Izoge—Wha Se Egagọ Jihova Gboja

“Kareghẹhọ ọnọ ọ ma owhẹ evaọ oke ọmoha ra.”—ỌTAUSI. 12:1.

1. Uzizie vẹ a kẹ emaha na evaọ Izrẹl?

 OWARE wọhọ ikpe idu esa gbe egba isoi (3,500) nọ e vrẹ, Mosis ọruẹaro Jihova o juzi kẹ izerẹ gbe ekpako Izrẹl inọ: “Koko ahwo na họ, ezae, eyae, gbe emaha na . . . , re a yo je wuhrẹ epanọ a rẹ rọ dhozọ ỌNOWO na Ọghẹnẹ rai, wha vẹ jẹ yọrọ oma epanọ wha re ro ru eme uzi nana.” (Izie. 31:12) Muẹrohọ oghẹrẹ ahwo nọ a ta nọ a kokohọ na: ezae, eyae, gbe emaha na. Ẹhẹ, makọ emaha dede a jọ usu enọ a ta kẹ nọ a gaviezọ, wuhrẹ, re a je koko izi Jihova.

2. Ẹvẹ Jihova o ro dhesẹ ọdawẹ kẹ izoge nọ e jọ ukoko Ileleikristi ikpe-udhusoi ọsosuọ?

² Evaọ ikpe-udhusoi ọsosuọ, Jihova o gbe je dhesẹ ọdawẹ nọ o wo kẹ emoha nọ e be gọe. Wọhọ oriruo, ọ kẹ Pọl ukọ na ẹzi riẹ nọ ọ rọ rehọ ugogo ehrẹ nọ ọ kẹ izoge na fiba ileta nọ o kere se ikoko na. (Se Ahwo Ẹfẹsọs 6:1; Ahwo Kọlọsi 3:20.) Emoha Ileleikristi nọ i fi ehrẹ yena họ iruo a ru usu rai kugbe Ọsẹ oyoyou obọ odhiwu rai kpekpe, a te je wo eghale riẹ.

3. Oghẹrẹ vẹ emoha buobu a bi ro dhesẹ nọ a gwọlọ gọ Ọghẹnẹ?

³ Kọ a zizie emoha na nẹnẹ re a kuomagbe omai te gọ Jihova? Ee! O rọ oware oghọghọ kẹ ahwo Ọghẹnẹ kpobi nọ a be rọ ruẹ emoha Ileleikristi nọ i bi lele uthubro Pọl na inọ: “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, [wha hẹ] se oma ba e kugbe he, wọhọ epanọ uruemu otu jọ o rọ, rekọ whai ohwo ọ hẹ ta udu họ ohwo awọ, ofa riẹ, wha riẹ nọ ẹdẹ na ọ kẹlino.” (Hib. 10:24, 25) Ofariẹ, emaha buobu a bi kuomagbe esẹgbini rai whowho usiuwoma Uvie Ọghẹnẹ. (Mat. 24:14) Yọ kukpe kukpe, emoha idu buobu a be họ-ame ro dhesẹ nọ a you Jihova no udu ze, a te je bi wo eghale nọ i re te enọ e rrọ ilele Jesu.—Mat. 16:24; Mak 10:29, 30.

Jẹ Uzizie na Rehọ Enẹna

4. Ẹvẹ emoha e rẹ kpako te re a tẹ jẹ uzizie Ọghẹnẹ ọgọ rehọ?

⁴ Ọtausiuwoma Na 12:1 o ta nọ: “Kareghẹhọ ọnọ ọ ma owhẹ evaọ oke ọmoha ra.” Ẹvẹ whai emoha wha rẹ kpako te re wha tẹ jẹ uzizie yena rehọ? Ikereakere na e fodẹ unuikpe he. Fikiere who roro nọ whọ maha hrọ họ re whọ gaviezọ kẹ Jihova jẹ gọe. Makọ epanọ whọ maha te kẹhẹ, ma zizie owhẹ nọ whọ jẹ uzizie yena rehọ ababọ okioraha.

5. Ẹvẹ esẹgbini a sai ro fi obọ họ kẹ emọ rai wo ẹnyaharo abọ-ẹzi?

⁵ O sae jọnọ ọsẹgboni ra hayo ọvo jọ evaọ usu rai o fi obọ họ kẹ owhẹ wo ẹnyaharo abọ-ẹzi. O tẹ rrọ ere, kiyọ whọ wọhọ Timoti. Okenọ ọ jọ ọmaha,  oni riẹ Yunisi gbe oniode riẹ Lọis họ enọ i wuhrẹ i rie ikere efuafo na. (2 Tim. 3:14, 15) Ẹsejọhọ, epọvo na ọsẹgboni ra a be rọ Ebaibol na wuhrẹ owhẹ, lẹ kugbe owhẹ, rọ owhẹ kpohọ iwuhrẹ gbe ikokohọ, jẹ wha owhẹ lele oma evaọ usiuwoma ota. Evaọ uzẹme, re a wuhrẹ owhẹ izi Ebaibol yọ obọdẹ owha-iruo jọ nọ Jihova ọ rọ kẹ ọsẹgboni ra. Kọ uyoyou gbe ọdawẹ nọ a wo kẹ owhẹ o da owhẹ ẹro?—Itẹ 23:22.

6. (a) Wọhọ epanọ Olezi 110:3 o ta, oghẹrẹ egagọ vẹ e rẹ were Jihova? (b) Eme ma be te ta ẹme kpahe?

⁶ Ghele na, nọ wha be rro kpako na, Jihova ọ gwọlọ nọ wha “dhesẹ oreva Ọghẹnẹ via, o nọ uwoma nọ a jẹrehọ nọ ojẹ gbunu,” wọhọ epanọ Timoti o ru. (Rom 12:2) Who te bi ru ere, who ti w’obọ evaọ iruẹru ukoko na, orọnikọ fikinọ ọsẹgboni ra a gwọlọ nọ who ru ere he rekọ fikinọ whọ gwọlọ ru oreva Ọghẹnẹ. O te were Jihova nọ whọ tẹ be rọ udu obọ ra gọe. (Ol. 110:3) Kọ ẹvẹ whọ sai ro dhesẹ nọ whọ gwọlọ yoẹme kẹ Jihova vi epaọ ọsosuọ re who je lele ọkpọvio riẹ? Ma te ta kpahe obọdẹ idhere esa nọ whọ sai ro ru ere. Idhere esa na họ uwuhrẹ, olẹ, gbe uruemu. Joma ta kpahe ae unọjọ utọjọ.

Riẹ Jihova Wọhọ Ọghẹnẹ nọ Ọ Ginẹ Rrọ

7. Ẹvẹ Jesu ọ rọ rrọ oriruo ohwo nọ o se ikere na gboja, kọ eme o fi obọ họ kẹe ru ere?

⁷ Edhere ọsosuọ nọ whọ sai ro dhesẹ nọ who se egagọ Jihova gboja vi epaọ ọsosuọ họ Ebaibol na nọ who re se kẹdẹ kẹdẹ. Who te bi ru ere, who ti ru ẹgwọlọ abọ-ẹzi ra gba je wo eriariẹ Ebaibol. (Mat. 5:3) Jesu o fi oriruo họ otọ kẹ omai. Okenọ ọ jọ ikpe 12, ọsẹgboni riẹ a jọ etẹmpol ruẹ e riẹ nọ “ọ keria udevie iwuhrẹ na, be kezọ eme rai, jẹ nọ ae enọ.” (Luk 2:44-46) Jesu o wo isiuru kẹ ikere na je wo otoriẹ rai makọ okenọ ọ gbẹ jọ ọmaha. Eme o fi obọ họ kẹe ru ere? Ababọ avro, Meri oni riẹ avọ Josẹf a fi obọ họ gaga. Aimava a jọ idibo Ọghẹnẹ nọ e rọ ikere na wuhrẹ Jesu no emaha ze.—Mat. 1:18-20; Luk 2:41, 51.

8. (a) Okevẹ esẹgbini a re ro muọ emọ rai Ẹme Ọghẹnẹ họ ewuhrẹ? (b) Fodẹ oriruo jọ nọ u dhesẹ erere nọ o riẹ re a wuhrẹ emọ no emaha ze.

⁸ Epọvo na re, esẹgbini nọ i wo ozodhẹ Ọghẹnẹ nẹnẹ a riẹ epanọ u wuzou te re a rehọ Ebaibol wuhrẹ emọ rai no emaha ze. (Izie. 6:6-9) Ere oniọvo-ọmọtẹ nọ a re se Rubi o ru nọ ọ nwani yẹ Joseph, ọmọ ọsosuọ riẹ no. Kẹdẹ kẹdẹ, ọ jẹ hai se Obe Ikuigbe Ebaibol Mẹ kẹe. Nọ ọ be whẹro na, o te fi obọ họ kẹe riẹ eria ikere jọ fihọ uzou. Kọ Joseph o wo erere no uwuhrẹ yena ze? Nọ o mu ẹme họ ẹta no, ọ jẹ rehọ eme obọ riẹ gbiku buobu nọ e rrọ Ebaibol na. Yọ okenọ ọ jọ ikpe isoi, o ru ẹme ọsosuọ riẹ evaọ Isukulu Odibọgba Esuo-Ọghẹnẹ na.

9. Fikieme o rọ roja re who se Ebaibol je roro didi kpahe eware nọ who se?

⁹ Re whai emaha na wha sai wo ẹnyaharo abọ-ẹzi ziezi, o gwọlọ nọ wha re wo uruemu isase Ebaibol kẹdẹ kẹdẹ. (Ol. 71:17) Ẹvẹ isase Ebaibol e sai ro fi obọ họ kẹ owhẹ wo ẹnyaharo? Muẹrohọ eme nọ Jesu ọ ta kẹ Ọsẹ riẹ evaọ olẹ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ.” (Jọn 17:3) Nọ who bi wuhrẹ kpahe Jihova na, u ti mu owhẹ ẹro inọ ọ ginẹ rrọ, uyoyou nọ who wo kẹe u ve ti diwi ziezi. (Hib. 11:27) Fikiere, oke kpobi nọ who se oria jọ Ebaibol na, rehọ uvẹ yena wuhrẹ ziezi kpahe Jihova. Nọ oma  ra nọ: ‘Eme oria nana u wuhrẹ omẹ kpahe Jihova? Ẹvẹ oria Ebaibol nana u ro dhesẹ uyoyou gbe ọdawẹ nọ Ọghẹnẹ o wo kẹ omẹ?’ Whọ tẹ be rehọ oke roro kpahe enọ itieye na u ti fi obọ họ kẹ owhẹ wuhrẹ kpahe Jihova ziezi jẹ riẹ oware nọ ọ gwọlọ mi owhẹ. (Se Itẹ 2:1-5.) Wọhọ Timoti ọmoha na, whọ vẹ te “rọwo” eware nọ who wuhrẹ no Ikereakere ze na, oma o vẹ te wọ owhẹ re whọ rehọ udu obọ ra gọ Jihova.—2 Tim. 3:14.

Epanọ Olẹ U re Ro Ru Uyoyou Ra kẹ Jihova Diwi

10, 11. Ẹvẹ olẹ u ti ro fi obọ họ kẹ owhẹ bọ isiuru nọ whọ gwọlọ rọ gọ Ọghẹnẹ ga?

¹⁰ Edhere avivẹ nọ whọ sai ro dhesẹ nọ who se egagọ Jihova gboja họ ẹkwoma elẹ ra. Ma jọ Olezi 65:2 se nọ: “O whẹ họ ọnọ o re yo elẹ! Whẹ họ ọnọ ahwo kpobi a re bru tha.” Makọ evaọ okenọ Ọghẹnẹ ọ gbẹ jẹ rehọ emọ Izrẹl ru iruo, ahwo erẹwho efa a rẹ sae ziọ etẹmpol Jihova a vẹ jọ etẹe lẹ sei. (1 Iv. 8:41, 42) Ọghẹnẹ o re dhesẹ ọriẹwẹ hẹ. Enọ i bi koko ijaje riẹ a wo imuẹro inọ o ti yo elẹ rai. (Itẹ 15:8) O rrọ vevẹ inọ whai emoha na wha rrọ usu “ahwo kpobi” nọ obe Olezi o fodẹ na.

¹¹ Whọ riẹ inọ re usu imava o sae tọ ziezi, a rẹ ta ẹme kugbe ẹsikpobi. Ẹsejọhọ o rẹ were owhẹ re whọ ta eva ra kpobi kẹ ogbẹnyusu ọkpekpe ra. Epọvo na re, whọ tẹ be lẹ no udu ze, yọ whọ be ta ẹme kẹ Ọnọma Oride na. (Fil. 4:6, 7) Ta eva ra kpobi kẹ Jihova oghẹrẹ nọ who re horie eva kẹ ọsẹgboni ra hayo ogbẹnyusu ọkpekpe ra. Evaọ uzẹme, epanọ who rri Jihova u re dhesẹ oma via evaọ elẹ ra. Whọ te ruẹ inọ epanọ usu ra kugbe Jihova o ga te, ere elẹ ra i ti wo otofa te.

12. (a) Fikieme uvi olẹ o gbẹ rọ jọ eme nọ whọ ta ọvo ho? (b) Eme o ti fi obọ họ kẹ owhẹ ruẹ nnọ Jihova ọ kẹle owhẹ?

¹² U fo re who muẹrohọ inọ orọnikọ eme nọ whọ ta no unu ze ọvo i re dhesẹ inọ olẹ ra u wo otofa ha. Olẹ na u re no owhẹ eva ze. Evaọ elẹ ra, dhesẹ nọ who gine you Jihova, who wo adhẹẹ odidi kẹe, gbe nnọ who fi eva ra kpobi họ iẹe. Nọ whọ be ruẹ epanọ Jihova ọ be rọ kuyo elẹ ra na, who ti vuhumu inọ “ỌNOWO na ọ kẹle enọ i bo se ei kpobi.” (Ol. 145:18) Ẹhẹ, Jihova o ti si kẹle owhẹ, bọ owhẹ ga re whọ wọso Ẹdhọ re whọ jẹ jẹ emamọ iroro evaọ uzuazọ.—Se Jemis 4:7, 8.

13. (a) Ẹvẹ usu kugbe Ọghẹnẹ u ro fi obọ họ kẹ oniọvo jọ? (b) Ẹvẹ usu kugbe Ọghẹnẹ u bi ro fi obọ họ kẹ owhẹ fi otunyẹ ọhwa kparobọ?

¹³ Roro kpahe epanọ Cherie o ro wo ẹgba fikinọ o wo usu okpekpe kugbe Jihova. Okenọ ọ jọ isukulu, a kẹ riẹ ekẹ buobu fikinọ ọ riobe gaga jẹ be riẹ ru ziezi evaọ arozaha isukulu. Nọ o nwrotọ  no isukulu no, a tẹ kẹe uvẹ nọ o re ro kpohọ isukulu ikpehru ọvọvẹ. Cherie ọ ta nọ: “O jọ bẹbẹ re mẹ ta nọ ijo, yọ iticha mẹ gbe ibe emọ-isukulu mẹ a jẹ gb’omẹ họ re mẹ rọwo.” Rekọ o muẹrohọ inọ re o kpohọ isukulu ikpehru, kiyọ ọ te rehọ enwenọ oke riẹ kpobi ro se ebe jẹ ruẹrẹ oma kpahe kẹ arozaha, o gbe ti wo oke tere kẹ egagọ Jihova ha. Eme Cherie o ru? Ọ ta nọ: “Nọ mẹ lẹ se Jihova no, mẹ tẹ jiroro inọ me bi kpohọ isukulu ikpehru hu, me te mu iruo ọkobaro oke-kpobi họ.” Enẹna, o ru iruo ọkobaro te ikpe isoi no. Ọ ta nọ: “Mẹ be vioja ha fiki iroro nọ mẹ jẹ na. Eva e be were omẹ keme mẹ riẹ nọ iroro nọ mẹ jẹ na e were Jihova. Whọ tẹ ginẹ rehọ Uvie Ọghẹnẹ karo, a ti fi eware efa nọ e roja họ kẹ owhẹ.”—Mat. 6:33.

Uruemu Ezi U re Dhesẹ Inọ Who “Wo Eva Efuafo”

14. Fikieme emamọ uruemu ra o rọ roja kẹ Jihova?

¹⁴ Edhere avesa nọ whọ sai ro dhesẹ nọ who se egagọ Jihova gboja họ ẹkwoma uruemu ra. Jihova ọ rẹ ghale izoge nọ e rrọ fuafo evaọ uruemu. (Se Olezi 24:3-5.) Samuẹle ọmoha na ọ raro kele uruemu ọfariẹ-ogbe orọ emọ Ilai Ozerẹ Okpehru na ha. Ahwo a je muẹrohọ emamọ uruemu Samuẹle. Ebaibol e ta nọ: “Samuẹle ọ tẹ ro evaọ oma, je wo aruoriwo obọ Ọghẹnẹ gbe ahwo.”—1 Sam. 2:26.

15. Ẹjiroro jọ vẹ e rẹ lẹliẹ owhẹ yọrọ emamọ uruemu?

¹⁵ Ma be rria akpọ nọ ọ vọ avọ ahwo nọ a you oma-obọrai, bi heri-oheri, nọ i bi yo ẹme enọ i yẹ rai hi, nọ e rrọ ababọ uyere-ọghọ, ababọ ẹfuọ, eva egaga, ofu-ọkpoo, nọ i you enu-awere siọ Ọghẹnẹ ba, gbe iruemu iyoma efa nọ Pọl ọ fodẹ. (2 Tim. 3:1-5) Fikiere o sae jọ bẹbẹ re ohwo o wo uruemu ezi evaọ udevie ahwo iyoma nọ ma fodẹ na. Rekọ oke kpobi nọ who ru oware nọ u kiehọ jẹ siọ uruemu uyoma, yọ who bi dhesẹ inọ abọ esuo Jihova whọ rrọ. (Job 2:3, 4) Who ti je wo evawere fikinọ who bi ru ayare Jihova na gba: “Ọmọzae mẹ, wo areghẹ, re who ru omẹ eva were, re mẹ sae kẹ ọnọ ọ poviẹ omẹ uyo.” (Itẹ 27:11) Ofariẹ, nọ whọ riẹ inọ eva ra e be were Jihova na u ti ru owhẹ kru oma ga ziezi evaọ egagọ riẹ.

16. Ẹvẹ oniọvo-ọmọtẹ jọ o ro ru eva were Jihova?

¹⁶ Nọ oniọvo-ọmọtẹ jọ nọ a re se Carol ọ gbẹ jọ uzoge, o se izi Ebaibol gboja nọ ọ jọ isukulu, yọ amọfa a muẹrohọ uruemu ezi riẹ. Eme ọ via? Ibe emọ-eklase Carol a je sei ẹkoko fikinọ ọ jẹ hai kuomagbe ai ru ehaa akpọ na je yere obiala ha. Ẹsejọ ọ jẹ hae rọ uvẹ yena ta oware nọ ọ rọwo rọ kẹ ae. Ikpe buobu e vrẹ no, ohwo jọ nọ avọ Carol a gbẹ jọ eklase o te vi ileta nọ o kere eme nana fihọ ro sei: “Anwẹdẹ mẹ be gwọlọ nọ me re kere se owhẹ je yere owhẹ. Mẹ gbẹ be kareghẹhọ uruemu ezi ra gbe emamọ oriruo nọ who fihọ otọ, avọ aruọwha nọ whọ jẹ rọ siọ ehaa akpọ na. Whẹ họ Osẹri Jihova ọsosuọ nọ mẹ riẹ.” Oriruo Carol o kpomahọ  ibe ọmọ-eklase riẹ na te epanọ o ro muọ Ebaibol họ ewuhrẹ. O kere fihọ ileta riẹ na inọ ọ họ-ame vrẹ ikpe udhuvẹ no. Wọhọ Carol, whai izoge nọ e be rọ aruọwha koko izi Ebaibol wha sai ti duobọte ahwo evezi udu re a ti wuhrẹ kpahe Jihova.

Emoha nọ I Bi Jiri Jihova

17, 18. (a) Ẹvẹ who rri emoha nọ e rrọ ukoko ra? (b) Eghale vẹ e rrọ obaro kẹ izoge nọ i wo ozodhẹ Ọghẹnẹ?

¹⁷ Eva e be were omai kpobi evaọ ukoko Jihova nọ ma be rọ ruẹ emoha buobu nọ e be rọ ọwhọ gọ Jihova. Emoha nana a bi ru ọtamuo nọ a be rọ gọ Jihova ga ẹkwoma isase Ebaibol ikẹdẹ kẹdẹ, olẹ, gbe edhesẹ emamọ uruemu. Uvi izoge yena a rrọ uvi omosasọ kẹ esẹgbini rai gbe ahwo Jihova kpobi.—Itẹ 23:24, 25.

¹⁸ Evaọ obaro, emoha nọ i kru ẹrọwọ rai a te jọ usu ahwo nọ e te zọ ruọ akpọ ọkpokpọ nọ Ọghẹnẹ ọ ya eyaa riẹ na. (Evia. 7:9, 14) A te jọ akpọ ọkpokpọ na wo eghale buobu nọ ovuhumuo rai kẹ Jihova ọ be rro haro na, a ve ti je jiri ei bẹdẹ bẹdẹ.—Ol. 148:12, 13.

Kọ Whọ Sae k’Iyo Enọ Nana Vevẹ?

• Ẹvẹ izoge a sai ro wo obọ evaọ egagọ uzẹme nẹnẹ?

• Re whọ sai wo erere no isase Ebaibol ze, fikieme eroro-didi o rọ roja?

• Ẹvẹ olẹ u re ro fi obọ họ kẹ owhẹ si kẹle Jihova?

• Ewoma vẹ o re no emamọ uruemu Oleleikristi ze?

[Enọ Uwuhrẹ]

[Uwoho nọ o rrọ ẹwẹ-obe avọ 5]

Kọ who wo uruemu isase Ebaibol ikẹdẹ kẹdẹ?