Wo Omosasọ No Eware Abọ-ẹzi ze

“Rehọ owhowha mẹ wha, . . . wha rẹ te ruẹ udhedhẹ kẹ izi rai.”—MAT. 11:29.

1. Ọruẹrẹfihotọ vẹ Ọghẹnẹ o ru eva Ugbehru Saena, kọ fikieme?

 EVAỌ usu izi nọ Ọghẹnẹ ọ rọ kẹ emọ Izrẹl eva Ugbehru Saena, uzi Ẹdijala o jariẹ. Jihova ọ rehọ ẹkwoma Mosis, ọtota riẹ, j’uzi kẹ orẹwho Izrẹl nọ: “Edẹ ezeza who re ru iruo ra, ẹdẹ avọ ihrẹ who ve serihọ; re eruẹ gbe eketekete ra e ruẹse serihọ, gbe ọmọzae aye ọvia ra gbe ọrara, a vẹ te rọ emu kẹ ae.” (Ọny. 23:12) Ẹhẹ, fiki ọdawẹ nọ Jihova o wo kẹ enọ e rrọ otọ Uzi na, ọ rọ uyoyou ruẹrẹ ẹdẹ Ẹdijala na họ kẹ ae re ahwo riẹ a ruẹsi “serihọ.”

2. Erere vẹ ekoko Ẹdijala na o wha se emọ Izrẹl?

² Kọ Ẹdijala na o jọ ẹdẹ nọ a re ro serihọ ọvo? Ijo, o jọ ẹdẹ nọ emọ Izrẹl a rẹ rọ gọ Jihova. Ekoko Ẹdijala na o jẹ hae kẹ esẹ na oke nọ a re ro wuhrẹ uviuwou rai “re a koko edhere ỌNOWO na evaọ ẹrẹreokie.” (Emu. 18:19) Yọ o jẹ kẹ uviuwou gbe egbẹnyusu oke nọ a re ro kokohọ re a roro kpahe iruo Jihova, re a jẹ wereva kugbe. (Aiz. 58:13, 14) Maero, Ẹdijala na o dikihẹ kẹ oke nọ Esuo Odu-Ikpe ọrọ Kristi na ọ te rọ wha uvi omosasọ se omai. (Rom 8:21) Kọ ẹvẹ kpahe oke mai nana? Diẹse uvi Ileleikristi nọ i se izi Jihova gboja a sae jọ ruẹ omosasọ utioye, kọ evaọ oghẹrẹ vẹ?

Wo Omosasọ no Iwuhrẹ gbe Ikokohọ Ze

3. Oghẹrẹ vẹ Ileleikristi ikpe-udhusoi ọsosuọ a rọ tuduhọ ohwohwo awọ, kọ eme o no rie ze?

³ Pọl ukọ na o dhesẹ ukoko na wọhọ “odẹẹ gbe ugbẹhẹ uzẹme na.” (1 Tim. 3:15) Ileleikristi ikpe-udhusoi ọsosuọ a wo omosasọ ẹkwoma uyoyou nọ a jẹ rọ tuduhọ ohwohwo awọ. (Ẹf. 4:11, 12, 16) Okenọ Pọl ọ jọ obọ Ẹfẹsọs, o wo uduotahawọ no iweze inievo nọ i no obọ ukoko Kọrint ze. Muẹrohọ epanọ iweze na i kpomahọ iẹe te. Ọ ta nọ: ‘Mẹ ghọghọ gaga fiki ẹnyaze Stẹfanas, Fọtunatu, gbe Akaikọs, keme a ru ẹzi mẹ kpokpọ.’ (1 Kọr. 16:17, 18) Epọvo na re, okenọ Taitọs o weze bru inievo obọ Kọrint no, Pọl o kere se ukoko na nọ: “Whai kpobi wha ru udu [Taitọs] kievi.” (2 Kọr. 7:13) Epọvo na nẹnẹ, Isẹri Jihova a bi wo omosasọ no omakugbe rai ze.

4. Ẹvẹ iwuhrẹ ukoko e rẹ rọ kẹ omai omosasọ?

⁴ Who vuhumu no inọ iwuhrẹ ukoko nọ ma rẹ nya e rẹ wha evawere se omai. Ma be hae jọ iwuhrẹ na “wo oma osasọ kugbe eva orọwọ” na. (Rom 1:12) Inievo Ileleikristi mai a rrọ egbẹrioma gheghe he. A rrọ uvi egbẹnyusu nọ ma gine you je rri ghaghae. Nọ ma te bi kpohọ iwuhrẹ ẹsikpobi, ma rẹ jọ obọ inievo nana wo uvi oghọghọ gbe omosasọ.—Filim. 7.

5. Edhere jọ vẹ ma sae rọ sasa ohwohwo oma evaọ ikokohọ mai?

⁵ Ikokohọ mai e rẹ jẹ kẹ omai omosasọ. Ma rẹ jọ ikokohọ na wuhrẹ eware buobu no Ebaibol ze, e vẹ jẹ kẹ omai uvẹ nọ ma re ro mu usu kugbe inievo efa. (2 Kọr. 6:12, 13) Rekọ ẹvẹ otẹrọnọ oma o  rẹ vo omai hayo o rẹ jọ bẹbẹ kẹ omai re ma mu usu kugbe amọfa? Edhere jọ nọ ma sai ro mu usu kugbe inievo mai họ ma rẹ fialoma via kẹ iruo evaọ ikokohọ. Nọ oniọvo-ọmọtẹ jọ o fi obọ họ ru iruo evaọ okokohọ akpọ-soso jọ no, ọ ta nọ: “U te no uviuwou mẹ gbe umutho egbẹnyusu mẹ jọ no, mẹ riẹ ohwo ọvo ho evaọ okokohọ na. Rekọ nọ me fi obọ họ evaọ erufuọ oria okokohọ na, me ru iruo kugbe inievo buobu. O jọ oware evawere gaga.”

6. Edhere jọ vẹ ma sai ro wo omosasọ?

⁶ Emọ Izrẹl a jẹ hai kpobọ Jerusalẹm kẹ egagọ evaọ isiasa ẹgbukpe. (Ọny. 34:23) Oyena o gwọlọ nọ a rẹ nya siọ idhu gbe iwou-eki rai ba, a vẹ nya otọ edẹ buobu evaọ edhere ovu. Ghele na, onana o jẹ hae wha “oghọghọ ulogbo” ze nọ ahwo na kpobi a be “suile kẹ ỌNOWO na.” (2 Irv. 30:21) Isẹri Jihova buobu a ruẹ no inọ te ai te uviuwou rai a te kpohọ Ebẹtẹle, uwou ogha Isẹri Jihova, o be hae wha evawere se ai. Kọ who gbe ru uvẹ fihọ re whọ wha uviuwou ra kpohọ Ebẹtẹle?

7. (a) Ẹvẹ omakugbe o sae rọ wha erere ze? (b) Eme ma re ru re omakugbe mai o sae wha uvi omosasọ ze?

⁷ Ma rẹ sai je wo omosasọ nọ ma te zizie inievo jọ ziọ emuọriọ evaọ uwou mai. Solomọn ovie owareghẹ na ọ ta nọ: “Oware ofa nọ uwoma kẹ ohwo o rọhọ ajokpa nọ ọ rẹ re ọ vẹ da, ọ vẹ re awere iruo riẹ.” (Ọtausi. 2:24) Omakugbe utioye orọnikọ o rẹ sasa omai oma ọvo ho, rekọ o rẹ jẹ lẹliẹ omai si kẹle inievo efa nọ ma be riẹ kpahe ae ziezi na. Re omakugbe o sae wha uvi omosasọ ze, ma re zizie ahwo bu hrọ họ, ma ve je muẹrohọ inọ ahwo a da idi vrẹ oma ha.

 Odibọgba na Ọ rẹ Wha Omosasọ Ze

8, 9. (a) Dhesẹ ohẹriẹ nọ o rrọ ovuẹ Jesu avọ orọ ikere-ebe gbe otu Farisi na. (b) Erere vẹ o re te omai nọ ma te bi wuhrẹ amọfa Ebaibol?

⁸ Jesu o je mu ọwhọ kẹ odibọgba na yọ ọ tuduhọ ilele riẹ awọ re a ru epọvo na. Onana u dhesẹ oma via evaọ ẹme nọ ọ ta inọ: “Ivuẹvu na i ghine bu, rekọ iruiruo e rẹ kakao. Fikiere wha lẹ Olori ivuẹvu na re o vi iruiruo kpobọ ivuẹvu riẹ.” (Mat. 9:37, 38) Eware nọ Jesu o je wuhrẹ e jẹ kẹ omosasọ gaga; e ginẹ jọ “usiuwoma.” (Mat. 4:23; 24:14) Onana u wo ohẹriẹ gaga no izi egaga nọ otu Farisi na a fihọ kẹ ahwo.—Se Matiu 23:4, 23, 24.

⁹ Nọ ma tẹ be ta usiuwoma kẹ amọfa yọ ma be kẹ ae omosasọ abọ-ẹzi, jẹ be rọ ere ru otoriẹ mai ọrọ eme Ebaibol na kodo ziezi. Ọso-ilezi na ọ ta gbagba inọ: “Jiri ỌNOWO! Keme uwoma re a so ile ujiro kẹ Ọghẹnẹ mai; keme ọ vọ avọ aruoriwo.” (Ol. 147:1) Kọ whọ sae ta usiuwoma kpahe Jihova kẹ erivẹ ra vi epaọ anwẹdẹ re oghọghọ ra o ruẹsi vihọ?

10. Kọ ẹnyaharo mai evaọ odibọgba na o rọ oma hwa unu ahwo nọ a kurẹriẹ? Ru ei vẹ.

¹⁰ Ginọ uzẹme inọ a rẹ jọ eria jọ gaviezọ kẹ usiuwoma na vi eria efa. (Se Iruẹru Ikọ Na 18:1, 5-8.) Otẹrọnọ ahwo a rẹ jọ oria nọ whọ be rria gaviezọ kẹ usiuwoma na tere he, daoma tẹrovi eware ezi nọ who bi ru evaọ odibọgba ra. Kareghẹhọ inọ oma nọ whọ be dawo re who whowho odẹ Jihova o rrọ uvrẹvru hu. (1 Kọr. 15:58) Ofariẹ, orọnikọ epanọ ahwo a kurẹriẹ te u re dhesẹ sọ ma bi wo ẹnyaharo evaọ odibọgba na ha. O rẹ sai mu omai ẹro inọ Jihova o ti ru re ahwo evezi a jẹ usiuwoma na rehọ.—Jọn 6:44.

Uwuhrẹ Ebaibol Uviuwou O rẹ Kẹ Omosasọ

11. Didi owha-iruo Jihova ọ kẹ esẹgbini, kọ ẹvẹ a sai ro ru ei gba?

¹¹ Esẹgbini Ileleikristi a wo owha-iruo nọ a re ro wuhrẹ emọ rai kpahe Jihova gbe idhere riẹ. (Izie. 11:18, 19) Otẹrọnọ whẹ yọ ọsẹ hayo oni, kọ whọ be hae ruẹrẹ oke fihọ nọ who re ro wuhrẹ emọ ra kpahe Ọsẹ oyoyou obọ odhiwu mai? Re whọ sai wuhrẹ uviuwou ra eware nọ i re fi obọ họ kẹ ae, Jihova ọ rọ ẹkwoma ebe, emagazini, ividio gbe idiski be rọ kẹ omai emuore abọ-ẹzi.

12, 13. (a) Ẹvẹ iviuwou a sai ro wo erere no Uwuhrẹ Ebaibol Uviuwou nọ a re ru evaọ owọwọ ze? (b) Ẹvẹ esẹgbini a sai ro ru re uwuhrẹ uviuwou rai o kẹ omosasọ?

¹² Ofariẹ, ọrigbo nọ o wo ẹrọwọ avọ areghẹ na o ru ọruẹrẹfihotọ Uwuhrẹ Ebaibol Uviuwou nọ a re ru evaọ owọwọ fihọ kẹ omai no. Onana yọ owọwọ nọ a re fihọ koka koka nọ a re ro ru uwuhrẹ uviuwou. Ahwo buobu a ruẹ no inọ ọruẹrẹfihotọ nana o lẹliẹ e rai si kẹle ohwohwo ziezi no, u te je ru usu rai kugbe Jihova ga no. Kọ ẹvẹ esẹgbini a sai ro ru re uwuhrẹ uviuwou rai o kẹ omosasọ abọ-ẹzi?

¹³ A re ru Uwuhrẹ Uviuwou na re o jọ sasasa. Onana u fo keme ma be gọ Ọghẹnẹ evawere yọ ọ gwọlọ nọ egagọ riẹ e rẹ kẹ omai evawere. (1 Tim. 1:11; Fil. 4:4) Oghale ulogbo o rrọ re ma fi owọwọ jọ họ nọ ma rẹ rọ keria ta ẹme kpahe Ọghẹnẹ. Esẹgbini a rẹ sae rehọ idhere sa-sa ru uwuhrẹ na. Wọhọ oriruo, ọsẹgboni jọ a ta kẹ ọmọzae rai nọ a re se Brandon nọ ọ rrọ ikpe 10 re ọ ta ẹme kpahe uzoẹme na “Fikieme Jihova Ọ rọ Rehọ Araomuomu Dhesẹ Setan?” Ẹme nana ọ be hae kẹ Brandon uye anwẹdẹ keme eraomuomu  e rẹ were iẹe, yọ o be hae dha e eva inọ a rehọ araomuomu dhesẹ Setan. Iviuwou jọ i re ru edrama ẹsejọ; ahwo uviuwou na a rẹ ghale oma fihọ ahwo nọ e rrọ ikuigbe Ebaibol nọ a gwọlọ ro ru edrama na, a ve se ọvuọ oria riẹ no Ebaibol na ze hayo a ve ru oware nọ ahwo nọ a jọ oria Ebaibol na ta kpahe na a ru. Orọnikọ onana u re ru uwuhrẹ were ọvo ho rekọ u re ru nọ emọ na i je w’obọ, o vẹ lẹliẹ iwuhrẹ Ebaibol te idu rai. *

Whaha Eware nọ E rẹ Sae Wha Ọkora Se Owhẹ

14, 15. (a) Oghẹrẹ vẹ idhọvẹ gbe awaọruọ i ro vihọ gaga no evaọ edẹ urere na? (b) Idabolo efa vẹ ma rẹ sae rẹriẹ ovao ku?

¹⁴ Idhọvẹ gbe awaọruọ i vihọ gaga no evaọ edẹ urere erọ uyerakpọ omuomu nana. Ababọ iruo gbe oghẹrẹ ọbẹwẹ sa-sa i bi kpomahọ ima ahwo buobu. Enọ e maki wo iruo dede a be ruẹ nnọ ugho nọ a bi wo u bi te ai ru uvumọ oware he. (Wawo Hagai 1:4-6.) Enọ e rrọ isu egọmeti gbe isu efa a be sai ru oware ovo kpahe ozighi ọkparesuọ emuemu efa ha. Eware iyoma nọ ahwo buobu a ru no i bi kpokpo ai.—Ol. 38:4.

¹⁵ Ebẹbẹ nana kpobi nọ akpọ Setan ọ be wha ze na i bi kpomahọ uvi Ileleikristi re. (1 Jọn 5:19) Ẹsejọ, ilele Jesu a be rẹriẹ ovao ku idabolo jọ fikinọ a be gwọlọ ru oreva Jihova. Jesu ọ ta nọ: “A te kpokpo mẹ, a re kpokpo owhai re.” (Jọn 15:20) Rekọ, a tẹ maki “kpokpo” omai, Ọghẹnẹ o re vu omai wa ha. (2 Kọr. 4:9) Ẹvẹ ma rọ ta ere?

16. Eme ọ rẹ sai fi obọ họ kẹ omai yọrọ oghọghọ mai?

¹⁶ Jesu ọ ta nọ: “Whai e ruẹ uye gbe enọ e wha owha ogbẹgbẹdẹ kpobi, wha bru omẹ ze, mẹ rẹ kẹ owhai udhedhẹ.” (Mat. 11:28) Fikinọ ma fi ẹrọwọ họ idhe ẹtanigbo Kristi, ma fi oma mai họ obọ Jihova no. Enẹ ma re ro wo “ogaga ulogbo nọ othesiwa.” (2 Kọr. 4:7) Orọnikọ “ọthuke na,” koyehọ ẹzi ọfuafo Ọghẹnẹ, o bi fi obọ họ bọ ẹrọwọ mai ga re ma sai thihakọ edawọ gbe ẹgaga ọvo ho rekọ re ma je wo oghọghọ.—Jọn 14:26; Jem. 1:2-4.

17, 18. (a) Oghẹrẹ ẹzi vẹ ma rẹ yọroma kpahe? (b) Eme ọ rẹ sae via otẹrọnọ ma rehọ eware abọ-iwo karo?

¹⁷ O gwọlọ inọ uvi Ileleikristi nẹnẹ a rẹ yọroma re akpọ nana nọ o bi le isiuru omaweromẹ ọvo na o se ae ba ẹviẹhọ. (Se Ahwo Ẹfẹsọs 2:2-5.) Ogbẹrọ ere he, “urusio uwo, gbe urusio ibiaro gbe eyeri uzuazọ” i ve su omai thọ. (1 Jọn 2:16) Hayo ma sai roro thọthọ inọ ekie kẹ isiuru iwo o te kẹ omai omosasọ. (Rom 8:6) Wọhọ oriruo, re ahwo jọ a ruẹsi wo omaweromẹ, a rẹ lọ imu egaga jẹ da idi vrẹta, rri ifoto ẹbẹba, dhomahọ ezaharo nọ i re fi uzuazọ ohwo họ ọza, hayo ru eware iyoma efa. Setan ọ be rehọ “ereghẹ” su ahwo thọ re a roro inọ eware iyoma e rẹ kẹ omosasọ.—Ẹf. 6:11.

¹⁸ O thọ họ re ohwo ọ re emu, da udi,  hayo zaharo otẹrọnọ e vrẹta ha. Ghele na, ma rẹ kuvẹ hẹ re eware nana e karo evaọ uzuazọ mai. Ma rẹ yọroma kẹ eware nana, maero fiki etoke nọ ma be rria na. Ilale obọ mai e rẹ sae wha ọkora se omai te epanọ ma gbẹ rọ nyaharo ho evaọ ewo eriariẹ kpahe Jesu Kristi Olori mai.—2 Pita 1:8.

19, 20. Ẹvẹ ma sai ro wo uvi omosasọ?

¹⁹ Ma te wo izi Jihova họ iroro ẹsikpobi, ma re vuhumu inọ isiuru ubroke ọvo akpọ nana ọ rẹ sae kẹ omai. Mosis o vuhu onana mu, yọ ere u fo inọ ma re vuhumu re. (Hib. 11:25) Uzẹme riẹ họ, re ma sai wo uvi omosasọ nọ o rẹ wha oghọghọ gbe evevọwẹ ze, ma re ru oreva Ọsẹ mai nọ ọ rrọ obọ odhiwu.—Mat. 5:6.

²⁰ Jọ ma hai gbe wo omosasọ no eware abọ-ẹzi ze. Ere ma te rọ siọ ‘urusio akpọ na ba be hẹrẹ ẹruore oghale mai, jegbe ẹtha oruaro Ọghẹnẹ ologbo na gbe ọrọ Osiwi mai Jesu Kristi.’ (Tait. 2:12, 13) Fikiere, joma gbaemu inọ ma rẹ jọ otọ owhowha Jesu ẹkwoma udu-esuo gbe ọkpọvio riẹ nọ ma rẹ nya lele. Ere ma sai ro wo uvi evawere gbe omosasọ!

[Oruvẹ-obotọ]

Ẹvẹ Whọ te k’Uyo?

• Ẹvẹ ahwo Jihova a bi ro wo omosasọ nẹnẹ?

• Ẹvẹ odibọgba na o rẹ rọ sasa omai gbe enọ ma be ta ẹme kẹ oma?

• Eme esẹgbini a rẹ sai ru re uwuhrẹ Ebaibol uviuwou rai o kẹ omosasọ?

• Eware vẹ e rẹ sai si omai kpemu evaọ abọ-ẹzi?

[Enọ Uwuhrẹ]

[Iwoho nọ e rrọ ẹwẹ-obe avọ 26]

Ma te bi lele ithubro Jesu, ma ti wo uvi omosasọ