“Didi Oghẹrẹ Ahwo Wha Hẹ Jọ!”
“Didi Oghẹrẹ Ahwo Wha Hẹ Jọ!”
“Kinọ enana kpobi e rẹte ghinẹ raha no na, didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ!” —2 PITA 3:11.
1. Fikieme ileta avivẹ Pita o rọ jọ uduotahawọ ẹruoke kẹ Ileleikristi oke riẹ?
OKENỌ Pita ukọ na o ro kere ileta avivẹ riẹ na yọ ukoko Ileleikristi na u thihakọ ukpokpoma buobu no, dede na oyena u kpomahọ ẹvi nọ ọ jọ ukoko na hayo ọwhọ nọ ukoko na u wo ho. Fikiere, Setan ọ tẹ rọ ẹghẹ ọfa ze, onọ ọ rọ viẹ idibo Ọghẹnẹ họ ẹsibuobu no. Wọhọ epanọ Pita ọ ta, Setan ọ rọ ẹkwoma iwuhrẹ erue nọ i “wo ibiaro nọ e vọ avọ ẹhwae-obro” gbe “iroro nọ eruẹrẹ oma kpahe kẹ eware amọfa eguọlọ” rọ daoma viẹ idibo Ọghẹnẹ họ. (2 Pita 2:1-3, 14; Jud 4) Nwani fo, ileta avivẹ Pita o kẹ Ileleikristi uduotahawọ re a kru ẹgbakiete rai.
2. Eme uzou avọ 3 orọ ileta avivẹ Pita o tẹrovi, kọ enọ vẹ u fo nọ ma rẹ nọ oma mai?
2 Pita o kere nọ: “Me roro irie kiehọ, nnọ epanọ mẹ rọ eva oma nana, mẹ rẹ hae rehọ edhere ekareghẹhọ jaja owhai, kemena mẹ riẹ nọ u reti lehie he nọ oma mẹ na u re ti hrerẹ . . . Mẹ rẹte ruẹ nọ okenọ me whu no wha rẹ te kareghẹhọ eware nana oke kpobi.” (2 Pita 1:13-15) Ẹhẹ, Pita ọ riẹ nọ oke uwhu riẹ o kẹle no, rekọ ọ gwọlọ inọ a rẹ kareghẹhọ eme riẹ na. Yọ ere o ginẹ via keme eme ọ Pita na e rrọ Ebaibol na nọ ma rẹ ruẹ se nẹnẹ. Uzou avọ 3 orọ ileta avivẹ Pita na o mae rrọ isiuru kẹ omai, keme o tẹrovi ‘edẹ urere’ uyerakpọ nana gbe ọraha ihru gbe akpọ ẹwoho na. (2 Pita 3:3, 7, 10) Didi ohrẹ Pita ọ kẹ omai? Ẹvẹ ohrẹ riẹ nọ ma re fihọ iruo o sai ro fi obọ họ kẹ omai wo ọjẹrehọ Jihova?
3, 4. (a) Eme vẹ Pita ọ ta nọ i re ru ohwo roro, kọ didi unuovẹvẹ ọ kẹ? (b) Eware esa vẹ ma te ta kpahe?
3 Nọ Pita ọ ta kpahe ẹraha akpọ Setan no, o te kere nọ: “Didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ!” (2 Pita 3:11, 12) O rrọ vevẹ inọ orọnikọ Pita ọ be jọ etenẹ nọ onọ họ, rekọ ọ be rọ ẹme nana ru ahwo roro. Pita ọ riẹ inọ ahwo nọ i ru oreva Jihova je dhesẹ iruemu nọ e rẹ were iẹe ọvo họ enọ e te zọ vrẹ “ẹdẹ orukele Ọghẹnẹ” nọ o be tha na. (Aiz. 61:2) Oyejabọ nọ ukọ na o ro fibae nọ: “Fikiere, whai iyoyou mẹ, epanọ wha riẹ onana vẹre ino na, wha sẹro oma, ogbẹrọ erehe iruthọ ahwo omuomu [koyehọ, iwuhrẹ erue] e rẹte wọ owhai vrẹ, odikihẹga rai ọ vẹ te va owhai abọ vru.”—2 Pita 3:17.
4 Fikinọ Pita ọ jọ usu ahwo nọ e riẹ epanọ edẹ urere na e te jọ, o vuhumu inọ o gwọlọ re Ileleikristi a muẹrohọ otọ ziezi re a sae yọrọ ẹgbakiete rai. Uwhremu na, Jọn ukọ na ọ fodẹ oware nọ o jẹ r’oja re Ileleikristi a muẹrohọ otọ ziezi. Ọ jọ eruẹaruẹ ruẹ Setan nọ a gele no obọ odhiwu ze avọ “ofu ọgaga” nọ o wo kpahe “enọ i [bi] koko izi Ọghẹnẹ, enọ i [bi] se isẹi kẹ Jesu.” (Evia. 12:9, 12, 17) Wọhọ utu, idibo Ọghẹnẹ nọ a rọ ẹzi wholo gbe otu “igodẹ efa” na a ti fi kparobọ. (Jọn 10:16) Rekọ ẹvẹ kpahe omai omomọvo? Kọ ma te yọrọ ẹgbakiete mai? Onana o te lọhọ kẹ omai ma tẹ be daoma (1) dhesẹ iruemu nọ e rẹ were Ọghẹnẹ, (2) jọ ababọ epe jẹ kare afuẹwẹ evaọ uruemu gbe abọ-ẹzi, gbe (3) wo eriwo nọ u fo kpahe edawọ. Joma ta kpahe eware nana.
Dhesẹ Iruemu nọ E Rẹ Were Ọghẹnẹ
5, 6. Didi iruemu u fo nọ ma re dhesẹ, kọ fikieme o jẹ gwọlọ nọ ma rẹ “dawo oma” ziezi re ma sai dhesẹ ai?
5 Evaọ ubrobọ emuhọ ileta avivẹ Pita, o kere nọ: “Dawo oma re wha rehọ ọtẹruo tua orọwọ rai, wha jẹ rehọ eriariẹ tua ọtẹruo rai; jẹ rehọ oma-onyẹ tua eriariẹ, emudhe rọ tua oma-onyẹ, gbe oreva Ọghẹnẹ rọ tua emudhe, wha vẹ jẹ rọ uyoyou-oniọvo rọ tua oreva Ọghẹnẹ, uyoyou-oniọvo kọ avọ uyoyou. Keme re enana kpobi e tẹ rọ oma rai ria i re si owhai no oyẹlẹ, wha gbẹ jọ ababọ ubi eva ẹriẹ Jesu Kristi Ọnowo mai hi.”—2 Pita 1:5-8.
6 Uzẹme, o gwọlọ nọ ma rẹ “dawo oma” ziezi re ma sai w’obọ evaọ iruẹru nọ i re fi obọ họ kẹ omai wo iruemu nọ e rẹ were Ọghẹnẹ. Wọhọ oriruo, o gwọlọ omodawọ re ohwo ọ sai kpohọ iwuhrẹ ukoko na kpobi, se Ebaibol na kẹdẹ kẹdẹ, jẹ nya lele omaa uwuhrẹ omobọ-ohwo. Yọ o rẹ jẹ sae gwọlọ iruo egaga gbe emamọ omaa re a wo Uwuhrẹ Ebaibol Uviuwou nọ a re ru evaọ owọwọ. Rekọ nọ iruẹru nana e tẹ reria omai oma no, o gbẹ te bẹ omai hi re ma ru ai ẹsikpobi—maero nọ ma tẹ ruẹ irere nọ i bi no ai ze.
7, 8. (a) Didi eme ahwo jọ a ta no kpahe Uwuhrẹ Ebaibol Uviuwou nọ a re ru evaọ owọwọ na? (b) Didi erere wha be jọ uwuhrẹ Ebaibol uviuwou rai wo?
7 Oniọvo-ọmọtẹ jọ o kere kpahe ọruẹrẹfihotọ uwuhrẹ Ebaibol uviuwou na inọ: “U bi fi obọ họ kẹ omai wuhrẹ kpahe eware buobu.” Oniọvo-ọmọtẹ ọfa ọ ta nọ: “Evaọ uzẹme, mẹ hae gwọlọ nọ uwuhrẹ obe ukoko na u kuhọ họ. Oye o jọ ewuhrẹ nọ o mae were omẹ kpaobọ. Rekọ enẹna nọ ma wo Uwuhrẹ Ebaibol Uviuwou nọ ma bi ru evaọ owọwọ no na, mẹ tẹ ruẹ inọ Jihova ọ riẹ oware nọ ma gwọlọ gbe oke nọ ma rọ gwọlọ iẹe.” Ọzae uwou-orọo jọ ọ ta nọ: “Uwuhrẹ Ebaibol Uviuwou u fi obọ họ kẹ omai gaga no. A rẹ ruẹ obọ uwuhrẹ nana ha keme u bi fi obọ họ kẹ omai wuhrẹ eware nọ i kie kpahe uviuwou mai! O rrọ omai imava na oma inọ ma bi wo ẹnyaharo evaọ edhesẹ ubi ẹzi ọfuafo na, yọ ma bi wo evawere evaọ odibọgba mai vi epaọ ọsosuọ.” Ọzae uwou-orọo ọfa ọ ta nọ: “Emọ mai a bi ru ekiakiẹ kẹ omobọ rai je bi wuhrẹ eware buobu—yọ onana o be were ae. Ọruẹrẹfihotọ nana o nwani ru omai wo evaifihọ inọ Jihova ọ riẹ oware nọ o rrọ omai oja gbe inọ ọ be kẹ uyo elẹ mai.” Kọ eme nana i dhesẹ eriwo nọ who wo kpahe obọdẹ okẹ nana nọ Ọghẹnẹ ọ kẹ omai na?
8 Whọ k’uvẹ hẹ re eware esese jọ e whaha eruo Uwuhrẹ Ebaibol Uviuwou ra. Imava-orọo jọ a ta nọ, “Evaọ eka ene nọ e vrẹ, oware jọ o jẹ hae jọ uviuwou mai via evaọ Edene-Oka kpobi, onọ o jẹ hae gwọlọ whaha omai eruo uwuhrẹ uviuwou, rekọ ma k’uvẹ re onana o via ha.” Uzẹme, evaọ ẹsejọ, o rẹ sae gwọlọ nọ wha nwene omaa rai. Ghele na, wha gbaemu inọ wha rẹ siọ Uwuhrẹ Ebaibol Uviuwou rai ba eruo ho—makọ oka ọvo dede!
9. Oghẹrẹ vẹ Jihova ọ rọ thọ Jerimaya, kọ eme ma re wuhrẹ no oriruo riẹ ze?
9 Jerimaya ọruẹaro na yọ emamọ oriruo kẹ omai. Ọ jẹ emu abọ-ẹzi nọ o wo mi Jihova rehọ je dhesẹ edẹro kẹe. Oyena u fi obọ họ kẹe rọ odiri whowho ovuẹ Ọghẹnẹ kẹ enọ eme riẹ e jẹ dheva. Ọ ta nọ: “Eme ỌNOWO na o . . . jọ evaọ eva mẹ wọhọ erae nọ e rẹ tuọ wariẹ [igbenwa] mẹ.” (Jeri. 20:8, 9) U te je fi obọ họ kẹe thihakọ etoke ogaga nọ o jọ taure a tẹ te raha Jerusalẹm. Nẹnẹ, ma wo oma Ebaibol na soso. Ma tẹ be rọ osegboja wuhrẹ Ebaibol na je wo eriwo Ọghẹnẹ wọhọ Jerimaya, ma te rọ oghọghọ thihakọ evaọ odibọgba na, thihakọ edawọ te urere, jẹ jọ fuafo evaọ uruemu gbe evaọ abọ-ẹzi.—Jem. 5:10.
Jọ “Ababọ Epe Hayo Afuẹwẹ”
10, 11. Fikieme o jẹ gwọlọ inọ ma rẹ daoma jọ “ababọ epe hayo afuẹwẹ,” kọ eme oyena o gwọlọ mi omai?
10 Mai Ileleikristi ma riẹ inọ edẹ urere na ma rrọ na. Fikiere, u bi gbe omai unu hu inọ akpọ na ọ be jọ eware nọ Jihova o mukpahe gbudie, eware wọhọ uvo-uthei, ọfariẹ-ogbe, gbe ozighi. A rẹ sae rọ eme nana dhesẹ ẹghẹ Setan: ‘Otẹrọnọ ukpokpoma u re gele idibo Ọghẹnẹ kie he, ẹsejọhọ a sae rọ ogbekuo gele ai kie.’ (Evia. 2:13, 14) Fikiere, o r’oja re ma se ohrẹ oyoyou Pita nana te iroro: ‘Wha fi-ududhe re Ọghẹnẹ ọ ruẹ owhai ababọ epe hayo afuẹwẹ, rekọ evaọ udhedhẹ.’—2 Pita 3:14.
11 Ẹme na “wha fi-ududhe” u tho ohrẹ nọ Pita ọ kake kẹ na, onọ ọ jọ tuduhọ omai awọ re ma “dawo oma.” U re vevẹ inọ Jihova, ọnọ ọ kẹ Pita ẹzi riẹ ro kere eme yena ọ riẹ nọ o gwọlọ omodawọ mi omai ziezi re ma sae jọ “ababọ epe hayo afuẹwẹ,” siomano ogbekuo akpọ Setan. Omodawọ nana u kugbe udu mai nọ ma rẹ kpọ ziezi re isiuru iyoma e siẹe ba esu thọ. (Se Itẹ 4:23; Jemis 1:14, 15.) Onana o tẹ jẹ gwọlọ nọ ma re mudhe kẹ ahwo nọ uzuazọ Oleleikristi mai o be dheva, ẹnọ e “be poviẹ [omai].”—1 Pita 4:4.
12. Imuẹro vẹ e rrọ Luk 11:13?
12 Fiki sebaẹgba mai, o re bẹbẹ re ma ru oware nọ u kiehọ. (Rom 7:21-25) Re ma sai ru oware nọ u kiehọ, Jihova ma re bru keme ọ rẹ rehọ ẹzi ọfuafo kẹ ahwo nọ e be rọ udu kpobi yare iẹe. (Luk 11:13) Ẹzi na o ve fi obọ họ kẹ omai wo uruemu nọ o rẹ were Ọghẹnẹ, yọ onana u re ru nọ ma jẹ sai thihakọ edawọ gbe ebẹbẹ sa-sa nọ ma be jọ uzuazọ rẹriẹ ovao dhe, enọ e rẹ sae ga viere nọ ẹdẹ Jihova o bi si kẹle na.
Jọ Edawọ E Bọ Owhẹ Ga
13. Eme o re fi obọ họ kẹ omai thihakọ nọ ma tẹ rẹriẹ ovao dhe edawọ?
13 Nọ ma gbẹ be rria akpọ omuomu nana, ma te rẹriẹ ovao dhe egheghẹrẹ ebẹbẹ. Rekọ ukpenọ edawọ e lẹliẹ udu whrehe owhẹ, kọ who gbe rri rai wọhọ uvẹ nọ who re ro dhesẹ uyoyou ra kẹ Ọghẹnẹ, re e jẹ bọ ẹrọwọ nọ who fihọ iẹe avọ Ebaibol na ga ziezi? Jemis olele na o kere nọ: “Imoni mẹ, re egheghẹrẹ edawọ i te te owhai, wha rehọ iẹe avọ evawere, keme na wha riẹ nọ odawọ nọ u te orọwọ rai na, o rẹ rehọ akothiho ọwhawha tha.” (Jem. 1:2-4) Jẹ kareghẹhọ inọ “Ọnowo ọ riẹ epanọ o re ro siwẹ [ahwo riẹ] no edawọ.”—2 Pita 2:9.
14. Didi uduotahawọ who wo no oriruo Josẹf ze?
14 Roro kpahe oriruo Josẹf, ọmọzae Jekọp, ọnọ inievo riẹ a zẹ kpohọ igbo. (Emu. 37:23-28; 42:21) Kọ oja nọ a gbe kẹ Josẹf o lẹliẹ ẹrọwọ riẹ whrehe? Kọ ọ dheva kẹ Ọghẹnẹ fikinọ ọ kuvẹ re oware uyoma utioye o via kẹe? Ebaibol e kuyo nọ ijo! Dede na, edawọ Josẹf i no ere kuhọ họ. Uwhremu na, a tẹ wọ eku họ iẹe uzou inọ ọ jẹ gwọlọ gba aye jọ du, fikiere a te fi ei họ uwou-odi. Dede na, onana u ru rie kiuke ku Ọghẹnẹ hẹ. (Emu. 39:9-21) Ukpoye, o wo ọbọga rono edawọ na ze, yọ onana o wha eghale buobu sei.
15. Eme ma rẹ sai wuhrẹ no oriruo Naomi ze?
15 Uzẹme, edawọ e rẹ sai ru ọkora jọ omai oma. O sae jọnọ Josẹf ọ jọ ọkora evaọ ẹsejọ. Ọkora ọ jọ idibo ẹrọwọ Ọghẹnẹ efa oma re. Roro kpahe Naomi, ọnọ ọzae riẹ gbe emezae ivẹ nọ o wo i whu ku. Ọ ta nọ: “Wha gbe se omẹ Naomi hi, wha se omẹ Mara [onọ otofa riẹ o rrọ “Ẹyayare”], keme Ọghẹnẹ Erumeru na o ru omẹ eware eyayare i no.” (Rut 1:20, 21) Uzẹme, ohwo ọvo nọ oware utionana o rẹ via kẹ nọ o re wo ọkpọ iroro nọ Naomi o wo na ha ọ riẹ hẹ. Dede na, wọhọ Josẹf, Naomi ọ kẹ uvẹ hẹ re edawọ nọ i te rie i ru ei zoruẹ hayo si obọ no ẹgbakiete riẹ. Ukuhọ riẹ, Jihova ọ ghale aye ọghaghae yena. (Rut 4:13-17, 22) U te no ere no, Jihova o ti si eyoma kpobi nọ Setan avọ akpọ omuomu riẹ a wha ze no evaọ Aparadase otọakpọ nọ ọ be tha na. “A gbẹ te kareghẹhọ eware anwae he hayo a gbe ti roro ai hi.”—Aiz. 65:17.
16. Didi uruemu u fo nọ ma re wo kpahe olẹ, kọ fikieme?
16 Fikinọ ma riẹ inọ Ọghẹnẹ o you omai, ma ti thihakọ edawọ kpobi nọ ma rẹriẹ ovao dhe. (Se Ahwo Rom 8:35-39.) Dede nọ Setan ọ te gbẹ daoma re o ru oma lọhọ omai, ọ te kparobọ họ otẹrọnọ ma “jaja aro vi” jẹ be hae “lẹ olẹ” ẹsikpobi. (1 Pita 4:7) Jesu ọ ta nọ: “Wha roro kẹse kẹse, wha hẹ lẹ re wha sae va eware nana kpobi abọ, enọ i re ti ruẹ na, re wha sai dikihẹ aro Ọmọ ohwo.” (Luk 21:36) Jesu ọ rehọ ohrẹ nana dhesẹ inọ enẹna họ oke nọ ma rẹ rọ daoma ru re usu nọ ma wo kugbei avọ Ọsẹ riẹ o jọ gaga. Ahwo nọ a wo emamọ edikihẹ evaọ aro Ọghẹnẹ ọvo họ enọ e te zọ evaọ ẹdẹ ofu Jihova.
Wo Obọ Ziezi Evaọ Egagọ Jihova
17. Otẹrọnọ o rrọ use-abọ re a jọ ẹkwotọ ra ta usiuwoma, ẹvẹ whọ sai ro lele emamọ oriruo orọ idibo Ọghẹnẹ oke anwae?
17 Obọ nọ ma re wo evaọ iruo Ọghẹnẹ o rẹ kẹ omosasọ. Onana o rẹ lẹliẹ omai kareghẹhọ eme Pita na inọ: “Didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ!” (2 Pita 3:11) Iruo nọ ma rẹ mae rọ karo họ ewhowho emamọ usi na. (Mat. 24:14) Uzẹme, evaọ eria jọ, o rẹ sae jọ use-abọ re a ta usiuwoma na, ẹsejọhọ fiki ọwọsuọ hayo ababọ osegboja ahwo nọ ma be ta usiuwoma kẹ, hayo fikinọ ilale uzuazọ i bi mi ai oke rai kpobi no. Idibo Jihova oke anwae a rẹriẹ ovao ku iyero itieye. Ghele na, oma o lọhọ e rai hi rekọ a jẹ hai whowho ovuẹ Ọghẹnẹ kẹ ahwo na “no oke te oke.” (Se Jerimaya 7:24-26; 2 Irv. 36:15, 16) Eme o fi obọ họ kẹ ae thihakọ? A rri ovuẹ na oghẹrẹ nọ Jihova o rri rie, orọnikọ oghẹrẹ nọ akpọ na o rri rie he. Ofariẹ, a rehọ e riẹ wọhọ uvẹ-ọghọ ulogbo re a rọ odẹ Ọghẹnẹ sẹ ai.—Jeri. 15:16.
18. Oghẹrẹ vẹ iruo usiuwoma ota na u ti ro ru odẹ Ọghẹnẹ fo evaọ obaro?
18 Ma wo uvẹ-ọghọ nọ ma bi ro whowho odẹ gbe ẹjiroro Jihova re. Dai roro onana: Fiki usiuwoma ota mai, ewegrẹ Ọghẹnẹ a te sai gu unoma ha inọ a yo ovuẹ Ọghẹnẹ hẹ, nọ Ọghẹnẹ ọ te wọ ofu riẹ bru ai ze. Evaọ uzẹme, wọhọ Fẹro oke anwae, a te riẹ inọ Jihova họ ọnọ ọ be họre ae na. (Ọny. 8:1, 20; 14:25) Evaọ oke ovona, Jihova o ti bru ọghọ họ idibo riẹ oma nọ o ti ru ei vevẹ kẹ ewegrẹ riẹ inọ idibo riẹ na họ enọ ọ jẹrehọ.—Se Izikiẹl 2:5; 33:33.
19. Ẹvẹ ma sai ro dhesẹ nọ o rrọ isiuru mai re ma rehọ uvẹ akothiho Jihova na ru iruo ziezi?
19 Evaọ ubrobọ urere ileta avivẹ Pita, o kere se ibe Ileleikristi riẹ nọ: “Wha kele akothiho Ọnowo mai gbe usiwo.” (2 Pita 3:15) Ẹhẹ, joma rehọ uvẹ akothiho Jihova nọ u gbe rovie kẹ omai na ro ru iruo ziezi. Evaọ oghẹrẹ vẹ? Ẹkwoma ewo iruemu nọ e rẹ were iẹe, “ababọ epe hayo afuẹwẹ” nọ ma rẹ jọ, ewo emamọ eriwo kpahe edawọ, gbe obọ nọ ma re wo ziezi evaọ iruo Uvie na. Ere oruo ma te rọ jọ usu ahwo nọ a te reawere eghale nọ i wo oba ha evaọ “ihru ekpokpọ avọ akpọ ọkpokpọ” na.—2 Pita 3:13.
Kọ Whọ Kareghẹhọ?
• Ẹvẹ ma sai ro wo iruemu nọ e rẹ were Ọghẹnẹ?
• Ẹvẹ ma sae rọ jọ “ababọ epe hayo afuẹwẹ”?
• Eme ma rẹ sai wuhrẹ no oriruo Josẹf gbe ọrọ Naomi ze?
• Fikieme obọ nọ ma re wo evaọ iruo usiuwoma ota na o jẹ rrọ obọdẹ uvẹ-ọghọ?
[Enọ Uwuhrẹ]
[Uwoho nọ o rrọ ẹwẹ-obe avọ 9]
Eme o ti fi obọ họ kẹ owhai ezae uwou-orọo gbe uviuwou rai wo iruemu nọ e rẹ were Ọghẹnẹ?
[Iwoho nọ e rrọ ẹwẹ-obe avọ 10]
Eme ma rẹ sai wuhrẹ no oghẹrẹ nọ Josẹf o ro thihakọ edawọ ze?