‘Ẹzi Na Ọ Rẹ Kiẹ Eware Ididi Ọghẹnẹ Via’

“Ẹzi [na] ọ rẹ guọlọ eware kpobi via, makinọ eware ididi Ọghẹnẹ.” —1 KỌR. 2:10.

1. Iruo vẹ ẹzi ọfuafo na o bi ru nọ Pọl ọ fodẹ eva 1 Ahwo Kọrint 2:10, kọ enọ vẹ e roma via?

 MA RE yere Jihova kẹ ẹzi ọfuafo riẹ nọ o bi ro ru iruo! Ebaibol i dhesẹ ẹzi na wọhọ ọthuke, okẹ, ose isẹri, gbe nnọ ọ rẹ lẹ kẹ omai. (Jọn 14:16; Iruẹru 2:38; Rom 8:16, 26, 27) Pọl ukọ na ọ fodẹ obọdẹ iruo efa nọ ẹzi ọfuafo na o re ru, ta nọ: “Ẹzi [na] ọ rẹ guọlọ eware kpobi via, makinọ eware ididi Ọghẹnẹ.” (1 Kọr. 2:10) Uzẹme, Jihova ọ be rehọ ẹzi ọfuafo na rovie eware ididi abọ-ẹzi via. O gbẹ rrọ obufihọ ẹzi ọfuafo na ha, ẹvẹ ma hae sai ro wo otoriẹ ẹjiroro Jihova? (Se 1 Ahwo Kọrint 2:9-12.) Rekọ enọ buobu e roma via: Oghẹrẹ vẹ ‘ẹzi na ọ be rọ kiẹ eware ididi Ọghẹnẹ via’? Ẹkwoma ono Jihova o ro dhesẹ eware nana via evaọ ikpe-udhusoi ọsosuọ? Oghẹrẹ vẹ gbe ẹkwoma ono ẹzi na ọ be rọ kiẹ eware ididi nana via evaọ oke mai na?

2. Idhere ivẹ vẹ ẹzi na o bi ro ru iruo?

² Jesu ọ fodẹ idhere ivẹ nọ ẹzi na o ti ro ru iruo. Taure o te ti whu, ọ ta kẹ ikọ riẹ nọ: “Ọthuke na, Ẹzi Ẹri na, ọnọ Ọsẹ ọ rẹ te rehọ odẹ mẹ viẹ, o re ti wuhrẹ owhai eware kpobi, ọ vẹ te rehọ eware nọ mẹ ta kẹ owhai kpobi [kareghẹhọ] owhai.” (Jọn 14:26) Koyehọ ẹzi ọfuafo na ọ te jọ owuhrẹ gbe ọnọ o re fi obọ họ kẹ ohwo kareghẹhọ eware. Wọhọ owuhrẹ, ẹzi na o re fi obọ họ kẹ Ileleikristi wo otoriẹ eware nọ i vẹ rai ẹro vẹre he. O re je fi obọ họ kẹ ae kareghẹhọ eware nọ a wuhrẹ no re a je fi ai họ iruo.

 Evaọ Ikpe-Udhusoi Ọsosuọ

3. Eme ọ Jesu vẹ i dhesẹ nọ a te rọ ẹmẹrera fere “eware ididi Ọghẹnẹ” via?

³ Jesu o wuhrẹ ilele riẹ eware buobu nọ a riẹ vẹre he. Ghele na, eware efa e jariẹ nọ a ti gbe wuhrẹ. Jesu ọ ta kẹ ikọ na nọ: “Me wo eware buobu nọ mẹ hẹ ta kẹ owhai, rekọ wha sae wha ae enẹna ha. Okenọ Ẹzi uzẹme ọ zi no, o re ti su owhai ruọ uzẹme na kpobi.” (Jọn 16:12, 13) Jesu ọ rọ onana dhesẹ inọ a te rọ ẹkwoma ẹzi ọfuafo na wo otoriẹ eware abọ-ẹzi ẹmẹrera.

4. Evaọ ẹdẹ Pẹntikọst 33 C.E., ẹvẹ ẹzi ọfuafo na ọ rọ jọ owuhrẹ gbe ọnọ o re fi obọ họ kẹ ohwo kareghẹhọ eware?

⁴ Evaọ ẹdẹ Pẹntikọst ọrọ 33 C.E., a ku “ẹzi uzẹme” na ku Ileleikristi udhozeza (120) nọ i kokohọ evaọ Jerusalẹm. Eware nọ ahwo a ruẹ je yo e kẹ imuẹro inọ ẹzi na o te ilele na obọ. (Iruẹru 1:4, 5, 15; 2:1-4) Ilele na a jẹ rọ evẹrẹ sa-sa ta kpahe “iruo ogaga nọ Ọghẹnẹ [o] ru.” (Iruẹru 2:5-11) Oke u te no nọ oware okpokpọ jọ u ti ro dhesẹ oma via. Joẹl ọ ruẹaro no vẹre kpahe ẹzi ọfuafo nọ o ti te ai obọ. (Joẹl 2:28-32) Enọ e jọ etẹe a jẹ ruẹ orugba eruẹaruẹ nana evaọ edhere nọ a rẹro riẹ hẹ, yọ Pita ukọ na ọ jẹ fa otọ oware nọ o jẹ via na kẹ ahwo nọ a jọ etẹe. (Se Iruẹru Ikọ Na 2:14-18.) Ẹzi ọfuafo na ọ jọ wọhọ owuhrẹ nọ o fi obọ họ kẹ Pita vuhumu inọ oware nọ o via kẹ ilele na yọ orugba eruẹaruẹ Joẹl na. Ẹzi na o te je fi obọ họ kẹ Pita kareghẹhọ eware, keme orọnikọ eruẹaruẹ Joẹl ọvo Pita ọ ta kpahe he rekọ te ilezi ivẹ nọ Devidi o kere. (Ol. 16:8-11; 110:1; Iruẹru 2:25-28, 34, 35) Eware nọ ahwo nọ a kokohọ na a ruẹ je yo e ginẹ jọ eware ididi Ọghẹnẹ.

5, 6. (a) Nọ Pẹntikọst 33 C.E. o vrẹ no, obọdẹ enọ vẹ kpahe ọvọ ọkpokpọ na u fo inọ a rẹ kẹ iyo rai? (b) Amono a rehọ eme nana lahwe, kọ ẹvẹ a rọ jiroro na?

⁵ Eware buobu e gbẹ jariẹ nọ a re ru vẹ kẹ Ileleikristi ikpe-udhusoi ọsosuọ. Wọhọ oriruo, enọ buobu e jariẹ kpahe ọvọ ọkpokpọ na nọ o muhọ evaọ ẹdẹ Pẹntikọst na. Kọ ahwo Ju gbe ahwo erẹwho efa nọ e jẹ egagọ Ju rehọ no ọvo a rẹ sae ziọ otọ ọvọ ọkpokpọ na? Kọ uvẹ u rovie fihọ kẹ ahwo erẹwho Egedhọ re a jọ otọ ọvọ ọkpokpọ na je wo ẹzi ọfuafo? (Iruẹru 10:45) Kọ ezae nọ e rrọ ahwo erẹwho Egedhọ a rẹ yawo tao je koko Uzi Mosis na? (Iruẹru 15:1, 5) Enọ nana i wuzou gaga. A gwọlọ ẹzi Jihova re a sai wo otoriẹ eware ididi nana. Rekọ, amono ẹzi na o ti ro ru iruo?

⁶ Inievo-emezae nọ i wo ewha-iruo e rehọ eme nana nọ e gwọlọ eruvẹ na lahwe. Pita, Pọl, avọ Banabas a jọ ẹgwae ugboma esuo na, a te gbiku epanọ Jihova ọ rọ rẹriẹ ovao ku ahwo erẹwho Egedhọ no, enọ e yawo ho. (Iruẹru 15:7-12) Nọ a rehọ eme nọ e rrọ Ikereakere Hibru na wawo iku nọ ikọ edekọ na a gbe na, avọ obufihọ ẹzi ọfuafo, ugboma esuo na a te wo ọtamuo ọvo. A te kere iroro nọ a jẹ se ikoko na.—Se Iruẹru Ikọ Na 15:25-30; 16:4, 5; Ẹf. 3:5, 6.

7. Ẹkwoma eme eware ididi i ro rovie via?

⁷ A jọ ileta nọ Jọn, Pita, Jemis, gbe Pọl a kere ru eme efa vẹ. Rekọ nọ ikpe jọ e vrẹ no, ekẹ eruẹaruẹ gbe eriariẹ nọ a rọ kẹ ahwo evaọ edhere igbunu e tẹ te vrẹ. (1 Kọr. 13:8) Kọ ẹzi na ọ te gbẹ jọ owuhrẹ gbe ọnọ o re fi obọ họ kẹ ahwo kareghẹhọ eware? Kọ o ti gbe fi obọ họ kẹ Ileleikristi kiẹ eware ididi Ọghẹnẹ via? Eruẹaruẹ i dhesẹ inọ o ti ru ere.

 Evaọ Oke Urere Na

8, 9. Amono a ti “lo” via evaọ oke urere na?

⁸ Ukọ-odhiwu jọ ọ ta kpahe oke urere na, inọ: “Otu nọ o wo areghẹ kọ a reti lo wọhọ ẹgho-ehru; jegbe otu nọ o ku ahwo rẹriẹ ruọ ẹrẹreokie kọ a reti lo wọhọ isi obehru bẹdẹ bẹdẹ. . . . Eriariẹ i veti vihọ.” (Dan. 12:3, 4) Amono a re ti wo areghẹ, kọ amono a ti lo? Jesu ọ kuyo na evaọ ọtadhesẹ eka gbe ikpoko na. Ọ ta kpahe “urere akpọ na,” inọ: “Ikiẹrẹe na ite ti lo via eva uvie Ọsẹ rai wọhọ ọre.” (Mat. 13:39, 43) Okenọ Jesu o je ru ọtadhesẹ na vẹ, ọ ta inọ “ikierẹe na” họ “emọ uvie na,” koyehọ Ileleikristi nọ a rọ ẹzi wholo na.—Mat. 13:38.

⁹ Kọ Ileleikristi nọ a wholo na kpobi a ti “lo”? Evaọ oghẹrẹ jọ, Ee, keme Ileleikristi kpobi a te ta usiuwoma je ru ilele, a vẹ jẹ jọ iwuhrẹ ukoko bọ ohwohwo ga. Enọ a rọ ẹzi wholo na a te kobaro. (Zek. 8:23) U te no onana no, a ti ru eware ididi vẹ evaọ oke urere na. A “ruru” eruẹaruẹ nọ Daniẹl o kere bọwo oke urere na. (Dan. 12:9) Oghẹrẹ vẹ gbe ẹkwoma amono ẹzi na ọ te rọ fere eware nana via?

10. (a) Ẹkwoma amono ẹzi na o ro ru eware ididi via evaọ edẹ urere na? (b) Dhesẹ epanọ a ro ru uzẹme kpahe etẹmpol abọ-ẹzi ologbo Jihova na via.

 ¹⁰ O tẹ gwọlọ re a ru ẹme jọ vẹ evaọ oke mai na, ẹzi ọfuafo o re fi obọ họ kẹ inievo-emezae nọ e rrọ utu ugboma esuo na re a wo otoriẹ eware ididi nọ a riẹ otọ rai vẹre he. (Mat. 24:45; 1 Kọr. 2:13) Utu Ugboma Esuo na kpobi a rẹ keria ta kpahe enwene kpobi. (Iruẹru 15:6) A te duku enwene jọ no, a ve kere iei via kẹ ahwo kpobi. (Mat. 10:27) Nọ oke o be nya haro na, inwene efa e sae te roma via, a ve je ru enana vẹ kẹ omai.—Rri ẹkpẹti na “Oghẹrẹ nọ Ẹzi na O ro Rovie Otofa Etẹmpol Abọ-Ẹzi na Via.”

Wo Erere no Iruo nọ Ẹzi na O Bi Ru Nẹnẹ Ze

11. Nọ ẹzi ọfuafo na ọ be kiẹ eware ididi Ọghẹnẹ via na, ẹvẹ Ileleikristi inẹnẹ a bi ro wo erere?

¹¹ Uvi Ileleikristi kpobi a wo erere no nọ ẹzi ọfuafo ọ be kiẹ eware ididi Ọghẹnẹ via na. Wọhọ epanọ o jọ kẹ Ileleikristi ikpe-udhusoi ọsosuọ na, ma bi wuhrẹ eware nọ ẹzi ọfuafo na o ru vẹ kẹ omai, ẹzi na o ve fi obọ họ kẹ omai kareghẹhọ ai je fi ai họ iruo. (Luk 12:11, 12) Ma re du kpohọ isukulu ikpehru hu re ma te wo otoriẹ eware ididi nọ e rrọ ebe mai. (Iruẹru 4:13) Eme ma re ru re ma sai wo otoriẹ eware ididi Ọghẹnẹ? Joma ta kpahe eware jọ.

12. Oke vẹ ma rẹ lẹ kẹ ẹzi ọfuafo?

¹² Lẹ kẹ ẹzi ọfuafo. Re ma te se obe ukoko na jọ, u re woma re ma lẹ re ẹzi ọfuafo ọ kpọ omai. Onana u fo o tẹ make rọnọ mai ọvo ma rrọ oria hayo oke nọ ma wo o tulo ho. Olẹ otiọye na o te were Ọsẹ obọ odhiwu mai. Wọhọ epanọ Jesu ọ ta, Jihova ọ te kẹ omai ẹzi ọfuafo riẹ otẹrọnọ ma yare riẹ.—Luk 11:13.

13, 14. Ẹvẹ oma oruẹrẹhọ kẹ iwuhrẹ u re ro fi obọ họ kẹ omai wo otoriẹ eware ididi Ọghẹnẹ?

¹³ Ruẹrẹ oma kpahe kẹ iwuhrẹ ukoko. Otu ọrigbo na ọ be kẹ omai emuore evaọ ẹruoke. Ọrigbo na o bi ru iruo nọ a kẹ riẹ na gba nọ ọ be rọ kẹ omai ebe nọ ma re se jẹ ruẹrẹ iwuhrẹ ukoko fihọ. A re wo uvi ẹjiroro nọ a rẹ rọ vuẹ omai inọ ma wuhrẹ eware jọ. (1 Pita 2:17; Kọl. 4:16; Jud 3) Nọ ma be daoma nya lele ekpọvio nọ a be kẹ omai na yọ ma be roma kpotọ kẹ ẹzi ọfuafo na.—Evia. 2:29.

¹⁴ Ma tẹ be ruẹrẹ oma kpahe kẹ iwuhrẹ ukoko, u re woma re ma se eria Ebaibol nọ a fodẹ evaọ ebe mai na, ma vẹ jẹ daoma riẹ epanọ ikere na i ro kie kpahe eme nọ ma bi se na. Uruemu nana o te lẹliẹ otoriẹ mai ọrọ Ebaibol na kodo ziezi. (Iruẹru 17:11, 12) Who te rovie ikere na se, eme na e te jọ owhẹ uzou, ẹzi ọfuafo na o ve fi obọ họ kẹ owhẹ kareghẹhọ ae evaọ oke ofa. Ofariẹ, nọ ma tẹ be hai rovie Ebaibol na se, u ti fi obọ họ kẹ omai  kareghẹhọ oria nọ eme yena e rrọ evaọ obaro.

15. Fikieme ma je se ebe ekpokpọ mai, kọ ẹvẹ ma sai ro ru ere?

¹⁵ Hai se ebe ekpokpọ kpobi. A rẹ jọ iwuhrẹ ukoko wuhrẹ ebe mai jọ họ, rekọ a kere ai rọkẹ erere mai. Fiki mai a ro kere emagazini mai nọ ma bi fihọ ada kẹ ahwo na. Evaọ akpọ inẹnẹ na, iyero jọ e rẹ gba omai họ nọ ma jẹ hẹrẹ ohwo hayo oware jọ. Ma tẹ wha obe jọ nọ ma ri se he lele oma, ma sae rehọ uvẹ utioye na se abọ obe na jọ. Ahwo jọ a rẹ rọ ekwakwa ikporakporo gaviezọ kẹ ebe mai nọ a tẹ be nya onya hayo nọ a tẹ rrọ evaọ omoto. Ebe nana nọ a nabe roma totọ kere na, e rẹ lẹliẹ ovuhumuo mai kẹ eware abọ-ẹzi kodo ziezi.—Hab. 2:2.

16. Erere vẹ o re noi ze otẹrọnọ ma kere enọ nọ e ziọ omai iroro fihọ otọ jẹ kiẹ kpahe ae?

¹⁶ Hai roro didi. Who te bi se Ebaibol hayo ebe ukoko na, hai roro didi kpahe eware nọ who bi se. Nọ whọ be roma totọ muẹrohọ epanọ eme na i ro kiekpahe ohwohwo na, enọ jọ e sae ziọ owhẹ iroro. Whọ rẹ sai kere enọ itieye fihọ otọ jẹ kiẹ kpahe ae oke ofa. Nọ ma tẹ be kiẹ kpahe eware nọ i si omai uru, ẹsiẹe ma rẹ mae kiẹ kodo. Otoriẹ nọ ma wo no ekiakiẹ itieye na ze ma re ro ru iruo evaọ oke nọ ma gwọlọ e rai.—Mat. 13:52.

17. Oghẹrẹ vẹ whọ be hai ro ru uwuhrẹ uviuwou hayo orọ omobọ ra?

¹⁷ Ruẹrẹ oke họ kẹ uwuhrẹ Ebaibol uviuwou. Ugboma Esuo na o tudu họ omai awọ inọ ma ruẹrẹ owọwọ jọ hayo oke ofa jọ họ koka koka kẹ uwuhrẹ omobọ mai hayo orọ uviuwou. Oghẹrẹ nọ a ruẹrẹ iwuhrẹ ukoko mai fihọ no enẹna u ru rie lọhọ kẹ omai re ma fi ohrẹ nana họ iruo. Ebe vẹ wha re ro ru uwuhrẹ uviuwou na? Ahwo jọ a re se Ebaibol na, a vẹ kiẹ kpahe eria ikere nọ i vo rai ẹro ho, a ve kere otoriẹ nọ a duku fihọ evaọ Ebaibol rai. Evaọ iviuwou buobu, ahwo uviuwou na a rẹ roma totọ ta kpahe epanọ eware nọ a wuhrẹ na i ro kiekpahe uviuwou rai. Ahwo jọ nọ i wuzou uviuwou a rẹ salọ izoeme nọ a riẹ nọ e te mae kẹ uviuwou rai erere hayo nọ e ta kpahe enọ jọ nọ ahwo uviuwou na a nọ no, a vẹ rehọ ae ru uwuhrẹ na. Ababọ avro, nọ oke o be nya haro na who ti roro ku izoeme efa nọ whọ sai ro ru uwuhrẹ na. *

18. Fikieme ma gbe siuke kpemu hu evaọ ewuhrẹ eware ididi nọ e rrọ Ebaibol na?

¹⁸ Jesu ọ ta nọ ẹzi na ọ te jọ ọthuke. Fikiere ma re siuke kpemu hu evaọ ewuhrẹ eware ididi nọ e rrọ Ebaibol na. Eware ididi yena yọ abọjọ ọrọ “eriariẹ Ọghẹnẹ,” yọ a zizie omai inọ ma kiẹ ae riwi. (Se Itẹ 2:1-5.) Eware ididi nọ e rrọ Ebaibol na yọ enọ “Ọghẹnẹ ọ ruẹrẹ kpahe kẹ enọ iyou rie.” Nọ ma be daoma gbe wuhrẹ kpahe Eme Jihova na, ẹzi ọfuafo na o ti fi obọ họ kẹ omai keme “ẹzi [na] ọ rẹ guọlọ eware kpobi via, makinọ eware ididi Ọghẹnẹ.”—1 Kọr. 2:9, 10.

[Oruvẹ-obotọ]

Ẹvẹ Whọ te k’Uyo?

• Idhere ivẹ vẹ ẹzi na o re ro fi obọ họ kẹ omai kiẹ “eware ididi Ọghẹnẹ” via?

• Ẹkwoma amono ẹzi ọfuafo na ọ rọ fere eware ididi via evaọ ikpe-udhusoi ọsosuọ?

• Ẹvẹ ẹzi ọfuafo na o bi ro ru eware vẹ evaọ oke mai na?

• Eme ma rẹ sai ru re ma wo erere no iruo nọ ẹzi na o bi ru ze?

[Enọ Uwuhrẹ]

[Ẹkpẹti nọ ọ rrọ ẹwẹ-obe avọ 22]

Oghẹrẹ nọ Ẹzi na O ro Rovie Otofa Etẹmpol Abọ-Ẹzi na Via

Usu “eware ididi Ọghẹnẹ” nọ a rovie via evaọ ikpe-udhusoi ọsosuọ na họ otoriẹ na inọ uwou-udhu na gbe etẹmpol nọ a bọ uwhremu na i dikihẹ kẹ oware ofa nọ u wo aghae gaga. Pọl o se rie “uwou-udhu egagọ o nọ Ọnowo na o ro vi [orọnikọ] ohwo akpọ họ.” (Hib. 8:2) Onana yọ etẹmpol abọ-ẹzi ologbo na, ọruẹrẹfihotọ nọ a rẹ rọ lẹ se Ọghẹnẹ, onọ idhe ẹtanigbo gbe ọkwa-ozerẹ Jesu Kristi i ru lọhọ.

Ọruẹrẹfihotọ “uwou-udhu egagọ” na u muhọ evaọ ukpe 29 C.E., okenọ Jesu ọ họ-ame nọ Jihova ọ jẹe rehọ wọhọ ọnọ ọ te jọ idheidhe ọgbagba. (Hib. 10:5-10) Okenọ Jesu o whu jẹ kparoma no, ọ tẹ ruọ eva Ọrẹri Erẹri ọrọ etẹmpol abọ-ẹzi na, ọ tẹ rehọ aghare idheidhe riẹ kpohọ “obọ aro Ọghẹnẹ.”—Hib. 9:11, 12, 24.

Evaọ oria ofa, Pọl ukọ na o kere kpahe Ileleikristi nọ a rọ ẹzi wholo na inọ a “jẹ ro ruọ uwou egagọ-ode ẹri eva Ọnowo na.” (Ẹf. 2:20-22) Kọ uwou egagọ-ode nana họ “uwou-udhu egagọ” nọ Pọl ọ ta kpahe evaọ ileta riẹ se ahwo Hibru na? Evaọ ikpe buobu, ere idibo Jihova a roro. O wọhọ nọ a be jọ otọakpọ ruẹrẹ Ileleikristi nọ a rọ ẹzi wholo na họ re a te jọ ‘itho’ evaọ etẹmpol obọ odhiwu ọrọ Jihova.—1 Pita 2:5.

Rekọ, evaọ urere ukpe 1970, utu ọrigbo na a te ti muhọ evuhumu inọ etẹmpol nọ Pọl o kere kpahe se ahwo Ẹfẹsọs na ọ sae jọ etẹmpol abọ-ẹzi ologbo Jihova na ha. Otẹrọnọ “uwou-udhu egagọ” na u dikihẹ kẹ Ileleikristi nọ a rọ ẹzi wholo nọ e kparoma ze no na, koyehọ ọruẹrẹfihotọ “uwou-udhu egagọ” na u muhọ okenọ Ileleikristi na a kparoma ze no evaọ etoke “ẹtha Ọnowo na.” (1 Tẹs. 4:15-17) Rekọ nọ Pọl ọ jẹ ta kpahe uwou-udhu na, o kere nọ: ‘Orọ oware oka rọ kẹ oge ọnana.’—Hib. 9:9.

Ma tẹ rọ eme nana wawo ikere efa, o rrọ vevẹ inọ orọnikọ obọnana etẹmpol abọ-ẹzi na u muhọ họ, yọ orọnikọ Ileleikristi nọ a rọ ẹzi wholo na yọ ‘itho’ nọ a be jọ otọakpọ ruẹrẹhọ họ re a te jọ abọ etẹmpol na. Ukpoye, Ileleikristi nọ a rọ ẹzi wholo na a be gọ evaọ etegu gbe evaọ Ọrẹri etẹmpol abọ-ẹzi na, be “rehọ okẹ iwẹegọ ejiro” kẹ Ọghẹnẹ kẹdẹ kẹdẹ.—Hib. 13:15.

[Uwoho nọ o rrọ ẹwẹ-obe avọ 23]

Eme ma re ru re otoriẹ mai ọrọ “eware ididi Ọghẹnẹ” u vi haro?