Wo Ufuoma Evaọ Udevie Ahwo Ọghẹnẹ
Wo Ufuoma Evaọ Udevie Ahwo Ọghẹnẹ
“Evaọ udevie ogbotu na mẹ jẹ te kẹ owhẹ akpẹwẹ.”—OL. 35:18.
1-3. (a) Eware jọ vẹ e rẹ sae raha usu nọ Ileleikristi a wo kugbe Jihova? (b) Diẹse ahwo Ọghẹnẹ a sae jọ ruẹ ọthọwẹ?
NỌ Joe avọ aye riẹ a jọ ilivi, a te kpohọ akotọ abade jọ nọ ame riẹ ọ rrọ gogogo nọ oghoghẹrẹ iyei e vọ re a ya ame. A tẹ dina ya haro bi rri otọ ame uwowoma gbe oghoghẹrẹ iyei na. Nọ a ya kpohọ oria nọ u diwi gaga no, aye Joe ọ tẹ ta nọ, “O wọhọ nọ ma bi thabọ ga hrọ no.” Ọzae riẹ ọ tẹ ta nọ: “Whọ ruawa ha. Mẹ riẹ oware nọ me bi ru.” Wọhọ epanọ Joe ọ ta uwhremu na, u je gbei unu inọ, ‘Diẹse iyei na kpobi e rrọ?’ Udu u te bru rie nọ ọ ruẹ oware nọ o lẹliẹ iyei na kpobi dhere na. Eri ologbo jọ nọ a re se shark (avatonwa) ọ be ya no obọ odidi na bru ei ze. Ọ te sae ya va eri nana abọ họ. Nọ eri na ọ kẹle iẹe oma kpobi no, idudhe na eri na o te kuomarẹriẹ ya zihe.
2 Oleleikristi ọ rẹ sae rọ oma kẹ eware ẹkeriotọ, iruo, gbe ekwakwa efe te epanọ o gbe ro vuhumu hu inọ o bi ti kie ruọ idabolo. Joe, ọnọ ma gbiku riẹ fihọ obehru na, nọ ọ rrọ ọkpako ukoko, ọ ta nọ: “Oware nọ o via kẹ omẹ na o lẹliẹ omẹ roro kpahe ahwo nọ u fo inọ ma rẹ nyusu kugbe. Ya ame evaọ oria nọ o kare ẹbẹbẹ, koyehọ evaọ ukoko na ọvo who re jo mu egbẹnyusu!” Whọ ya kpohọ obonọ o diwi gaga ha, koyehọ obonọ whọ rẹ sae jọ kie ruọ egbefẹ Ẹdhọ. Whọ tẹ ruẹ inọ whọ ya thabọ ga hrọ no, kuomarẹriẹ re whọ ya kpohọ obonọ oma o rẹ jọ fọ owhẹ. Ogbẹrọ ere he, Ẹdhọ o ve ti mu owhẹ lọ.
3 Ileleikristi a be nyaku ebẹbẹ buobu nẹnẹ evaọ akpọ na. (2 Tim. 3:1-5) Setan ọ riẹ inọ umutho oke u kiọkọ kẹe, fikiere ọ be gwọlọ gele enọ i rri otọ mu hu kie. (1 Pita 5:8; Evia. 12:12, 17) Dede na, Jihova ọ rrọ omai emu. Ọ rehọ oria adhẹzọ abọ-ẹzi kẹ ahwo riẹ, koyehọ ukoko Ileleikristi na.
4, 5. Ẹvẹ ahwo buobu a bi rri obaro rai, kọ fikieme?
4 Omofọwẹ o rrọ akpọ na tere nẹnẹ hẹ. Ahwo buobu a rrọ awawa fiki ethube, ozighi, eware nọ i bi dhe ẹghẹghare, makọ akpọ na nọ a nua no. Mai kpobi ma rẹriẹ ovao ku ebẹbẹ owho gbe ẹyao. Yọ enọ i tube wo iruo dede, enọ i wo uwou, ugho, gbe omokpokpọ, a riẹ hẹ sọ eware nana e te tọ.
5 Ahwo buobu a wo udhedhẹ iroro gbe he. U yoma gaga inọ ibuobu a be ruẹ udhedhẹ gbe omofọwẹ nọ a rẹro riẹ hẹ evaọ orọo. Yọ oma o tubẹ lọhọ ahwo buobu nọ i bi kpohọ ichọche no te epanọ a bi ro wo avro sọ erere ọ ginẹ rrọ eware nọ a bi wuhrẹ ai na. Oware nọ o be mae wha onana ze họ iruemu iyoma gbe iwuhrẹ erue erọ isu egagọ rai. Fikiere, ahwo buobu a te dhugbe bi fi ẹruore họ otọkiẹ-eriariẹ hayo ọghọ nọ ibe ahwo-akpọ a re ru. Agbẹta nọ ahwo a rọ rrọ awawa na hayo gbe bi tube roro kpahe obaro ho na.
6, 7. (a) Fikieme ohẹriẹ o rọ rrọ eriwo enọ e be gọ Ọghẹnẹ gbe enọ e be gọe he? (b) Eme ma be te ta kpahe?
6 Oghẹrẹ nọ enọ e rrọ ukoko Ileleikristi a rri uzuazọ u wo ohẹriẹ gaga. Dede nọ mai ahwo Jihova ma wo oghẹrẹ ebẹbẹ buobu nọ amọfa a wo, oghẹrẹ nọ ma rehọ ebẹbẹ na u wo ohẹriẹ gaga. (Se Aizaya 65:13, 14; Malakae 3:18.) Fikieme? Keme Ebaibol e ta kẹ omai vevẹ oware nọ o wha ebẹbẹ nana kpobi ze, yọ ukoko Ọghẹnẹ u bi wuhrẹ omai epanọ ma re ro thihakọ ebẹbẹ nana. Fiki onana, ma be ruawa ga hrọ kpahe obaro ho. Fikinọ ma be gọ Jihova, ma be whaha iroro iyoma gbe ọfariẹ-ogbe nọ o be wha uye se ahwo buobu nẹnẹ. Fikiere enọ e rrọ ukoko na a wo ududhomẹno nọ amọfa a wo ho.—Aiz. 48:17, 18; Fil. 4:6, 7.
7 Iriruo jọ e riẹ nọ i ti fi obọ họ kẹ omai roro kpahe ufuoma nọ idibo Jihova ọvo e be reawere riẹ. Iriruo nana e te wọ omai kiẹ iroro gbe uruemu mai riwi, i ve je fi obọ họ kẹ omai roro sọ eria jọ e gbẹ riẹ nọ ma rẹ jọ fi ohrẹ Ọghẹnẹ họ iruo, enọ e rrọ ọthọwẹ kẹ omai.—Aiz. 30:21.
“Ukiọkọ Omojọ Awọ Mẹ O Vru no Edhere”
8. Eme idibo Jihova a bi ru ẹsikpobi?
8 No emuhọ akpọ na ze, enọ e be gọ Jihova a be daoma re a whaha usu okpekpe kugbe enọ e be gọ Jihova ha. Evaọ uzẹme, Jihova ọ ta inọ egrẹ ọ te jọ udevie enọ e be gọe gbe enọ i bi lele Setan. (Emu. 3:15) Ahwo Ọghẹnẹ a wo ohẹriẹ no amọfa fikinọ a bi koko izi riẹ. (Jọn 17:15, 16; 1 Jọn 2:15-17) O rẹ jọ bẹbẹ ẹsejọ re ma wo uruemu nọ u wo ohẹriẹ no orọ otu nọ e rrọ ukoko ho. Idibo Jihova jọ a wo avro no sọ erere ọ riẹ re ohwo ọ gọ Ọghẹnẹ.
9. Dhesẹ avro nọ ọ jọ ọnọ o kere Olezi avọ 73 na udu.
9 Odibo Jihova jọ nọ o wo avro sọ emamọ iroro ọ jẹ nọ ọ be rọ gọ Ọghẹnẹ họ ọnọ o kere Olezi avọ 73 na, ẹsejọhọ ọmọ Asaf jọ. Ọso-ilezi na ọ nọ kpahe oware nọ akpọ o bi ro woma kẹ irumuomu na, rekọ akpọ o vẹ be bẹ otujọ nọ e be gọ Ọghẹnẹ.—Se Olezi 73:1-13.
10. Fikieme ẹme avro nọ ọso-ilezi na ọ wha ze o rọ r’oja kẹ owhẹ?
10 Kọ oghẹrẹ avro otiọye na o ziọ owhẹ udu no ẹdẹjọ? Otẹrọ ere, who brukpe oma ra ha hayo roro ho inọ ẹrọwọ ra ọ gbẹ ga ha. Evaọ uzẹme, idibo Jihova jọ, te ejọ nọ o ro kere Ebaibol na, a wo oghẹrẹ iroro itieye na. (Job 21:7-13; Ol. 37:1; Jeri. 12:1; Hab. 1:1-4, 13) Enọ e gwọlọ gọ Jihova kpobi a re roro gaga kpahe onọ nana hrọ: Kọ re a gọ Ọghẹnẹ je yoẹme kẹe họ oware nọ u fo eruo? Onọ nana u kie kpahe ẹme avro nọ Setan ọ kpare ze evaọ ọgbọ Idẹn. U wo obọ kpahe esuo ehrugbakpọ ọrọ Ọghẹnẹ. (Emu. 3:4, 5) Fikiere, u fo re mai kpobi ma roro didi kpahe ẹme nọ ọso-ilezi na o fihọ otọ na. Kọ ma rẹ re irumuomu nọ o wọhọ nnọ uye o rrọ oma ha na ihri? Kọ awọ mai i re “vru no edhere” Jihova no re ma raro kele irumuomu na? Uzedhe oware nọ Setan ọ gwọlọ inọ ma ru oye.
11, 12. (a) Ẹvẹ ọso-ilezi na o ro fi avro riẹ kparobọ, kọ eme onana u wuhrẹ omai? (b) Eme o lẹliẹ owhẹ roro inọ u fo re a gọ Jihova, wọhọ epanọ ọso-ilezi na o vuhumu uwhremu na?
11 Eme o fi obọ họ kẹ ọso-ilezi na fi avro riẹ kparobọ? Dede nọ u kiọkọ omojọ re o kie no egagọ Jihova wọhọ epanọ ọ ta na, eriwo riẹ u nwene okenọ o kpohọ “aruẹri Ọghẹnẹ”, koyehọ, okenọ o kuomagbe ahwo Ọghẹnẹ evaọ obọ etẹmpol na, je roro kpahe ẹjiroro Ọghẹnẹ. U te ti vẹi ẹro inọ ọ gwọlọ uye nọ u ti te irumuomu na ha. O te ti vuhumu inọ uzuazọ nọ a bi yeri o lẹliẹ e rai dikihẹ “eria nọ e be whra.” Ọso-ilezi na ọ ruẹ inọ enọ e nya siọ Jihova ba kpobi a bi kpohọ ‘ọraha,’ rekọ Jihova ọ te thọ enọ e be gọe. (Se Olezi 73:16-19, 27, 28.) Ababọ avro, whọ ruẹ ẹgbagba ẹme yena no. Re a yeri uzuazọ odode o re si ahwo buobu urru, rekọ uye nọ u re no uzuazọ utioye na ze o re ruaro.—Gal. 6:7-9.
12 Oware ofa vẹ ma jọ oriruo ọso-ilezi na wuhrẹ? Ọ jọ udevie ahwo Ọghẹnẹ ruẹ ufuoma gbe areghẹ. Iroro riẹ e kpọvi okenọ o kpohọ oria nọ a be jọ gọ Jihova. Epọvo na re nẹnẹ, ma rẹ jọ obọ iwuhrẹ ukoko ruẹ uvi ekohrẹ jẹ reawere emamọ emuore abọ-ẹzi. Agbẹta nọ Jihova ọ rọ ta kẹ idibo riẹ inọ a kpohọ iwuhrẹ ẹsikpobi na. A rẹ jọ obei wo uduotahawọ je fi obọ họ kẹ ohwohwo ru oware nọ u woma.—Aiz. 32:1, 2; Hib. 10:24, 25.
Rọ Areghẹ Salọ Egbẹnyusu Ra
13-15. (a) Eme o via kẹ Daina, kọ eme onana u wuhrẹ omai? (b) Fikieme usu kugbe ibe Ileleikristi o rọ rrọ ọthọwẹ?
13 Daina, ọmọtẹ Jekọp yọ oriruo ọrọ ohwo nọ o kie ruọ ẹbẹbẹ fikinọ ọ nyusu kugbe enọ e be gọ Jihova ha. Obe Emuhọ o ta kẹ omai inọ ọ jẹ hae nyusu kugbe emetẹ Kenan, enọ e jẹ rria kẹle ai. Wo ohẹriẹ no ahwo Kenan, Jihova ọ kẹ ahwo riẹ izi nọ a je koko. Rekọ, eware nọ ekiotọ eware anwae a duku i dhesẹ inọ uzuazọ nọ ahwo Kenan a je yeri o lẹliẹ edhọgọ, ọfariẹ-ogbe, gbe ozighi vọ otọ rai. (Ọny. 23:23; Izerẹ 18:2-25; Izie. 18:9-12) Kareghẹhọ oware nọ o via uwhremu na fikinọ Daina o lele ahwo nana nyusu.
14 Shẹkẹm, ọzae Kenan jọ, ọnọ a dhesẹ wọhọ ohwo nọ o “wo adhẹ gaga eva orua riẹ,” ọ ruẹ Daina “ọ tẹ gba e lele ei wezẹ.” (Emu. 34:1, 2, 19) Oware nọ o via na u yoma kẹhẹ. Kọ who roro nnọ Daina ọ riẹ inọ oware utioye o sae via kẹe? Ẹsejọhọ ọ jẹ hai lele izoge Kenan keria gbiku, o roro ho inọ ọjọ ọ rẹ sai wo iroro iyoma kpahe iẹe. Rekọ Daina o roro thọ gaga.
15 Eme ikuigbe nana i wuhrẹ omai? Inọ ma te bi lele enọ e rrọ idibo Jihova ha nyusu, oware uyoma o rẹ sai noi ze. Ikereakere na e ta nọ “usu uyoma o rẹ raha uruemu ezi.” (1 Kọr. 15:33) Evaọ abọdekọ riẹ, whọ tẹ be nyusu kugbe enọ i wo ọkpọ orọwọ ra, ọkpọ uruemu ra, gbe enọ i you Jihova, whọ te nyathọ họ. Emamọ usu utioye na u ti fi obọ họ kẹ owhẹ ru oware ezi.—Itẹ 13:20.
“A Họ Owhai, je Ru Owhai Fo”
16. Eme Pọl ukọ na ọ ta kpahe otujọ nọ e jọ ukoko Kọrint?
16 Ukoko Ileleikristi na u fi obọ họ kẹ ahwo buobu siobọno iruemu iyoma no. Okenọ Pọl ukọ na o kere ileta ọsosuọ riẹ se ukoko obọ Kọrint, o kere kpahe inwene nọ Ileleikristi nọ e jọ obei a ru no re a ruẹse rria lele itee Ọghẹnẹ. Otujọ a jọ igberedha, egedhọ, ibruẹnwae, ezae nọ i re du ezae, iji, egbidi, gbe efa buobu. Pọl ọ ta kẹ ae nọ: “Rekọ a họ owhai, je ru owhai fo.”—Se 1 Ahwo Kọrint 6:9-11.
17. Ẹvẹ ekoko izi Ebaibol u ro nwene uzuazọ ahwo buobu no?
17 Enọ e be gọ Ọghẹnẹ hẹ a wo emamọ izi nọ e be kpọ ae he. Onọ u je rai a re ru wọhọ epanọ ahwo Kọrint a je ru taure a te ti kurẹriẹ. (Ẹf. 4:14) Rekọ ohwo nọ o wo eriariẹ egbagba erọ Ebaibol na je bi fi ai họ iruo ọ rẹ sai nwene. (Kọl. 3:5-10; Hib. 4:12) Ahwo buobu nọ e rrọ ukoko na nẹnẹ a rẹ sae ta kẹ owhẹ inọ taure a te ti kurẹriẹ, a je yeri uzuazọ odode. Evaọ oke yena, a je wo evawere he. Okenọ a ti kuomagbe ahwo Ọghẹnẹ no je bi koko izi Ebaibol, ẹsiẹe a ro wo udhedhẹ.
18. Eme ọ via kẹ ọmoha jọ, kọ eme onana u dhesẹ?
18 Wo ohẹriẹ, enọ e rehọ owọ rai kọ no ukoko Ileleikristi na no evaọ oke nọ u kpemu a be vioja gaga nẹnẹ. Oniọvo-ọmọtẹ jọ nọ a re se Tanya, ọ ta inọ ọ jẹ “rọ oma da Isẹri Jihova,” rekọ nọ o te ikpe 16 no, o te kie no ukoko re o “le isiuru akpọ na.” Uwhremu na a tẹ kẹe eva, ọ tẹ jẹ kpare eva na no. Enẹna ọ ta nọ: “Ikpe esa nọ mẹ jọ obọ akpọ na e te kẹ omẹ uye bọwo ẹdẹ nọ me re whu. Oware jọ nọ o gbẹ be da omẹ họ me kpe ọmọ nọ ọ jọ omẹ eva. . . . Mẹ be ta kẹ izoge nọ e gwọlọ dawo akpọ na riwi makọ evaọ ubroke dede inọ: ‘Seba!’ Evaọ oke ọsosuọ, o rẹ sae were, rekọ ukuhọ riẹ u re yoma gaga. Ọkora ọvo akpọ na ọ rẹ kẹ owhẹ. Mẹ riẹ ere. O via kẹ omẹ no. Daji ukoko Jihova. Oye ọvo họ edhere uzuazọ nọ o rẹ kẹ evawere.”
19, 20. Didi ọthọwẹ ukoko Ileleikristi na o be kẹ omai, kọ evaọ oghẹrẹ vẹ?
19 Dai roro oware nọ o te via kẹ owhẹ nọ who te kie no ufuoma nọ o rrọ ukoko Ileleikristi na. U re gbe inievo buobu nọ e jọ obọ akpọ vẹre unu nọ a te yo inọ ohwo jọ o bi kie no ukoko na. (Jọn 6:68, 69) Whọ rẹ sai gbe wo ufuoma gbe uketha no idabolo gbe ebẹbẹ nọ i bi wowẹ evaọ akpọ Setan otẹrọnọ whọ talamu inievo Ileleikristi ra. Usu kugbe inievo mai gbe iwuhrẹ nọ who re kpohọ ẹsikpobi i ti ru owhẹ kareghẹhọ kẹse kẹse inọ izi ikiẹrẹe Jihova e rrọ ziezi, onana u ve ti ru ei lọhọ kẹ owhẹ re who koko izi riẹ. Who wo ẹjiroro kpobi nọ who re ro “jiri [Jihova] evaọ iraro ahwo buobu,” wọhọ epanọ ọso-ilezi na o ru.—Ol. 35:18.
20 Eware e rẹ sae jọ bẹbẹ kẹ Ileleikristi kpobi ẹsejọ te epanọ a sai ro roro nọ a te sai kru ẹgbakiete rai hi. Obufihọ a gwọlọ. Eme te owhẹ gbe ukoko na kpobi a rẹ sai ru ro fi obọ họ kẹ ibe eg’Ọghẹnẹ evaọ etoke otiọye? Uzoẹme nọ o rrọ aro na o te ta kpahe epanọ whọ sae rọ sasa inievo ra oma jẹ tuduhọ ai awọ.—1 Tẹs. 5:11.
Ẹvẹ Whọ te k’Uyo?
• Eme ma wuhrẹ no oware nọ o via kẹ ọnọ o kere Olezi avọ 73 na ze?
• Eme ma jọ oware nọ o via kẹ Daina na wuhrẹ?
• Fikieme whọ sai ro wo ufuoma evaọ ukoko Ileleikristi na?
[Enọ Uwuhrẹ]
[Iwoho nọ e rrọ ẹwẹ-obe avọ 7]
Ya ame evaọ oria nọ o kare ẹbẹbẹ; daji ukoko na!