Fikieme U Je Fo Re Whọ Roma Mudhe Kẹ Jihova?

“Keme evaọ aso nọ ọ vrẹ na ukọ-odhiwu Ọghẹnẹ ọnọ mẹ be gọ na o dikihẹ akotọ mẹ.”—IRUẸRU 27:23.

1. Didi owọ enọ e gwọlọ họ-ame a jẹ no, kọ didi enọ onana o wha ze?

 “FIKI idhe Jesu Kristi, kọ who kurẹriẹ no izieraha ra no jẹ roma mudhe kẹ Jihova no re who ru oreva riẹ?” Onana yọ ovo jọ evaọ usu enọ ivẹ nọ a rẹ nọ enọ e gwọlọ họ-ame okenọ a tẹ kẹ ovuẹ ame-ọhọ no. Fikieme u je fo re Ileleikristi a roma mudhe kẹ Jihova? Didi erere omarọkẹ Ọghẹnẹ o rẹ wha se omai? Fikieme ohwo ọ gbẹ sae rọ gọ Ọghẹnẹ ziezi hi ajokpanọ ọ roma mudhe kẹe? Re ma kiyo enọ yena, u fo re ma kake riẹ oware nọ omarọkẹ o rrọ.

2. Eme u dhesẹ re ohwo ọ roma mudhe kẹ Jihova?

² Eme u dhesẹ re ohwo ọ rehọ oma riẹ mudhe kẹ Ọghẹnẹ? Muẹrohọ epanọ Pọl ukọ na o dhesẹ usu riẹ kugbe Ọghẹnẹ. Evaọ iraro enọ e jọ okọ nọ ọ kẹle ezue no, o se Jihova “Ọghẹnẹ ọnọ mẹ be gọ na.” (Se Iruẹru Ikọ Na 27:22-24.) Jihova họ ọnọ uvi Ileleikristi kpobi a be gọ. Wo ohẹriẹ, akpọ na kpobi “ọ rọ obọ ogaga oyoma na.” (1 Jọn 5:19) Nọ Ileleikristi a tẹ rehọ oma rai mudhe kẹ Jihova no, yọ a zihe ruọ idibo riẹ no. Omarọkẹ otiọye na yọ eyaa nọ ohwo ọ ya kẹ Jihova. Ọ tẹ roma mudhe no, ọ vẹ họ-ame.

3. Eme ame-ọhọ Jesu o dhesẹ, kọ ẹvẹ ilele a rẹ rọ raro kele oriruo riẹ?

³ Jesu o fi oriruo họ otọ k’omai okenọ ọ rọ udu obọ riẹ salọ inọ o re ru oreva Ọghẹnẹ. Fikinọ orẹwho Izrẹl nọ o roma mudhe kẹ Ọghẹnẹ no a jo yẹe, u dhesẹ inọ ọ roma mudhe no eva oni riẹ ze no. Ghele na, ọ họ-ame, oware nọ Uzi na o gba riẹ họ nnọ o re ru hu. Ebaibol i dhesẹ nọ Jesu ọ ta nọ: “[Rri], mẹ ze ti ru o rọ eva ra, O Ọghẹnẹ.” (Hib. 10:7; Luk 3:21) Fikiere ame-ọhọ Jesu u dhesẹ oma nọ ọ rọ kẹ Ọghẹnẹ inọ oreva Ọsẹ riẹ o re ru. Ilele riẹ a be raro kele oriruo riẹ nọ a tẹ họ-ame.  Rekọ ame-ọhọ rai yọ odhesẹvia ẹgbede inọ a roma mudhe kẹ Ọghẹnẹ no evaọ olẹ.

Epanọ Omarọkẹ O rẹ rọ Wha Erere Se Omai

4. Eme usu Devidi avọ Jonatan u wuhrẹ omai kpahe ọtamuo?

⁴ Omarọkẹ Ileleikristi yọ oware nọ u wuzou gaga. Omarọkẹ orọnikọ yọ ọtamuo gheghe nọ imava a ru hu. Rekọ didi erere omarọkẹ o rẹ wha se omai? Re onana o sai vẹ omai ẹro, joma roro kpahe erere nọ o re noi ze nọ imava a te ru ọtamuo. Oriruo jọ họ nọ imava a tẹ rrọ egbẹnyusu. Re whọ sai wo erere no usu ze, who re ru ẹkabọ ra gba evaọ usu na. Whọ rẹ rehọ iẹe wọhọ owha-iruo ra re whọ rẹrote ogbẹnyusu ra. Egbẹnyusu ivẹ nọ e kẹle ohwohwo gaga nọ Ebaibol e ta kpahe họ Devidi avọ Jonatan. A tubẹ riọvọ. (Se 1 Samuẹle 17:57; 18:1, 3.) Dede nọ a rẹ kake ruẹ egbẹnyusu ivẹ nọ e kpekpe te ere he, usu imava o rẹ tọ nọ a tẹ be daoma ru ẹkabọ rai.—Itẹ 17:17; 18:24.

5. Eme ọrigbo o re ru re ọ sae jọ kugbe olori riẹ bẹdẹ bẹdẹ?

⁵ Uzi nọ Ọghẹnẹ ọ rọ kẹ Izrẹl u dhesẹ usu ofa onọ ahwo a jo wo erere fiki ọtamuo nọ a ru. Ọrigbo ọ tẹ gwọlọ inọ o re no uwou olori riẹ hẹ, ọ rẹ sai ru ọtamuo kugbei inọ ọ gwọlọ jọ uwou riẹ bẹdẹ bẹdẹ. Uzi na o ta nọ: “Ọrigbo na ọ tẹ ta vevẹ nọ, ‘Me you olori mẹ, te aye mẹ, gbe emọ mẹ; fikiere me bi kpo ho.’ Kẹsena olori riẹ ọ vẹ rehọ iẹ se Ọghẹnẹ, ọ vẹ rehọ iẹ ze unuwou hayo unuẹthẹ; olori riẹ ọ vẹ rehọ ukẹti zahiẹ eghogho họ iẹ ezọ; ọ vẹ ga ae bẹdẹ bẹdẹ.”—Ọny. 21:5, 6.

6, 7. (a) Didi erere ahwo a re wo nọ a te ru ọtamuo? (b) Kọ eme oyena u dhesẹ kpahe usu mai kugbe Jihova?

⁶ Orọo yọ usu nọ o gwọlọ emamọ ọtamuo. Ọtamuo nana yọ ọnọ a jọ ya eyaa kẹ omọfa, orọnikọ ọnọ a jọ whobọ họ ebe gheghe he. Imava nọ e be rria kugbe gheghe nọ e rọo ho, udu u re kie ai vi hi, yọ ere udu u re kie emọ rai vi hi re. Rekọ fiki Ikereakere na, imava nọ e ginẹ rrọ orọo a rẹ daoma rọ uyoyou ku ebẹbẹ rai họ.—Mat. 19:5, 6; 1 Kọr. 13:7, 8; Hib. 13:4.

⁷ Evaọ oke emọ Izrẹl, ahwo a rẹ whaha ebẹbẹ nọ a te wo ọtamuo kpahe unuigho nọ a rẹ hwa ohwo nọ a rehọ iruo. (Mat. 20:1, 2, 8) Epọvo na o rrọ nẹnẹ. Wọhọ oriruo, ma tẹ be gwọlọ thueki kugbe ohwo jọ hayo ru iruo kẹ ohwo jọ, erere o re noi ze nọ ma te kere oware nọ ma rọwo kugbe fihọ otọ. Fikiere otẹrọnọ ọtamuo o re fi obọ họ evaọ usu, orọo gbe iruo, erere riẹ o rẹ rro viere nọ ma tẹ rehọ oma mai kpobi mudhe kẹ Jihova. Obọnana ma gwọlọ ta kpahe epanọ ahwo evaọ oke anwae a ro wo erere fikinọ a roma mudhe kẹ Jihova Ọghẹnẹ gbe epanọ onana u ro woma vi ọtamuo gheghe.

Irere nọ I te Emọ Izrẹl Fikinọ A Roma Mudhe kẹ Ọghẹnẹ

8. Eme oma nọ Izrẹl o ro mudhe kẹ Ọghẹnẹ u dhesẹ?

⁸ Orẹwho Izrẹl soso a roma mudhe kẹ Jihova okenọ a ya eyaa kẹ Ọghẹnẹ. Jihova o koko i rai họ kẹle Ugbehru Saena, ọ tẹ ta kẹ ae nọ: “Otẹrọnọ wha re ghine yo uru mẹ je koko ọvọ mẹ, wha rẹ te jọ efe-agheghọ rọ kẹ omẹ eva udevie erẹwho na kpobi.” Ahwo na kpobi a tẹ ta nọ: “Onọ ỌNOWO na ọ ta kpobi ma re ruẹ.” (Ọny. 19:4-8) Oma nọ Izrẹl o ro mudhe kẹ Ọghẹnẹ orọnikọ ọtamuo re a ru oware jọ ọvo ho. U ru rai fihọ ahwo Jihova, Jihova ọ tẹ rehọ ae wọhọ “efe-agheghọ” riẹ.

9. Irere vẹ emọ Izrẹl a wo fikinọ a roma mudhe kẹ Ọghẹnẹ?

⁹ Emọ Izrẹl a wo erere fikinọ a roma mudhe  kẹ Jihova. Ọ jẹ ginẹ rẹrote ai wọhọ epanọ emamọ ọsẹ hayo oni ọ rẹ rẹrote ọmọ riẹ. Ọghẹnẹ ọ ta kẹ emọ Izrẹl nọ: “Kọ [ọmọ-unuevie] ọ sae thọ aye ẹro, nọ ọ gbẹ reohrọ ọmọ nọ o no edhede riẹ ze he? O sae thọ enana ẹro dede, rekọ wha sae thọ omẹ ẹro ho.” (Aiz. 49:15) Jihova ọ kẹ rai Uzi na re o kpọ ae, ọ rehọ eruẹaro na kẹ ae uduotahawọ, ọ tẹ jẹ rehọ ikọ-odhiwu riẹ thọ ae. Ọso-ilezi jọ o kere nọ: “O dhesẹ ẹme riẹ kẹ Jekọp, ujaje gbe uzi riẹ rọ kẹ Izrẹl. O ri ru utiona kẹ orẹwho ofa ẹdẹọvo ho.” (Ol. 147:19, 20; se Olezi 34:7, 19; 48:14.) Epanọ Jihova ọ rẹrote Izrẹl nọ ọ roma mudhe kẹe na, ere ọ te rẹrote enọ e roma mudhe kẹe nẹnẹ.

Oware nọ U je Fo re Ma Roma Mudhe kẹ Jihova

10, 11. Kọ a yẹ omai fihọ uviuwou Ọghẹnẹ? Ru ei vẹ.

¹⁰ Ahwo jọ a te bi roro sọ u fo re a roma mudhe jẹ họ-ame, a rẹ sae nọ inọ, ‘Fikieme mẹ gbẹ sae rọ gọ Ọghẹnẹ hẹ ajokpanọ mẹ roma mudhe kẹe?’ Uyo na u re vevẹ nọ ma tẹ riẹ oghẹrẹ edikihẹ nọ ma wo kugbe Ọghẹnẹ. Kareghẹhọ, fiki uzioraha Adamu, a yẹ omai kpobi fihọ otafe uviuwou Ọghẹnẹ. (Rom 3:23; 5:12) Re Ọghẹnẹ o dede omai rehọ fihọ uviuwou riẹ, kiyọ ma rẹ roma mudhe kẹe. Joma ruẹ oware nọ o soriẹ ze.

¹¹ Ọsẹ ọvo ọ rrọ usu mai hi ọnọ ọ rẹ sae kẹ emọ riẹ uzuazọ ebẹdẹ bẹdẹ, onọ Ọghẹnẹ ọ jiroro riẹ. (1 Tim. 6:19) A yẹ omai wọhọ emọ Ọghẹnẹ hẹ keme okenọ ọsẹ gbe oni ọsosuọ mai a raha uzi, te ai te emọ rai kpobi a tẹ hẹrioma no Ọsẹ gbe Ọmemama oyoyou rai. (Wawo Iziewariẹ 32:5.) No anwọ oke yena ze, ahwo-akpọ kpobi a tẹ hẹrioma no uviuwou Jihova.

12. (a) Ẹvẹ ahwo-akpọ nọ e gba ha a sae rọ jọ ahwo uviuwou Ọghẹnẹ? (b) Eme ma re ru re ma tẹ te họ-ame?

¹² Rekọ mai omomọvo ma rẹ sae yare Ọghẹnẹ inọ ọ jẹ omai rehọ wọhọ omọvo idibo riẹ. * Kọ ẹvẹ onana o rẹ sae rọ lọhọ kẹ omai erahaizi? Pọl ukọ na o kere nọ: “Okenọ ma [jọ] ewegrẹ a rọ fiki uwhu ọmọ riẹ kuomaigbe Ọghẹnẹ.” (Rom 5:10) Ma rẹ rọ ame-ọhọ yare Ọghẹnẹ inọ ọ kẹ omai eva efuafo re ọ sae jẹ omai rehọ. (1 Pita 3:21) Rekọ taure ma tẹ te họ-ame, eware jọ e riẹ nọ ma re ru. Ma rẹ daoma riẹ Ọghẹnẹ, fievahọ iẹe, kurẹriẹ, ma ve je nwene oghẹrẹ nọ ma je yeri uzuazọ. (Jọn 17:3; Iruẹru 3:19; Hib. 11:6) Yọ oware ofa o riẹ nọ ma re ru re Ọghẹnẹ ọ tẹ jẹ omai rehọ. Didi oware?

13. Fikieme u ro fo re ohwo ọ roma mudhe kẹ Ọghẹnẹ re ọ sae jọ omọvo uviuwou Riẹ?

¹³ Re ohwo nọ ọ hẹrioma no Ọghẹnẹ ọ sae jọ omọvo uviuwou riẹ nọ ọ jẹrehọ, ọ rẹ ya eyaa kẹ Jihova tao. Re ẹme na o sai vẹ omai ẹro, roro kpahe ọsẹ nọ o dhesẹ isiuru kpahe uzoge nọ o wo ọsẹgboni hi, ọ tẹ gwọlọ inọ ọ rẹ yọrọ ọmọ na wọhọ ọmọ obọ riẹ. A riẹ ọzae na wọhọ emamọ ohwo. Rekọ, taure ọ tẹ rehọ ọmọ na wọhọ ọmọ obọ riẹ, ọ gwọlọ inọ ọmọ na ọ rẹ ya eyaa jọ kẹe. Ọzae na ọ tẹ ta nọ, “Re mẹ rehọ owhẹ wọhọ ọmọ obọ mẹ, mẹ gwọlọ riẹ sọ who ti you omẹ jẹ kẹ omẹ adhẹẹ.” Ọmọ na ọ rẹ ya eyaa na hrọ re ọzae na ọ tẹ te rehọ iẹe fihọ uviuwou riẹ. Kọ oware nọ ọsẹ na ọ gwọlọ na o ga hrọ? Epọvo na re, enọ Jihova ọ rẹ jẹrehọ fihọ uviuwou riẹ họ enọ e rọwo inọ a rẹ roma mudhe kẹe. Ebaibol e ta nọ: “Wha ru oma rai rọ iwẹ  e kpokpọ gbe ọrẹri o nọ Ọghẹnẹ ọ rẹ jẹrehọ.”—Rom 12:1.

Omauromudhe U Dhesẹ Uyoyou gbe Ẹrọwọ

14. Edhere vẹ omauromudhe u ro dhesẹ inọ ma you Ọghẹnẹ?

¹⁴ Re ohwo ọ roma mudhe kẹ Ọghẹnẹ u dhesẹ inọ o gine you Jihova. Evaọ oghẹrẹ jọ, o wọhọ eyaa nọ enọ e be rọo a rẹ ya. Ọzae Oleleikristi o re dhesẹ inọ o you aye na nọ ọ tẹ ya eyaa inọ ọ rẹ jọ kugbei makọ oware nọ o via kpobi. Onana orọnikọ eyaa gheghe he rekọ ọvọ nọ whọ re kugbe ohwo. Ọzae Oleleikristi ọ riẹ inọ tei te aye na a rẹ sae rria kugbe he ajokpanọ ọ riọvọ yena. Epọvo na re, ma gbẹ roma mudhe he, ma rẹ sae jọ ahwo uviuwou Jihova ha. Fikiere, dede nọ ma gba ha, ma rẹ roma mudhe kẹ Ọghẹnẹ keme ma gwọlọ jọ idibo riẹ, ma tẹ jẹ gbaemu inọ ma re yoẹme kẹe, makọ oware nọ o via kpobi.—Mat. 22:37.

15. Ẹvẹ omauromudhe u ro dhesẹ inọ ma fi ẹrọwọ họ Ọghẹnẹ?

¹⁵ Ma tẹ roma mudhe kẹ Ọghẹnẹ, u dhesẹ inọ ma wo ẹrọwọ. Evaọ oghẹrẹ vẹ? Ẹrọwọ nọ ma fihọ Jihova o kẹ omai imuẹro inọ ma te sikẹle Ọghẹnẹ u ti woma kẹ omai. (Ol. 73:28) Ma riẹ inọ orọnikọ ẹsikpobi o te lọhọ họ re ma lele Ọghẹnẹ nya nọ ma be rria udevie ‘oge ọbẹbẹ nọ ọ rẹ barosa ru eyoma na,’ rekọ ma fi eva họ eyaa Ọghẹnẹ inọ o ti fi obọ họ kẹ omai. (Fil. 2:15; 4:13) Ma riẹ inọ ma gba ha, rekọ ma wo imuẹro inọ Jihova ọ te re ohrọ mai nọ eware jọ e tẹ thọ omai obọ. (Se Olezi 103:13, 14; Ahwo Rom 7:21-25.) Ma fievahọ nnọ Jihova ọ te hwosa k’omai otẹrọnọ ma kru ẹgbakiete mai.—Job 27:5.

Omauromudhe kẹ Ọghẹnẹ O rẹ Wha Evawere Ze

16, 17. Fikieme omaromudhe kẹ Jihova o rẹ rọ wha evawere ze?

¹⁶ Omauromudhe kẹ Jihova o rẹ wha evawere ze keme o gwọlọ inọ ma rẹ gbodibo. Jesu ọ fodẹ uzẹme jọ nọ a rẹ vro ho nọ ọ ta nọ: “Ẹkẹ oghale o mae rọ vi emio.” (Iruẹru 20:35) Okenọ Jesu ọ jọ otọakpọ, o wo evawere nọ ẹkẹ ọ rẹ wha ze. Ọ jẹ tubẹ kpairoro vrẹ eriosehọ, emuore, gbe eware omosasọ re ọ sai fi obọ họ kẹ ahwo ruẹ edhere nọ u re su kpohọ uzuazọ. (Jọn 4:34) O rẹ were Jesu re o ru Ọsẹ riẹ eva were. Jesu ọ ta nọ: “Me bi ru eware nọ e be were iẹe kẹse kẹse.”—Jọn 8:29; Itẹ 27:11.

¹⁷ Fikiere, Jesu o dhesẹ kẹ ilele riẹ uzuazọ nọ o rẹ wha evawere ze nọ ọ ta nọ: “Ohwo nọ ọ guọlọ nọ o re lele omẹ, jọ ọ  vro oma riẹ.” (Mat. 16:24) Ere oruo u re si omai kẹle Jihova. Kọ omọfa jọ ọ riẹ ọnọ ma re fi uzuazọ mai họ obọ riẹ, ọnọ ọ te rẹrote omai je you omai te enẹ?

18. Fikieme ẹria te oma nọ ma ro mudhe kẹ Jihova o rẹ rọ wha evawere ze vi oma nọ ma rẹ rọ kẹ oware jọ hayo omọfa?

¹⁸ Omauromudhe kẹ Jihova gbe ẹrria te omauromudhe mai ẹkwoma eruo oreva riẹ o rẹ wha evawere ze vi oma nọ a re ro mudhe kẹ oware hayo ohwo jọ. Wọhọ oriruo, ahwo buobu a rẹ rehọ uzuazọ rai kpobi le efe ababọ uvi evawere gbe evevọwẹ nọ a re wo. Rekọ enọ e roma mudhe kẹ Jihova no a rẹ wereva. (Mat. 6:24) Uvẹ-ọghọ nọ a rọ rrọ enọ “i bi ru iruo kẹ Ọghẹnẹ” o be lẹliẹ eva were ai, ghele na orọnikọ iruo jọ a rehọ oma kẹ hẹ rekọ Ọghẹnẹ mai nọ o wo edẹro. (1 Kọr. 3:9) Ọghẹnẹ họ ọnọ ọ mai wo edẹro kẹ iruo nọ a bi ru. O ti tube zihe enọ e gọ riẹ kpohọ oke uzoge rai re a sai wo erere no ẹruọsa riẹ ze bẹdẹ bẹdẹ.—Job 33:25; se Ahwo Hibru 6:10.

19. Didi uvẹ-ọghọ enọ e roma mudhe kẹ Jihova no a be reawere riẹ?

¹⁹ Omauromudhe kẹ Jihova o rẹ lẹliẹ owhẹ wo usu okpekpe kugbe ei. Ebaibol e ta nọ: “Bigba Ọghẹnẹ o re ti bigba owhẹ.” (Jem. 4:8; Ol. 25:14) Evaọ uzoẹme nọ o rrọ aro na, ma te ta kpahe oware nọ o rẹ lẹliẹ omai rọ ududu jiroro inọ Jihova ma gwọlọ roma mudhe kẹ.

[Oruvẹ-obotọ]

Ẹvẹ Whọ te k’Uyo?

• Eme u dhesẹ re ohwo ọ roma mudhe kẹ Ọghẹnẹ?

• Ẹvẹ omauromudhe kẹ Ọghẹnẹ o rẹ rọ wha erere se omai?

• Fikieme u je fo re Ileleikristi a roma mudhe kẹ Jihova?

[Enọ Uwuhrẹ]

[Uwoho nọ o rrọ ẹwẹ-obe avọ 6]

Ẹria te omarọkẹ mai o rẹ wha evawere ebẹdẹ se omai