Kọ Whọ Kareghẹhọ?

Kọ whọ reawere ese Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

• Fikieme O rọ Gwọlọ nnọ Mesaya na O re Whu?

Ẹjiroro ivẹ jọ ena: Uwhu Jesu u dhesẹ inọ ohwo ọgbagba ọ rẹ sae yọrọ ẹgbakiete edawọ na e tẹ make ga. Ofariẹ, ọ hwosa uzioraha nọ emọ Adamu a reuku riẹ, onọ u ru rie lọhọ re a wo uzuazọ ebẹdẹ bẹdẹ.—12/15, ẹwẹ-obe avọ 22-23.

• Eme emamọ ẹme nọ a rẹ ta kugbe emọ o kugbe?

Orọnikọ thakpinọ who lele emọ ra t’ẹme no ọvo ho rekọ o kugbe enọ nọ whọ rẹ nọ ae, whọ vẹ jẹ rọ odiri gaviezọ kẹ iyo rai. Ahwo buobu a ruẹ no inọ oke emuore yọ obọdẹ oke nọ a rẹ rọ ta ẹme kugbe.—1/15, ẹwẹ-obe avọ 18-19.

• Eme ọ rẹ whae ze nọ ohwo ọ sae rọ wariẹ họ-ame?

Ọ rẹ sae wariẹ họ-ame otẹrọnọ ohwo na ọ jẹ lẹlẹ ru oware uyoma jọ nọ a sai ro si ohwo no ukoko o hae jọnọ ọ họ-ame no vẹre.—2/15, ẹwẹ-obe avọ 22.

• Evaọ ohare Jesu orọ ikpoko avọ eka na, amono ubi uwoma na u dikihẹ kẹ?

Jesu, ọnọ ọ rrọ Ọmọ ohwo na, ọ ruẹrẹ udhu na fihọ evaọ etoke odibọgba otọakpọ riẹ. No Pẹntikọst 33 C.E. vrẹ, a kọ emamọ ubi na okenọ a rọ ẹzi na wholo Ileleikristi wọhọ emọ Ọghẹnẹ, koyehọ emọ Uvie na.—3/15, ẹwẹ-obe avọ 20.

• Ẹvẹ a rọ rehọ enọ e wọhọ eka nọ Jesu ọ jọ ohare riẹ ta ẹme te na ziọ uwou emu Jihova? (Mat. 13:30)

Orugba ohare nana o rehọ oke krẹkri evaọ etoke ekuhọ uyerakpọ na. A be rehọ emọ Uvie na nọ a rọ ẹzi wholo na, koyehọ eka ẹwoho na, ziọ uwou emuọriọ Jihova nọ a tẹ rehọ ae ziọ ukoko Ileleikristi na no hayo nọ a te wo osohwa odhiwu rai no.—3/15, ẹwẹ-obe avọ 22.

• Amono a vuhu ebe nọ a rọ ẹzi Ọghẹnẹ kere jẹ ta nọ enana e rẹ jọ Ikereakere Griki Ileleikristi na?

Orọnikọ ogbẹgwae ichọche hayo osu egagọ jọ họ. Ukpoye, Ileleikristi uzẹme ae a rọ ẹkwoma obufihọ ẹzi ọfuafo vuhu ikere nọ a rọ ẹzi Ọghẹnẹ kere. Onana yọ uzẹme keme ‘otọ-oriẹ ẹzi’ o jọ usu ekẹ igbunu nọ a kẹ ukoko Ileleikristi na evaọ ikpe-udhusoi ọsosuọ. (1 Kọr. 12:4, 10)—4/1, ẹwẹ-obe avọ 28.