Bọ Isiuru Isase gbe Uwuhrẹ họ Udu Emọ Ra
Bọ Isiuru Isase gbe Uwuhrẹ họ Udu Emọ Ra
OBỌ nọ who re fihọ kẹ emọ ra re a wo ẹzi isase gbe uwuhrẹ omobọ-ohwo yọ uvi edhere jọ nọ whọ sae rọ ruẹrẹ ae họ kẹ emamọ uzuazọ evaọ obaro. Yọ isase gbe uwuhrẹ e rẹ kẹ evawere. Oware evawere nọ ahwo jọ a rẹ mae kareghẹhọ kpahe oke emaha rai họ, etoke nọ ọsẹgboni rai a jẹ hai ro se obe kẹ ae. Isase e rẹ kẹ omawere, yọ ere irere nọ i re noi ze re. Onana o mae rrọ ere kẹ idibo Ọghẹnẹ, nọ orọnọ uwuhrẹ Ebaibol o rẹ wha ẹnyaharo abọ-ẹzi ze na. Ọyewọ Oleleikristi jọ ọ ta nọ: “Usu eware nọ ma mai riwi ghare họ isase gbe uwuhrẹ.”
Ẹzi uwuhrẹ omobọ-ohwo nọ who re fi obọ họ kẹ emọ ra wo o rẹ sai fi obọ họ kẹ ai wo usu okpekpe kugbe Ọghẹnẹ. (Ol. 1:1-3, 6) Dede nọ esiwo o roma hwa obe oriẹse he, Ebaibol i dhesẹ nọ eghale ilogbo abọ-ẹzi i re no isase ze. Wọhọ oriruo, Eviavia 1:3 o ta nọ: “Oghale ute ọnọ o se eme aruọruẹ na via, oghale ute enọ i yo rai.” Ofariẹ, aghare ẹro-ofihotọ, onọ u wuzou gaga evaọ uwuhrẹ, u dhesẹ oma via evaọ ohrẹ nọ Pọl ukọ na ọ kẹ Timoti inọ: “He dhe iruo enana erueruo, rehọ uvẹ ra kpobi kẹ ae.” Fikieme? “Re ahwo kpobi a ruẹ ẹnyaharo ra.”—1 Tim. 4:15.
Uzẹme, re a riẹ obe ese jẹ riẹ uwuhrẹ eruo o nwane rrọ imuẹro ho inọ e te wha eghale se ohwo. Ahwo buobu a wo ekẹ nana rekọ a bi gbabọkẹ ae, be raha oke rai fihọ eware nọ i wuzou tere he. Nọ o rrọ ere na, ẹvẹ esẹgbini a sai fi obọ họ kẹ emọ rai bọ isiuru kẹ ewo eriariẹ nọ e rẹ kẹ erere?
Uyoyou gbe Oriruo Ra
Emaha e rẹ reawere uwuhrẹ nọ a tẹ ruẹ nọ a be rọ uyoyou wuhrẹ ae. Imava-orọo Ileleikristi jọ nọ a re se Owen gbe Claudia a ta kpahe emọ ivẹ rai nọ: “A jẹ hai rẹro etoke uwuhrẹ keme obọdẹ etoke o jọ rọkẹ ae—o jọ etoke evawere gbe omosasọ kẹ ae. A rehọ etoke uwuhrẹ na fihọ etoke omakugbe uyoyou.” Nọ emọ e be make kpako ruọ etoke udhu rai nọ o rẹ jọ use-abọ na, uyoyou nọ u re dhesẹ oma via evaọ etoke uwuhrẹ uviuwou u re gbe fi obọ họ kẹ emọ rọ emamọ ẹro rri uwuhrẹ. Emọ Owen avọ Claudia a rrọ ekobaro enẹna, yọ a gbe bi wo erere no ẹzi isase gbe uwuhrẹ nọ ọsẹgboni rai a fi obọ họ kẹ ai wo ze.
U te no uyoyou no, oriruo ra yọ oware ofa nọ u re fi obọ họ kẹ emọ gaga. Nọ emọ e tẹ be ruẹ esẹgbini rai ẹsikpobi nọ a bi se obe je bi ru uwuhrẹ omobọrai, o rẹ mae lọhọ kẹ ae re a ru onana họ ẹkẹ uruemu rai. Rekọ, wọhọ ọsẹ hayo oni, ẹvẹ whọ sai ro fi oriruo otioye h’otọ otẹrọnọ who wo ehoo obe use? O sae gwọlọ nọ who ru inwene evaọ eware nọ whọ rọ karo evaọ uzuazọ hayo uruemu ra kpahe isase. (Rom 2:21) Otẹrọnọ who ru isase họ oware nọ u wuzou gaga evaọ iruẹru ikẹdẹ kẹdẹ ra, u ti duobọte udu emọ ra. Osegboja ra—maero evaọ isase Ebaibol, oma oruẹrẹhọ kẹ iwuhrẹ ukoko, gbe uwuhrẹ uviuwou—u ti fi obọ họ kẹ emọ ra vuhu epanọ eware nana i wuzou te.
Ẹhẹ, uyoyou gbe oriruo ra i wuzou gaga evaọ obọ ufihọ kẹ emọ ra re a wo isiuru kẹ isase. Rekọ ugogo idhere vẹ whọ sai ro ru onana?
Isiuru nọ E rẹ Rọ Isase Muhọ
Eware jọ vẹ nọ i wuzou who re ru re whọ sae kọ isiuru isase fihọ udu emọ ra? Hae kẹ ae ebe nọ a gbẹ rrọ emaha na. Ọkpako ukoko jọ nọ ọsẹgboni riẹ a fi obọ họ kẹ wo isiuru kẹ isase ọ ta nọ: “Kẹ emọ ra uvẹ re a hae tọlọ je rovie ebe. Ẹkwoma ere oruo, ebe i ve ti zihe ruọ egbẹnyusu kẹ ae gbe abọjọ uzuazọ rai.” Fikiere ebe mai wọhọ Wuhrẹ Mi Owuhrẹ Ologbo Na gbe Obe Ikuigbe Ebaibol Mẹ i re zihe ruọ egbẹnyusu ekpekpe kẹ emọ buobu taure a tẹ te riẹ obe ese. Who te bi se ebe itieye na kugbe emọ ra, orọnikọ epanọ a rẹ jẹ ẹvẹrẹ ọvo who bi fi obọ họ kẹ ae wuhrẹ hẹ, rekọ te “uwuhrẹ Ẹzi na” gbe “uzẹme ẹzi na.”—1 Kọr. 2:13.
Hai se dovia ẹsikpobi. Ruẹrẹ oke họ nọ who re ro se obe kugbe emọ ra kẹdẹ kẹdẹ. Onana u re wuhrẹ ai epanọ a re se ẹme gbagba je fi obọ họ kẹ ai wo ẹzi obe use. Oghẹrẹ nọ who re se obe u wuzou gaga re. Whọ tẹ be hai se obe jajaja, ere ọvona a ti ru re. Evaọ uzẹme, whọ te ruẹ nọ emọ ra a te hae lẹ owhẹ inọ who dhe ikuigbe evona esese. Hai ru ere kẹ ae! U te te oria jọ no, a te gwọlọ nọ wha kpohọ ikuigbe efa. Rekọ whọ gba emọ ra họ se obe he. Jesu o fi oriruo h’otọ nọ ọ jẹ hai ro wuhrẹ ahwo nọ e jẹ gaviezọ kẹe “utho nọ a sai yo.” (Mak 4:33) Whọ gbẹ be gba emọ ra họ se obe he, a te hae rọ ọwhọ rẹro etoke nọ wha fihọ kẹ obe use, yọ onana u ti fi obọ họ kẹ owhẹ nyate utee ra nọ whọ gwọlọ rọ bọ isiuru obe use họ emọ ra.
Tuduhọ ae awọ re a se re, wha vẹ ta kpahe eware nọ wha se. O te were owhẹ gaga keme ẹmẹrera na, emọ esese ra a ti muọ eme buobu họ evuhu, se, jẹ riẹ otọ rai. Ẹta kpahe eware nọ wha se o rẹ sai fi obọ họ kẹ ai wo ẹnyaharo kpatakpata. Obe jọ nọ a kere kpahe epanọ a sai ro fi obọ họ kẹ emọ riẹ obe se ziezi u dhesẹ inọ ẹmeọta-kugbe u re fi obọ họ kẹ emọ “wuhrẹ eme nọ o gwọlọ nọ a re vuhu je wo otọriẹ rai evaọ obaro nọ a te bi se obe.” Obe ovona o ta re nọ: “Ẹme nọ a rẹ ta kugbe emọ esese nọ ẹvori rai o bi rovie ze obọ u fo—ẹmeọta kpahe eware nọ i wuzou . . . oye o rẹ mai fi obọ họ.”
Vuẹ emọ ra re a se obe kẹ owhẹ, jẹ tuduhọ ae awọ re a nọ enọ. Whọ sae nọ enọ jọ fihotọ, jẹ kẹ iyo sa-sa nọ a rẹ jọ salọ onọ o gba. Ẹkwoma ere oruo, emaha a vẹ te riẹ inọ ebe yọ ehri evuẹ, inọ eme nọ a be hai se na i wo otofa. Onana u re ruiruo gaga maero otẹrọnọ obe nọ wha bi se na u w’obọ kugbe Ebaibol na, onọ o rrọ obe nọ o mai wo ẹgba evaọ usu ebe kpobi.—Hib. 4:12.
Dede na, o thọrọ owhẹ ẹro họ inọ isase yọ oware nọ o gwọlọ ẹro ofihotọ gaga. O rẹ rehọ oke gbe ewuhrẹ re ohwo ọ sae riẹe ru ziezi. * Fikiere, ruẹ nọ whọ bọ isiuru isase emọ ra ga ẹkwoma ejiri nọ who re jiri ae ẹsikpobi kẹ omodawọ rai. Whọ tẹ be hai jiri emọ ra, u ti fi obọ họ kẹ ai wo uyoyou kẹ isase.
Isase E rẹ Kẹ Erere gbe Omawere
Who te wuhrẹ emọ ra epanọ a re ro ru uwuhrẹ kẹ omarai, u ti ru nọ a te rọ ruẹ erere nọ ọ rrọ isase. Uwuhrẹ họ ẹromuhọ eware ekpokpọ gbe epanọ eware nana i ro kiekpahe eware efa nọ whọ riẹ. O gwọlọ ẹgbakugbe evuẹ, ekareghẹhọ gbe eroruiruo evuẹ itieye na. Nọ ọmọ ọ tẹ riẹ epanọ a re ru uwuhrẹ jẹ ruẹ epanọ o sai ro fi obọ họ kẹe no, kẹsena ọ vẹ te ruẹ uwuhrẹ wọhọ oware erere gbe omawere.—Ọtausi. 10:10.
Fi obọ họ kẹ emọ vuhu eware nọ e roja kẹ uwuhrẹ. Uwuhrẹ Ebaibol Uviuwou, ikere okpẹdẹ nọ a re se, gbe eware itieye na efa yọ
obọdẹ uvẹ sa-sa nọ whọ sai ro fi obọ họ kẹ emọ ra wo onaa uwuhrẹ. Oma nọ wha re ro totọ keria tẹrovi ugogo oware nọ wha bi wuhrẹ, u re fi obọ họ kẹ emọ riẹ inọ uwuhrẹ o gwọlọ ẹromuhotọ. U te no ere no, whọ sae ta kẹ ọmọzae ra re ọ vuẹ owhẹ epanọ oware okpokpọ jọ nọ o wuhrẹ obọnana u ro w’obọ kugbe oware nọ ọ riẹ no vẹre. Onana u re fi obọ họ kẹe riẹ epanọ a rẹ rọ eware wawọ ohwohwo. Kọ ẹvẹ kpahe ọmọtẹ ra nọ whọ rẹ ta kẹ re ọ rehọ eme oboriẹ ta kpẹkpẹe kpahe eware nọ o se? Onana u ti fi obọ họ kẹe wo otoriẹ oware na ziezi jẹ kareghẹhọ iẹe. Oware ofa nọ u re fi obọ họ kẹ emọ kareghẹhọ oware nọ a wuhrẹ họ ọkiẹkpemu, igogo eware nọ e rrọ oria nọ wha se na nọ wha rẹ wariẹ ta kpahe. Whọ sai tube wuhrẹ emọ esese ra inọ a hai kere igogo eme jọ fihotọ evaọ etoke uwuhrẹ uviuwou hayo iwuhrẹ ukoko. Onana u re fi obọ họ kẹ ai fi udu họ ewuhrẹ na ziezi. Whẹ avọ emọ ra wha te ruẹ nọ eware nana i re ru uwuhrẹ siuru jẹ were oma.Ru re oria nọ wha bi jo wuhrẹ na o foma ziezi. Oria nọ o fọ, nọ elo ọ rrọ, nọ ofou ọ be ro ziezi u re fi obọ họ kẹ ohwo fi ẹro họ uwuhrẹ. Uzẹme, oghẹrẹ nọ esẹgbini a rri uwuhrẹ u wuzou gaga. Oni jọ ọ ta nọ: “U wuzou gaga re whọ hae ruẹrẹ oke họ ẹsikpobi kẹ isase gbe uwuhrẹ, je ru ei lele oke nọ who fihọ na. Onana u re fi obọ họ kẹ emọ ra wuhrẹ epanọ a re ru eware owowa. U re fi obọ họ kẹ ae riẹ inọ oware kpobi u wo ẹruoke riẹ.” Esẹgbini buobu a rẹ whaha emọ rai eruo oware ofa kpobi evaọ etoke uwuhrẹ. Ohwo jọ nọ ọ riẹ kpahe uwuhrẹ emọ ọ ta inọ onana yọ ugogo edhere jọ nọ a re ro fi obọ họ kẹ emọ wo emamọ uruemu kpahe uwuhrẹ.
Dhesẹ aghare uwuhrẹ kẹ emọ. Orọ urere, fi obọ họ kẹ emọ ra ruẹ irere nọ e rrọ uwuhrẹ. Efihiruo eware nọ a wuhrẹ i re ru ohwo ruẹ aghare uwuhrẹ. Uzoge Oleleikristi jọ ọ ta nọ: “Mẹ gbẹ ruẹ epanọ oware nọ me bi se u ro kpomahọ omẹ hẹ, uwuhrẹ na o rẹ kẹ omẹ ehoo. Rekọ o tẹ rrọ oware nọ mẹ ruẹ nọ o rẹ sai kpomahọ omẹ, o rẹ jọ isiuru mẹ re me wo otoriẹ riẹ.” Nọ emọ e tẹ ruẹ uwuhrẹ wọhọ edhere jọ nọ a sai ro le utee jọ nọ u wuzou kẹ ai tobọ, onana o te lẹliẹ ae wo ajọwha kẹ uwuhrẹ. A ve ti mu isiuru họ ewo kẹ uwuhrẹ, wọhọ epanọ a wo kẹ isase na.
Erere nọ Ọ Mae Rro
A rẹ ruẹ unu gbiku irere nọ i re noi ze he nọ whọ tẹ bọ isiuru isase họ udu emọ ra. U te no omawere nọ u re no isase gbe uwuhrẹ ze no, u re fi obọ họ kẹ ohwo ru ziezi evaọ isukulu, evaọ ofẹ iruo, evaọ ọriẹyero kugbe amọfa, u re je fi obọ họ kẹ ohwo wo otoriẹ akpọ nọ ọ wariẹ omai họ, je ru uyoyou ọsẹgboni avọ ọmọ ga.
Onọ o mae rro họ, nọ emọ ra a te wo ẹzi uwuhrẹ, o rẹ sai fi obọ họ kẹ ae jọ gaga evaọ abọ-ẹzi. Uyoyou nọ emọ i re wo kẹ uwuhrẹ họ usiavẹ nọ u re rovie udu gbe iroro rai nọ a sae rọ “riẹ epa okẹkẹe, gbe uthethei, [gbe] ekpehru gbe ekodo” orọ uzẹme Ikereakere na. (Ẹf. 3:18) Uzẹme, eware buobu e riẹ nọ eyewọ Ileleikristi a re wuhrẹ emọ rai. Nọ esẹgbini a be daoma ruẹrẹ oke gbe uvẹ họ ro wuhrẹ emọ rai emamọ edhere uzuazọ na, a bi rẹro inọ uwhremu na u ti no emọ na eva ze re a jọ enọ e be gọ Jihova. Obọ ufihọ kẹ emọ re a wo emamọ uruemu kpahe uwuhrẹ u re ru ai wo jẹ yọrọ emamọ usu kugbe Ọghẹnẹ. Fikiere, hae yare Jihova re ọ ghale omodawọ ra nọ whọ be bọ isiuru isase gbe uwuhrẹ họ udu emọ ra na.—Itẹ 22:6.
[Oruvẹ-obotọ]
^ edhe-ẹme 14 Obe use gbe uwuhrẹ e rrọ use-abọ ulogbo kẹ emọ nọ i wo oghẹrẹ ẹyao jọ nọ o kpomahọ ẹvori rai. Rọkẹ oware nọ esẹgbini e rẹ sai ru ro fi obọ họ kẹ emọ itieye na, rri Awake! ọ February 22, 1997, ẹwẹ-obe avọ 3-10.
[Ẹkpẹti/Uwoho nọ e rrọ ẹwẹ-obe avọ 26]
Isase . . .
• Hai fi ebe h’otọ
• Se dovia
• Tuduhọ emọ awọ re a w’obọ
• Wha ta kpahe eware nọ wha se
• Vuẹ emọ ra re a se kẹ owhẹ
• Tuduhọ emọ ra awọ re a nọ enọ
Uwuhrẹ . . .
• Fi emamọ oriruo h’otọ
• Wuhrẹ emọ ra epanọ a re . . .
○ fi ẹro hotọ
○ ru ẹwawọ
○ ru orukpẹre
○ ru ọkiẹkpemu
○ kere igogo eme fihotọ
• Ru oria uwuhrẹ kiehọ oma ziezi
• Dhesẹ aghare uwuhrẹ kẹ ae