Rehọ “Ọgbọdọ Ẹzi Na” Ru Iruo Avọ Onaa
Rehọ “Ọgbọdọ Ẹzi Na” Ru Iruo Avọ Onaa
“Rehọ . . . ọgbọdọ Ẹzi na, ọnọ ọrọ ẹme Ọghẹnẹ.”—ẸF. 6:17.
1, 2. Eme ma re ru nọ ma gwọlọ iwhowho-uvie buobu nẹnẹ na?
NỌ JESU ọ ruẹ nọ ohọo abọ-ẹzi u bi kpe ogbotu na, ọ tẹ ta kẹ ilele riẹ nọ: “Ivuẹvu na i ghine bu, rekọ iruiruo e rẹ kakao. Fikiere wha lẹ Olori ivuẹvu na re o vi iruiruo kpobọ ivuẹvu riẹ.” Jesu ọ j’owọ lele ẹme yena. Nọ ọ ta ẹme yena no, “o te se ilele ikpogbivẹ riẹ” o te vi ai re a nyae ta usiuwoma na. (Mat. 9:35-38; 10:1, 5) Uwhremu na, Jesu “ọ tẹ jẹ ha udhe ahwo osa gbe imakpe efa ro mu, o te vi ai imimava” kpohọ iruo evona.—Luk 10:1, 2.
2 Ma gbẹ gwọlọ iwhowho-uvie buobu nẹnẹ re. Ahwo nọ a jọ akpọ-soso ziọ Emu Owọwọ evaọ ukpe 2009 a bu te 18,168,323. Onana o rehọ ima ikpe bu vi unu Isẹri Jihova kpobi. Idhu na e ginẹ ware no kẹ ivuẹvu. (Jọn 4:34, 35) Fikiere, u fo re ma lẹ re a vi iruiruo efa bru omai ze. Rekọ ẹvẹ ma sai ro ru lele ayare yena? Ma rẹ daoma re ma wo onaa ziezi nọ ma be rọ ọwhọ ta usiuwoma je ru ilele na.—Mat. 28:19, 20; Mak 13:10.
3. Ẹvẹ ẹzi Ọghẹnẹ o re ro fi obọ họ kẹ omai jọ egbodibo nọ i wo onaa ziezi?
3 Uzoẹme nọ o vrẹ na u dhesẹ nọ ẹzi ọfuafo na ọ rẹ sai fi obọ họ kẹ omai “rọ aruọwha ta ẹme Ọghẹnẹ.” (Iruẹru 4:31) Ẹzi na ọ sai je fi obọ họ kẹ omai jọ egbodibo nọ i wo onaa. Edhere jọ nọ ma re ro ru onaa mai woma ziezi họ, ma rẹ rehọ Ebaibol na, okwakwa obọdẹ nọ Jihova Ọghẹnẹ ọ kẹ omai na ru iruo ziezi. Ẹkwoma ẹzi ọfuafo na a ro kere iei. (2 Tim. 3:16) Ọghẹnẹ họ ọnọ ọ kẹ ahwo ẹgba kere eme nọ e rrọ eva riẹ. Fikiere, nọ ma tẹ be rọ onaa rehọ Ebaibol na wuhrẹ ahwo evaọ odibọgba na, kiyọ ẹzi ọfuafo na ọ be kpọ omai na. Taure ma tẹ te ta kpahe epanọ ma sai ro ru ere, joma kake ta kpahe epanọ Ebaibol na o wo ẹgba te.
“Ẹme Ọghẹnẹ” O Wo Ẹgba
4. Inwene vẹ Ebaibol na e rẹ sai fi obọ họ kẹ ohwo ru?
4 Ẹme Ọghẹnẹ o wo ẹgba thesiwa! (Hib. 4:12) Evaọ edhere ẹwoho, eme nọ e rrọ Ebaibol na e da viọ ọgbọdọ kpobi, keme i re duwu ruọ ighogho obọ enwa na. Eme Ebaibol e rẹ sai duobọte udu gbe iroro ohwo, e vẹ jẹ fere oghẹrẹ ohwo nọ ọ ginẹ rrọ via. E rẹ sai nwene ohwo. (Se Ahwo Kọlọsi 3:10.) Ẹhẹ, Ẹme Ọghẹnẹ ọ rẹ sai nwene uzuazọ!
5. Idhere vẹ Ebaibol na e sae rọ kpọ omai, kọ eme o re noi ze?
5 Ofariẹ, a rẹ sae jọ oria ọfa ruẹ obọ eme areghẹ nọ e rrọ Ebaibol na ha. Eme nọ e rrọ eva riẹ i re fi obọ họ k’omai yeri emamọ uzuazọ evaọ akpọ ọbẹbẹ nana. Ẹme Ọghẹnẹ ọ rrọ elo kẹ omai, orọnikọ enẹna ọvo ho rekọ te obaro. (Ol. 119:105) O rẹ kpọ omai nọ ma tẹ rẹriẹ ovao dhe ebẹbẹ hayo be jiroro eghẹrẹ egbẹnyusu nọ ma rẹ salọ, ighe nọ ma re riwi, okọ nọ ma rẹ kọ, ẹgọ gbe eware efa. (Ol. 37:25; Itẹ 13:20; Jọn 15:14; 1 Tim. 2:9) Efihiruo ehri-izi Ebaibol u re ru ei lọhọ kẹ omai lele amọfa rria dhedhẹ. (Mat. 7:12; Fil. 2:3, 4) Nọ ẹme Ọghẹnẹ ọ tẹ rrọ elo kẹ obaro mai, u re fi obọ họ kẹ omai riẹ oghẹrẹ nọ iroro nọ ma jẹ enẹna i ti kpomahọ omai evaọ obaro. (1 Tim. 6:9) Ikereakere na e tẹ jẹ ta kpahe eware nọ Ọghẹnẹ o ti ru evaọ obaro, nọ o rẹ lẹliẹ omai koko izi Ọghẹnẹ. (Mat. 6:33; 1 Jọn 2:17, 18) Ohwo nọ o bi koko izi Ebaibol ọ rẹ sai gine yeri emamọ uzuazọ!
6. Ẹvẹ Ebaibol na o wo ẹgba te evaọ ohọre abọ-ẹzi mai?
6 Ofariẹ, roro kpahe oghẹrẹ nọ Ebaibol na o rọ rrọ obọdẹ okwakwa nọ ma re ro fi ẹmo abọ-ẹzi mai. Pọl o se ẹme Ọghẹnẹ “ọgbọdọ Ẹzi na.” (Se Ahwo Ẹfẹsọs 6:12, 17.) A tẹ rehọ ovuẹ Ebaibol na wuhrẹ ahwo ziezi, o rẹ sai si ai no igbo nọ Setan o fi rai họ. Ọgbọdọ nana o bi siwi ahwo orọnikọ o bi kpe ai hi. Kọ u gbe fo re ma daoma rehọ iẹe ru iruo ziezi?
Rehọ Ẹme Ọghẹnẹ Ru Iruo Ziezi
7. Fikieme u ro wuzou re ohwo o wuhrẹ epanọ ọ rẹ rehọ “ọgbọdọ Ẹzi na” ru iruo ziezi?
7 Nọ ọgbaẹmo o te wuhrẹ epanọ ọ rẹ rehọ ekwakwa-ẹmo riẹ họre, ẹsiẹe ọ sae rọ rehọ ae họre ziezi. Epọvo na o gwọlọ re ma sae rehọ “ọgbọdọ Ẹzi na” ru iruo evaọ ohọre abọ-ẹzi mai. Pọl o kere nọ: ‘Dawo oma re whọ sai ru oma ra wọhọ ọnọ Ọghẹnẹ ọ jẹrehọ no, oruiruo ọnọ ọ kare omaovuọ, nọ ọ rẹ yọrọ ẹme uzẹme na ziezi.’—2 Tim. 2:15.
8, 9. Eme o re fi obọ họ kẹ omai wo otoriẹ Ebaibol na? Kẹ oriruo jọ.
8 Eme o re fi obọ họ kẹ omai ‘rehọ Ẹme Ọghẹnẹ ru iruo ziezi’ evaọ odibọgba mai? Re ma sae rehọ Ebaibol na wuhrẹ amọfa ziezi, ma re wo otoriẹ Ebaibol na ziezi tao. Onana o gwọlọ nọ ma te se oria Ebaibol jọ no, ma ve rri eme nọ e wariẹ e riẹ họ. Onana u re fi obọ họ kẹ owhẹ wo otoriẹ oware nọ who se na.
9 Re ma sai wo otoriẹ oria ikere jọ o gwọlọ nọ ma re se eme efa nọ e wariẹ oria ikere na họ. Eme Pọl nọ e rrọ Ahwo Galesha 5:13 yọ oriruo jọ. O kere nọ: “Keme whai, imoni a se [owhai] ze emuyẹ; rekọ wha rehọ ọmuyẹ ru uvẹ kẹ uwo ho, rekọ rehọ fiki uyoyou gba odibo kẹ ohwo ohwo.” Oghẹrẹ emuyẹ vẹ Pọl ọ jẹ t’ẹme kpahe na? Kọ emuyẹ no igbo uzioraha gbe uwhu, igbo iwuhrẹ erue, manikọ oware ofa jọ? Eme efa nọ e wariẹ oria yena họ i dhesẹ nọ Pọl ọ jẹ t’ẹme kpahe emuyẹ nọ ahwo a rrọ fikinọ a ‘ta rai no ekela hayo igbo Uzi na no.’ (Gal. 3:13, 19-24; 4:1-5) Ọ jẹ ta kpahe ufuoma nọ Ileleikristi a wo. Enọ e jẹ ufuoma yena rehọ a rẹ rọ uyoyou gbodibo kẹ ohwohwo. Enọ e kare uyoyou a rẹ gbẹroma jẹ ta amọfa raha.—Gal. 5:15.
10. Re ma wo otoriẹ Ikereakere na gbagba, eme ma rẹ daoma riẹ, kọ ẹvẹ ma sae rọ riẹ eware nana?
10 Eware efa e riẹ nọ i re fi obọ họ kẹ omai wo otoriẹ ẹme nọ ma jọ Ebaibol se. Ma rẹ daoma riẹ ohwo nọ o kere obe Ebaibol yena, okenọ a ro kere iei, gbe otọ uyero nọ a jọ kere iei. U re je woma re whọ riẹ ẹjiroro nọ a ro kere obe na, yọ o tẹ lọhọ, kiẹ kpahe iruemu ahwo, uzuazọ nọ a je yeri gbe egagọ nọ e jariẹ oke oyena. *
11. Eme ma re ru hu nọ ma te bi ru Ikereakere na vẹ kẹ amọfa?
11 Re a ‘yọrọ ẹme uzẹme na ziezi’ u viọ Ikereakere na nọ a rẹ fa otọ rai gbagba ọvo. Ma rẹ rehọ Ebaibol na ta ozọ họ ahwo ẹro ho. Dede nọ ma rẹ sae rehọ Ikereakere na thọ uzẹme na wọhọ epanọ Jesu o ru evaọ okenọ Ẹdhọ ọ dawo iẹe, orọnikọ ma rẹ rehọ iẹe guegue ahwo hayo gbae họ rọwo iwuhrẹ mai hi. (Izie. 6:16; 8:3; 10:20; Mat. 4:4, 7, 10) Ma re fi ohrẹ Pita ukọ na họ iruo nọ ọ ta nnọ: “Jọ eva ra rọ adhẹẹ kẹ Kristi rọ Ọnowo. Kẹse kẹse hẹ thọ-oma vẹra re whọ ta unu ra vevẹ kẹ kohwo kohwo nọ o se owhẹ re who gbe-iku ẹruore nọ ọrọ eva ra kẹe, otẹrọ ere dede, rọ udhedhẹ avọ [omaurokpotọ] ruei.”—1 Pita 3:15.
12, 13. Oghẹrẹ eware vẹ Ebaibol na e rẹ sai fi obọ họ kẹ ohwo siobọno? Kẹ oriruo.
12 Eme Ẹme Ọghẹnẹ ọ rẹ sai ru nọ ma tẹ rehọ iẹe ru iruo ziezi? (Se 2 Ahwo Kọrint 10:4, 5.) O rẹ sae raha “eria nọ egae,” koyehọ, o rẹ fere iwuhrẹ erue via, iruemu iyoma, gbe eriariẹ ifofe ahwo-akpọ. Ma rẹ sae rehọ Ebaibol na raha uwuhrẹ kpobi “nọ umukpahe eriariẹ Ọghẹnẹ” no. Ma rẹ sae jẹ rehọ Ebaibol na fi obọ họ kẹ amọfa nwene iroro rai rọwokugbe uzẹme na.
13 Rehọ oriruo aye jọ nọ ọ be rria obọ India nọ ọ kpako te ikpe 93 no. No emaha riẹ ze ọ rọ rọwo uwuhrẹ ọwariẹyẹ. Nọ ọmọ riẹ nọ ọ rrọ orẹwho ofa o mu Ebaibol họ ewuhrẹ kugbei ẹkwoma ileta nọ a je kere se ohwohwo, aye nana ọ tẹ nwane rọwo eware nọ o je wuhrẹ kpahe Jihova avọ eyaa riẹ. Rekọ, fikinọ ọ rọwo uwuhrẹ ọwariẹyẹ na thesiwa, o kẹ riẹ uye gaga nọ ọmọ riẹ o kere kpahe uyero iwhuowhu na. Ọ ta nọ: “Eme ọ Ebaibol ra na i vẹ omẹ ẹro ho. Egagọ kpobi i wuhrẹ nọ oware jọ o rrọ oma mai na nọ u re whu hu. No emaha ze mẹ rọwo inọ ugboma na u re whu, rekọ a vẹ wariẹ yẹ ohwo na te unuẹse ima eree gbe idu egba ene (8,400,000). Fikieme whọ rẹ rọ vuẹ omẹ nnọ uwuhrẹ nana o gba ha? Kọ enwenọ egagọ na kpobi a bi wuhrẹ thọ?” Kọ “ọgbọdọ Ẹzi na” ọ sai fi obọ họ kẹ ohwo siomano uwuhrẹ utiọye? Nọ ọmọ riẹ ọ rehọ Ikereakere na lele iei ta ẹme te eka jọ no, aye na o te kere nọ: “Obọnana me mu otoriẹ họ ewo no kpahe oware nọ o rẹ via nọ ohwo o te whu. Eva e be were omẹ nọ mẹ rọ riẹ inọ evaọ oke ẹkparomatha na, ma te wariẹ ruẹ iyoyou mai nọ i whu no. Mẹ be lẹ nọ Uvie Ọghẹnẹ o ze kẹle.”
Rọ Ebaibol Ta Ẹme ruọ Ahwo Oma
14. Eme u dhesẹ re ma ta ẹme ruọ amọfa oma?
14 Re ma rehọ Ebaibol na ru iruo avọ onaa orọnikọ ma re se eme jọ no eva riẹ ze ọvo ho. Pọl ọ ta ẹme ruọ ahwo oma, yọ ere ma re ru re. (Se Iruẹru Ikọ Na 19:8, 9; 28:23.) Re a ta ẹme ruọ ohwo oma u dhesẹ nọ ẹme na o re te ohwo na udu. Ọnọ a ta ẹme ruọ oma ọ rẹ rọwo ẹme na te epanọ o re ro fi eva họ iẹe. Nọ ma te bi ru uwuhrẹ Ebaibol jọ vẹ kẹ ohwo re ọ sae rọwo iẹe, yọ ma bi fi obọ họ kẹe re o fi eva họ uwuhrẹ na. Re ma sai ru onana, o gwọlọ nọ ma re ru ohwo na rọwo inọ ẹme nọ ma be ta kẹe na ginọ uzẹme. Ma sai ru onana evaọ idhere nọ e rrọ obotọ na.
15. Eme ma re ru re ahwo a ruẹsi wo adhẹẹ kẹ Ebaibol na?
15 Kpọ iroro ahwo ziọ Ebaibol evaọ oghẹrẹ nọ a sai ro wo adhẹẹ kẹe. Whọ tẹ fodẹ oria Ebaibol jọ, u fo re whọ ta nọ u wuzou gaga re ma riẹ oware nọ Ọghẹnẹ ọ ta kpahe ẹme na. Nọ ohwo na ọ tẹ kpahe ẹme fihọ onọ nọ whọ nọ riẹ no, whọ sae ta nnọ, ‘Joma se kpahe oghẹrẹ nọ Ọghẹnẹ o rri ẹme nana.’ Hayo whọ rẹ sae nọ inọ, ‘Eme Ọghẹnẹ ọ ta kpahe ẹme nana?’ Eme itienana e rẹ lẹliẹ ohwo na riẹ nọ Ọghẹnẹ o wo Ebaibol na, u re je fi obọ họ kẹe wo adhẹẹ kẹ Ebaibol na. Onana o mae roja nọ ma tẹ be ta ẹme kẹ ohwo nọ ọ rọwo Ọghẹnẹ rekọ ọ riẹ Ebaibol ho.—Ol. 19:7-10.
16. Eme o ti fi obọ họ kẹ owhẹ f’otọ Ebaibol na ziezi?
16 Orọnikọ who re se Ebaibol ọvo ho; whọ rẹ f’otọ eria nọ who se. O jọ uruemu Pọl re ‘o dhesẹ jẹ fa otọ’ eware nọ o wuhrẹ. (Iruẹru 17:3) Eme buobu e rẹ sae jọ oria Ebaibol nọ who se na, fikiere u fo re who fiẹgba họ oware nọ whọ rọ fiki riẹ se oria na. Re who ru onana, whọ rẹ sae wariẹ eme nọ i wuzou evaọ oria nọ wha se na hayo whọ rẹ sae nọ enọ nọ i re fi obọ họ kẹ ohwo na vuhu eme nọ i kie kpahe oware nọ wha bi wuhrẹ na. Kọ eme yena who re ru vẹ. Who te ru ere no, who ve dhesẹ kẹ ohwo na epanọ eme na i ro kie kpahe iẹe.
17. Ẹvẹ whọ sae rọ jiroro no Ebaibol ze re ẹme ra o mu ahwo ẹro?
17 Rọ Ikereakere na lele ahwo jiroro evaọ edhere nọ o re ro vẹ ai ẹro. Pọl ọ rehọ ‘ikereakere na jiroro kugbe ahwo’ ziezi evaọ edhere nọ ẹme na ọ rọ daruọ ahwo oma. (Iruẹru 17:2, 4) Wọhọ Pọl, daoma ta ẹme nọ o re te ahwo udu. Daoma “riẹ” oware nọ o rrọ udu ahwo ẹkwoma enọ nọ i re dhesẹ inọ whọ gwọlọ fi obọ họ kae. (Itẹ 20:5) Whaha eme nọ e rẹ da ohwo. Otẹrọnọ ohwo na ọ rọwo ẹme jọ họ, rehọ onaa gbe areghẹ ru ẹme na vẹ. Fodẹ eware nọ e rẹ lẹliẹ ẹme na mu ohwo na ẹro. Jọ eme ra i no Ebaibol ze. O rẹ mai woma re who se oria Ebaibol ọvo je ru ei vẹ ziezi ukpenọ who re se eria buobu. Enana kpobi e te lẹliẹ ẹme ra “dhẹruọ ahwo oma.” (Itẹ 16:23) Ẹsejọ, o sai woma re ma ru ekiakiẹ re ma kẹ ohwo na evuẹ efa. O gwọlọ nọ a re ru ei vẹ kẹ aye nọ ọ rrọ ikpe 93 nọ ma fodẹ ẹsiẹe na oware nọ o be lẹliẹ enwenọ ichọche kpobi wuhrẹ inọ ẹwẹ (hayo ẹzi na) o re whu hu. Oware nọ u fi obọ họ kẹ aye na rọwo ẹme nọ Ebaibol e ta kpahe uwuhrẹ nana họ, nọ a dhesẹ obonọ uwuhrẹ na u noze kẹe gbe epanọ o rọ daruọ enwenọ egagọ kpobi. *
Gbẹ Hae Rọ Ebaibol na Ru Iruo avọ Onaa
18, 19. Fikieme ma jẹ rọ “ọgbọdọ Ẹzi na” ru iruo ziezi?
18 Ebaibol e ta nọ: ‘Uyero akpọ na u bi nwene.’ Ahwo muomu a bi no eyoma ruọ onọ o mai yoma. (1 Kọr. 7:31; 2 Tim. 3:13) Fikiere o roja re ma gbẹ hae rehọ “ọgbọdọ Ẹzi na, ọnọ ọrọ ẹme Ọghẹnẹ” rọ raha “eria nọ egae.”
19 Eva e be were omai gaga nọ ma ro wo Ebaibol na, nọ ma be jẹ rọ rehọ iẹe fere iwuhrẹ erue via je fi obọ họ kẹ enọ i wo udu-oruọzewọ. Uruemu hayo uwuhrẹ ovo o riẹ hẹ nọ ma rẹ sae rehọ Ebaibol na fi kparobọ họ. Fikiere joma dawo utho ẹgba mai kpobi re ma rehọ “ọgbọdọ Ẹzi na” ru iruo ziezi evaọ iruo usiuwoma ota nọ Ọghẹnẹ ọ kẹ omai na.
[Oruvẹ-obotọ]
^ edhe-ẹme 10 Ebe jọ nọ i re fi obọ kẹ ohwo wo otoriẹ Ebaibol họ “All Scripture Is Inspired of God and Beneficial,” Insight on the Scriptures, gbe izoẹme wọhọ “Ẹme Jihova Ọ Rrọ Uzuazọ,” evaọ Uwou-Eroro Na.
^ edhe-ẹme 17 Rri ibroshọ na, Eme Ọ rẹ Via k’Omai Okenọ Ma te Whu? ẹwẹ-obe avọ 5-6.
Eme Who Wuhrẹ?
• Ẹvẹ Ẹme Ọghẹnẹ o wo ẹgba te?
• Ẹvẹ ma sae rọ rehọ ‘ẹme uzẹme na ru iruo ziezi’?
• Ẹvẹ eme Ebaibol na e sae rọ raha “eria nọ egae”?
• Eme ma re ru re ẹme mai ọ sae daruọ ahwo oma?
[Enọ Uwuhrẹ]
[Ẹkpẹti/Uwoho nọ e rrọ ẹwẹ-obe avọ 12]
Epanọ Ma Sae rọ Rehọ Ebaibol Ru Iruo Ziezi
▪ Ru re ahwo a wo adhẹẹ kẹ Ebaibol na
▪ F’otọ Ikereakere nọ who se
▪ Rọ Ikereakere na lele ahwo jiroro re o sai vẹ ai ẹro
[Uwoho nọ o rrọ ẹwẹ-obe avọ 11]
Wuhrẹ epanọ whọ rẹ rọ rehọ “ọgbọdọ Ẹzi na” ru iruo ziezi