Ẹro-ofihotọ O Rẹ Wha Emamọ Iyẹrẹ ze
Ẹro-ofihotọ O Rẹ Wha Emamọ Iyẹrẹ ze
KỌ WHO bi fiẹro h’otọ kẹ uvẹ sa-sa nọ e rẹ sai rovie fihọ kẹ usiuwoma ota evaọ ẹkwotọ ukoko ra? Inievo Ileleikristi mai nọ e rrọ okpẹwho Turku evaọ Finland, nọ u wo unueri nọ ekọ e rẹ kpahe, a ru ere, yọ emamọ iyẹrẹ i no rie ze.
Okejọ nọ u kpemu, inievo nọ e rrọ Turku a muẹrohọ inọ ahwo jọ a no obọ Asia ze ti ru abọ urere ọrọ okọ-oyibo ulogbo jọ nọ a je ku evaọ unueri ẹwho na. Oniọvo jọ ọ tẹ te gwọlọ ehọtẹle nọ otu iruo na a wohọ via. O te je muẹrohọ inọ irioke, a rẹ rehọ imoto wọ otu iruo na no ehọtẹle na kpobọ unueri na. Ababọ okioraha, oniọvo na ọ tẹ vuẹ inievo nọ e rrọ ukoko Oyibo kpahe onana.
Ekpako ukoko Oyibo na a vuhumu inọ obọdẹ uvẹ nọ a rẹro riẹ hẹ nọ a sae rọ ta usiuwoma Uvie na kẹ erara buobu oye u rovie na, a te ru ọruẹrẹfihotọ nọ a rẹ rọ ta usiuwoma kẹ erara na ababọ okioraha. Ighọjọ ihrẹ ohiohiẹ Ẹdoka evaọ oka yena, iwhowho-uvie ikpe a te dikihẹ kẹle oria nọ imoto e jẹ wọ ahwo na. A hẹrẹ omojọ, uvumọ ohwo ọ nyaze he. Inievo na a tẹ be nọ omoma rai nọ: ‘Kọ o sae jọnọ ma nyaze ẹruoke he? Manikọ ahwo na a no ẹwho na no?’ Kẹsena, omọvo iruiruo na jọ ọ tẹ nya via, avọ iwu iruo nọ o kuhọ. Ọfa ọ tẹ nya via, kẹsena a tẹ ruẹ efa buobu. U ri kri hi na, oria nọ imoto e rẹ jọ wọ ae na o tẹ vọ avọ iruiruo na. Iwhowho-uvie na a te mu usiuwoma họ, avọ ebe ẹvẹrẹ Oyibo nọ a be rọ kẹ ae. Nwani fo na, o rehọ enwenọ auwa soso taure iruiruo na kpobi a tẹ te ruẹrẹ oma họ ọvuọ oria riẹ evaọ imoto na, onọ o kẹ inievo na uvẹ ziezi rọ ta usiuwoma kẹ ibuobu rai. Iruiruo na a ruọ edhere avọ emebe mai nọ i bu te udhozeza gbezeza (126) gbe emagazini udhusoi akuasa gbe udhe gbizii (329)!
Iyẹrẹ iwoma nọ i no omodawọ inievo na ze u ru nọ a rọ wariẹ onana evaọ oka nọ u lele i rie, evaọ etoke iweze ọsẹro ọnyawariẹ. Evaọ ighọjọ ezeza gbabọ ohiohiẹ avọ oso nọ ọ be rrọ, ọsẹro ọnyawariẹ na o te ru ẹme omakugbe kẹ usiuwoma ota, kẹsena iwhowho-uvie 24 a te kpohọ oria nọ imoto e rẹ jọ wọ iruiruo na. Evaọ ẹdẹ nana, inievo na a wha ebe ẹvẹrẹ Tagalog lele oma re, keme a ruẹ nọ ibuobu iruiruo na i no orẹwho Philippines ze. Evaọ ohiohiẹ ẹdẹ yena, inievo na a fi ebe 7, emebe 69, gbe emagazini udhusoi akuane, udhosa gbe ikpegbizii (479) họ ada kẹ iruiruo na. Dai roro epanọ inievo nọ i wobọ evaọ usi-uwhowho na a wo evawere te!
Taure iruiruo na a te ti zihe kpohọ erẹwho nọ a no ze, inievo na a zihe bru ibuobu rai evaọ ehọtẹle nọ a jọ na, jẹ nabe roma totọ ru ovuẹ Uvie na vẹ kẹ ae. Ejọ evaọ usu iruiruo na e vuẹ inievo na inọ Isẹri Jihova e ta usiuwoma kẹ ae no vẹre evaọ erẹwho efa. Eva e were iruiruo na ziezi rọkẹ omodawọ nọ inievo na a ru rọ ta usiuwoma kẹ ae evaọ etoke nọ a jọ orẹwho Finland na.
Kọ whọ be hai fiẹro h’otọ kẹ uvẹ sa-sa nọ e rẹ sae roma via evaọ ẹkwotọ usiuwoma ota ukoko ra? Kọ who ru rie fihọ utee ra re whọ ta usiuwoma na kẹ ahwo erẹwho efa nọ e rrọ ẹkwotọ ra? Who te bi ru ere, whọ sai wo ọkpọ iyẹrẹ nọ inievo mai evaọ Turku a wo na.
[Udhesẹ-oria/Uwoho nọ o rrọ ẹwẹ-obe avọ 32]
(Rọkẹ onọ a ruẹrẹhọ ziezi, rri obe na)
FINLAND
HELSINKI
Turku