Enọ Ahwo nọ A s’Ebe

Eme ọ rẹ whae ze nọ ohwo ọ sae rọ wariẹ họ-ame?

Ẹsejọ ohwo nọ ọ họ-ame no ọ sai roro kpemu kpahe ame-ọhọ riẹ, jẹ jiroro inọ a wariẹ họe ame. Wọhọ oriruo, o sae jọnọ evaọ okenọ ọ rọ họ-ame na iruemu iyoma jọ e gbẹ jariẹ obọ nọ amọfa a riẹ hẹ, nọ a rẹ sae rọ fiki rai si ei no ukoko o hae jọnọ ọ họ-ame no anwẹdẹ. Kọ omauromudhe yena o sae ginẹ jọ orọ uzẹme? Omauromudhe riẹ kẹ Jihova o hẹ sae jọ orọ uzẹme o hẹ jọnọ o si obọ no uruemu uyoma na tao. Fikiere, ohwo nọ ọ họ-ame evaọ otọ uyero utioye na ọ sai roro inọ u fo re ọ wariẹ họ-ame.

Kọ ẹvẹ kpahe ohwo nọ ọ lẹlẹ ru oware uyoma jọ nọ a sae rọ rehọ ohwo guẹdhọ nọ ọ họ-ame no? Ma rehọ iẹe nọ ọ ta inọ o wo otoriẹ ame-ọhọ vọvọ evaọ okenọ ọ rọ họ-ame na ha, jẹ ta inọ ọ jọ udu riẹ rehọ oyena wọhọ ame-ọhọ họ. Nọ ekpako na a te bi lele ohwo nọ ọ raha uzi t’ẹme, u fo ho re a ta inọ o wọhọ nọ ame-ọhọ riẹ o wiruo ho, jẹ nọe sọ o gine roro inọ omauromudhe gbe ame-ọhọ riẹ na u kiehọ. Uzẹme riẹ họ, ọ gaviezọ kẹ ovuẹ ame-ọhọ nọ a kẹ no Ikereakere na ze kpahe epanọ ame-ọhọ o wuzou te. O yo inọ “Ee” kẹ enọ omauromudhe gbe ame-ọhọ na, onọ u dhesẹ nọ ọ rọwo fihọ iẹe. Kẹsena, o te nwene iwu riẹ je kpohọ oria ame-ọhọ na, a te duwu ei họ ame. Fikiere, o rrọ gbagba re ma ku ei họ inọ o wo otoriẹ epanọ ame-ọhọ o wuzou te. Fikiere, ekpako na a rẹ rehọ iẹe guẹdhọ epaọ ohwo nọ ọ họ-ame no.

Otẹrọnọ ohwo ọ ta inọ ame-ọhọ riẹ o wiruo ho, ekpako na a rẹ sae vuẹe inọ o se Uwou-Eroro ọ March 1, 1960, ẹwẹ-obe avọ 159 gbe 160, gbe February 15, 1964, ẹwẹ-obe avọ 123 rite 126 (erọ Oyibo), eria nọ a jọ ta ẹme kokodo kpahe ẹme nana. Ame nọ a rẹ wariẹ họ evaọ otọ iyero jọ (wọhọ oriruo, otẹrọnọ ohwo o wo otoriẹ ugogo iwuhrẹ Ebaibol taure ọ tẹ họ-ame he), yọ ẹme omobọ ohwo.

Eme Ileleikristi a re roro kpahe evaọ ẹme ahwo nọ a rẹ gbẹ rria uwou kugbe?

Ohwo kpobi ọ gwọlọ oria nọ ọ rẹ rria. Rekọ nẹnẹ, ahwo buobu a wo oria obọrai nọ a be rria ha. Eware wọhọ ẹbẹbẹ ugho, ẹyao, hayo eware efa e rẹ sae whae ze nọ imoni ohwo, erọ tabọ tabọ hayo erọ ọrivẹ-orọo ohwo a rẹ rọ rria uwou kugbe. Evaọ eria jọ akpọ na, imoni a rẹ nwẹ kuku ubruwou ọvo be rria kugbe, onọ ohwo ọ rẹ jọ ruẹ oria si oma no ho.

O rrọ owha-iruo ukoko Jihova ha re o kẹ okugbe inievo akpọ-soso mai na izi sa-sa kpahe oghẹrẹ ahwo nọ u fo nọ a rẹ rria uwou kugbe. Ma be ta udu họ Ileleikristi awọ inọ a rọ ehri-izi Ikereakere na kiẹriwi sọ oghẹrẹ oria nọ a be rria gbe ahwo nọ a gbẹ rrọ uwou u kiehọ evaọ aro Ọghẹnẹ. Evẹ họ ehri-izi Ikereakere nana jọ?

 Oware nọ ma rẹ mai roro kpahe họ, oghẹrẹ nọ amọfa nọ ma re lele rria evaọ uwou ovona o rẹ sai kpomahọ omai gbe edikihẹ abọ-ẹzi mai. Wọhọ oriruo, oghẹrẹ ahwo vẹ a rrọ? Kọ a be gọ Jihova? Kọ uzuazọ rai o rọwo kugbe ehri-izi Ebaibol? Pọl ukọ na o kere nọ: “Wha jọ a viẹ owhai họhọ: ‘Usu uyoma o rẹ raha uruemu ezi.’”—1 Kọr. 15:33.

Ikereakere na e ta vevẹ inọ Jihova o mukpahe ibruẹhwae gbe igberedia. (Hib. 13:4) Fikiere, ọruẹrẹfihotọ kpobi nọ imava nọ e rrọ erivẹ-orọo ho a re ro kiẹzẹ oria ovona wọhọ ẹsenọ a rrọ ọzae-avọ-aye u kiehọ vievie he evaọ aro Ọghẹnẹ. U kiehọ họ re Oleleikristi ọ rria uwou ovona kugbe ahwo nọ a re gbe-ọfariẹ.

Ofariẹ, Ebaibol e hrẹ ahwo kpobi nọ e gwọlọ wo aruoriwo Ọghẹnẹ inọ a ‘si oma no ọfariẹ-ogbe.’ (1 Kọr. 6:18) Fikiere, o rrọ oware areghẹ re Ileleikristi a whaha ọruẹrẹfihotọ ahwo olele-rria nọ o rẹ sai su ai ruọ ọfariẹ-ogbe. Wọhọ oriruo, roro kpahe ọruẹrẹfihotọ nọ Ileleikristi buobu a re jo kiẹzẹ uwou ovona. Evaọ otọ uyero utioye na, kọ eware nọ a rẹro rai hi nọ i re su kpohọ odawọ e gbẹ sae roma via? Kinọ imava nọ e rrọ erivẹ-orọo ho ọvo a te kiọkọ uwou fikinọ otu edekọ a kpohọ ọvuọ oria rai no? Epọvo na re, oware uyoma o rẹ sai noi ze nọ imava nọ i wo isiuru orọo kpahe ohwohwo a tẹ be rria uwou ovona. O rrọ oware areghẹ re ma whaha oghẹrẹ ọriakugbe otiọye. Ere ọvona, evaọ iwou nọ imishọnare e be rria, u fo re ọzae gbe aye nọ e rrọ imava-orọo ho ọvo a kiọkọ uwou hu.

Yọ u fo gbe he re imava-orọo nọ e fa orọo no a gbẹ rria uwou ovona. Usu okpekpe nọ a wo kugbe vẹre no na o sai su ai kpohọ ọfariẹ-ogbe.—Itẹ 22:3.

Oware ofa jọ nọ u wuzou gaga nọ ma re roro kpahe họ, oghẹrẹ ubiẹro nọ ahwo okegbe mai a ti ro rri omai. Ọriakugbe ahwo sa-sa evaọ uwou ovona, nọ Oleleikristi ọ rẹ sai rri nọ u kiehọ, rekinọ o rẹ lẹliẹ ahwo okegbe rai ninwe họ ai, u fo vievie he. Ma gwọlọ nọ uruemu mai o wha ekela se odẹ Jihova vievie he. Pọl ọ ta nọ: “Wha ru ahwo Ju, hayo e rọ Griki hayo [ukoko] Ọghẹnẹ eva dha ha, wọhọ epanọ mẹ be guọlọ ru ahwo eva wera eva eware kpobi, orọnikọ ewoma oma obọ mẹ hẹ rekọ o rọ amọfa re a ruẹse siwi ai.”—1 Kọr. 10:32, 33.

Re a ru emamọ ọruẹrẹfihotọ oria nọ a rẹ rria gbe oghẹrẹ ahwo nọ a rẹ gbẹ rria uwou o rẹ sae jọ use-abọ ulogbo kẹ ahwo nọ e gwọlọ nya lele itee ikierẹe Jihova. Dede, o gwọlọ nọ Ileleikristi a rẹ ruabọhọ eruo “onọ o rẹ were Ọnowo na.” A rẹ ruẹ nọ oware otọtọ ovo o via evaọ uwou rai hi. (Ẹf. 5:5, 10) Onana o gwọlọ nọ Ileleikristi a rẹ lẹ kẹ ọkpọvio Jihova jẹ daoma kpobi ruẹ nọ a kuvẹ kẹ oware ovo nọ o rẹ wha enwoma ugboma ze hayo raha ẹfuọ uruemu ohwohwo ho, hayo nọ o rẹ wha ekela se odẹ Jihova.