Akothiho nọ Ọrivẹ-Orọo Ohwo O te bi Yeri Uzuazọ Agbava

MARGARITA avọ Raúl ọzae riẹ a roma kẹ iruo Jihova ikpe buobu no wọhọ egbodibo oke-kpobi. * Rekinọ a nwani yẹ ọmọ ọsosuọ rai no, ọzae na, Raúl o te bi si uke kpemu evaọ egagọ Jihova. Ukuhọ riẹ, Raúl o te mu uzuazọ ọfariẹ-ogbe họ eyeri, onọ o wha riẹ ze nọ a ro si ei no ukoko. Margarita, aye riẹ ọ ta nọ: “Nọ onana o via, o j’omẹ oma inọ me bi ti whu. Fiki iroro nọ e gb’omẹ udu, mẹ gbẹ riẹ onọ me re ru hu.”

Nọ Jane avọ ọzae riẹ a rọo no, u kri hi, ọzae na ọ tẹ raha evaifihọ gbe uyoyou nọ Jane o wo kẹe evaọ edhere nọ u wo ohẹriẹ no orọ imava-orọo nọ ma kake fodẹ na. Ọzae na ọ jẹ hai kpei. Jane ọ ta nọ: “Ẹdẹ ọsosuọ nọ ọ bọwo omẹ, akpọ o gb’omẹ unu, oma u ririe omẹ avọ ọghọ nọ u si no omẹ. Ọ tẹ lẹ omẹ nọ mẹ rọ vrẹ riẹ, onana u te ti zihe ruọ uruemu riẹ, o te kpe omẹ no ọ vẹ lẹ omẹ nọ mẹ rọ vrẹ riẹ. Mẹ rehọ e riẹ inọ wọhọ Oleleikristi, o gba omẹ họ ẹsikpobi nọ mẹ rẹ rọvrẹ jẹ kpairoro vrẹ. Mẹ tẹ jẹ rehọ iẹe inọ oware ovivie o rrọ re mẹ ta ẹbẹbẹ uviuwou mai kẹ omọfa—makọ ekpako ukoko mai. Enẹ o gboja kẹ  omẹ ikpe buobu, yọ mẹ be rọ vrẹ riẹ. Evaọ etoke yena kpobi, mẹ jẹ hai roro inọ oware jọ o riẹ nọ mẹ rẹ sai gbe ru re ọzae mẹ o you omẹ. Uwhremu na nọ ọ dhẹ siọ omẹ avọ ọmọtẹ mai ba no, o tẹ j’omẹ oma inọ mẹ daoma te he, inọ mẹ hai gbe ru oware jọ hayo ta eme jọ nọ e hai kru orọo mai na dikihẹ.”

Wọhọ Margarita avọ Jane, o sae jọnọ whọ be ruẹ uye iroro, ẹbẹbẹ ugho, gbe ẹbẹbẹ kpahe ẹyọrọ edikihẹ abọ-ẹzi ra fikinọ ọzae ra o bi yeri uzuazọ agbava. Hayo o sae jọnọ whẹ yọ ọzae nọ ọ be ruẹ uye iroro gbe ebẹbẹ efa fikinọ aye ra o bi gbọfariẹ. Wọhọ epanọ Ebaibol e ruẹaro riẹ, avro ọ riẹ hẹ inọ ma be rria “oke ẹbẹbẹ.” Eruẹaruẹ nana i dhesẹ inọ evaọ “edẹ urere” na, usu okpekpe uviuwou u ti whrehe, avọ evega nọ i ti dhesẹ oma via ẹsibuobu. Ejọ e te ta nọ a be gọ Ọghẹnẹ, rekọ a vẹ te rọ uruemu rai vro riẹ. (2 Tim. 3:1-5) Ebẹbẹ nana e rẹ sai kpomahọ Ileleikristi uzẹme re; nọ o rrọ ere na, eme ọ rẹ sai fi obọ họ kẹ owhẹ thihakọ nọ ọrivẹ-orọo ra o te bi yeri uzuazọ agbava?

Rri Oma Ra Epanọ Jihova O bi Rri Owhẹ

Evaọ oke ọsosuọ, o sae jọ bẹbẹ re whọ rọwo inọ ohwo nọ who you tere o re ru owhẹ oware odada utioye. Whọ sae tubẹ fo omara dede inọ ẹsejọhọ who ru oware jọ nọ o wọ ọrivẹ-orọo ra ru oware othọthọ yena.

Rekọ kareghẹhọ inọ makọ Jesu nọ ọ jọ ohwo ọgbagba na, ohwo nọ o fi eva họ je you ziezi o vivi rie. Jesu ọ roma totọ roro jẹ lẹ taure ọ tẹ salọ ikọ riẹ nọ i zihe ruọ egbẹnyusu ekpekpe riẹ. Evaọ oke yena, ikọ 12 na kpobi e jọ idibo Jihova nọ a fi eva họ. Fikiere, avro ọ riẹ hẹ inọ o da Jesu gaga nọ Judas “o zihe ruọ ovivie.” (Luk 6:12-16) Dede na, Jihova ọ fuọ Jesu hu rọkẹ owọ othọthọ nọ Judas ọ jẹ.

Uzẹme, ọrivẹ-orọo ọvo nọ ọ gba ọ riẹ hẹ. Eware e rẹ thọ imava-orọo obọ. Ọso-ilezi jọ nọ o vuhu onana mu ọ rọ ẹgba ẹzi kere inọ: “O ỌNOWO, otẹrọnọ, who roro imuemu mai, ỌNOWO kọ ono ọ rẹ sai dikihẹ?” (Ol. 130:3) Evaọ aruorokele Jihova, u fo nọ imava-orọo a rẹ kpairoro vrẹ ethobọ ohwohwo.—1 Pita 4:8.

Dede na, “mai kpobi ma ti . . . gu ọvuọ ẹkẹunu riẹ kẹ Ọghẹnẹ.” (Rom 14:12) Otẹrọnọ ọrivẹ-orọo jọ o wo uruemu nọ ọ rẹ rọ rehọ eka fa ọrivẹ-orọo riẹ ovao hayo wo uruemu othọthọ ofa jọ, ọye o ti gu ẹkẹunu riẹ kẹ Jihova. Jihova o mukpahe ozighi gbe eme ekela, fikiere u wo ẹjiroro ọvo ho nọ ọrivẹ-orọo jọ ọ jẹ rọ edhere otiọnana dhesẹ ababọ uyoyou je si ọghọ no ọrivẹ-orọo riẹ oma. (Ol. 11:5; Ẹf. 5:33; Kọl. 3:6-8) Ẹhẹ, otẹrọnọ Oleleikristi jọ o re muofu ọkpoo ẹsikpobi yọ ọ be rọwo nwene he, a re si ei no ukoko. (Gal. 5:19-21; 2 Jọn 9, 10) U fo ho re udu u brukpe ọrivẹ-orọo ohwo otiọye na otẹrọnọ ọ nyae vuẹ ekpako ukoko na kpahe uruemu uyoma ọrivẹ-orọo riẹ. Evaọ uzẹme, Jihova ọ rẹ re ohrọ erivẹ-orọo nọ a bi gboja kẹ.

Nọ ohwo o te bruẹnwae, orọnikọ ọrivẹ-orọo riẹ ọvo ọ thuzi mukpahe he, rekọ te Jihova re. (Mat. 19:4-9; Hib. 13:4) Otẹrọnọ ọnọ ọ riẹ onahona ha na ọ be daoma rria lele ehri-izi Ebaibol, u du fo ho re ọ fuọ omariẹ rọkẹ ẹnwae-obro ọrivẹ-orọo riẹ.

Kareghẹhọ inọ Jihova ọ riẹ epanọ o be kẹ owhẹ uye te. Jihova o dhesẹ inọ ọyomariẹ yọ ọzae kẹ orẹwho Izrẹl, yọ ma rẹ jọ Ẹme riẹ ruẹ eria buobu nọ e ta kpahe epanọ o da Jihova te nọ orẹwho na u duomahọ ọfariẹ-ogbe abọ-ẹzi. (Aiz. 54:5, 6; Jeri. 3:1, 6-10) Otẹrọnọ ọrivẹ-orọo ra o bi yeri uzuazọ agbava, jọ u mu owhẹ ẹro inọ Jihova ọ be ruẹ irui-oviẹ ra. (Mal. 2:13, 14) Jihova ọ riẹ inọ whọ gwọlọ uduotahawọ gbe omosasọ.

Oghẹrẹ nọ Jihova Ọ rẹ rọ Kẹ Omosasọ

Ọruẹrẹfihotọ ukoko Ileleikristi na yọ edhere jọ nọ Jihova ọ rẹ rọ kẹ omosasọ. Jane ọ rọ enẹ wo omosasọ. Ọ ta nọ: “Iweze ọsẹro ọnyawariẹ ziọ ukoko mai u kie fihọ okenọ  ọkora ọ rọ da omẹ oma fia. Ọsẹro ọnyawariẹ na ọ ruẹ epanọ ọkora ọ d’omẹ oma te fiki ẹgwae orọo-ofa nọ ọzae mẹ ọ jẹ gba. Ọ raha oke ro fi obọ họ kẹ omẹ roro kpahe ikere wọhọ 1 Ahwo Kọrint 7:15. Eria Ebaibol nọ o se kẹ omẹ gbe eme ẹwo riẹ i fi obọ họ kẹ omẹ nọ mẹ gbẹ jẹ rọ fuọ oma mẹ hẹ, jẹ lẹliẹ udu kie omẹ vi.” *

Margarita nọ ma jọ emuhọ fodẹ na, ọ ruẹ vuhumu re inọ Jihova ọ rẹ rọ ẹkwoma ukoko Ileleikristi na fi obọ họ. Ọ ta nọ: “Nọ mẹ ruẹ vuhumu inọ ọzae mẹ o bi ku obọ rẹriẹ hẹ, mẹ avọ emọ mẹ ma tẹ kwa kpohọ ẹwho ọfa. Nọ ma te obei, mẹ ruẹ ibriwou ivẹ haya nọ ma rẹ rria. Okiokiọ riẹ, nọ mẹ jẹ kua eware no ekpa mai avọ oma uweri, me te yo edo ohwo jọ nọ o kporo ẹthẹ mai. Me je roro inọ ẹsejọhọ aye nọ o wo uwou na nọ ẹthẹ riẹ ọ nwane kẹle ọmai. Avọ igbunu, kpakọ oniọvo-ọmọtẹ nọ o ru uwuhrẹ Ebaibol kugbe oni mẹ, ọnọ o fi obọ họ kẹ uviuwou mai riẹ uzẹme na. O rẹro nọ ọ te ruẹ omẹ evaọ etenẹ vievie he, oware nọ o wọ riẹ ze họ uwuhrẹ Ebaibol nọ o bi ru kugbe aye nọ o wo uwou na. Me te kuẹwẹ—mẹ sae gba oma mẹ hẹ. Mẹ ta ẹbẹbẹ mẹ kẹe, mai imava ma te muhọ ẹviẹ. Ọ tẹ nwani ru ọruẹrẹfihotọ nọ ma ro kpohọ ewuhrẹ ẹdẹ yena. Inievo ukoko na a dede omai rehọ, ekpako ukoko na a te ru ọruẹrẹfihotọ nọ a re ro fi obọ họ kẹ omẹ rẹrote ẹgwọlọ abọ-ẹzi uviuwou mẹ.”

Oghẹrẹ nọ Amọfa A Sai ro Fi Obọ Họ

Ahwo nọ e rrọ ukoko na a rẹ sai fi obọ họ evaọ idhere buobu. Wọhọ oriruo, Margarita ọ jẹ gwọlọ iruo. Uviuwou jọ evaọ ukoko na o fialoma via inọ oke kpobi nọ o gwọlọ, a rẹ rẹrote emọ Margarita nọ a te no isukulu kpozi.

Margarita ọ ta nọ: “Oware jọ nọ o ginẹ d’omẹ ẹro fia họ, unevaze nọ inievo na a jẹ hai ro se omẹ avọ emọ mẹ gboma kpohọ usiuwoma ota.” Ẹkwoma obufihọ utioye, inievo nọ e rrọ ukoko na a be ‘wha uye ohwohwo,’ je “ru uzi Kristi na gba.”—Gal. 6:2.

Obufihọ utionana o rẹ ginẹ were ahwo nọ a be ruẹ uye fiki uzioraha amọfa. Monique, aye jọ nọ ọzae ọ dhẹ siọ emọ ene ba kẹ, avọ osa nọ u bu te edọla 15,000 (₦2,220,000), ọ ta nọ: “Uyoyou nọ inievo ukoko na a dhesẹ o rro kẹhẹ. Mẹ riẹ epanọ mẹ hai ro te inẹnẹ hẹ o gbẹ rrọ uketha rai hi. Mẹ sae ta nọ Jihova ọ kẹ omẹ inievo iyoyou abọ-ẹzi, enọ e raha oke rai ro fi obọ họ kẹ emọ mẹ. O kẹ omẹ evawere nọ mẹ rọ ruẹ emọ mẹ nọ e jẹ rro haro evaọ abọ-ẹzi fiki obufihọ utioye na. Okenọ mẹ  gwọlọ uthubro, ekpako ukoko na i fi obọ họ kẹ omẹ. Okenọ mẹ gwọlọ ohwo nọ mẹ rẹ ta ebẹbẹ mẹ kẹ, ekpako na a gaviezọ kẹ omẹ.”—Mak 10:29, 30.

Uzẹme, ogbẹnyusu oyoyou ọ rẹ riẹ ẹruoke nọ u ro fo ho re o si iroro ohwo kpohọ oware nọ o be dae. (Ọtausi. 3:7) Margarita ọ ta nọ: “Ẹsibuobu, o jẹ hae were omẹ nọ ẹmeọta mẹ kugbe inievo-emetẹ nọ e rrọ ukoko okpokpọ nọ mẹ rrọ na o tẹ rrọ orọ iruo usiuwoma ota, ebe-iwuhrẹ Ebaibol, emọ mai—oware ofa kpobi, u te no ebẹbẹ mẹ no. O kẹ omẹ evawere gaga inọ a jẹ hai ru omẹ kareghẹhọ eware nọ e via kẹ omẹ vrẹ no ho, a te je fi obọ họ kẹ omẹ to uzuazọ okpokpọ họ.”

Whọ K’uvẹ kẹ Ẹzi Orukele He

U te no ẹfuọ nọ whọ rẹ sae fo omara inọ ẹsejọhọ whẹ ọ wha riẹ ze nọ ọrivẹ-orọo ra ọ rọ jẹ ekpehre owọ no, ẹsejọ whọ rẹ sae vioja inọ ọrivẹ-orọo ra o fi owhẹ họ oja nọ whọ rrọ na. Whọ tẹ kẹ evedha nana uvẹ, o sai ru nọ who je gbabọkẹ ọtamuo ra re whọ gọ Jihova te urere. Wọhọ oriruo, evedha e rẹ sae wọ owhẹ gwọlọ edhere kpobi nọ who re ro ru ọrivẹ-orọo ra kele.

Whọ tẹ ruẹ nọ iroro orukele itieye e be hae ziọ owhẹ udu ẹsikpobi, whọ sai roro kpahe oriruo Joshua avọ Kelẹb. Ezae ẹrọwọ nana a fi uzuazọ rai họ ọza nyae kiẹ Ẹkwotọ Eyaa na riwi. Ekiotọ nọ i kiọkọ a kare ẹrọwọ je ru ahwo orẹwho na ghẹmeeyo kẹ Jihova. Ahwo Izrẹl jọ a jẹ tubẹ gwọlọ rehọ itho fi Joshua avọ Kelẹb kpe fikinọ a jẹ tuduhọ orẹwho na awọ inọ a fi ẹrọwọ họ Jihova. (Ik. 13:25-14:10) Aghẹmeeyo nana u ru nọ orẹwho Izrẹl soso u ro ghoro ikpe 40 evaọ udhude, yọ Joshua avọ Kaleb a jọ usu na dedenọ ae a soriẹ hẹ.

Dede nọ ẹsejọhọ onana o kẹ Joshua avọ Kelẹb uye, a kuvẹ hẹ re uzioraha imoni rai u ru ae wo ẹgo họ eva. A tẹrovi ẹyọrọ edikihẹ abọ-ẹzi rai. Nọ ikpe 40 nọ a jọ udhude na i te oba no, Joshua avọ Kelẹb gbe ahwo Livai a zọ evaọ usu oge yena je wo uvẹ nọ a rọ ruọ Ẹkwotọ Eyaa na.—Ik. 14:28-30; Jos. 14:6-12.

Owọjẹ othọthọ ọrivẹ-orọo ra o sai ru nọ whọ jẹ rioja evaọ etoke jọ. Orọo na o sae fa, yọ whọ rẹ sai wo edada iroro gbe ọbẹwẹ ugho. Dede na, ukpenọ whọ rẹ kuvẹ re edada itieye e kẹ owhẹ ọkora, kareghẹhọ inọ Jihova ọ riẹ edhere nọ ọ mai fo nọ ọ rẹ rọ hwosa kẹ ahwo nọ a keke aro họ gbabọkẹ izi riẹ, wọhọ epanọ o via kẹ emọ Izrẹl nọ e kare ẹrọwọ evaọ udhude na.—Hib. 10:30, 31; 13:4.

Whọ rẹ Sai Thihakọ!

Ukpenọ whọ rẹ kuvẹ re iroro ethọthọ i fi ọkora họ owhẹ oma, hae rehọ eme Jihova vọ iroro ra. Jane ọ ta nọ: “Mẹ ruẹ nọ isase Uwou-Eroro Na avọ Awake! nọ a ru fihọ ikporakporo nọ mẹ jẹ hae gaviezọ kẹ i fi obọ họ kẹ omẹ thihakọ. Iwuhrẹ ukoko na e kẹ omẹ ọbọga ologbo re. Abọ owo evaọ iwuhrẹ ukoko u fi obọ họ kẹ omẹ kpairoro vrẹ ebẹbẹ mẹ. Epọvo na usiuwoma ota u fi obọ họ kẹ omẹ re. Amọfa nọ me je fi obọ họ kẹ bọ ẹrọwọ rai ga fihọ Jihova u ru ẹrọwọ mẹ ga re. Yọ obufihọ kẹ emọ-uwuhrẹ Ebaibol mẹ u fi obọ họ kẹ omẹ tẹrovi eware nọ e mae roja.”

Monique, ọnọ ma t’ẹme te no vẹre na ọ ta nọ: “Ekpohọ iwuhrẹ ukoko ẹsikpobi gbe usiuwoma ota wọhọ epanọ o rẹ lọhọ kẹ omẹ te u bi fi obọ họ kẹ omẹ thihakọ. Onana o lẹliẹ usu uviuwou mẹ kpekpe je ru omai sikẹle inievo ukoko na vi epaọ ọsosuọ no. Ẹbẹbẹ nọ o te omẹ na u fi obọ họ kẹ omẹ vuhu oria nọ mẹ jọ kiekpo. Ẹbẹbẹ na ọ ginẹ jọ odawọ kẹ omẹ, rekọ Jihova o bi fi obọ họ kẹ omẹ thihakọ.”

Whọ rẹ sai thihakọ oghẹrẹ edawọ evona. Ghelọ edada nọ owojẹ ọrivẹ-orọo ra o wha se owhẹ kẹhẹ, daoma ru lele ohrẹ nọ Pọl ọ rọ ẹgba ẹzi Ọghẹnẹ kere na: “Je oma oware uwoma uruo o rọ omai hi: keme u re ti krẹ hẹ re ma te kọrọ ibi rai, otẹrọnọ oma o rọ omai hi.”—Gal. 6:9.

[Oruvẹ-obotọ]

[Uwoho nọ o rrọ ẹwẹ-obe avọ 31]

O rẹ were otu nọ erivẹ-orọo rai i gbabọkẹ nọ inievo i te bi lele ai kpohọ usiuwoma ota