ ae he.” Epọvo na re, o rẹ sae rehọ omoke jọ re whọ tẹ riẹ oria nọ whọ sai jo fi obọ họ ziezi.—Iruẹru 16:6-10.

Ẹsejọhọ whọ jọ udu ra roro ku eria jọ no. Who te wo iroro inọ whọ rẹ ta usiuwoma evaọ orẹwho ọfa, kere se iwou ogha ọrọ Isẹri Jihova nọ e rrọ erẹwho nọ whọ gwọlọ nya. Fodẹ ekwa-iruo nọ who wo whọ vẹ jẹ nọ kpahe eware nọ e rrọ owhẹ udu, wọhọ epanọ eware e ghare te, oghẹrẹ uwou nọ a te sae ruẹ kẹ owhẹ, ẹsipito nọ e riẹ, gbe epanọ o lọhọ te re ohwo ọ ruẹ iruo. Rehọ ileta na kẹ Ogbẹgwae Iruo Ukoko ra. A ti kere ẹkẹ ileta rai a ve vi ivẹ na ovavo kpohọ iwou ogha nọ whọ gwọlọ kere se na. Ileta nọ a te za zihe se owhẹ i ti fi obọ họ kẹ owhẹ riẹ oria nọ a te mae jọ gwọlọ obufihọ ra.

Willie, ọnọ ma fodẹ ẹsejọ na, ọ ta nọ: “Enọ e rẹ mae kparobọ họ enọ e rẹ kaki te orẹwho na, be gwọlọ ẹwho nọ o te mai kiehọ ai oma. Ọzae avọ aye jọ a ruẹ inọ o te jọ bẹbẹ kẹ ae otẹrọnọ a kpohọ oria nọ u siomano. Fikiere a te kpohọ ẹwho ọsese jọ nọ a jọ gwọlọ etausiuwoma, rekọ a te jọ etẹe were eva keme ẹwho na ọ dina rovie aro omojọ.”

Ebẹbẹ nọ E rẹ Sai te Ohwo

Ababọ avro whọ rẹ sae nyaku ebẹbẹ jọ nọ whọ tẹ kwa kpohọ orẹwho ọfa. Lisa nọ ma fodẹ ẹsiẹe na ọ ta nọ: “Whọ rẹ sae jọ goli fiki ahwo nọ whọ nya seba.” Eme o fi obọ họ kẹe? O bigba ahwo ukoko nọ ọ kwa bru na. Ọ gba riẹ mu inọ ọ rẹ riẹ odẹ omomọvo. Re onana o sae lọhọ, ọ rẹ kaki te obọ ewuhrẹ ọ vẹ jẹ raha omoke jọ nọ a te ku ewuhrẹ họ no. Lisa o lele amọfa kpohọ usiuwoma, zizie ahwo ziọ uwou riẹ, o te ti wo egbẹnyusu  ekpokpọ. Ọ ta nọ: “Eware nọ mẹ kwa seba na e d’omẹ hẹ. Jihova ọ ginẹ ghale omẹ no.”

Nọ emọ rai i n’uwou no, Paul avọ Maggie a tẹ kwa no uwou rai nọ a be rria anwọ ikpe 30. Paul ọ ta nọ: “Re ma siobọno ekwakwa mai o lọhọ vi epanọ ma roro. Rekọ re ma kwa siọ imoni mai ba oyehọ oware nọ o jọ bẹbẹ vi epanọ ma roro. Ma viẹ aro wae okenọ ma jọ arupre. O jọ lọlọhọ re ma roro nọ, ‘Nọ oware nọ ma te sai ru hu.’ Rekọ ma rẹro so Jihova. Egbẹnyusu ekpokpọ nọ who re mu o rẹ k’owhẹ ẹgba ruabọhọ iruo na.”

Greg avọ aye riẹ Crystal a kwa no Canada kpobọ Namibia fikinọ Oyibo a rẹ mae jọ orẹwho yena ta. Rekọ uwhremu na a tẹ ruẹ nnọ u ti woma gaga otẹrọnọ a wuhrẹ ẹvẹrẹ ahwo nọ a be rria kugbe na. A ta nọ: “Oyẹlẹ o jẹ hae ruọ omai oma ẹsejọ. Rekọ okenọ ma wuhrẹ ẹvẹrẹ ahwo na no ma te wo otoriẹ uzuazọ nọ ahwo na a bi yeri. Inievo ẹwho na nọ ma sikẹle u fi obọ họ kẹ omai nọ ẹwho na ọ rọ reria omai oma.”

Omaurokpotọ gbe ẹzi unevaze utiọye na o rẹ sai fi obọ họ kẹ inievo ẹwho na re. Jenny ọ kareghẹhọ iviuwou sa-sa nọ e kwa ziọ Ireland, orẹwho nọ ọ jọ whẹro. Ọ ta nọ: “A jẹ whẹtiẹ ahwo h’oma gaga. A ginẹ nyaze ti fi obọ họ, orọnikọ re amọfa a gbodibo kẹ ae he. A vọ avọ ọwhọ gbe evawere te epanọ mẹ rọ gwọlọ kpohọ orẹwho ọfa nya e ta usiuwoma.” Enẹna, Jenny avọ ọzae riẹ a rrọ imishọnare evaọ Gambia.

Eghale Jihova I re “Ru Ohwo họ Ọdafe”

Eware nọ Pọl ọ nyaku evaọ obọ Masidonia a re gbiku rai hi! Nọ ikpe ikpe e vrẹ no, o te kere se inievo nọ e rrọ obọ Filipai nọ: “Me re yere Ọghẹnẹ mẹ ẹsikpobi nọ mẹ kareghẹhọ . . . owhai.”—Fil. 1:3.

Epọvo na oma o jọ Trevor avọ Emily, enọ e jọ Malawi ta usiuwoma taure a te ti zizie ai kpohọ Isukulu Ebaibol ọ Giliad ọrọ Watchtower. Greg avọ Crystal nọ ma fodẹ ẹsejọ na a ta nọ: “Ẹsejọ ma re roro sọ ma ginẹ riẹ oware nọ ma bi ru, rekọ eva e jẹ were omai. Ma tẹ kẹle ohwohwo ziezi jẹ ruẹ nọ Jihova ọ be ghale omai. Oware ofa nọ u woma vi onana nọ ma re ru o rrọ họ.”

Ginọ uzẹme inọ ahwo kpobi a rẹ sae kwa kpohọ orẹwho ọfa ha. O te mai woma kẹ ahwo jọ re a kwa kpohọ ẹwho ọfa nọ a mae jọ gwọlọ etausiuwoma evaọ orẹwho rai na. Amọfa a rẹ sae kwa kpohọ ikoko efa nọ e kẹle oria rai. Oware nọ u wuzou họ re whọ rehọ ẹgba ra kpobi gọ Jihova. (Kọl. 3:23) Eme nana e vẹ te jọ oma ra rugba: “Oghale ỌNOWO na u re ru ohwo họ ọdafe, o re ku enuobro kugbe ei hi.”—Itẹ 10:22.

[Ẹkpẹti/Uwoho nọ e rrọ ẹwẹ-obe avọ 5]

Kiẹ Oma Ra Riwi

Re whọ kiẹ oma ra riwi sọ whọ sae kwa kpohọ orẹwho ọfa, roma totọ ziezi roro kpahe enọ nọ e rrọ obotọ na. Eme nọ e rrọ Uwou-Eroro Na (erọ Oyibo) nọ e vrẹ no e rẹ sai fi obọ họ kẹ owhẹ ru ere.

• Kọ mẹ yọ ohwo nọ o se eware abọ-ẹzi gboja?—“Epanọ Who Re ro Wo Evawere” (October 15, 1997, ẹwẹ-obe avọ 6)

• Kọ mẹ yọ uvi ọgbodibo?—“Epanọ Whọ Rẹ Sai ro Ru Iruo Ọkobaro” (May 15, 1989, ẹwẹ-obe avọ 21)

• Kọ mẹ sae kwa siọ imoni gbe egbẹnyusu mẹ ba?—“Epanọ Whọ Sai ro Ru Iruo Ọghẹnẹ nọ Ẹro Ahwo Ra O te bi Vo Owhẹ” (May 15, 1994, ẹwẹ-obe avọ 28)

• Kọ mẹ sai wuhrẹ ẹvẹrẹ ọkpokpọ?—“Ẹkwa Kpohọ Ukoko Ẹvẹrẹ Ọfa” (March 15, 2006, ẹwẹ-obe avọ 17)

• Kọ me wo ugho nọ mẹ rẹ rọ kwa?—“Kọ Whọ Sae Ta Usiuwoma Evaọ Orẹwho Ọfa?” (October 15, 1999, ẹwẹ-obe avọ 23)

[Uwoho nọ o rrọ ẹwẹ-obe avọ 6]

Omaurokpotọ gbe ẹzi unevaze o rẹ sai fi obọ họ kẹ inievo ẹwho na

[Uwoho nọ o rrọ ẹwẹ-obe avọ 7]

Enọ e kwa ze te ta usiuwoma na ae a be mae kparobọ