Jihova ọ Gwọlọ nọ Whọ Jọ Oma Kọkọ

OKENỌ okpẹtu nọ a rẹ ruẹ obọ riẹ hẹ na ọ te roma via, Ọghẹnẹ Erumeru na ọ te ruẹ nọ o “siwi” idibo riẹ kpobi. (Joẹl 2:32) Uzẹme riẹ họ, n’otọ avọ otọ ze Jihova ọ rẹ gwọlọ thọ ahwo no enwoma. Fikinọ ọye o “wo eyeri azọ,” o rri ahwo-akpọ kpobi ghaghae yọ ọ gwọlọ nọ enwoma evuevo i te ai oma ha.—Ol. 36:9.

Uvi idibo Ọghẹnẹ evaọ oke anwae a wo eriwo ọvona kpahe uzuazọ. Wọhọ epanọ o rrọ Emuhọ 33:18, Jekọp avọ uviuwou riẹ a nya onya imuozọ jọ te uwou “dhedhẹ,” oma kọkọ. Jekọp ọ rẹroso Jihova kẹ uketha, dedena ọ jẹ owọ nọ ọ rọ thọ ahwo nọ a gbẹ jọ usu evaọ onya erẹ na. (Emu. 32:7, 8; 33:14, 15) Ẹkwoma efihiruo ehri-izi Ebaibol, whọ rẹ sai gbe muẹrohọ idhere efa nọ whọ sae rọ thọ omara gbe amọfa no omonwa. Joma ruẹ epanọ ẹme nana o ro wo iruo gaga kẹ inievo nọ e be bọ Egwa Uvie gbe ọkpọ ebabọ itieye na efa, jegbe enọ i bi wo abọ evaọ iruẹru ogbodhẹ.

Omoyọrọ Evaọ Otọ Uzi Mosis Na

Omoyọrọ yọ ugogo oware jọ nọ Uzi Mosis na o gwọlọ mi idibo Ọghẹnẹ. Wọhọ oriruo, o gba ohwo Izrẹl kpobi họ inọ ọ tẹ be bọ uwou, ọ rẹ bọ ogbẹ wariẹ ehru uwou na. Nọ o rọnọ ahwo a jẹ hae keria obọ ehru uwou rai nọ a bọ kuwhrẹrẹ hẹ na, oware nọ a bọ wariẹe na u re ru nọ a gbe kie no ehru na ze he. (1 Sam. 9:26; Mat. 24:17) Ohwo jọ o te kie no obọ ehru uwou na ze fikinọ a bọ ogbẹ wariẹe he, ohwo nọ o wo uwou na ọ reabe azẹ evaọ aro Jihova.—Izie. 22:8.

A rẹ jẹ rehọ ehri-uzi nana kru ohwo nọ arao riẹ ọ wha enwoma se omọfa. Otẹrọnọ eruẹ o kpe ohwo, ohwo nọ o wo eruẹ na o re kpe eruẹ na no re ọ siọ amọfa ba ekpe. Uzi na o ta nọ ọ rẹ re iẹe hayo zẹe kẹ omọfa ha, fikiere ekpe-kufiẹ arao na họ uye nọ u te rie kẹ uwhu nọ arao riẹ ọ wha ze na. Rekọ eme ọ rẹ via otẹrọnọ ohwo jọ nọ eruẹ riẹ ọ nwa ohwo oma ọ rọwo kru eruẹ riẹ hẹ? O tẹ via evaọ obaro inọ eruẹ ọvona o kpe ohwo, uzi na o ta nọ a re kpe eruẹ na gbe ohwo nọ o wo rie na. Uzi yena o rẹ lẹliẹ ohwo nọ ọ rẹ gwọlọ gbabọkẹ erao riẹ nabe romatotọ roro kpahe owojẹ riẹ.—Ọny. 21:28, 29.

Uzi na o tẹ jẹ tuduhọ ẹromuhọ ekwakwa iruo re e siọ omonwa ba ẹwha se amọfa. Ahwo Izrẹl buobu a jẹ hae rehọ ewhe bẹre ire. Otẹrọnọ uzou ewhe o la nyai kie ohwo nọ ọ kẹle etẹe u je kpei, ohwo nọ ọ jẹ bẹre ure na ọ rẹ dhẹ kpohọ ẹwho adhẹzọ. Obei ọ rẹ jọ bẹsenọ ozerẹ okpehru na o re whu, onọ u re ru nọ ohwo nọ ọ rọ ọthobọ kpe ohwo ọ sae rọ nyasiọ uviuwou riẹ ba ikpe buobu. Uzi yena u wuhrẹ orẹwho Izrẹl inọ uzuazọ o rẹ ghaghae kẹ Jihova. Ohwo  nọ o wo eriwo Ọghẹnẹ kpahe uzuazọ ọ rẹ ruẹ nọ ekwakwa iruo riẹ e rrọ kọkọ, jẹ ruẹ nọ ọ rehọ e rae ru iruo evaọ edhere nọ e gbẹ rọ wha omonwa ze he.—Ik. 35:25; Izie. 19:4-6.

Jihova ọ rehọ ẹkwoma izi itieye na ru ei vevẹ inọ ọ gwọlọ nọ ahwo riẹ a se omoyọrọ gboja evaọ uwou rai hayo otafe. Ọ kẹ uzi kpahe uye nọ a rẹ kẹ ahwo nọ a wha uwhu hayo omonwa se amọfa, o tẹ make rọnọ ọthobọ. Eriwo Jihova kpahe omoyọrọ u ri nwene he. (Mal. 3:6) O gbẹ rrọ ẹgwọlọ riẹ inọ ahwo a yọroma jẹ siọ omonwa ba ẹwha se omarai gbe amọfa. Onana o roja maero nọ ma tẹ be bọ iwou kẹ egagọ riẹ, hayo nọ ma tẹ be ruẹrẹ enọ ma wo no vẹre.

 Omoyọrọ Evaọ Etoke Ebabọ

Obọdẹ uvẹ-ọghọ o rrọ re ma wobọ evaọ ebabọ gbe ẹruẹrẹ Egwa Uvie, Egwa Ikokohọ, gbe iwou ogha. O rrọ uvẹ-ọghọ re nọ ma te bi wobọ evaọ ebabọ iwou inievo nọ eware okpẹtu e via kẹ. O gwọlọ nọ ma ru iruo kpobi avọ onaa, ogbẹrọ ere he, ma rẹ sae wha omonwa se oma mai gbe amọfa, makọ evaọ eware esese. (Ọtausi. 10:9) Ẹhẹ, ma te wo uruemu omoyọrọ evaọ iruo, o rẹ sai fi obọ họ kẹ omai whaha omonwa.

Ebaibol e ta nọ: “Ogaga họ oruaro emoha, eza họ eru ekpako na.” (Itẹ 20:29) Re a sai ru iruo egaga, o gwọlọ ẹgba uzoge. Rekọ ahwo nọ a kpako no—enọ i wo onaa ziezi evaọ iruo ebabọ—a re ru abọ ukuhọ iruo nọ e gwọlọ onaa. Oke jọ o jariẹ nọ ahwo nọ e kpako no enẹna a jẹ rehọ ogaga uzoge rai ru iruo nọ e gwọlọ ẹgba. Otẹrọnọ whẹ yọ ohwo ọkpokpọ nọ ọ fialoma via kẹ iruo ebabọ, hai rri oghẹrẹ nọ otu nọ o kri iruo na no a bi ro ru iruo, re who je lele ọkpọvio rai. Whọ tẹ gwọlọ wuhrẹ, inievo nọ i wo onaa evaọ iruo ebabọ na a ti wuhrẹ owhẹ eware buobu. Ejọ rai họ, epanọ whọ sae rọ wọ ewha egbẹgbẹdẹ gbe eroruiruo ekwakwa nọ e rẹ sae wha omonwa ulogbo ze nọ ohwo ọ gbẹ yọroma ha. Onana u ti ru nọ who ti ro wo ẹnyaharo, whaha  omonwa, je wo evawere evaọ iruo ra.

O gwọlọ nọ ahwo nọ a bi ru iruo evaọ oria ebabọ a muẹrohotọ ẹsikpobi. Eware e rẹ sai nwene idudhe. Ọgọdọ ọ sai bru fihọ otọ nọ o jọ gaga vẹre obọnana. O sae jọnọ amọfa jọ evaọ usu iruiruo na a go ewewe, ẹwẹ ure, hayo ugbogbo ọda no eria nọ e jọ vẹre. Who gbe rri otọ mu hu, whọ sae nwoma. Uzi egọmeti kpahe awhaha omonwa o gwọlọ nọ ahwo nọ a rrọ oria ebabọ ru iruo a wo ekwakwa jọ nọ a rẹ rọ thọ omarai. Ughẹgbe-aro nọ u wo okpa, etu ọgaga, gbe eviẹ iruo e rẹ sae thọ owhẹ no omonwa buobu evaọ oria ebabọ. Rekọ re eware nana e sae thọ owhẹ, whọ rẹ ruẹ nọ e rrọ kọkọ gbe inọ who ku rai họ oma.

Dede nọ o rẹ sae jọ omai ẹro inọ ekwakwa iruo buobu e rẹ bẹ eroruiruo ho, o gwọlọ nọ a re wuhrẹ ohwo re ọ sae riẹ epanọ ọ rẹ rehọ ai ru iruo avọ onaa jẹ whaha omonwa. Whọ gbẹ riẹ epanọ a rẹ rehọ okwakwa iruo jọ ru iruo ho, vuẹ oniọvo nọ o wuzou iruo na. O ti ru ọruẹrẹfihotọ re a wuhrẹ owhẹ ziezi. Omaurokpotọ, hayo ẹriẹ ọnyaba ra yọ uruemu nọ u fo ewo. Evaọ uzẹme, re whọ whaha omonwa nọ whọ rẹ wha se omara gbe amọfa evaọ oria ebabọ, o gwọlọ omaurokpotọ mi owhẹ.—Itẹ 11:2.

Ekie o rẹ mae wha omonwa ze evaọ eria ebabọ. Taure whọ tẹ te gadiẹ ewewe hayo okwakwa ofa jọ, ruẹ nọ ọ ga, o dikihẹ ziezi gbe inọ eware nọ a sae rọ rehọ iẹe ru iruo omakọkọ kpobi e riẹ. Whọ tẹ be jọ ewewe hayo ehru ekpala nọ a rẹ rọ gadiẹ ru iruo, o rẹ sae gwọlọ nọ whọ sa ifi nọ a rẹ rọ gadiẹ okwakwa utioye na mu oma hayo ruẹ nọ a fi egada wariẹe họ. Who te wo enọ jọ kpahe iruo nọ e gwọlọ ẹgadiẹ, nọ mi ọsẹro iruo na. *

Nọ unu idibo Jihova wariẹ akpọ-soso họ u bi vihọ na, ere ẹgwọlọ kẹ ebabọ Egwa Uvie gbe eria efa nọ a rẹ rọ wha egagọ uzẹme haro u bi vihọ re. A mu owha-iruo ẹruorote igodẹ eghaghae Jihova nọ e be jọ eria ebabọ Egwa Uvie mai gbe iwou itieye na efa ru iruo họ obọ esẹro iruo na. (Aiz. 32:1, 2) Who te wo uvẹ-ọghọ nọ whọ be rọ rẹrote abọjọ iruo ebabọ mai, hae kareghẹhọ inievo na epanọ omoyọrọ u wuzou te. Ruẹ nọ oria ebabọ na o rrọ fuafo gbe inọ a ruẹrẹ eware kpobi họ ọvuọ oria rai kpatiẹ. Rọ ẹwo gbe osegboja ta ẹme kẹ ahwo nọ a gwọlọ ekareghẹhọ kpahe omoyọrọ. Whọ kẹ emaha hayo ahwo nọ i wo onaa iruo ziezi hi uvẹ hẹ re a jọ eria nọ e vọ avọ enwoma ru iruo. Roro kpahe enwoma nọ e rẹ sae romavia evaọ oria iruo re whọ vuẹ iruiruo na kpahe epanọ a sae rọ yọroma. Kareghẹhọ inọ utee mai họ re ma ru iruo na te urere ababọ omonwa.

Uyoyou U Wuzou

Iruo buobu evaọ ebabọ Egwa Uvie gbe iwou itieye na efa nọ a rẹ rọ wha egagọ uzẹme haro e rrọ iruo nọ e rẹ sae wha omonwa ze. Fikiere, o gbahọ nọ ahwo nọ a be jọ eria itieye na ru iruo a rẹ yọroma gaga. Whọ tẹ be rọ adhẹẹ kẹ ehri-izi Ebaibol, bi lele ọkpọvio nọ a fihọ kẹ iruo na, jẹ be rọ orimuo ru eware, whọ te whaha omonwa buobu je fi obọ họ thọ ibe iruiruo ra no omonwa re.

Ẹjiroro vẹ ọ be mae wọ omai dhesẹ ẹzi omoyọrọ? Uyoyou. Ẹhẹ, uyoyou kẹ Jihova o rẹ wọ omai rri uzuazọ ghaghae wọhọ ọyomariẹ. Uyoyou kẹ erivẹ mai u re ru omai whaha abọgbekẹ eware, onọ o rẹ sae wha omonwa se ai. (Mat. 22:37-39) Fikiere, ajo ma ru epanọ ẹgba mai o te kpobi re ma ruẹ nọ ma ru iruo ebabọ mai oma kọkọ.

[Oruvẹ-obotọ]

[Ẹkpẹti/Uwoho nọ e rrọ ẹwẹ-obe avọ 30]

Epanọ A rẹ rọ Rehọ Ewewe Ru Iruo Ababọ Omonwa

Ukpe jọ kẹle na evaọ obọ United States, iruiruo nọ i bu vrẹ idu udhoree (160,000) a kie no ehru ewewe ze jẹ nwoma. Ofariẹ, oware wọhọ ahwo udhuhrẹ-gbe-ikpe (150) a whu fiki ewewe nọ a kie no ze. Oria kpobi nọ whọ rrọ hayo be jọ ru iruo, ekpọvio nọ e rrọ obotọ na e rẹ sai fi obọ họ nọ who gbe kie no ewewe ze he.

◇ Whọ gadiẹ ewewe nọ ọ rrọ deghe deghe hayo nọ ọ joma raha no ho, yọ whọ ruẹrẹ ewewe otiọye na gbe he. Raha iẹe kufiẹ.

◇ U wo utho owha nọ ewewe kpobi ọ rẹ sae wọ. Ruẹ nọ whẹ omara gbe ekwakwa iruo nọ whọ te wọ lele oma rọ gadiẹ ewewe na e gbẹdẹ vrẹ umuo nọ u fo nọ ewewe na ọ rẹ wọ họ.

◇ Rehọ ewewe nọ who bi ti jo ru iruo na ro dikihẹ oria nọ o rrọ gaga nọ u ku whrẹrẹ hẹ. Whọ rehọ iẹe dikihẹ ehru oware nọ o rrọ deghe deghe hayo nọ o rẹ sai no ẹta ha, wọhọ ehru ogogolo hayo ẹkpẹti.

◇ Ẹsikpobi nọ whọ tẹ be gadiẹ hayo nwrotọ no ewewe, ruẹ nọ whọ rẹriẹ ovao ku ei.

◇ Evaọ eria nọ a re thihi rọ gadiẹ ewewe na, whọ keria hayo dikihẹ ivẹ nọ e mae kẹle obọ ehru vievie na ha.

◇ Whọ tẹ be gadiẹ ewewe nọ a rẹ sai si kpehru re u theri, ruẹ nọ o rehọ irula esa kpehru vi oria nọ whọ be te gadiẹ ro na hayo oria nọ whọ rehọ e riẹ rẹrẹ na. Re awọ ewewe na ọ sae dọmu oria ovo, rehọ ifi gbae mu oria jọ hayo rehọ ibubẹ tehe akpala hayo ure fihọ emu awọ ewewe na. Whọ gbẹ sai ru ere he, ta kẹ ohwo jọ re o kru ewewe na kẹ owhẹ nọ whọ be gadiẹ hayo jariẹ ru iruo na. Gba ehru ewewe na mu oria jọ re o seba ego kpenẹ avọ enẹ nọ whọ be jariẹ ru iruo na.

◇ Whọ rọ ire kpahe eria nọ a re thihi rọ gadiẹ ewewe na re who dikihẹ ehru rai hi.

◇ Whọ tẹ be riẹ abọ hayo awọ nọ whọ tẹ rrọ ehru ewewe ru iruo, o sae lẹliẹ ewewe na no ẹta. Whaha oyena uruo. Hai go ewewe na kẹle oria nọ whọ gwọlọ jọ ru oware jọ kpobi.

◇ Otẹrọnọ ewewe nọ whọ be jọ ehru riẹ ru iruo na o rrọ aro ẹthẹ nọ a sigbe, fi oka họ aro ẹthẹ na rọ vẹvẹ ahwo unu whọ vẹ jẹ kare iẹe. Otẹrọnọ o gbẹ lọhọ re whọ kare ẹthẹ na ha, jọ ohwo jọ o dikihẹ etẹe nọ ọ rẹ vuẹ ahwo nọ a gwọlọ nya unuẹthẹ na inọ a rrọ etẹe ru iruo.

◇ Whọ kuvẹ hẹ re imava e gadiẹ ewewe ọvona, ajokpanọ a ru rie inọ imava e rẹ sae gadiẹe. *

[Oruvẹ-obotọ]

[Uwoho nọ o rrọ ẹwẹ-obe avọ 29]

Uzi Mosis o gwọlọ inọ a rẹ bọ ogbẹ wariẹ ehru uwou nọ ọ rrọ praprara