Dadamu Wọso Eviẹhọ Setan

‘WHA jọ a viẹ owhai họ họ. Ọghẹnẹ ọ te thọ owhai hi. Wha ruọ abọ mai hayo uye u ti te owhai!’ Ere Rabshakẹ, ọnyukọ Senakerib ovie Asiria ọ ta kẹ ahwo Jerusalẹm. Ogbaẹmo ovie na a wọ ẹmo kpohọ Juda. Ọnyukọ na ọ nabe ma eme riẹ te evaọ edhere nọ u re ro ru udu no ahwo Jerusalẹm awọ re a ruẹsi fi oma hotọ kẹ ai.—2 Iv. 18:28-35.

Ahwo Asiria a geva gaga, yọ a jẹ hae lahiẹ ahwo. A rẹ rọ iku oja nọ a rọ re erigbo rai no fi iguegue họ ewegrẹ rai oma. Wọhọ epanọ ogbiku na Philip Taylor ọ ta, a rẹ rọ “iku olahiẹ imuozọ gbe eviẹhọ nọ a ma te ro fi ewhọloma họ ahwo nọ a mu, jẹ rọ udhesẹ epanọ a geva te ro fi iguegue họ udu ahwo nọ a hae te wọ ohọre bru ai ze.” Eviẹhọ yọ okwakwa-ẹmo nọ u wo ẹgba gaga. Ogbiku na, Taylor ọ ta nọ: “O rẹ raha udu ohwo.”

Ileleikristi uzẹme a rrọ ohọre, “orọnọ uwo gbe azẹ ma bi lele họra na ha, rekọ . . . izi iyoma,” emama ẹzi nọ e wọso Ọghẹnẹ. (Ẹf. 6:12) Ọnọ ọ kobaro evaọ usu izi iyoma nana họ Setan Ẹdhọ na. Ọ be rọ iguegue gbe eviẹhọ ruiruo evaọ ohọre nana.

Setan ọ ta inọ ọ rẹ sae raha ẹgbakiete mai omomọvo. Evaọ edẹ Job, ọ ta kẹ Jihova Ọghẹnẹ nọ: “Eware kpobi nọ ohwo o wo o re ro nwene uzuazọ riẹ.” Otọ ẹme riẹ na họ, a te keke ohwo ba, ujerekrẹ, o re si obọ no ẹgbakiete nọ o wo kẹ Ọghẹnẹ. (Job 2:4) Kọ onana ginọ uzẹme? Kọ mai kpobi ma wo umuo nọ ma re thihakọ ba—nọ ma re ro gbabọkẹ oware nọ ma riẹ nọ u kiehọ re ma ruẹse jọ uzuazọ? Ere Setan ọ gwọlọ nọ ma roro. Fikiere, ọ tẹ be rọ ẹghẹ kọ iroro itieye na fihọ udu mai. Joma kiẹ idhere jọ nọ o bi ro ru onana riwi, jẹ ta kpahe epanọ ma sae rọ dadamu wọso ẹe.

“Otọhọ-Otọ [Rai] O Rọ Eva Uwẹkpẹ”

Setan ọ rọ ẹkwoma Elifaz, omọvo egbẹnyusu esa Job ta inọ ẹrọwọ ohwo-akpọ ọ ga te epanọ o re ro mugba kẹ odawọ họ. Nọ o je dhesẹ ahwo-akpọ wọhọ otu nọ “a be ria iwou ẹkpẹ,” ọ ta kẹ Job nọ: “Otọhọ-otọ [rai] o rọ eva uwẹkpẹ, nọ ehẹhẹ e rẹ raha no, no ohiohiẹ ri te owọwọ yọ e whọlọ [no]! E rẹ raha no riẹriẹ nọ ohwo ọvo o re se ai gbe odẹ oware ovo ho.”—Job 4:19, 20.

A jọ oria ofa Ikereakere na dhesẹ ahwo-akpọ wọhọ “eware nọ a rehọ ẹkpẹ ma”—wọhọ uwho ohẹhẹ. (2 Kọr. 4:7) Ma rrọ hẹhẹhẹ fiki uzioraha gbe sebaẹgba nọ ma reuku riẹ. (Rom 5:12) O tẹ rrọ omoma ogaga mai ọvo, ma re kie kẹ egbefẹ Setan lọlọhọ. Rekọ wọhọ Ileleikristi, ma wo ohwo nọ o bi fi obọ họ kẹ omai. Ghelọ omoyẹlẹ nọ ma wo, Ọghẹnẹ ọ rehọ omai ghaghae. (Aiz. 43:4) Ofariẹ, Jihova ọ rẹ rọ ẹzi ọfuafo riẹ kẹ ahwo nọ a yare riẹ. (Luk 11:13) Ẹzi riẹ ọ rẹ sae kẹ omai “ogaga ulogbo nọ othesiwa,” onọ u re fi obọ họ kẹ omai thihakọ uye kpobi nọ Setan o ro te omai. (2 Kọr. 4:7; Fil. 4:13) Ma te mugba kẹ Ẹdhọ, “dikihẹ ga eva orọwọ,” Ọghẹnẹ ọ te kẹ omai ẹgba dikihẹ kothi. (1 Pita 5:8-10) Fikiere, u fo nọ ma rẹ dhozọ Setan Ẹdhọ họ.

 Ohwo “Ọ Be Da Umuomu Wọhọ Ame”

Elifaz ọ nọ inọ: “Eme ohwo ọ rọ, nọ ọ rẹ rọ jọ fuafo? Hayo nọ ohwo nọ aye o yẹ, ọ rẹ rọ jọ ohwo okiẹrẹe?” Kẹsena ọyeọvo ọ tẹ kẹ uyo inọ: “Ri, Ọghẹnẹ o fievahọ erẹri riẹ ọvuọvo ho, idhiwu na dede e fo evaọ aro riẹ hẹ; kabikọ ohwo ọnyenye ọtọtọ avọ eyoma, ohwo nọ ọ be da umuomu wọhọ ame!” (Job 15:14-16) Elifaz ọ be ta kẹ Job inọ Jihova o re rri uvumọ ohwo kiẹrẹe he. Ẹdhọ ọ rẹ gwọlọ rehọ iroro ethọthọ ruọ omai oma re. Ọ gwọlọ nọ ma ruawa kpahe eware nọ ma ru thọ oke nọ u kpemu, re iroro mai e hai brukpe omai thesiwa, re ma je roro nọ ma rẹ sai wo erọvrẹ hẹ. Ọ tẹ jẹ gwọlọ nọ ma roro inọ oware nọ u kpehru vrẹ omai abọ Jihova ọ gwọlọ mi omai, gbe inọ o wo ohrọ-oriọ, erọvrẹ, gbe obufihọ te epanọ ma bi roro na ha.

Uzẹme, mai kpobi ma “raha uzi re no [ma] gbe te obọ oruaro Ọghẹnẹ hẹ.” Ohwo-akpọ sebaẹgba ọvuọvo ọ riẹ hẹ nọ ọ rẹ sae nyate itee egbagba Jihova ẹrẹrẹ. (Rom 3:23; 7:21-23) Dede na, oyena o nwani dhesẹ hẹ inọ ma fioka ha evaọ aro riẹ. Jihova ọ riẹ nọ “oriọvọ anwae na ọnọ a re se Ukumuomu gbe Setan na” họ ọnọ ọ be gwọlọ rọ ẹkwoma sebaẹgba mai ro fi elọhoma họ omai oma na. (Evia. 12:9, 10) Ọghẹnẹ o bi roro kẹ omai keme ọ riẹ nọ “mai ẹkpẹ gheghe,” o re fi ẹro họ omai gwọlọ ethobọ họ.—Ol. 103:8, 9, 14.

Ma te si obọ no oware uyoma uruo, kurẹriẹ jẹ rọ eva efuafo nya bru Jihova ze, “ọ rẹ te rehọ vrẹ.” (Aiz. 55:7; Ol. 51:17) Ebaibol na e ta inọ izieraha mai e tẹ make “ware wọhọ azẹ, e rẹ te fo wọhọ ukpoiwo.” (Aiz. 1:18) Fikiere, joma gbaemu inọ ma rẹ dadamu oreva Ọghẹnẹ uruo.

Fikinọ a yẹ omai evaọ uzioraha, omodawọ mai ọvo o sai ru omai kiẹrẹe evaọ aro Ọghẹnẹ hẹ. Uzuazọ ogbagba gbe uvẹ uzuazọ ebẹdẹ bẹdẹ nọ Adamu avọ Ivi a ku fiẹ na u wholo omai kpobi. (Rom 6:23) Rekọ fiki uyoyou ulogbo nọ o wo kẹ ahwo-akpọ, Jihova o ru uvẹ fihọ nọ ọ rẹ rọ rehọ izieraha vrẹ omai nọ ma te fi ẹrọwọ họ idhe ẹtanigbo Ọmọ riẹ, Jesu Kristi. (Mat. 20:28; Jọn 3:16) “Aruoriwo” nọ Ọghẹnẹ o wo kẹ omai ọ rro kẹhẹ! (Tait. 2:11) A rẹ sae rọ izieraha vrẹ omai! Kọ fikieme ma jẹ kẹ Setan uvẹ ru omai roro nọ ma sai wo erọvrẹ evaọ obọ Ọghẹnẹ hẹ?

“Rọ Obọ Ra ro Te Enwa Riẹ gbe Oma Riẹ”

Setan ọ ta inọ Job o ti si obọ no ẹrọwọ riẹ nọ ẹyao o te kiei. O seha kẹ Jihova inọ: “Rọ obọ ra ro te enwa riẹ gbe oma riẹ, ọ rẹ te la owhẹ eka eva iraro ra.” (Job 2:5) Avro ọ riẹ  hẹ, eva e te were Ọwegrẹ Ọghẹnẹ otẹrọnọ ọ sai ru omai roro inọ ma fioka oware ovo ho fiki sebaẹgba mai.

Dede, Jihova ọ rẹ siọ omai hi otẹrọnọ oware jọ o wha riẹ ze nọ ma gbẹ be sai ru te epanọ ma je ru vẹre evaọ iruo riẹ hẹ. Wọhọ oriruo, ma rehọ iẹe nọ ogbẹnyusu mai jọ ọ nwoma. Kọ ma rẹ fa usu mai kugbei fikinọ ọ gbẹ be sai ru te epanọ o je ru kẹ omai vẹre he? Vievie! Ma re gbe wo uyoyou kẹe jẹ rẹrotei—maero otẹrọnọ udevie oware nọ o je ru kẹ omai ọ jọ nwoma na. Kọ ma roro nọ Jihova ọ kare ọdawẹ otiọye? Ebaibol e ta nọ: “Ọghẹnẹ ọ kare ọ rọ ẹrẹreokie he nọ iruo rai i re vẹro ho gbe uyoyou nọ owha be rehọ fiki riẹ ruẹ.”—Hib. 6:10.

Ebaibol na e ta kpahe “ayeuku oyogbere jọ,” ẹsejọhọ ọnọ ọ gọ Ọghẹnẹ te ikpe buobu no. Nọ Jesu ọ rue riẹ nọ o bi fi “anini ivẹ” họ “emetehe-okẹ” evaọ etẹmpol, kọ o rri aye na avọ okẹ riẹ kuẹku? O ru ere he, ukpoye o jiri rie nọ o ro ru onọ ẹgba riẹ o mu kpobi evaọ uketha egagọ uzẹme.—Luk 21:1-4.

Ma tẹ yọrọ ẹgbakiete mai, o rẹ sai mu omai ẹro inọ usu mai kugbe Jihova o rẹ gbẹ jọ kothi, ghelọ oware kpobi nọ owho hayo ẹyao nọ sebaẹgba ọ wha ze u re ru omai kẹhẹ. Ọghẹnẹ ọ rẹ siọ otu nọ o wo ẹrọwọ vievie he fikinọ ẹbẹbẹ o kpiri rai abọ họ evaọ egagọ riẹ.—Ol. 71:9, 17, 18.

Jẹ “Etu Usiwo na” Rehọ

Ẹvẹ ma sae rọ thọ oma mai no eviẹhọ Setan? Pọl ukọ na o kere nọ: “Wha kru oma ga eva Ọnowo na gbe eva ogaga eri riẹ. Wha fi ẹgọ-ẹmo Ọghẹnẹ ọsoso họ oma, re wha sai dikihẹ kẹ ereghẹ ukumuomu.” Okwakwa ẹgọ-ẹmo abọ-ẹzi yena jọ họ “etu usiwo na.” (Ẹf. 6:10, 11, 17) Re ma sai mugba kẹ eviẹhọ Setan, o gwọlọ nọ ma rẹ jẹ etu yena rehọ jẹ rehọ iẹi tu. Etu alakpa-ẹmo ọ rẹ thọ uzou riẹ. “Ẹruore usiwo” mai—evaifihọ nọ ma wo inọ eyaa akpọ ọkpokpọ Ọghẹnẹ na e te seba erugba ha—o rẹ thọ omai no eviẹhọ Setan. (1 Tẹs. 5:8) U fo nọ ma re ru ẹruore yena ga jẹ kpokpọ ẹkwoma uwuhrẹ omobọ-ohwo orọ Ikereakere na nọ ma rẹ roma totọ ru.

Job o thihakọ ọwọsuọ omuomu Setan. Ẹrọwọ Job kpahe ẹkparomatha na ọ ga te epanọ iguegue uwhu dede e sai ro whrehe udu riẹ hẹ. Ukpoye, ọ ta kẹ Jihova nọ: ‘Oke kpobi nọ who se, me ti yo kẹ owhẹ; iruo abọ ra i ti si owhẹ urru.’ (Job 14:15) Job ọ hae maki whu dede fikinọ o kru ẹgbakiete riẹ, o wo imuẹro inọ uyoyou nọ Ọghẹnẹ o wo kẹ idibo Riẹ nọ i wo ẹrọwọ o te wọe kpare ai no iwhuowhu ze.

Joma wo ọkpọ evaifihọ itieye na kpahe Ọghẹnẹ uzẹme na re. Jihova ọ rẹ sae ruẹrẹ oware kpobi nọ Setan avọ ikọ-imuomu riẹ a raha ku omai. Kareghẹhọ re inọ Pọl ọ kẹ omai imuẹro nọ: “Ọghẹnẹ avọ ọtẹruo, ọ nọ o re je ẹdawọ nọ ọ ro vi owhẹ o te owhẹ hẹ; rekọ ọ rẹ jọ eva ẹdawọ na ru epanọ owhẹ rẹ rọ va ae abọ, re whọ ruẹse sai thihi-akọ riẹ.”—1 Kọr. 10:13.

[Uwoho nọ o rrọ ẹwẹ-obe avọ 20]

Jihova o rri iruo ẹrọwọ ra ghaghae

[Uwoho nọ o rrọ ẹwẹ-obe avọ 21]

Jẹ etu usiwo na rehọ jẹ rehọ iẹi tu