Fi Obọ Họ kẹ Emọ Ra Fi Ebẹbẹ Rai Kparobọ

EMỌ mai a wo ebẹbẹ buobu. A rẹriẹ ovao ku ẹzi akpọ omuomu Setan, a te bi je lele “urusio ogena” muabọ. (2 Tim. 2:22; 1 Jọn 5:19) Ofariẹ, fikinọ a be daoma ‘kareghẹhọ ọnọ ọ ma rai,’ enọ e wọso egagọ rai a be rehọ ai se ẹkoko, tube kpokpo ai dede. (Ọtausi. 12:1) Enẹ oniọvo nọ a re se Vincent ọ ta kpahe ebẹbẹ nọ o wo evaọ okenọ ọ jọ uzoge: “Fikinọ mẹ yọ Osẹri, ahwo a jẹ hai kpokpo omẹ ẹsikpobi, jẹ tubẹ gwọlọ omẹ ẹme. Ẹsejọ eware i re yoma te epanọ mẹ rẹ rọ gwọlọ siọ isukulu ba.” *

Ẹbẹbẹ ọfa nọ izoge mai a wo họ isiuru nọ a gwọlọ rọ jọ wọhọ ehwa rai. Enẹ Cathleen, oniọvo-ọmọtẹ nọ ọ rrọ ikpe 16 ọ ta: “O re bẹbẹ re ohwo o wo ohẹriẹ no ehwa riẹ.” Oniọvo-ọmọzae nọ a re se Alan ọ ta nọ: “Ibe emọ-isukulu mẹ a re zizie omẹ  ẹsikpobi re ma gbe kpohọ ore, yọ mẹ ginẹ gwọlọ inọ mẹ rẹ nya.” Izoge na a te je wo isiuru nọ a re ro kuomagbe aruọzaha isukulu, onọ o rẹ sai su kpohọ ekpehre usu. Oniọvo-ọmọtẹ nọ a re se Tanya ọ ta nọ: “Aruọzaha o rẹ were omẹ. Kẹse kẹse iticha mai a jẹ hae ta kẹ omẹ inọ me kuomagbe aruọzaha isukulu na. O jọ bẹbẹ re mẹ se.”

Ẹvẹ whọ sai ro fi obọ họ kẹ emọ ra fi ebẹbẹ rai kparobọ? Jihova ọ ta kẹ esẹgbini inọ a wuhrẹ emọ rai. (Itẹ 22:6; Ẹf. 6:4) Oware nọ esẹgbini nọ e be dhozọ Ọghẹnẹ a gwọlọ kpobi họ epanọ a re ro wuhrẹ emọ rai re a yoẹme kẹ Jihova. (Itẹ 6:20-23) Onana u re fi obọ họ kẹ emọ mugba kẹ ẹzi akpọ nana o tẹ make rọnọ esẹgbini rai a rrọ kugbe ai hi.

O rrọ bẹbẹ kẹ esẹgbini re a ru iruo nọ a rẹ rọ rẹrote emọ rai, yọrọ ae, re a je wo obọ evaọ iruẹru ukoko na. Esẹ hayo ini jọ e riẹ nọ ae ọvo a be yọrọ emọ rai, yọ inievo mai jọ a be rẹriẹ ovao dhe ukpokpoma no obọ erivẹ-orọo rai ze. Ghele na, Jihova ọ gwọlọ inọ esẹgbini a ru uvẹ kẹ oma rai nọ a re ro wuhrẹ je fi obọ họ kẹ emọ rai. Fikiere, eme whọ rẹ sai ru ro fi obọ họ kẹ emọ ra dadamu kẹ otunyẹ ọhwa, edawọ, gbe ukpokpoma nọ a be nyaku kẹdẹ kẹdẹ?

Usu Okpekpe Kugbe Jihova

Orọ ọsosuọ, u fo re izoge na a riẹ inọ Jihova ọ ginẹ rrọ. Fi obọ họ kẹ ae re a ruẹ “ọ nọ a rẹ ruẹ hẹ” na. (Hib. 11:27) Vincent, ọnọ ma fodẹ ẹsejọ na, ọ kareghẹhọ epanọ ọsẹgboni riẹ a ro fi obọ họ kẹe wo emamọ usu kugbe Jihova. Ọ ta nọ: “A wuhrẹ omẹ epanọ olẹ u wuzou te. Mẹ kareghẹhọ inọ okenọ mẹ gbẹ jọ ọmaha, mẹ jẹ hae lẹ se Jihova k’aso k’aso taure me te ti kiẹzẹ. O wọhọ ẹsenọ Jihova ọ rrọ akotọ mẹ.” Kọ whọ be hai lele emọ ra lẹ? Kọ whọ gbẹ gaviezọ kẹ elẹ rai nọ a be hae lẹ  se Jihova? Kọ ugogo eme jọ ọvo a be hae wariẹ ẹsikpobi? Hayo kọ elẹ rai i bi dhesẹ oghẹrẹ nọ a rri Jihova? Wha tẹ be gaviezọ kẹ elẹ rai, wha te riẹ epanọ a kẹle Ọghẹnẹ te no.

Re a wo omaa isase Ebaibol obọ rai yọ edhere ọfa nọ emaha a sai ro sikẹle Jihova. Cathleen, ọnọ ma fodẹ ẹsejọ na, ọ ta nọ: “Ebaibol nọ me se n’oka duoka evaọ oke emaha mẹ u fi obọ họ kẹ omẹ. O k’omẹ udu inọ ahwo a tẹ maki mukpahe omẹ, Jihova ọ rrọ gb’omẹ.” Kọ emọ ra a wo omaa isase Ebaibol omobọ rai?—Ol. 1:1-3; 77:12.

Uzẹme inọ emọ jọ a rẹ kaki fi ohrẹ họ iruo vi efa. Ofariẹ, epanọ a kpako te no o rẹ sai kpomahọ ẹnyaharo rai. Rekọ, ababọ ọkpọvio o rẹ jọ bẹbẹ kẹ emaha re a riẹ Jihova ziezi. Esẹgbini a rẹ rehọ eme Ọghẹnẹ wuhrẹ emọ rai, o vẹ wọhọ ẹsenọ emọ na a bi yo urru Jihova, makọ oria kpobi nọ a rrọ. (Izie. 6:6-9) U fo re emọ ra a rọwo inọ Jihova o you rai.

Lele Emọ Ra Ta Ẹme Ziezi

Ẹmeọta-kugbe yọ obọdẹ edhere ọfa nọ who re ro fi obọ họ kẹ emọ ra. Onana orọnikọ thakpinọ who lele emọ ra t’ẹme hayo gbiku ọvo ho. Ẹsejọ whọ rẹ sae nọ emọ ra enọ whọ vẹ rọ odiri kezọ kẹ iyo rai, a tẹ make kiyo nọ e thọ. Oni jọ nọ o yẹ emezae ivẹ ọ ta nọ: “Mẹ rẹ nọ enọ bẹsenọ mẹ rẹ riẹ oware nọ o rrọ eva rai gbe ebẹbẹ nọ a rẹriẹ ovao ku.” Kọ emọ ra a sae ta nọ whọ be ginẹ kezọ kẹ ae? Tanya, ọnọ ma ta kpahe vẹre na, ọ ta nọ: “Ọsẹgboni mẹ a rẹ ginẹ gaviezọ kẹ omẹ a vẹ jẹ kareghẹhọ eme nọ ma ta. A riẹ edẹ emọ isukulu mẹ. A rẹ nọ omẹ onọ rai, a vẹ jẹ nọ kpahe ẹme jọ nọ ma ta evaọ okejọ nọ u kpemu.” Ezọgaviẹ  gbe ẹkareghẹhọ i wuzou gaga evaọ ẹmeọta-kugbe.

Iviuwou buobu a ruẹ no inọ oke emuore yọ emamọ oke nọ a rẹ rọ ta ẹme kugbe. Vincent ọ ta nọ: “Evaọ uviuwou mẹ, ma rẹ re emu kugbe. O tẹ lọhọ, ọsẹgboni mẹ a rẹ gwọlọ inọ mai kpobi ma jọ oria ọvo re emu. A rẹ kuvẹ hẹ re ma rri etehe-ughe, gaviezọ kẹ irediyo, hayo se obe evaọ oke emuọriọ. Nọ orọnọ eme-ehwẹ ma rẹ ta evaọ oke emuọriọ na, u re fi obọ họ kẹ omẹ kpairoro vrẹ ebẹbẹ nọ mẹ rẹriẹ ovao ku evaọ obọ isukulu.” O fibae nọ: “Fikinọ o reria omẹ oma no re me lele ọsẹgboni mẹ ta ẹme evaọ oke emuọriọ, o rọ lọlọhọ kẹ omẹ re mẹ ta ebẹbẹ mẹ kẹ ae.”

Nọ oma ra nnọ, ‘Evaọ uviuwou mẹ, bro ẹse ma rẹ jọ oria ọvo re emu evaọ ẹkpoka?’ Kọ wha tẹ be jọ oria ọvo re emu, o gbẹ te k’owhẹ uvẹ lele emọ ra ta ẹme ziezi?

Idhesẹvia nọ Wha rẹ Jọ Uwou Ru I re Fi Obọ Họ

Uwuhrẹ Ebaibol Uviuwou nọ a re ru koka koka u re ru ẹmeọta-kugbe lọhọ evaọ uviuwou je fi obọ họ kẹ emaha fi ebẹbẹ kparobọ. Alan, ọnọ ma fodẹ ẹsejọ na, ọ ta nọ: “Ọsẹgboni mẹ a rẹ rehọ oke uwuhrẹ uviuwou na riẹ oware nọ o rrọ omai eva. A jẹ hae rehọ eme nọ i kie kpahe ebẹbẹ mai no ebe ukoko na ze ro ru uwuhrẹ na.” Oni Alan ọ ta nọ: “Ma rẹ rehọ oke uwuhrẹ uviuwou mai jọ ro ru idhesẹvia. Idhesẹvia nana i re fi obọ họ kẹ emọ mai thọ ẹrọwọ rai je dhesẹ eware nọ a rọwo vevẹ kẹ amọfa. Onana u fi obọ họ kẹ ae fi ebẹbẹ nọ i te rai kparobọ.”

Nọ emọ mai a tẹ rẹriẹ ovao ku edawọ, u te he re a siọ oware uyoma jẹ nya vrẹ. U re woma re a sae ta oware nọ uruemu yena o jẹ thọ. U te je fo re a sai dikihẹ ga nọ a te bi se ai ẹkoko fiki egagọ rai. O te jọ bẹbẹ re a dikihẹ ga kẹ edawọ ajokpanọ a rẹ sai  dhesẹ eware nọ a rọwo vevẹ kẹ amọfa. Idhesẹvia nọ wha rẹ jọ obọ uwou ru o rẹ kẹ ae udu ru onana.

Ẹkpẹti nọ ọ rrọ ẹwẹ-obe avọ 18 o wo iriruo buobu nọ a rẹ sai ro ru idhesẹvia evaọ etoke Uwuhrẹ Ebaibol Uviuwou rai. Ru ei wọhọ ẹsenọ emọ a ginẹ nyaku ohwo nọ o bi lele ai vro avro. Evaọ etoke idhesẹvia na, tẹme te iriruo ahwo nọ a fodẹ evaọ Ebaibol nọ i kru edikihẹ rai ghelọ ọwọsuọ. Oghẹrẹ iwuhrẹ itieye na i re fi obọ họ kẹ emọ ra kru ẹrọwọ rai evaọ obọ isukulu gbe eria efa.

Kọ Uwou Ra Yọ Oria Ufuoma?

Kọ uwou ra yọ oria nọ u re si emọ ra urru nọ isukulu e tẹ fa no? Uwou ra o tẹ rrọ oria ufuoma, onana u ti fi obọ họ kẹ emọ ra fi ebẹbẹ kparobọ ẹsikpobi. Oniọvo-ọmọtẹ jọ nọ o bi ru iruo evaọ Ebẹtẹle ọ ta nọ: “Oke nọ mẹ jọ ọmaha, oware jọ nọ u fi obọ họ k’omẹ gaga họ uwou mai o jọ oria ufuoma. Mẹ riẹ inọ eware e tẹ maki yoma gaga evaọ obọ isukulu, me te te obọ uwou yọ ebẹbẹ na kpobi i kuhọ no.” Ẹvẹ uwou ra o rrọ? Kọ uwou ra yọ oria nọ “ofuomuo, eguae-iyoma, [gbe] omohẹriẹ” e da fia, manikọ oria nọ “uyoyou, oghọghọ, [gbe] udhedhẹ” e rrọ? (Gal. 5:19-23) Otẹrọnọ udhedhẹ o rrọ uwou ra ha, kọ whọ be daoma ru oware jọ kpahe iẹe re uwou ra o ruẹse jọ oria ufuoma kẹ emọ ra?

Oware ofa nọ whọ rẹ sai ru kẹ emọ ra họ, who re fi obọ họ kẹ ai mu emamọ egbẹnyusu. Kọ whọ be hai zizie inievo nọ i kru ga evaọ ukoko na re a raha oke kugbe uviuwou ra? Hayo kọ whọ sai zizie ọsẹro ọnyawariẹ hayo inievo efa nọ e rrọ iruo odibọgba oke-kpobi re a te re emu evaọ uwou ra? Kọ whọ riẹ imishọnare jọ hayo oniọvo jọ nọ ọ rrọ Ebẹtẹle ru iruo nọ emọ ra a sai mu ogbẹnyusu kugbe, o tẹ make rọnọ ileta, ekọmputa hayo ifonu a rẹ rọ t’ẹme kugbe ẹsejọ? Usu utioye na o rẹ sai fi obọ họ kẹ emọ ra nya kpọvi ziezi je fi itee abọ-ẹzi họ kẹ oma rai. Dai roro epanọ Timoti o wo erere no usu riẹ kugbe Pọl ukọ na ze. (2 Tim. 1:13; 3:10) Usu okpekpe nana u fi obọ họ kẹ Timoti rehọ eware abọ-ẹzi karo.—1 Kọr. 4:17.

Jiri Emọ Ra

Eva e rẹ were Jihova re ọ ruẹ izoge nọ i bi ru oware nọ u kiehọ ghelọ edawọ nọ e rrọ akpọ Setan. (Ol. 147:11; Itẹ 27:11) Ababọ avro, eva e rẹ were owhẹ re nọ whọ tẹ ruẹ izoge nọ e be jẹ emamọ iroro. (Itẹ 10:1) Jiri emọ ra nọ a tẹ be riẹ ru ziezi. Jihova ọ rrọ emamọ oriruo kẹ esẹgbini. Eva oke ame-ọhọ Jesu, Jihova ọ ta nọ: “Whẹ họ Ọmọ oyoyou mẹ, whọ were omẹ hrọ.” (Mak 1:11) Eme nana e tuduhọ Jesu awọ gaga fi edawọ buobu nọ ọ nyaku kparobọ. Epọvo na re, jọ emọ ra riẹ inọ who you rai, je jiri ai kẹ eware nọ a bi ru.

Uzẹme, o lọhọ họ re whọ thọ emọ ra no edawọ, ukpokpoma, gbe ẹkoko-ose kpobi nọ a te rẹriẹ ovao ku. Ghele na, eware buobu e riẹ nọ whọ rẹ sai ru ro fi obọ họ kẹ ae. Eware vẹ? Fi obọ họ kẹ ae wo usu okpekpe kugbe Jihova. Ru re uwou ra o jọ oria nọ emọ a rẹ jọ ta ẹme nọ ọ rrọ eva rai. Ru re Uwuhrẹ Ebaibol Uviuwou ra u duobọte ebẹbẹ nọ emọ ra a be nyaku, je ru re uwou ra o jọ oria ufuoma. Onana u ti fi obọ họ kẹ emọ ra fi ebẹbẹ rai kparobọ.

[Oruvẹ-obotọ]

[Ẹkpẹti/Uwoho nọ e rrọ ẹwẹ-obe avọ 18]

WHA RU IDHESẸVIA KUGBE EMỌ RAI

Iyero jọ e rrọ obotọ nọ emọ mai a be nyaku. Kọ wha gbẹ rehọ enana jọ ro ru odhesẹvia evaọ oke Uwuhrẹ Ebaibol Uviuwou rai?

▸ Iticha jọ ọ ta kẹ ọmọtẹ ra inọ o kuomagbe aruọzaha jọ evaọ obọ isukulu.

▸ A kẹ ọmọzae ra isigareti nọ o je no isukulu ze.

▸ Emezae jọ a seha kẹ ọmọzae ra inọ a ti kpei a tẹ gbẹ rue riẹ nọ ọ be ta usiuwoma.

▸ Nọ ọmọtẹ ra ọ jẹ ta usiuwoma n’uwou ruọ uwou, ọ tẹ nyaku ibe ọmọ-isukulu riẹ.

▸ A jọ iraro eklase na kpobi nọ ọmọtẹ ra oware nọ o gbe bi ro yere obiala ha.

▸ Ọmọzae jọ ọ be hae rọ ọmọzae ra s’ẹkoko ẹsikpobi fikinọ ọ rrọ Osẹri.

[Uwoho nọ o rrọ ẹwẹ-obe avọ 17]

Kọ emọ ra a wo omaa isase Ebaibol omobọ rai?

[Uwoho nọ o rrọ ẹwẹ-obe avọ 19]

Kọ whọ be hai zizie inievo nọ i kru ga evaọ ukoko na re a raha oke kugbe uviuwou ra?