Jọ Gaga Evaọ Abọ-Ẹzi nọ Whọ Tẹ Be Rẹrote Omoni Ra nọ Ọ Be Mọ

A JỌ ugbuke Kim nọ ọ rrọ omọvo Isẹri Jihova ruẹ ẹgbẹ jọ, nọ a kiẹ riwi a tẹ ruẹ nọ kpakọ ẹyao-ọta. * Steve, ọzae riẹ, ọ ta nọ: “Nọ a bru oware nọ o ta fihọ iẹe ugbuke na no, a tẹ rọ okwakwa usiwo-imu nọ a rẹ rọ ruẹ oma ohwo lafi kiẹ oma riẹ riwi jẹ kẹe imu nọ i wo ẹgba gaga. Oghẹrẹ usiwo nana o tẹ whae ze nọ ẹgba ọ gbẹ rọ jariẹ oma ha. Ọ gbẹ jẹ sae nya no oria ruọ oria tere he.”

Kọ whọ sae jọ iroro ra ruẹ edada Steve, nọ o bi rri aye riẹ nọ o you gaga na nọ o bi lele ẹyao oyoma nana muabọ? Ẹsejọhọ ohwo uviuwou ra jọ nọ ọ kpekpe owhẹ oma gaga ọ be ruẹ uye ẹyao ọgaga jọ hayo owho. (Ọtausi. 12:1-7) O tẹ rrọ ere, whọ riẹ inọ re whọ sae rẹrote ohwo na ziezi, o gwọlọ nọ whọ rẹ rẹrote oma ra. Whọ gbẹ bọ oma ra ga evaọ abọ-ẹzi hi, onana o rẹ sai kpomahọ owhẹ nọ who re ro wo elọhoma evaọ iroro gbe ugboma te epanọ whọ gbẹ te sae rọ rẹrote ẹgwọlọ ohwo nọ ọ be mọ na ziezi hi. Ẹvẹ whọ sae rọ yọrọ edikihẹ abọ-ẹzi ra nọ whọ tẹ be rẹrote omoni ra nọ ọ be mọ hayo nọ ọ kpako no? Eme Ileleikristi efa evaọ ukoko na a rẹ sai ru ro dhesẹ ororokẹ rọkẹ ohwo otiọye nọ oma o ga ha na?

Yọrọ Edikihẹ Abọ-Ẹzi Ra—Oghẹrẹ Vẹ?

Re whọ sae yọrọ edikihẹ abọ-ẹzi jẹ rẹrote oma ra nọ whọ tẹ be rẹrote omoni ra nọ ọ be mọ, o gwọlọ nọ who re ru inwene jọ jẹ momaa iruẹru ra gbe araha ugho lele uyero nọ o rrọ otọ na. Itẹ 11:2 o ta nọ: “Areghẹ ọ rẹ jọ rọ kẹ enọ e rehọ oma kpotọ.” “Rehọ oma kpotọ” nọ a jọ etenẹ fodẹ na u dhesẹ epanọ ohwo ọ rẹ riẹ ọnyaba riẹ. Re oma o siọ owhẹ ba ẹwhọlọ fihotọ, o sae gwọlọ nọ whọ kiẹ omaa gbe ewha-iruo ra riwi.

 Steve o dhesẹ orimuo je vuhu umuo nọ ọ rẹ sai ru ba ẹkwoma owha-iruo riẹ nọ ọ wariẹ kiẹ riwi. U te no enuokọ riẹ no, ọye ọ jọ ọsẹro usiuwoma ota gbe ọnọ o re koko iruẹru ugboma ekpako na họ evaọ ukoko rai evaọ Ireland. Ọ tẹ jẹ jọ omọvo Ogbẹgwae Ẹmeọta-Kugbe Ahwo Iwou-Imu evaọ ẹkwotọ rai. Steve ọ ta nọ: “Kim ọ dheva ẹdẹvo ho inọ mẹ be nya se iẹe ba roma kẹ ewha-iruo ukoko enana ga hrọ.” Steve o fibae nọ: “Rekọ mẹ riẹ inọ ewha-iruo na i gine bu omẹ uzou hrọ.” Eme Steve o ru? Ọ ta nọ: “Nọ mẹ lẹ kpahe iẹe no, me te si obọ no owha-iruo ọnọ o re koko iruẹru ugboma ekpako na họ. Mẹ gbẹ jọ ọkpako ukoko, rekọ ewha-iruo ukoko na jọ nọ me si obọ no o kẹ omẹ uvẹ nọ me je ro wo oke kẹ Kim jẹ rẹrotei wọhọ epanọ o gwọlọ.”

Nọ oke o be nyaharo na, oma Kim u te ti kiehọ omojọ. Steve avọ Kim a tẹ wariẹ kiẹ uyero rai riwi, kẹsena avọ obufihọ aye na, Steve ọ tẹ wariẹ rehọ ewha-iruo nọ o si obọ no vẹre evaọ ukoko na. Steve ọ ta nọ: “Mẹ avọ aye mẹ ma wuhrẹ epanọ ma re ro ru utho nọ oma riẹ o kẹ uvẹ te.” Steve o fibae nọ: “Me yere Jihova gaga kẹ obufihọ riẹ, me te je yere aye mẹ kẹ uketha nọ ọ be kẹ omẹ ababọ unoma uguo ghelọ ẹyao riẹ na.”

 Joma je roro kpahe oriruo Jerry nọ ọ rrọ ọsẹro ọnyawariẹ, gbe Maria, aye riẹ. A ru inwene evaọ utee rai re a ruẹse rẹrote ọsẹgboni ọzae na nọ e kpako no. Maria ọ ta nọ: “Mẹ avọ ọzae mẹ ma fi utee họ inọ ma re kpohọ iruo imishọnare evaọ orẹwho ofa.” O fibae nọ: “Whaọ, Jerry ọvo họ ọmọ nọ ọsẹgboni riẹ a yẹ yọ a gwọlọ ẹruorote. Fikiere, ma tẹ daji Ireland re ma ruẹse rẹrote ai. Onana u ru nọ ma sae rọ jọ kugbe ọsẹ Jerry evaọ obọ ẹsipito kẹse kẹse taure o te ti whu. Enẹna, ma be hai lele oni Jerry t’ẹme hayo rue riẹ kẹdẹ kẹdẹ, yọ oria mai o kẹle te epanọ ma sai ro tei oma vẹrẹ nọ ọ tẹ gwọlọ obufihọ. Ukoko nọ oni Jerry o bi kuomagbe u bi fi obọ họ kẹe gaga, nọ u ru nọ ma sae rọ daji iruo ọsẹro ọnyawariẹ.”

Oghẹrẹ nọ Amọfa A Sai ro Fi Obọ Họ

Nọ Pọl ukọ na ọ jẹ ta kpahe oware nọ a rẹ sai ru kẹ eyae-uku nọ e kpako no evaọ ukoko na, o kere nọ: “Otẹrọnọ ohwo jọ ọ sae guọlọ kẹ imoni riẹ hẹ, yọ ọ sae guọlọ kẹ uwou riẹ gbe he, ohwo ọyena ọ vro orọwọ na no, o te je yoma vi ohwo nọ ọ rọwo ho.” Pọl ọ kareghẹhọ ibe Ileleikristi riẹ inọ re egagọ rai e jọ “onọ Ọghẹnẹ o re miẹ,” o gba rai họ inọ a rẹ rẹrote esẹgbini nọ i yẹ rai gbe esẹgbini ilogbo rai evaọ abọ ugho. (1 Tim. 5:4, 8) Dede na, amọfa nọ a rrọ ukoko na a sai fi obọ họ, yọ ere u fo nọ a ru.

Muẹrohọ oriruo Hakan avọ Inger, ọzae-avọ-aye jọ evaọ obọ Sweden nọ e kpako no. Hakan ọ ta nọ: “Nọ edọkita ọ kiẹ via inọ aye mẹ o wo ẹyao-ọta, akpọ o gbe omai unu. Inger o wo omokpokpọ n’otọ ze. Rekọ enẹna, kẹdẹ kẹdẹ ma be hai kpohọ ẹsipito, yọ imu nọ ọ be rehọ na e be wha ebẹbẹ efa ze. Etoke nana kpobi uwou ọvo Inger ọ jẹ jọ, yọ o gwọlọ nọ mẹ rẹ jọ kugbei jẹ rẹrote ei.” Ẹvẹ inievo ukoko rai a ro fi obọ họ kẹ Hakan avọ Inger?

Ekpako ukoko na a ru ọruẹrẹfihotọ re Hakan avọ Inger a rọ ẹkwoma ifonu hae gaviezọ kẹ iwuhrẹ Ileleikristi evaọ uwou rai. U te no ere no, inievo na, te erọ emetẹ gbe erọ emezae a jẹ hai weze bru rae jẹ rọ ifonu se ai. A jẹ hai vi ileta gbe ekade se ai re. Hakan ọ ta nọ: “Ma ruẹ imuẹro obufihọ Jihova gbe inievo na kpobi.” Ọ ta re inọ: “Obufihọ nana u ru omai sae yọrọ edikihẹga abọ-ẹzi mai. Ọghẹnẹ o ru kẹhẹ, oma Inger u kpo no, ma wariẹ mu iwuhrẹ họ ẹnya no evaọ obọ Ọgwa Uvie.” Nọ inievo Ileleikristi a tẹ be dao utho ẹgba rai kpobi ro fi obọ họ kẹ ahwo nọ a be mọ, gbe otu nọ ọ kpako no evaọ udevie rai, a bi dhesẹ inọ a rrọ ‘egbẹnyusu nọ e rrọ rọkẹ eyowo ẹsikpobi.’—Itẹ 17:17.

Omodawọ Ra O be Were Jihova

Evaọ uzẹme, re a rẹrote ohwo uviuwou nọ ọ be mọ o lọhọ tere he. O make rrọ ere na, Devidi o kere nọ: “Oghale u te ọnọ ọ rẹ kareghẹhọ iyogbere [hayo, iruori],” wọhọ oriruo ohwo nọ ọ gwọlọ obufihọ evaọ etoke ẹyao.—Ol. 41:1.

Fikieme ohwo nọ ọ be rẹrote ọnọ ọ be mọ ọ sai ro wo oghale hayo evawere? Itẹ 19:17 o ta nọ: “Ohwo nọ o fiobọhọ kẹ iyogbere [hayo, iruori] yọ ỌNOWO na o momo kẹ, ọ rẹte hwa e osa iruo riẹ.” Ọghẹnẹ uzẹme na o wo ọdawẹ kẹ idibo omaurokpotọ riẹ nọ e be mọ, yọ ọ rẹ ghale ohwo nọ o dhesẹ ọdawẹ kẹ idibo riẹ nana. Devidi, ọso-ilezi na ọ so nọ: “ỌNOWO ọ te rọ ẹro ro te [ohwo otiọye na] okenọ o kiẹzẹ rọ ẹmọ; eva oke ẹyao riẹ, who re ti siyei no ọyawa riẹ kpobi.” (Ol. 41:3) O rẹ sai mu omai ẹro inọ ohwo nọ ọ rẹ rẹrote hayo dhesẹ ọdawẹ kẹ ọnọ ọ be mọ o te wo ẹbẹbẹ jọ, Jihova o ti fi obọ họ kẹe.

U woma kẹhẹ nọ ma rọ riẹ inọ Jihova Ọghẹnẹ o bi muẹrohọ je wo ọjẹrehọ kpahe iruo nọ ma bi ru rọ rẹrote omoni mai nọ ọ be mọ! Dede nọ ẹruorote otiọye o gwọlọ omodawọ mi omai, Ikereakere na e kẹ omai imuẹro nọ “iwẹgọ i tieyena e rẹ were Ọghẹnẹ gaga.”—Hib. 13:16.

[Oruvẹ-obotọ]

[Iwoho nọ e rrọ ẹwẹ-obe avọ 18]

Yọrọ edikihẹ abọ-ẹzi ra, jẹ obufihọ amọfa rehọ re