Kọ Whọ Rehọ Jihova Wọhọ Ọsẹ Ra?

‘OLORI, wuhrẹ omai epanọ ma rẹ lẹ.’ Nọ olele Jesu jọ ọ yare oyena, Jesu ọ ta nọ: “Wha te lẹ wha tanọ, Ọsẹ mai ru re a dhẹozọ kẹ odẹ ra.” (Luk 11:1, 2) Jesu ọ hẹ sae rehọ edẹ-ova ilogbo ro se Jihova, wọhọ “Erumeru,” ‘Owuhrẹ Ologbo,’ “Ọnọ ọ ma,” “Ọnọ ọ rọ no oke anwae ze,” gbe ‘Ovie ebẹdẹ bẹdẹ.’ (Emu. 49:25; Aiz. 30:20; 40:28; Dan. 7:9; 1 Tim. 1:17) Ukpoye Jesu o se rie “Ọsẹ.” Fikieme? Ẹsejọhọ fikinọ ọ gwọlọ nọ ma rọ oghẹrẹ nọ ọmọ ọ rẹ rọ omaurokpotọ ta ẹme kẹ ọsẹ riẹ na lẹ se Ọnọ ọ mai kpehru evaọ ehrugbakpọ na.

Rekọ o rrọ bẹbẹ kẹ ahwo jọ re a rehọ Ọghẹnẹ wọhọ Ọsẹ rai. Oleleikristi jọ nọ a re se Atsuko * ọ ta nọ: “Ikpe buobu nọ mẹ họ-ame no, o jọ bẹbẹ kẹ omẹ re me si kẹle Jihova jẹ lẹ sei wọhọ Ọsẹ.” Ọ ta oware nọ o rọ jọ bẹbẹ kẹe inọ, “Ọsẹ nọ o yẹ omẹ ọ whẹtiẹ omẹ họ oma ẹdọvo ho.”

Evaọ edẹ urere ebẹbẹ nana, esẹ buobu a wo ọdawẹ kẹ emọ rai hi. (2 Tim. 3:1, 3) Fikiere, o rrọ oware aghẹruẹ hẹ re ahwo a wo ọkpọ iroro Atsuko na. Rekọ, o rrọ oware omosasọ nọ ma rọ riẹ inọ ma rẹ sae rehọ Jihova wọhọ Ọsẹ oyoyou mai.

Jihova—Ọkokẹ Oyoyou

Re ma sae rehọ Jihova wọhọ Ọsẹ mai, o gwọlọ nọ ma rẹ riẹe ziezi. Jesu ọ ta nọ: “Ohwo ọvuọvo ọ riẹ Ọmọ na ha Ọsẹ [na] ọvo, ohwo ọvuọvo ọ riẹ Ọsẹ na gbe he, Ọmọ [na] ọvo, jegbọ ọnọ Ọmọ na ọ rẹ rehọ iẹ via kẹ.” (Mat. 11:27) Eroro kpahe eme nọ Jesu ọ ta kpahe Ọghẹnẹ uzẹme na yọ edhere obọdẹ nọ ma re ro wuhrẹ oghẹrẹ nọ Jihova ọ rọ rrọ Ọsẹ. Nọ o rrọ ere na, eme Jesu o dhesẹ via kpahe Ọsẹ na?

Jesu o dhesẹ nọ Jihova họ Ọnọ ọ kẹ riẹ uzuazọ, ọ ta nọ: “Mẹ [rrọ uzuazọ] fiki Ọsẹ na.” (Jọn 6:57) Ọsẹ na họ ọnọ ọ kẹ omai uzuazọ re. (Ol. 36:9; Iruẹru 17:28) Eme ọ wọ Jihova kẹ amọfa uzuazọ? Kọ ogbẹrọnọ uyoyou? U fo nọ ma re you Ọsẹ obọ odhiwu mai fiki uzuazọ nọ ọ kẹ omai na.

Edhere nọ ọ mae rro nọ Ọghẹnẹ o ro dhesẹ uyoyou kẹ ahwo-akpọ no họ, okẹ orọ idhe ẹtanigbo Jesu. Ẹtanigbo na u ru rie lọhọ kẹ ahwo-akpọ sebaẹgba nọ a re ro wo usu okpekpe kugbe Jihova ẹkwoma Ọmọ oyoyou riẹ. (Rom 5:12; 1 Jọn 4:9, 10) Yọ Ọsẹ obọ odhiwu mai ọ rrọ Ọnọ o re ru eyaa riẹ gba na, o rẹ sai mu omai ẹro inọ ahwo kpobi nọ i you rie je bi yoẹme kẹe a te reawere “uvẹ oruaro emọ Ọghẹnẹ.”—Rom 8:21.

Ọsẹ obọ odhiwu mai o bi je “ru ọre riẹ vatha” kẹ omai kẹdẹ kẹdẹ. (Mat. 5:45) Fiki oyena, ma rehọ e riẹ nọ ma re du lẹ kẹ ọre taure ọ tẹ va ze he. Rekọ ababọ ọre na ma sae jọ uzuazọ họ. Ofariẹ, Ọsẹ mai yọ Ọkokẹ ologbo nọ ọ riẹ ẹgwọlọ mai makọ taure ma tẹ te yare iẹe. Fikiere, kọ u gbe fo re ma hai roro kpahe je dhesẹ edẹro kẹ oghẹrẹ nọ Ọsẹ obọ odhiwu mai ọ be rọ rẹrote emama riẹ?—Mat. 6:8, 26.

Ọsẹ Mai—Ọthuke nọ Ọ rẹ “Riohrọ”

Eruẹaruẹ Aizaya e kẹ idibo Ọghẹnẹ oke anwae imuẹro inọ: “Makinọ igbehru-itho  na i no no, ikpehru e maki wolo no, yọ uyoyou owhawha mẹ u reti no udevie rai hi, jegbe ọvọ udhedhẹ mẹ ọ rẹ sae no ho, ere ỌNOWO na, ọnọ ọ [be] riohrọ ra ọ tae.” (Aiz. 54:10) Jesu ọ rọ olẹ nọ ọ lẹ evaọ aso urere riẹ evaọ otọakpọ ro fi ẹgba họ onana inọ Jihova ginọ ọthuke nọ ọ rẹ “riohrọ.” Jesu ọ lẹ kpahe ilele riẹ nọ: “Enana erọ eva akpọ na, me bi bru owhẹ tha. Ọsẹ ọrẹri, rehọ [fiki] odẹ ra sẹro enọ whọ kẹ omẹ na.” (Jọn 17:11, 14) Jihova ọ be sẹro jẹ ginẹ thọ ilele Jesu.

Edhere jọ nọ Ọghẹnẹ ọ be rọ thọ omai no eghẹ Setan nẹnẹ họ, emu abọ-ẹzi nọ ọ be rọ ẹkwoma “odibo oruọzewọ, nọ o wo areghẹ” na kẹ omai ẹruoke. (Mat. 24:45) Ẹriọ emu abọ-ẹzi nana nọ ọ rẹ kẹ ẹgba na u wuzou evaọ ẹwhẹhọ “ẹgọ-ẹmo Ọghẹnẹ ọsoso” na. Wọhọ oriruo, roro kpahe “ojese orọwọ” nọ ma “sai ro furie esagba erae imuomu na.” (Ẹf. 6:11, 16) Ẹrọwọ nọ ma re wo o rẹ thọ omai no enwoma abọ-ẹzi, yọ o rẹ kẹ imuẹro inọ ma fi eva họ ọthọwẹ Ọsẹ mai na.

Ẹkiẹriwi oghẹrẹ nọ Jesu o yeri uzuazọ evaọ okenọ ọ jọ otọakpọ u re fi obọ họ kẹ omai wuhrẹ eware efa kpahe ohrọ-oriọ Ọsẹ obọ odhiwu mai. Muẹrohọ iku nọ e rrọ Mak 10:13-16. Ma rẹ jọ etẹe ruẹ ẹme nọ Jesu ọ ta kẹ ilele riẹ inọ: “Jọ emaha esese na i bru omẹ ze.” Nọ emọ na a su wariẹe họ, Jesu o dede i rae họ oma je guọvunu kẹ ae. A gbe du ta ha epanọ eva e were emọ na te! Nọ Jesu ọ ta inọ: ‘Ọnọ ọ ruẹ omẹ ọ ruẹ Ọsẹ na no’ na, u mu omai ẹro inọ Ọghẹnẹ uzẹme na ọ gwọlọ nọ ma bru rie ze ere re.—Jọn 14:9.

Jihova Ọghẹnẹ yọ ehri uyoyou nọ o basa ha. Ọye họ Ọkokẹ gbe Ọthuke nọ o wo ibe he nọ ọ gwọlọ nọ ma si kẹle iẹe. (Jem. 4:8) Fikiere, avro ọ riẹ hẹ, Jihova họ Ọsẹ nọ ọ mai woma kpaobọ!

Irere nọ Ma bi Wo!

Ma re wo irere buobu nọ ma te fi eva họ Jihova wọhọ Ọsẹ obọ odhiwu oyoyou mai nọ o wo ohrọ-oriọ. (Itẹ 3:5, 6) Eva nọ Jesu o fihọ Ọsẹ riẹ o wha erere sei. Jesu ọ vuẹ ilele riẹ nọ: “Mẹ ọvo ọ rọ usu hu, rekọ mẹ avọ Ọsẹ nọ o vi omẹ ze.” (Jọn 8:16) Jesu o wo imuẹro uketha Jihova ẹsikpobi. Wọhọ oriruo, evaọ oke ame-ọhọ riẹ, Ọsẹ na ọ kẹ riẹ imuẹro inọ: “Ọnana họ Ọmọ oyoyou mẹ, ọnọ ọ were omẹ hrọ.” (Mat. 3:15-17) Yọ taure ọ tẹ nwane whu, Jesu o bo nọ: “Ọsẹ, mẹ rehọ ẹzi mẹ họ obọ ra!” (Luk 23:46) Eva nọ Jesu o fihọ Ọsẹ riẹ i whrehe vievie he.

O rẹ sae jọ ere kẹ omai re. Nọ Jihova ọ rrọ gbomai na, ozọ eme ma rẹ dhẹ? (Ol. 118:6) Atsuko, aye nọ ma ta ẹme te no vẹre na, ọ jẹ hae rẹroso omobọ riẹ ọvo evaọ oware kpobi. Kẹsena ọ tẹ te roma totọ se je roro kpahe uzuazọ Jesu gbe odibọgba riẹ, maero usu okpekpe nọ Jesu o wo kugbe Ọsẹ obọ odhiwu riẹ. Eme o no rie ze? Ọ ta nọ: “Mẹ tẹ te riẹ oware nọ u dhesẹ re a wo Ọsẹ jẹ rẹroso ẹe.” O fibae nọ: “Me te ti wo uvi udhedhẹ gbe evawere. Uzẹme, u wo ẹjiroro ọvo nọ ma rẹ rọ ruawa ha.”

Irere efa vẹ ma rẹ sai wo nọ ma tẹ rehọ Jihova wọhọ Ọsẹ mai? O rrọ uruemu emọ re a you esẹgbini rai jẹ gwọlọ ru ai eva were. Fiki uyoyou nọ o wo kẹ Ọsẹ riẹ, Jesu o “ru eware nọ e [rẹ] were iẹe kẹse kẹse.” (Jọn 8:29) Epọvo na re, uyoyou nọ ma wo kẹ Ọsẹ obọ odhiwu mai o rẹ wọ omai jẹ owọ areghẹ jẹ ta ewoma riẹ kẹ ahwo.—Mat. 11:25; Jọn 5:19.

Ọsẹ Mai ‘O Kru Obọze Mai’

Ọsẹ obọ odhiwu mai ọ kẹ omai “ọthuke” no re—ẹzi ọfuafo riẹ. Jesu ọ ta nọ: “O re ti su owhai ruọ uzẹme na kpobi.” (Jọn 14: 15-17; 16:12, 13) Ẹzi ọfuafo Ọghẹnẹ ọ rẹ sai fi obọ họ kẹ omai riẹ Ọsẹ na ziezi. O rẹ sai fi obọ họ kẹ omai “raha eria nọ egae,” koyehọ, orọwọ sa-sa nọ i notọ ze, iwuhrẹ erue, hayo iwuhrẹ ethọthọ, jẹ rọ ere “mu iroro kpobi imu fiki Kristi.” (2 Kọr. 10:4, 5) Fikiere, joma yare Jihova kẹ “ọthuke” na, avọ imuẹro inọ “Ọsẹ obọ odhiwu [mai] ọ rẹ rehọ Ẹzi Ẹri kẹ enọ e yare riẹ.” (Luk 11:13) U te je kiehọ re ma lẹ inọ ẹzi ọfuafo na o fi obọ họ kẹ omai si kẹle Jihova viere.

Nọ ọmaha avọ ọsẹ riẹ a tẹ rrọ usu, udu u re kie ọmọ na vi, ọ rẹ dhozọ họ. Whọ tẹ ginẹ rehọ Jihova wọhọ Ọsẹ ra, eme omosasọ nana e rẹ sai ru udu kie owhẹ vi: “Mẹ, ỌNOWO na Ọghẹnẹ ra, o kru obọze ra na; mẹ họ ọnọ ọ ta kẹ owhẹ [nọ], ‘Ozọ umu owhẹ hẹ, me ti fiobọhọ kẹ owhẹ.’” (Aiz. 41:13) Whọ sai wo uvẹ-ọghọ nọ whọ rẹ rọ “nya lele” Ọghẹnẹ bẹdẹ bẹdẹ. (Mae. 6:8) Ruabọhọ eruo oreva riẹ, whọ te reawere uyoyou riẹ, oghọghọ, gbe ududhomẹno nọ whọ tẹ rehọ Jihova wọhọ Ọsẹ ra.

[Oruvẹ-obotọ]