Wha Jọ Eva Ẹzi Nya Re Wha Sae Rria Te Eyaa Omauromudhe rai

“Wha jọ eva Ẹzi nya, wha gbẹ sae ti ru urusio uwo gba ha.”—GAL. 5:16.

1. Didi eghẹrẹ ame-ọhọ ahwo a họ evaọ ẹdẹ Pẹntikọst?

 ILELE Jesu a jẹ evẹravẹrẹ evaọ ẹdẹ Pẹntikọst ọrọ 33 C.E. nọ a rehọ ẹzi ọfuafo na họ ae ame no. Onana yọ odhesẹvia okẹ orọ ẹzi ọfuafo na. (1 Kọr. 12:4-10) Ẹvẹ okẹ evẹravẹrẹ na gbe eme Pita i kpomahọ ogbotu na? Ikere na e ta nọ o da rai te ẹzi. A te kurẹriẹ jẹ họ-ame wọhọ epanọ Pita ọ ta kẹ ae. Ikere na e ta nọ: “A tẹ ze họ enọ e rehọ eme riẹ ame, ahwo nọ a kuomagbe ai ẹdẹọyena a te idu ahwo esa.” (Iruẹru 2:22, 36-41) Wọhọ epanọ Jesu ọ ta, u muẹro nnọ a họ ahwo nana ame no evaọ odẹ Ọsẹ, Ọmọ, gbe ẹzi ọfuafo na.—Mat. 28:19.

2, 3. (a) Dhesẹ ohẹriẹ nọ o rrọ ẹzi ọfuafo nọ a rẹ rọ họ ohwo ame avọ ame-ọhọ evaọ odẹ ẹzi ọfuafo na. (b) Fikieme u ro fo re Ileleikristi kpobi a họ-ame?

² Kọ ohẹriẹ jọ o rrọ ẹzi ọfuafo na nọ a rẹ rọ họ ohwo ame avọ ame-ọhọ evaọ odẹ ẹzi ọfuafo na? Ee. Enọ a rọ ẹzi ọfuafo na họ-ame  họ enọ a rọ ẹzi wholo re a jọ emọ Ọghẹnẹ. (Jọn 3:3) A rọ ẹzi wholo ai re a te jọ ivie gbe izerẹ evaọ Uvie obọ odhiwu, a tẹ jẹ rọ abọjọ ugboma Kristi. (1 Kọr. 12:13; Gal. 3:27; Evia. 20:6) Fikiere, ẹzi ọfuafo na nọ a rẹ rọ họ ahwo ame na yọ oware nọ Jihova o muhọ eruo anwọ ẹdẹ Pẹntikọst ze nọ o muọ enọ i ti lele Kristi su họ ẹsalọ. (Rom 8:15-17) Kọ ẹvẹ kpahe ame-ọhọ evaọ odẹ ẹzi ọfuafo na, nọ a be hai ru kẹse kẹse evaọ ikokohọ Isẹri Jihova nẹnẹ?

³ Ame-ọhọ yọ owọ nọ Ileleikristi a rẹ jẹ ro dhesẹ nọ a rehọ oma rai kpobi kẹ Jihova Ọghẹnẹ no. Enọ i ti kpobọ odhiwu a rẹ họ-ame. Rekọ ima ahwo buobu nẹnẹ nọ i wo ẹruore ẹria bẹdẹ bẹdẹ evaọ otọakpọ a rẹ họ-ame re. Te ikpodhiwu gbe enọ e te rọ otọakpọ na reuku a rẹ họ-ame hrọ evaọ odẹ Ọsẹ, gbe Ọmọ gbe Ẹzi Ẹri re Ọghẹnẹ ọ sae jẹ ae rehọ. Ileleikristi kpobi nọ e họ-ame evaọ oghẹrẹ otiọna a rẹ “jọ eva Ẹzi nya.” (Se Ahwo Galesha 5:16.) Kọ whọ be jọ eva ẹzi nya re whọ sae rria te eyaa omauromudhe ra?

Eme U Dhesẹ re A “Jọ Eva Ẹzi Nya”

4. Eme u dhesẹ re a “jọ eva Ẹzi nya”?

⁴ Re whọ “jọ eva Ẹzi nya” o gwọlọ nọ whọ rẹ kẹ ẹzi ọfuafo na uvẹ re ọ kpọ owhẹ. U dhesẹ nọ ẹzi ọfuafo na ọ rẹ kpọ owhẹ evaọ eware kpobi nọ who bi ru. Ahwo Galesha uzou avọ 5 u dhesẹ ohẹriẹ nọ o rọ ohwo nọ ẹzi ọfuafo ọ be kpọ gbe ọnọ o bi ru lele urusio uwo.—Se Ahwo Galesha 5:17, 18.

5. Eware vẹ who re siomano nọ ẹzi ọfuafo ọ tẹ be kpọ owhẹ?

⁵ Ẹzi ọfuafo ọ tẹ be kpọ owhẹ, whọ rẹ daoma whaha iruo iwo. Iruo iwo e kẹre te eware wọhọ “ogberẹ-obro, egbegbe, ẹnwae-obro, urusio, edhọegọ, enua, [egrẹọjẹ], eme-ivẹ-eta, omaoya, [ihri-eriọ] ofuomuo, eguae-iyoma, omohẹriẹ, ewuhrẹ-erue, ẹro-oyoma, ọgba edada, eha-iyoma.” (Gal. 5:19-21) O wọhọ ẹsenọ whọ “rọ fiki Ẹzi kpe iruẹru uwo” na no. (Rom 8:5, 13) Onana u re fi obọ họ kẹ owhẹ tẹrovi eware abọ-ẹzi, jẹ kuvẹ re ẹzi ọfuafo na ọ kpọ owhẹ, ukpenọ isiuru iwo e rẹ kpọ owhẹ.

6. Fodẹ oriruo jọ ro dhesẹ oware nọ o gwọlọ re ma sae mọ ubi ẹzi na?

⁶ Ẹzi ọfuafo ọ tẹ rọ owhẹ oma, whọ rẹ jọ uzuazọ ra dhesẹ uruemu-ezi ohwo Ọghẹnẹ, koyehọ “ubi Ẹzi” na. (Gal. 5:22, 23) Rekọ whọ riẹ inọ onana o gwọlọ omodawọ. Wọhọ oriruo: Ọwhẹrẹ o re kporo udhu riẹ. Rekọ ababọ elo-ọre gbe oso, ekakọ riẹ i re woma ha. Ma rẹ sae rehọ ẹzi ọfuafo na ro dhesẹ elo-ọre. O gwọlọ ẹzi ọfuafo na re ma sae mọ ibi ẹzi na. Ghele na, otẹrọnọ ọwhẹrẹ na o gbe kporo udhu hu, ekakọ na i re mu dhẹ ze he. (Itẹ 10:4) Ẹhẹ, epanọ whọ ruẹrẹ udu ra họ te u re dhesẹ epanọ ẹzi ọfuafo na ọ rẹ mọ ibi te evaọ oma ra. Fikiere, nọ oma ra nọ, ‘Kọ mẹ be kẹ ẹzi ọfuafo na uvẹ re ọ jọ oma mẹ mọ ibi?’

7. Fikieme uwuhrẹ Ebaibol gbe eroro-didi i ro wuzou whọ tẹ gwọlọ wo ibi ẹzi na?

 ⁷ Ọwhẹrẹ ọ tẹ gwọlọ inọ ekakọ riẹ e rẹ mọ ziezi, o re ku ame ku ai. Epọvo na, re whọ sae mọ ubi ẹzi na, whọ gwọlọ iwuhrẹ Ebaibol na, enọ e wọhọ ame nọ ma jọ ukoko na wo nẹnẹ. (Aiz. 55:1) Ẹsejọhọ whọ ta kẹ ahwo buobu no inọ ẹkwoma ẹzi ọfuafo na a ro kere Ebaibol na. (2 Tim. 3:16) Ofariẹ, ọrigbo nọ o wo ẹrọwọ avọ areghẹ na o bi fi obọ họ kẹ omai wo eriariẹ egbagba erọ Ebaibol na. (Mat. 24:45-47) Ẹme na ọ rrọ vevẹ. Re ẹzi ọfuafo na ọ sae jọ oma mai ru iruo ziezi, ma re se Ebaibol na je roro didi kpahe eme nọ ma se. Who te bi ru ere, yọ whọ be raro kele emamọ oriruo eruẹaro na enọ ‘e gwọlọ, jẹ n’ekpẹ’ eme nọ a kere na. Makọ ikọ-odhiwu dede a wo isiuru gaga kpahe eme nọ Ebaibol e ta kpahe Ubi nọ a ya eyaa riẹ na gbe ukoko Ileleikristi nọ a wholo na.—Se 1 Pita 1:10-12.

Ẹvẹ Ẹzi na Ọ Sae rọ Jọ Oma Ra Ru Iruo?

8. Fikieme o rọ r’oja re whọ yare Jihova kẹ ẹzi riẹ?

⁸ Orọnikọ thakpinọ who wuhrẹ Ebaibol je roro-didi kpahe eme nọ who se ọvo ho. Whọ rẹ yare obufihọ gbe ọkpọvio Jihova ẹsikpobi. Ọ rẹ sai ru “eware ilogbo buobu vi enọ ma [yare].” (Ẹf. 3:20; Luk 11:13) Rekọ eme whọ rẹ ta otẹrọnọ ohwo jọ ọ nọ owhẹ nọ, “Fikieme mẹ rẹ rọ yare Ọghẹnẹ otẹrọnọ ‘ọ riẹ eware nọ mẹ gwọlọ no re mẹ tẹ te yare’?” (Mat. 6:8) Whọ tẹ be yare Ọghẹnẹ inọ ọ kẹ owhẹ ẹzi ọfuafo, yọ who bi dhesẹ inọ whọ gwọlọ obufihọ Jihova. Wọhọ oriruo, ohwo jọ o te bru owhẹ ze kẹ obufihọ, whọ te daoma ra kpobi re who fi obọ họ kẹe keme o fievahọ owhẹ jabọ o ro bru owhẹ ze. (Wawo Itẹ 3:27.) Epọvo na re, o rẹ were Jihova nọ whọ tẹ yare iẹe re ọ kẹ owhẹ ẹzi riẹ, yọ ọ te rehọ iẹe kẹ owhẹ.—Itẹ 15:8.

9. Ẹvẹ ẹzi Ọghẹnẹ ọ rẹ rọ jọ oma ra ru iruo nọ whọ tẹ be hai kpohọ iwuhrẹ?

⁹ Whọ rẹ jẹ riẹ inọ edhere ọfa nọ ẹzi Ọghẹnẹ ọ sae rọ jọ oma ra ru iruo họ whọ tẹ be hai kpohọ iwuhrẹ gbe ikokohọ mai. O r’oja gaga re whọ daoma hai kpohọ iwuhrẹ gbe ikokohọ jẹ hae gaviezọ ziezi. Onana u re fi obọ họ kẹ owhẹ wo otoriẹ “eware ididi Ọghẹnẹ.” (1 Kọr. 2:10) Erere o re je noi ze nọ whọ tẹ be hae k’uyo ẹsikpobi evaọ obọ ewuhrẹ. Roro kpahe iwuhrẹ nọ whọ nya no evaọ eka ene nọ i kpemu na. Bro ẹse whọ kpare obọ re whọ ta oware nọ whọ rọwo via? Kọ whọ ruẹ nọ u fo re whọ gbẹ daoma evaọ abọ nana? O tẹ rọ ere, gbaemu inọ whọ te daoma vi epaọ anwẹdẹ no umuọ enẹna vrẹ. Jihova ọ te ruẹ inọ whọ ginẹ gwọlọ kpahe ẹme, ọ vẹ te kẹ owhẹ ẹzi ọfuafo riẹ, onọ u ti fi obọ họ kẹ owhẹ wo erere no iwuhrẹ na ze vi epaọ ọsosuọ.

10. Ma tẹ be nya evaọ ẹzi na, didi uzizie ma rẹ wha se amọfa?

¹⁰ Re ma nya evaọ ẹzi na o gwọlọ inọ ma rẹ j’owọ kpahe uzizie nọ ma se eva Eviavia 22:17 na: ‘Ẹzi na avọ Ọva na a tẹ ta nọ,  “Nyaze.” Jọ ohwo nọ o yo kpobi ọ za nọ, “Nyaze.” Whai enọ uruame u re kpe a nyaze obonẹ re wha mi ame uzuazọ na ọvọvẹ.’ Ẹzi na, onọ o be wọ utu ọva nọ a wholo na ru iruo na, o bi zizie omai inọ ma da ame uzuazọ. Otẹrọnọ whọ ginẹ “nyaze” no wọhọ epaọ uzizie na, kọ who bi se amọfa inọ a “Nyaze”? Re ohwo o wo obọ evaọ iruo nana yọ ọghọ ologbo!

11, 12. Ẹvẹ ẹzi ọfuafo o bi ro fi obọ họ evaọ iruo usiuwoma ota na?

¹¹ Ẹzi ọfuafo na o bi fi obọ họ kẹ omai ru iruo nana nọ i wuzou gaga na. Ma jọ Ebaibol se epanọ ẹzi ọfuafo na o ro fi obọ họ evaọ ikpe-udhusoi ọsosuọ kpọ ovao imishọnare kpohọ ekwotọ ekpokpọ. Ma ruẹ epanọ ‘Ẹzi Ẹri ọ rọ whaha Pọl ukọ na avọ egbẹnya riẹ re a siọ ẹme na ba ẹta evaọ Esia’; yọ ẹzi na ọ kẹ rai uvẹ gbe he re a ruọ Bithinia. Uzedhe epanọ ẹzi na ọ rọ whaha Pọl avọ egbẹnya riẹ re a siọ ewho nana ba ekpohọ ma riẹ hẹ, rekọ o rrọ vevẹ inọ ẹzi na ọ kpọ Pọl riwi ekwotọ obọ Europe nọ e rro gaga. Evaọ eruẹaruẹ, Pọl ọ ruẹ ọzae Masidonia jọ nọ ọ jẹ lẹe kẹ obufiho.—Iruẹru 16:6-10.

¹² Epọvo na re nẹnẹ, ẹzi Jihova ọ be kpọ usiuwoma ota akpọ-soso na. A be jọ eruẹaruẹ dhesẹ orẹwho nọ ma rẹ jọ ta usiuwoma kẹ omai nẹnẹ hẹ wọhọ epanọ a dhesẹ kẹ Pọl na; ukpoye Jihova ọ be rehọ ẹzi ọfuafo riẹ kpọ enọ a wholo na. Yọ ẹzi na ọ be wọ inievo na ru utho ẹgba rai evaọ usiuwoma ota na. Ababọ avro, who bi wo obọ evaọ iruo obọdẹ nana. Kọ whọ sai gbe ru viere re oghọghọ ra u vihọ?

13. Ẹvẹ whọ sae rọ kuvẹ re ẹzi ọfuafo na ọ kpọ owhẹ? Kẹ oriruo.

¹³ Whọ rẹ sae roma kpotọ kẹ ekpakpọ ẹzi ọfuafo na ẹkwoma efihiruo ohrẹ nọ a be rọ kẹ ahwo Ọghẹnẹ. Rehọ oriruo Mihoko, ọmoha jọ nọ ọ rrọ obọ Japan. O muọ iruo ọkobaro họ obọ, fikiere ozọ u je mu ei re o ru izihebro; o roro nnọ ọ riẹ epanọ ọ rẹ rọ kpare isiuru ahwo ho. Evaọ etoke yena, Odibọgba Uvie Mai jọ u te dhesẹ epanọ a rẹ rọ rehọ iminiti jọ kakao lele ohwo ta ẹme evaọ ozihebro. Ukoko u te siobọno ibroshọ na A Satisfying Life—How to Attain It. Ibroshọ na u wo iruo gaga evaọ ẹkwotọ Japan. Mihoko o ru lele epanọ ukoko o ta nọ a rehọ ibroshọ na ru iruo, maero kọ epanọ a rẹ rọ rehọ iminiti jọ kakao lele ohwo ta ẹme evaọ ozihebro. U kri hi o te muọ Ebaibol họ ewuhrẹ kugbe enọ e hae gwọlọ wuhrẹ vẹre he. Ọ ta nọ, “Me wo emọ-uwuhrẹ Ebaibol te 12 okejọ, mẹ jẹ sai wuhrẹ ai re dede he.” Whọ tẹ be ginẹ nya evaọ ẹzi na, bi fi ohrẹ nọ a be rọ kẹ ahwo Jihova họ iruo, who ti wo irere buobu.

Rẹroso Ẹzi Ọghẹnẹ

14, 15. (a) Ẹvẹ o sae rọ lọhọ kẹ ahwo-akpọ nọ e gba ha re a rria te omarọkẹ rai? (b) Ẹvẹ whọ sai ro wo egbẹnyusu nọ e mai woma?

¹⁴ Wọhọ ọgbodibo nọ ọ roma mudhe no, o r’oja re whọ ta usiuwoma. (Rom 10:14) Ẹsejọ whọ sai rri oma ra inọ who te kẹ iruo na ha. Rekọ Ọghẹnẹ họ  ọnọ o ru owhẹ te kẹ iruo na wọhọ epanọ o rrọ kẹ enọ a rọ ẹzi wholo na. (Se 2 Ahwo Kọrint 3:5.) Whọ rẹ sae rria te eyaa omauromudhe ra ẹkwoma eruo uthoma ra gbe ẹrorọsuọ ẹzi Ọghẹnẹ.

¹⁵ Evaọ uzẹme, o rrọ bẹbẹ kẹ omai ahwo-akpọ nọ a gba ha re ma rria te oma nọ ma ro mudhe kẹ Jihova, Ọghẹnẹ mai nọ ọ rrọ gbagba na. Ẹbẹbẹ jọ họ uzuazọ nọ who bi yeri enẹna o rẹ sai gbe egbẹnyusu ra jọ vẹre unu, ‘a vẹ te poviẹ owhẹ.’ (1 Pita 4:4) Rekọ jọ o thọrọ owhẹ ẹro ho inọ egbẹnyusu nọ e mai woma who wo enẹna, maero kọ Jihova gbe Jesu Kristi. (Se Jemis 2:21-23.) U re je fi obọ họ re whọ daoma riẹ inievo nọ e rrọ ukoko ra, enọ e rrọ abọjọ okugbe-inievo akpọ soso mai. (1 Pita 2:17; Itẹ 17:17) Jihova ọ te rehọ ẹkwoma ẹzi riẹ fi obọ họ kẹ owhẹ wo egbẹnyusu nọ i ti ru owhẹ jọ emamọ ohwo.

16. Wọhọ Pọl, ẹvẹ whọ sae rọ ‘ghọghọ eva okuako’ koyehọ nọ who te wo ẹbẹbẹ?

¹⁶ Whọ tẹ maki wo emamọ egbẹnyusu evaọ ukoko na, o rẹ sae gbẹ jọ bẹbẹ kẹ owhẹ re who thihakọ ebẹbẹ. Ẹsejọ ebẹbẹ na e rẹ sai bu te epanọ who re ro reghe no. Oke nana o mae gwọlọ inọ who re bo se Jihova, lẹ re ọ kẹ owhẹ ẹzi ọfuafo riẹ. Pọl ukọ na o kere nọ: “Keme nọ omẹ rẹ kuako, kpakiyọ ẹsiẹe mẹ gae.” (Se 2 Ahwo Kọrint 4:7-10; 12:10.) Pọl ọ riẹ inọ makọ oghẹrẹ nọ ẹbẹbẹ mai ọ rro te kẹhẹ, ẹzi Ọghẹnẹ ọ rẹ sai fi obọ họ kẹ omai. Fikiere, ogaga iruo Ọghẹnẹ o rẹ sae kẹ owhẹ ẹgba nọ oma o tẹ rrọ owhẹ. Pọl o kere inọ ‘ọ jẹ ghọghọ eva okuako.’ Okenọ oma o lọhọ e riẹ ẹsiẹe ọ rẹ ruẹ inọ ẹzi ọfuafo ọ rrọ oma riẹ ru iruo. Onana o rẹ sae via kẹ owhẹ re.—Rom 15:13.

17. Ẹvẹ ẹzi ọfuafo na ọ sai ro fi obọ họ kẹ owhẹ nyate utee ra?

¹⁷ Ma gwọlọ ẹzi Ọghẹnẹ re ma sai yeri uzuazọ nọ o rẹ were iẹe. Rehọ oma ra wọhọ ọnọ o wuzou okọ nọ a re thuru emehọ fihọ, okọ nọ ofou ọ rẹ wọ dhẹ. Utee ra họ re whọ gọ Jihova bẹdẹ bẹdẹ. Ẹzi ọfuafo ọ wọhọ ofou nọ o re fi obọ họ kẹ owhẹ re whọ sai bi okọ na te okpa. Whọ gwọlọ họ re ẹzi akpọ Setan ọ wọ owhẹ kpenẹ avọ enẹ. (1 Kọr. 2:12) U fo re who vuhu uzedhe ofou nọ o re fi obọ họ kẹ owhẹ bi okọ na te okpa. Ofou yena họ ẹzi ọfuafo na. Ẹkwoma Ebaibol gbe ukoko na, ẹzi ọfuafo na o ti gine fi obọ họ kẹ owhẹ gọ Ọghẹnẹ ziezi.

18. Eme họ ọtamuo ra enẹna, kọ fikieme?

¹⁸ Otẹrọnọ Isẹri Jihova a bi wuhrẹ obe kugbe owhẹ anwẹdẹ, yọ whọ be hai kpohọ iwuhrẹ rai ẹsikpobi, rekiyọ whọ re roma mudhe jẹ họ-ame he, nọ oma ra nọ, ‘Eme o be lẹliẹ omẹ si enẹ h’emu?’ Whọ tẹ riẹ inọ ẹzi ọfuafo na o bi gine fi obọ họ kẹ ahwo ru oreva Jihova nẹnẹ, ru oware nọ whọ riẹ inọ u fo. Jihova o ti ku eghale riẹ ku owhẹ. Ọ te rehọ ẹzi ọfuafo riẹ kẹ owhẹ vọvọ. Otẹrọnọ whọ họ-ame no anwẹdẹ, ababọ avro whọ jọ oma ra ruẹ imuẹro ẹzi ọfuafo na no. Whọ ruẹ epanọ Ọghẹnẹ ọ rrọ ẹzi riẹ thọ owhẹ no. Ẹzi Ọghẹnẹ ọ te gbẹ thọ owhẹ, orọnikọ evaọ oke nana ọvo ho rekọ bẹdẹ bẹdẹ. Fikiere, gbaemu inọ whọ rẹ gbẹ nya evaọ ẹzi ọfuafo na.

Kọ Whọ Kareghẹhọ?

• Eme u dhesẹ re ohwo ọ “jọ eva Ẹzi nya”?

• Eme ọ rẹ sai fi obọ họ kẹ owhẹ “jọ eva Ẹzi nya”?

• Ẹvẹ whọ sae rọ rria te omauromudhe ra?

[Enọ Uwuhrẹ]

[Uwoho nọ o rrọ ẹwẹ-obe avọ 15]

Re whọ ruẹrẹ udu ra họ o gwọlọ omodawọ

[Iwoho nọ e rrọ ẹwẹ-obe avọ 16, 17]

Kọ ẹzi Ọghẹnẹ ọ be jọ owhẹ oma ru iruo?