Yọrọ “Eva Efuafo” Evaọ Oke Obẹbẹ Nana

“UVUMỌ ohwo ọ sae vro ho inọ ogbekuo o rrọ Ichọche na nẹnẹ.” Ere Vittorio Messori ọniyẹrẹ ichọche Kathọlik ọ ta kpahe usi ọfariẹ-ogbe nọ u do kẹle na kpahe ichọche Kathọlik nọ e rrọ Itali. Ọ ta haro nọ “A tẹ make ta nọ izerẹ ichọche na a muhọ ẹrọo kẹhẹ, ẹbẹbẹ na o ti notọ họ, keme imaree evaọ imakpe kpobi nọ a bi ru onana yọ enọ i bi lele ezae ibe rai wezẹ—izerẹ nọ e be gba ezae gbe emezae esese na du.”—La Stampa.

Ababọ avro, emuemu nọ ọ vọ oria kpobi na yọ oka “edẹ urere” uyero akpọ nana. (2 Tim. 3:1-5) Wọhọ epanọ usi u dhesẹ, orọnikọ ahwo gheghe ọvo a bi w’obọ evaọ ogbekuo nọ o rrọ akpọ na ha, rekọ te ahwo nọ a se omarai ikọ Ọghẹnẹ. Udu uyoma rai o be wọ ai ru eware etọtọ. (Ẹf. 2:2) Agbẹta nọ Jesu ọ rọ vẹvẹ unu inọ “eva iroro iyoma i re no tha, ijihẹ, ẹnwae-obro, uji, isẹierue, igberedha, ugbeguo.” (Mat. 15:19) Rekọ Jihova Ọghẹnẹ ọ gwọlọ nọ idibo riẹ a wo “eva efuafo.” (Itẹ 22:11) Fikiere, ẹvẹ Oleleikristi ọ sae rọ yọrọ eva efuafo evaọ oke obẹbẹ nana?

Eme U Dhesẹ re A Wo “Eva Efuafo”?

A jọ eria jọ Ebaibol na rehọ ẹme na “eva” hayo udu ro ruiruo evaọ edhere ẹwoho. Wọhọ epanọ obe jọ o ta, ẹme nọ a jọ Ebaibol fa eva na u dikihẹ kẹ “edidi obeva ohwo,” “oria jọ evaọ oma ohwo nọ Ọghẹnẹ o rri ghaghae gaga, oria nọ usu ohwo kugbe Ọghẹnẹ u re no ze, onọ o rẹ lẹliẹ ohwo wo emamọ uruemu.” Eva hayo udu na u dikihẹ kẹ oghẹrẹ ohwo nọ ma ginẹ rrọ. Wọhọ epanọ obe nọ ma fodẹ evaọ obehru na u dhesẹ, udu na Jihova ọ rẹ kiẹriwi.—1 Pita 3:4.

Evaọ Ebaibol na ‘fuafo’ o sai dikihẹ kẹ oware nọ o fo. Rekọ a rẹ sae jẹ rehọ iẹe ta ẹme kpahe oware nọ a gbeku hu—onọ o rrọ gbegbe he evaọ abọ uruemu gbe egagọ. Evaọ Ovuẹ obọ Ugbehru na, Jesu ọ ta nọ: “Ahwo nọ a wo eva efuafo eva e were ae.” Ọ jẹ ta kpahe ahwo nọ a kare uruemu ugbegbe evaọ obọ eva. (Mat. 5:8) Te uruemu rai, isiuru rai gbe iroro rai e rrọ fuafo. Fikinọ a wo uyoyou gbe edẹro kẹ Jihova, a rehọ eva hayo udu rai kpobi ro you rie, ababọ ọviẹwẹ. (Luk 10:27) Whọ gwọlọ jọ fuafo oghẹrẹ utioye, o gbẹ rọ ere?

Re A Yọrọ “Eva Efuafo” Ẹsikpobi O Sae Jọ Bẹbẹ

O gwọlọ nọ odibo Jihova o re wo “eva efuafo” ẹsikpobi. (Ol. 24:3, 4) Rekọ eware sa-sa e riẹ nẹnẹ nọ i bi ru ei bẹbẹ gaga kẹ idibo Ọghẹnẹ re a yọrọ “eva efuafo.” Setan avọ akpọ riẹ nọ o bi su, jegbe oma sebaẹgba mai, e be rọ suọ omai re ma raha usu mai kugbe Jihova no. Re ma seba ekie, o r’oja gaga re ma wo “eva efuafo” jẹ sẹro riẹ. Onana o te thọ omai je fi obọ họ kẹ omai gbẹ jọ egbẹnyusu Ọghẹnẹ. Ẹvẹ ma sae rọ yọrọ eva efuafo?

Ahwo Hibru 3:12, o vẹvẹ unu nọ: “Whaọ imoni, wha yọrọ oma rai o gbẹrọ  erehe ohwo oyoma jọ eva udevie rai, avọ eva imuomu nọ e kare orọwọ o ve ti su owhai kie no Ọghẹnẹ uzuazọ na.” Ma te wo udu nọ o “kare orọwọ,” ma te sae yọrọ “eva efuafo” ho. Iwuhrẹ vẹ Setan Ẹdhọ na ọ wha haro no re o ru ahwo siọ orọwọ ba efihọ Ọghẹnẹ? Enana jọ họ ewuhrẹ eghrorotha, inọ utee uruemu ezi ovo nọ o gba o riẹ hẹ, egagọ evo nọ i woma re o rrọ họ, gbe inọ ẹgba Ọghẹnẹ a ro kere Ebaibol na ha. Ma rẹ kuvẹ re iwuhrẹ iyoma itieye i kpomahọ omai vievie he. (Kọl. 2:8) Ebaibol na nọ ma re se kẹdẹ kẹdẹ je roro didi kpahe u re fi obọ họ kẹ omai nọ ma gbe kiẹ kẹ iwuhrẹ itieye he. Eriariẹ egbagba Ebaibol na i ti ru omai wo ovuhumuo gbe uyoyou udidi kẹ Jihova fiki oghẹrẹ nọ ọ be rọ rehọ uyoyou yeri kugbe ahwo-akpọ. Oghẹrẹ ovuhumuo gbe uyoyou utioye o rrọ ọgbahọ otẹrọnọ ma gwọlọ nọ ma re kie kẹ iwuhrẹ erue he, jẹ sẹro ẹrọwọ mai kpahe Jihova gaga.—1 Tim. 1:3-5.

Nọ Ma Tẹ Rẹriẹ Ovao Dhe Odawọ Isiuru Abọ-Iwo

Ẹbẹbẹ ọfa nọ ma rẹ sae rẹriẹ ovao dhe nọ ma be daoma yọrọ “eva efuafo” na họ isiuru ugboma gbe erọ ekwakwa-efe. (1 Jọn 2:15, 16) Uyoyou kpahe ugho hayo isiuru re ohwo o wo ekwakwa abọ-iwo buobu o sai gbe udu Oleleikristi ku jẹ lẹliẹe ru eware nọ Ọghẹnẹ o mukpahe. Onana o be lẹliẹ ahwo jọ oria iruo rai fi iwhayo, wha amọfa re, je tho igho hayo eware nọ e rrọ erai hi.—1 Tim. 6:9, 10.

Rekọ, nọ ma te wo uvi ozodhẹ kẹ Jihova, you uvioziẹ, jẹ gbaemu nọ ma re wo emamọ obroziẹ-iroro, yọ ma bi dhesẹ nọ ma rri ewo “eva efuafo” ghaghae. Oyena o rẹ wọ omai rọ ‘oruọzewọ ru eware kpobi.’ (Hib. 13:18) Ma tẹ rọ ahwo oruọzewọ o rẹ sae jọ uvi isẹri kẹ amọfa. Oniọvo-ọmọzae Oleleikristi mai jọ nọ a re se Emilio, nọ ọ  be dhẹ omoto kẹ ekọmpene jọ evaọ obọ Itali ọ ruẹ ẹmẹkpa-ugho jọ nọ unuigho nọ u bu te 470 euros (enwenọ ₦96,560) o jọ eva. U gbe ibe-iruiruo riẹ unu gaga nọ ọ rehọ ẹmẹkpa-ugho na kẹ ọga riẹ, ọnọ ọ rehọ ẹmẹkpa na kẹ ohwo nọ o wo rie. Uruemu Emilio na o were ibe-iruiruo riẹ jọ gaga te epanọ a ro mu Ebaibol họ ewuhrẹ. Onana o wha riẹ ze nọ imahrẹ evaọ iviuwou ivẹ a ro kurẹriẹ no. Evaọ uzẹme, ohwo oruọzewọ nọ ma rẹ jọ o rẹ sae wọ amọfa jiri Ọghẹnẹ.—Tait. 2:10.

Eriwo ọthọthọ kpahe owezẹ ọzae-avọ-aye yọ oware ofa jọ nọ o rẹ sai kpomahọ eva efuafo Oleleikristi. Fikinọ ahwo buobu a rri ọfariẹ-ogbe fihọ oware uwoma, o rẹ sae whae ze nọ Oleleikristi ọ sai ro wo oghẹrẹ eriwo otiọye. Ohwo nọ o kie ruọ ọfariẹ-ogbe ọ sae kuọ umuomu riẹ na dhere, rehọ ere yeri uzuazọ agbava. Ohwo otiọye na o wo “eva efuafo” vievie he.

Gabriele ọ họ-ame nọ ọ jọ ikpe 15, je mu iruo ọkobaro họ ovavo. Rekọ, uwhremu na o te je kuomagbe ekpehre egbẹnyusu kpohọ epati-aso. (Ol. 26:4) Enẹ o ro mu uzuazọ ọfariẹ-ogbe họ eyeri, kẹsena a te si ei no ukoko na. Onana o lẹliẹ e riẹ roro didi. Gabriele ọ ta uwhremu na inọ: “Me te ti mu eware nọ me se gboja vẹre he họ eru. Me je se Ebaibol na kẹdẹ kẹdẹ, re me wo otoriẹ oware nọ Jihova ọ be ta, yọ mẹ jẹ romatotọ se ebe ukoko na. Mẹ ruẹ epanọ uwuhrẹ omobọ ohwo o rẹ kẹ erere te, gbe epanọ isase Ebaibol gbe olẹ e rẹ kẹ ẹgba te.” Onana u fi obọ họ kẹ Gabriele siobọno uruemu ọfariẹ-ogbe riẹ jẹ ruẹrẹ usu riẹ họ kugbe Jihova.

Enẹna Gabriele ọ wariẹ mu iruo ọkobaro họ no, kugbe aye riẹ. Oware nọ o via kẹe na u dhesẹ epanọ isase Ebaibol na gbe ebe nọ ‘ọrigbo nọ o wo ẹrọwọ avọ areghẹ na’ o kere e sai ro fi obọ họ kẹ ohwo wo eva efuafo je siomano ọfariẹ-ogbe.—Mat. 24:45; Ol. 143:10.

Ewo “Eva Efuafo” Evaọ Otọ Odawọ

Ọwọsuọ, ẹbẹbẹ ugho gbe ẹyao ọgaga o wha elọhoma se idibo Ọghẹnẹ jọ no. Evaọ ẹsejọ, onana u kpomahọ udu rai yoyoma no re. Makọ Devidi Ovie na ọ ruẹ uye utioye, ọ ta nọ: “Oma o tẹ rọ ẹzi mẹ no; iroro udu mẹ e tẹ raha no.” (Ol. 143:4) Eme o fi obọ họ kẹe evaọ etoke yena? Devidi o roro kpahe eware nọ Ọghẹnẹ o ru kẹ idibo riẹ no, gbe epanọ ọ rọ thọ ọyomariẹ no. O roro kpahe eware nọ Jihova o ru no fiki odẹ ulogbo Riẹ. Devidi o je roro kpahe iruo igbunu Ọghẹnẹ kẹse kẹse. (Ol. 143:5) Epọvo na re, ma tẹ be hai roro kpahe Ọnọ ọ ma omai gbe eware nọ o ru kẹ omai no, je gbe bi ru kẹ omai u re fi obọ họ kẹ omai nọ ma tẹ make rrọ otọ odawọ.

Nọ a te ru omai eva dha hayo ma roro nọ a ru omai eva dha, ofu ọ rẹ sai mu omai. Oware nọ o via na nọ ma re roro kpahe ẹsikpobi o sae lẹliẹ omai dheva kpahe inievo Ileleikristi mai. O sae lẹliẹ omai siomano amọfa je dhesẹ umutho isiuru kpahe ae. Kọ who te ru ere, kiyọ who wo “eva efuafo”? O rọ vevẹ inọ, ewo eva efuafo o kẹre te oghẹrẹ nọ ma bi yeri kugbe inievo Ileleikristi mai no ẹdẹ te ẹdẹ gbe evaọ okenọ ẹwhọ ọ tẹ romavia.

Evaọ akpọ nọ ogbekuo o je bi titi, nọ uruemu ezi u je kiekpo reno, mai Ileleikristi uzẹme ma wo ohẹriẹ keme ma rri ewo “eva efuafo” ghaghae gaga. Ma wo evawere keme ma wo udhedhẹ iroro nọ u re no eruo oreva Ọghẹnẹ ze. Maero, ma wo usu okpekpe kugbe Jihova Ọghẹnẹ mai, ọnọ o you enọ “eva rai efo.” (Ol. 73:1) Ẹhẹ, ma te jọ usu ahwo nọ a te wereva keme wọhọ epanọ Jesu ọ yeyaa, “a rẹ te ruẹ Ọghẹnẹ,” evaọ okenọ o ti siwi enọ i wo “eva efuafo.”—Mat. 5:8.