Okugbe Evaọ Uyoyou Iyẹrẹ Ẹgwae Ẹgbukpe

OMA o jẹ were ohwo kpobi evaọ Ọgwa Okokohọ Isẹri Jihova nọ o rrọ Jersey City, New Jersey, U.S.A. Isẹri Jihova nọ i bu vrẹ idu isoi (5,000) a kokohọ evaọ ohiohiẹ October 3, 2009, rọkẹ ẹgwae ẹgbukpe ọrọ avọ 125 orọ Watch Tower Bible and Tract Society of Pennsylvania. Amọfa buobu a jọ Ebẹtẹle esa nọ e rrọ United States gbe orọ Canada rọ ẹkwoma itehe-ughe gbe ifonu ruẹ jẹ gaviezọ kẹ ọruẹrẹfihotọ na. Isẹri nọ e gaviezọ kẹ ọruẹrẹfihotọ na a te idu ikpegbesa, udhusoi akuava gbe ọgba gbisoi (13,235), yọ aikpobi evaọ okugbe ọvo nọ a wo fiki uyoyou rai kẹ Jihova a reawere ẹgwae euwa esa na.

Geoffrey Jackson, omọvo Ugboma Esuo na ọ jọ ohwo-agbara evaọ ẹgwae na. O mu ọruẹrẹfihotọ na họ ẹkwoma utu ahwo uviuwou Ebẹtẹle nọ o zizie te so ile jọ no obe-ile ọkpokpọ mai na ze. David Splane, omọfa Ugboma Esuo na ọ kpọ inievo nọ e so ile na, ọ tẹ jẹ ta ẹme kpẹkpẹe kpahe epanọ ile i wuzou te evaọ egagọ uzẹme. A zizie inievo nọ e jọ ẹgwae na kpobi inọ a so ile ekpokpọ esa; ahwo uviuwou Ebẹtẹle na a kake so ile na, kẹsena ogbotu na o te kuomagbe ae so. Omakugbe obọdẹ nana ọvo ma jo ru ọruẹrẹfihotọ utu ile-esuọ; orọnikọ enẹ o rẹ jọ evaọ iwuhrẹ ikoko hayo ikokohọ họ.

Iyẹrẹ nọ I No Iwou Ogha Ze

Inievo isoi erọ Egbẹgwae Uwou Ogha sa-sa e jọ ẹgwae nana n’iyẹrẹ kpahe erẹwho rai. Kenneth Little ọ n’iyẹrẹ inọ kẹlena, uwou ogha Canada o be te hai kporo abọ buobu erọ emagazini orẹwho United States gbe erọ Canada omariẹ, onọ u ti ru ekporo ebe evaọ uwou ogha Canada rọ akuakpe bu vi epaọ anwẹdẹ. Re a sae nyate utee nana, a dẹ ẹjini ọkpokpọ jọ nọ a ti ro kporo ebe euwa ikpegbezeza kẹdẹ kẹdẹ.

Reiner Thompson ọ n’iyẹrẹ kpahe iruo Uvie na evaọ orẹwho Dominican Republic; Albert Olih o te dhesẹ epanọ iruẹru mai e be nyaharo te evaọ Nigeria. Emile Kritzinger nọ o no Mozambique ze, ọ n’iyẹrẹ inọ Isẹri na e ruẹ uye ukpokpoma ikpe buobu, uwhremu na evaọ 1992, egọmeti orẹwho na o te kuenu kẹ Isẹri Jihova wọhọ egagọ nọ a riẹ. Erẹwho esa nana i wo ẹvi buobu no evaọ unu iwhowho-uvie. Viv Mouritz nọ o no uwou ogha Australia ze ọ ta kpahe ẹnyaharo nọ ọ be roma via evaọ orẹwho East Timor, onọ uwou ogha Australia o be rẹrote.

Egbẹgwae Ugboma Esuo

Anwọ 1976 a ro ru ọruẹrẹfihotọ nọ egbẹgwae ezeza erọ Ugboma Esuo na e be rọ rẹrote iruẹru Isẹri Jihova kpobi. Nọ u te oria jọ, a tẹ jọ usu igodẹ efa na rehọ inievo jọ mu re a fi obọ họ kẹ ae. Enẹna, inievo 23 i bi fi obọ họ kẹ egbẹgwae ezeza na. A jọ usu enana kiẹ inievo ezeza riwi. A te ku ikpe iruo odibọgba oke-kpobi rai kugbe, i bu te ikpe udhusoi akuasa gbe udhuvẹ gbọvo (341)—yọ a tẹ ghale iẹe, omomọvo rai ọ raha te ikpe 57 no.

Don Adams nọ o mu iruo Ebẹtẹle họ evaọ 1943, ọ ta nọ esẹro egbẹgwae isoi nọ i kiọkọ eye i ru Ogbẹgwae Otu Ẹruọsa na via, yọ ogbẹgwae nana u re muẹrohọ inọ egbẹgwae isoi nọ i kiọkọ na i bi ru iruo kugbe ziezi. Ogbẹgwae Otu Ẹruọsa na o rẹ jowọ kpahe iyero idudhe nọ e roma via, te ukpokpoma, edhọ ekọto, okpẹtu nọ ọ roma via, gbe eware efa nọ i kpomahọ Isẹri Jihova wariẹ akpọ na họ nọ e gwọlọ owojẹ ovẹrẹ.

Dan Molchan ọ ta kpahe iruo Ogbẹgwae  Ẹruorote Ahwo Uwou Ogha, onọ u bi muẹrohọ ẹgwọlọ abọ-ẹzi gbe abọ-iwo orọ ahwo uviuwou Ebẹtẹle wariẹ akpọ-soso họ, enọ i bu te idu ikpegbizii, udhusoi akuaree, udhuvẹ gbe ikpegbọvo (19,851). David Sinclair ọ ta kpahe epanọ Ogbẹgwae Ebe-Iwhowho na o be rọ rẹrote edadẹ eware nọ a bi ro ru iruo evaọ iwou ogha wariẹ akpọ na họ. Kẹsena, Robert Wallen nọ ọ jọ Ebẹtẹle ru iruo kẹle ikpe 60 no, ọ tẹ ta kpahe epanọ Ogbẹgwae Iruo Ukoko na o be rọ kpọ jẹ rẹrote iruo usiuwoma ota na gbe iwuhrẹ ukoko idibo Jihova. William Malenfant ọ ta kpahe iruo egaga nọ Ogbẹgwae Ewuhrẹ na u bi ru evaọ ẹruẹrẹkpahe eme ikokohọ ubrotọ. Orọ urere, John Wischuk ọ tẹ ta kpahe epanọ Ogbẹgwae Ebe-Ikere na o be rọ rẹrote ekokohọ evuẹ gbe ekere ebe mai. *

Uzoẹme Ẹgbukpe 2010 O Tẹrovi Uyoyou

Inievo esa nọ e rrọ usu Ugboma Esuo na a ru eme esa nọ i kiọkọ. Gerrit Lösch ọ rọ onọ nana muhọ, “Kọ whọ gwọlọ nọ amọfa a you owhẹ?” Ọ ta nọ uyoyou yọ ugogo oware nọ ohwo-akpọ ọ gwọlọ, gbe inọ o rẹ kẹ omai kpobi omosasọ. Uyoyou u ru nọ ma rọ rrọ uzuazọ keme oye o wọ Jihova nọ ọ rọ ma omai. Uyoyou kẹ Jihova họ ẹjiroro nọ ọ mae rro nọ o be wọ omai ta usiuwoma je wuhrẹ ahwo.

Orọnikọ erivẹ mai ọvo ma re dhesẹ uyoyou kẹ hẹ rekọ te ewegrẹ mai. (Mat. 5:43-45) A ta udu họ ogbotu na awọ re a roro kpahe uye nọ Jesu ọ ruẹ fiki mai; a fa riẹ eviaviẹ, a rehọ e riẹ j’ijehwẹ, a nwoeya ku ei, jẹ rọ ọgbọdọ duwu ei. Ghelọ oja-oriọ nana kpobi, ọ lẹ Ọghẹnẹ inọ ọ rọ vrẹ elakpa nọ e kare riẹ fihọ ure-oja na. Kọ onana u gbe ru omai you rie viere? Kẹsena, Brọda Lösch o te whowho uzoẹme ẹgbukpe 2010 na: 1 Ahwo Kọrint 13:7, 8, ‘Uyoyou u re thihakọ eware kpobi. Uyoyou u re re he.’ Orọnikọ ẹruore uzuazọ ebẹdẹ bẹdẹ ọvo ma wo ho, rekọ te uvẹ nọ ma ti ro you amọfa jẹ reawere uyoyou amọfa bẹdẹ bẹdẹ.

Kọ Whọ be Dhẹ Enwenọ Ofofe?

Samuel Herd ọ rọ ọtadhesẹ mu ẹme riẹ họ. Ma rehọ iẹe nọ ogbẹnyusu ra jọ ọ wọ owhẹ fihọ omoto inọ wha kpohọ ugbo jọ nọ u thabọ te emaele 30. Evaọ obaro nọ whọ keria kugbei na, who te muẹrohọ oka nọ u re dhesẹ umuo epẹtiro na inọ epẹtiro e joma re omoto na no. Whọ tẹ ta kẹ ogbẹnyusu ra inọ epẹtiro omoto na e joma re no. Ọ tẹ ta kẹ owhẹ inọ whọ jọ udu u bru owhẹ hẹ; inọ epẹtiro nọ i te ilolo ene e gbẹ rrọ etanke omoto na. U ri kri hi na, epẹtiro omoto na i te re muotọ. Kọ u fo re a ‘kẹnyẹ epẹtiro rọ dhẹ omoto,’ nọ orọnọ onana o rẹ sae lẹliẹ omoto fu ku ohwo evaọ edhere na? O rẹ mai woma re a se epẹtiro vọ omoto. O gwọlọ nọ ma re se epẹtiro vọ eva, wọhọ odẹme, rọ eriariẹ Jihova vọ eva mai.

Nọ o rrọ ere na, o gwọlọ nọ ma re wo eriariẹ  d’oma ziezi ẹsikpobi. U wo idhere ene nọ ma sai ro ru onana. Orọ ọsosuọ, uwuhrẹ omobọ-ohwo nọ u re fi obọ họ kẹ omai wo otoriẹ Ebaibol na ẹkwoma Ebaibol na nọ ma re se kẹdẹ kẹdẹ. Orọnikọ ma re sei ọvo ho, rekọ o gwọlọ nọ ma re wo otoriẹ oware nọ ma se. Orọ avivẹ, o gwọlọ nọ ma re se Uwuhrẹ Ebaibol Uviuwou mai gboja. Kọ ma be hae rọ oke jọ koka koka se etanke eriariẹ mai vọ, manikọ umutho ma be hai fihọ iẹe? Orọ avesa, ekpohọ iwuhrẹ ukoko. Orọ avene, eroro-didi kpahe iruo Jihova evaọ oria nọ u dhoma. Olezi 143:5 o ta nọ: ‘Mẹ kareghẹhọ oke anwae, me roro kpahe eware nọ who ru no.’

‘Ikiẹrẹe na I ti Lo Via’

John Barr họ ọnọ ọ ta ẹme avesa, onọ o rrọ ẹme urere. Ọ jọ ẹme nana ta kpahe ohare Jesu orọ eka gbe ikpoko na. (Mat. 13:24-30, 38, 43) Jesu ọ jọ ohare yena ta kpahe “ezi orọ” hayo oke ivuẹvu, etoke nọ a ti ro koko “emọ uvie na” họ, a vẹ salọ ikpoko na fihọ abọvo jẹ mahe ae kufiẹ.

Brọda Barr o ru rie vẹ inọ iruo ahwo okokohọ nana e te jọ ribri hi. O se Matiu 24:34, onọ o ta nọ: “Oge ọnana ọ rẹ te vrẹ hẹ bẹsenọ eware enana kpobi e te gba no.” Isiava soso o se eme nana: “U muẹro nọ Jesu ọ be ta inọ otujọ nọ a rọ ẹzi wholo nọ e te ruẹ emuhọ uye ulogbo na a te riẹ otujọ nọ a rọ ẹzi wholo nọ e jariẹ evaọ okenọ oka na u muhọ evaọ 1914.” Ma riẹ ugogo unuikpe nọ “oge ọnana” o te rehọ họ, rekọ ma riẹ inọ eko ahwo ivẹ nana nọ e ruẹ ohwohwo na a ru rie via. Dede nọ enọ a wholo na a rrọ unuikpe ovona ha, eko ahwo ivẹ nana nọ i ru oge na via na a rria evaọ etoke ọvona, evaọ etoke edẹ urere na. O rrọ oware omosasọ re ma riẹ inọ erọ emaha evaọ otu nọ a wholo na nọ e rọ ẹro ruẹ erọ ekpako nọ e ruẹ emuhọ oka na evaọ 1914 na, a ti whu reno taure uye ulogbo na o tẹ te roma via ha.

“Emọ uvie na” a be rọ ọwhọ hẹrẹ osohwa obọ odhiwu rai, rekọ o gwọlọ nọ mai kpobi ma re kru ẹrọwọ mai ga je ru elo mai lo te urere. Uvẹ-ọghọ ulogbo o rrọ nọ ma be rọ rria etoke nọ a bi ro koko “eka” na họ.

Nọ a so ole ekuhọ no, Theodore Jaracz nọ ọ rrọ omọvo Ugboma Esuo na ọ tẹ lẹ olẹ ekuhọ. Ọruẹrẹfihotọ ẹgwae ẹgbukpe na ọ kẹ ọbọga kẹhẹ!

[Oruvẹ-obotọ]

[Ẹkpẹti nọ o rrọ ẹwẹ-obe avọ 5]

ISUKULU RỌKẸ EKPAKO UKOKO

Anthony Morris, ọmọvo Ugboma Esuo na ọ jọ ẹgwae ẹgbukpe na whowho inọ a ru ọruẹrẹfihotọ no nọ a te hai ro wuhrẹ ekpako ukoko n’oke t’oke. A muọ isukulu ekpako nana họ evaọ United States anwọ emuhọ ukpe 2008 evaọ oria ewuhrẹ Ukoko na nọ o rrọ Patterson, New York. A nwani ku ewuhrẹ utu avọ 72 họ no obọ, yọ ekpako ukoko nọ a wuhrẹ no anwẹnọ a ro muhọ na a bu te idu ezeza, udhusoi akuahrẹ gbe udhe (6,720). Iruo buobu e gbẹ r’otọ. Ekpako ukoko nọ e rrọ United States ọvo a bu vi idu udhone gbe ezeza (86,000). Fikiere, Ugboma Esuo na o kẹ uvẹ inọ muhọ no December 7, 2009, a jọ Brooklyn, New York ru isukulu na re.

Omaa na họ re a rọ emerae ivẹ wuhrẹ esẹro ọnyawariẹ ene evaọ Patterson re a jọ iwuhrẹ isukulu nana. Kẹsena a vẹ rọ esẹro ọnyawariẹ ene na kpohọ Brooklyn nyai wuhrẹ evaọ isukulu na, a vẹ jẹ wariẹ zizie esẹro ọnyawariẹ ene efa ze Patterson ti wuhrẹ rọkẹ ẹjiroro ọvona. Kẹsena, esẹro ọnyawariẹ ene uwhremu nana i ve wuhrẹ isukulu na evaọ Brooklyn, rekọ ene ọsosuọ na i ve kpohọ Egwa Ikokohọ gbe Egwa Uvie nyai wuhrẹ isukulu na. Enẹ a maa nọ a ti ru bẹsenọ a ti ro wo iwuhrẹ 12, enọ e te jọ isukulu ezeza rọ ẹvẹrẹ Oyibo wuhrẹ koka koka evaọ United States. Kẹsena, a ve ti wuhrẹ inievo ene nọ e te rọ ẹvẹrẹ Spanish wuhrẹ isukulu na. Isukulu nana e te rehọ ẹta Isukulu Odibọgba Uvie nọ ma wo enẹna ha; ẹjiroro isukulu ọkpokpọ nana họ re o bọ edikihẹ abọ-ẹzi ekpako ukoko ga viere. Iwou ogha akpọ na soso i ti ru ọruẹrẹfihotọ nọ a te rọ jọ Egwa Ikokohọ gbe Egwa Uvie mu isukulu nana họ evaọ ukpe iruo 2011.

[Iwoho nọ e rrọ ẹwẹ-obe avọ 4]

Ẹgwae ẹgbukpe na o muhọ avọ ile nọ a so rono obe ile ọkpokpọ mai na ze, “Suile kẹ Jihova”