Wo Obọ Ziezi Evaọ Iruo Ivuẹvu Ilogbo na
Wo Obọ Ziezi Evaọ Iruo Ivuẹvu Ilogbo na
“Wha hẹ jọ owhreze iruo Ọnowo na.”—1 KỌR. 15:58.
1. Didi uzizie Jesu ọ kẹ ilele riẹ?
OKENỌ Jesu ọ jẹ nya ẹkwotọ Sameria vrẹ evaọ ubrobọ urere ukpe 30 C.E., o te serihọ evaọ akotọ ozae jọ nọ o kẹle ẹwho Saeka. Ọ tẹ jọ etẹe ta kẹ ilele riẹ nọ: “Wha kpare aro rai, wha ri idhu, epanọ e fano kẹ evuo.” (Jọn 4:35) Orọnikọ ivuẹvu ekakọ jọ Jesu ọ jẹ ta kpahe na ha rekọ ekokohọ ahwo evezi nọ e be te jọ ilele riẹ. Ọ rehọ eme nana ta kẹ ilele riẹ inọ a ruẹrẹ oma họ kẹ iruo. Iruo buobu e rrọ otọ, yọ oke nọ a wo kẹ iruo na u tulo ho.
2, 3. (a) Eme o dhesẹ inọ oke ivuẹvu ma be rria na? (b) Eme uzoẹme nana o te ta kpahe?
2 Eme nọ Jesu ọ ta kpahe ivuẹvu na i wo obọdẹ otofa kẹ omai nẹnẹ. Ma be rria etoke nọ idhu na, enọ i dikihẹ kẹ ahwo-akpọ, e rọ “fano kẹ evuo.” Kukpe kukpe, a bi zizie ima ahwo buobu re a ti wuhrẹ uzẹme nọ o rẹ kẹ uzuazọ, yọ ilele ekpokpọ nọ e be họ-ame a bu te idu buobu. Ma wo uvẹ-ọghọ nọ ma bi ro wo obọ evaọ iruo ivuẹvu nọ e mae rro kpobi, evaọ otọ ẹruọsa Olori ivuẹvu na, Jihova Ọghẹnẹ. Kọ whọ rrọ “owhreze iruo” ivuẹvu nana?—1 Kọr. 15:58.
3 Evaọ etoke odibọgba ikpe esa gbe ubro riẹ, Jesu o wuhrẹ ilele riẹ re a jọ etausiuwoma. Evaọ usu eware buobu nọ i wuzou nọ Jesu o wuhrẹ ilele riẹ na, ma te jọ uzoẹme nana ta kpahe esa jọ. Eware nana ọvuọvo o ti fiẹgba họ okwakwa-aghae nọ o r’oja gaga kẹ omai nọ ma be daoma ru ilele evaọ oke mai na. Joma ta kpahe ekwakwa-aghae nana unọjọ utọjọ.
Omaurokpotọ O r’Oja
4. Ẹvẹ Jesu o ro dhesẹ epanọ omaurokpotọ u wuzou te?
4 Dai roro kpahe oware nọ o via na: Ilele na a vro avro no kpahe ohwo nọ ọ mae rro. Ẹsejọhọ, a rẹ gbẹ jọ ovao rai ruẹ evedha gbe omukpahọ. Jesu o te se ọmaha ro dikihẹ udevie rai. Ọ tẹ riobọhọ ọmọ na ta nọ: “Ohwo nọ ọ rẹ rọ oma kpotọ wọhọ [ọmaha] ọnana, ọye họ ọnọ ọmaero eva uvie odhiwu.” (Se Matiu 18:1-4.) Ukpenọ ilele riẹ a re roro wọhọ ahwo-akpọ, enọ e rẹ rehọ ọkwa, efe, gbe okpodẹ rọ riẹ ohwo, o gwọlọ re a vuhumu inọ ọnọ ọ roma kpotọ evaọ iraro amọfa, ọye ọ mae rro. Jihova ọ te ghale ae jẹ rehọ ai ru iruo otẹrọnọ a ginẹ roma kpotọ.
5, 6. Fikieme whọ rẹ rọ roma kpotọ re whọ sai wo obọ ziezi evaọ iruo ivuẹvu na? Kẹ oriruo.
5 Rite inẹnẹ na, ahwo buobu a be rehọ uzuazọ rai kpobi le ekwa, efe, gbe okpodẹ. Fiki onana, a wo uvẹ nọ a rẹ rọ gọ Ọghẹnẹ hẹ. (Mat. 13:22) Wo ohẹriẹ, ahwo Jihova a bi ru oma rai kakao kẹ amọfa re a sai wo eghale gbe ọjẹrehọ Olori ivuẹvu na.—Mat. 6:24; 2 Kọr. 11:7; Fil. 3:8.
6 Rehọ oriruo Francisco, ọnọ ọ rrọ ọkpako ukoko evaọ obọ South America. Okenọ ọ jọ uzoge, o no yunivasiti re ọ ruẹse jọ ọkobaro. Ọ ta nọ: “Uwhremu na, nọ mẹ jẹ gwọlọ rọo, mẹ hae ruẹ iruo nọ mẹ hae jọ wo ugho ziezi. Ukpoye, mẹ avọ aye mẹ ma tẹ jiroro inọ ma re ru uzuazọ mai lọhọ re ma ruabọhọ iruo odibọgba oke-kpobi na. Uwhremu na, ma te ti yẹ emọ, ewha-iruo na i te ti bu no. Rekọ Jihova o fi obọ họ kẹ omai ru uzuazọ mai lọhọ wọhọ epaọ ọtamuo mai.” Francisco o ku ẹme riẹ họ inọ: “Eva e were omẹ nọ mẹ rọ rrọ ọkpako te ikpe 30 no, gbe obọdẹ uvẹ-iruo efa nọ i te omẹ obọ no. Ma re vioja ẹdọvo ho inọ ma ru uzuazọ mai lọlọhọ.”
7. Ẹvẹ who ru uzuazọ ra lọhọ te no lele ohrẹ nọ o rrọ Ahwo Rom 12:16?
7 Whọ gbẹ be gwọlọ ikpeware akpọ nana ha, whọ rẹ sae jọ iruo ivuẹvu na reawere eghale gbe uvẹ-iruo buobu.—Rom 12:16; Mat. 4:19, 20; Luk 18:28-30.
Ajọwha O rẹ Wha Eghale Ze
8, 9. (a) Ta ẹme kpẹkpẹe kpahe ọtadhesẹ Jesu ọrọ etalẹnte na. (b) Amono ọtadhesẹ nana ọ rẹ mae jọ uduotahawọ kẹ?
8 Okwakwa-aghae ofa nọ o re fi obọ họ kẹ omai wo obọ ziezi evaọ iruo ivuẹvu na họ ajọwha. Jesu o dhesẹ onana evaọ ọtadhesẹ etalẹnte na. * Evaọ ọtadhesẹ yena, ọzae jọ nọ ọ jẹ gwọlọ kperẹ o mu ekwakwa riẹ họ erigbo esa riẹ obọ. Ọ rehọ etalẹnte isoi kẹ ọrigbo ọsosuọ, ivẹ kẹ ọrigbo avivẹ, ọ tẹ rehọ ọvo kẹ ọrigbo avesa. Nọ olori na o kperẹ no, avọ ajọwha irigbo ivẹ ọsosuọ na a tẹ rehọ etalẹnte rai “kpo eki-ọthuọ.” Rekọ ọrigbo avesa na ọ jọ ‘ọyẹlẹ.’ Ọ tọ etalẹnte riẹ họ otọ. Nọ olori na o zihe ze, o te ru irigbo ivẹ ọsosuọ na ọghọ nọ ọ rehọ ai “muẹ uzou eware buobu.” O te mi ọrigbo avesa na etalẹnte nọ ọ kẹ riẹ, o te lei no uviuwou riẹ.—Mat. 25:14-30.
9 Ababọ avro, o rrọ isiuru ra re whọ rọ aro kele ajọwha erigbo nọ Jesu ọ fodẹ evaọ ọtadhesẹ na re who wo obọ ziezi evaọ iruo usiuwoma ota na. Kọ ẹvẹ otẹrọnọ uyero ra o be kẹ owhẹ uvẹ ru te epanọ whọ hae gwọlọ ru hu? Ẹsejọhọ ẹgaga akpọ o be lẹliẹ owhẹ ru iruo euwa buobu re whọ sae ko uviuwou ra. O sae jẹ jọnọ oma ra o gbẹ ga te epanọ o jọ okenọ whọ jọ uzoge he. O tẹ rọ ere kiyọ ọtadhesẹ etalẹnte na o wo uduotahawọ jọ kẹ owhẹ.
10. Ẹvẹ olori nọ a fodẹ evaọ ọtadhesẹ etalẹnte na o ro dhesẹ inọ o wo orimuo, kọ fikieme onana o rọ rrọ uduotahawọ kẹ owhẹ?
10 Muẹrohọ inọ olori na evaọ ọtadhesẹ na o vuhumu inọ erigbo riẹ a wo ẹgba sa-sa. Oyejabọ nọ ọ rọ rehọ etalẹnte kẹ omomọvo wọhọ “epanọ a rẹ sai ruẹ” na. (Mat. 25:15) Ọrigbo ọsosuọ na o wo erere bu vi ọrigbo avivẹ na. Rekọ olori na o jiri omodawọ aimava na nọ o se ai omomọvo “emamọ ohwo” ọ tẹ kẹ ae oghẹrẹ osohwa ọvo na. (Mat. 25:21, 23) Epọvo na re, Olori ivuẹvu na, Jihova Ọghẹnẹ, ọ riẹ inọ iyero ra i re kpomahọ epanọ whọ rẹ sai ru te evaọ iruo riẹ. O ti muẹrohọ epanọ whọ be daoma te evaọ egagọ riẹ, ọ vẹ rọ ere hwosa kẹ owhẹ.—Mak 14:3-9; se Luk 21:1-4.
11. Kẹ oriruo ro dhesẹ nnọ ajọwha nọ ma re wo evaọ oke obẹbẹ o rẹ wha eghale buobu ze.
11 Oriruo Selmira, oniọvo-ọmọtẹ jọ evaọ obọ Brazil, o dhesẹ inọ orọnikọ okenọ eware i te kiehọ ọvo ohwo o re wo ajọwha ha evaọ egagọ Ọghẹnẹ. Ikpe 20 nọ e vrẹ, otu egbulegbu a sa ọzae riẹ kpe, kọ ọye ọvo ọ jẹ yọrọ emọ esa rai. Iruo nọ oniọvo nana o je ru họ ọ jẹ hai ru iwou ahwo fo no ohiohiẹ rite owọwọ, yọ te ẹnyavrẹ gbe ekpozi, ọ rẹ ruọ imoto nọ ahwo a rẹ keke oma họ. Ghele na, ọ ruẹrẹ oke riẹ họ re ọ sai ru ọkobaro oke-kpobi. Evaọ usu emọ esa riẹ na, ivẹ e tẹ te jọ ekobaro. Aye na ọ ta nọ: “Evaọ ikpe na kpobi, me wuhrẹ obe kugbe ahwo nọ i bu vi 20 no, a tẹ wọhọ ahwo ‘uviuwou’ mẹ enẹna. Rite inẹnẹ na, ahwo nana a gbẹ rrọ egbẹnyusu mẹ. Onana yọ efe nọ ugho o rẹ sae dẹ hẹ.” Olori ivuẹvu na ọ ginẹ ghale Selmira no kẹ ajọwha riẹ!
12. Ẹvẹ ma sai ro dhesẹ ajọwha evaọ iruo usiuwoma ota na?
12 Otẹrọnọ uyero ra o be kẹ owhẹ uvẹ wo obọ ziezi hi evaọ usiuwoma ota na, whọ rẹ sae gbẹ dawo utho ẹgba ra. Whọ tẹ be roma tọtọ fi eware nọ a bi wuhrẹ omai evaọ Ewuhrẹ Odibọgba na họ iruo, who ti wo onaa ziezi evaọ iruo na je muẹrohọ idhere efa nọ whọ sae rọ ta usiuwoma. (2 Tim. 2:15) O tẹ lọhọ, whọ sai je gbobọnẹ eware nọ i wo aghae tere he re whọ hai lele ukoko ra kpohọ usiuwoma kẹse kẹse.—Kọl. 4:5.
13. Eme o mai wuzou nọ u re ru omai wo ajọwha?
13 Ajọ o thọrọ owhẹ ẹro ho inọ uyoyou gbe edẹro kẹ Ọghẹnẹ eye i re ru ohwo wo ajọwha. (Ol. 40:8) Ọrigbo avesa nọ Jesu ọ fodẹ evaọ ọtadhesẹ na ọ jẹ dhozọ olori riẹ, bi rri rie wọhọ ọrivri gbe ọnọ o re roro kẹ ohwo ho. Fikiere, ọzae na ọ tẹ tọ etalẹnte na họ otọ ukpenọ ọ rẹ rehọ iẹe ru iruo re ekwakwa olori riẹ i vi. Re ma whaha uruemu oyẹlẹ utioye na, ma re wo usu okpekpe kugbe Jihova, Olori ivuẹvu na. Ruẹrẹ oke họ nọ who re ro wuhrẹ Ebaibol je roro didi kpahe ekwakwa-aghae Jihova, koyehọ uyoyou, odiri, gbe ohrọ riẹ. Who te bi ru ere, oma o te wọ owhẹ dawo ẹgba ra kpobi evaọ iruo Jihova.—Luk 6:45; Fil. 1:9-11.
‘Wha rẹ Jọ Ọrẹri Hrọ’
14. Re a sae jẹ omai rehọ kẹ iruo ivuẹvu na, eme Ọghẹnẹ ọ gwọlọ mi omai?
14 Nọ Pita ukọ na ọ jẹ wariẹ eme nọ e rrọ Ikereakere Hibru na, ọ fodẹ oware nọ Ọghẹnẹ ọ gwọlọ mi idibo riẹ nọ e rrọ otọakpọ, inọ: “Epanọ ohwo nọ o se owhai ọ rọ fuafo na, whai omarai wha jọ eva uruemu rai kpobi jọ fuafo re; keme a kere nọ, ‘Wha rẹte [jọ] ọrẹri, keme mẹ ọrẹri.’” (1 Pita 1:15, 16; Izerẹ 19:2; Izie. 18:13) Eme nana i dhesẹ inọ ma rẹ jọ fuafo evaọ abọ-ẹzi gbe uruemu. Ma rẹ sai ru ere otẹrọnọ ma be daoma mai kpobi re ma jọ fuafo evaọ aro Ọghẹnẹ. Ẹvẹ ma sai ro ru ere? Ẹkwoma obufihọ ẹme Ọghẹnẹ.
15. Didi ẹgba ẹme Ọghẹnẹ o wo?
15 A rehọ ẹme Ọghẹnẹ wawo ame nọ o re ru eware fo. Wọhọ oriruo, Pọl ukọ na o kere inọ ukoko Ileleikristi nọ a rọ ẹzi wholo na o rrọ fuafo evaọ aro Ọghẹnẹ, wọhọ ọva rọkẹ Kristi, ọnọ ọ rehọ “ame gbe ẹme wozẹ iẹ fo, . . . re ọ ruẹse jọ ọrẹri kare epe.” (Ẹf. 5:25-27) Ikpe buobu taure Pọl o te ti kere eme yena, Jesu ọ ta inọ ẹme Ọghẹnẹ nọ o bi whowho na o wo ẹgba nọ o re ro ru ahwo fo. Jesu ọ ta kẹ ilele riẹ nọ: “Wha fo fiki eme na nọ mẹ ta kẹ owhai.” (Jọn 15:3) Fikiere, ẹme Ọghẹnẹ o wo ẹgba nọ o re ro ru ahwo fo evaọ abọ-ẹzi gbe uruemu. Re Ọghẹnẹ ọ sae jẹ egagọ mai rehọ, ma rẹ kuvẹ re ẹme riẹ o ru omai fo.
16. Eme o rẹ sai fi obọ họ kẹ omai jọ fuafo evaọ abọ-ẹzi gbe uruemu?
16 Fikiere, re ma sae jọ iruiruo evaọ ivuẹvu Ọghẹnẹ, ma rẹ kaki siobọno eware kpobi nọ Ọghẹnẹ o rri gbegbe. Ẹhẹ, re ma sai gbe te kẹ iruo nana, ma rẹ gbẹ jọ fuafo evaọ abọ-ẹzi gbe uruemu. (Se 1 Pita 1:14-16.) Wọhọ epanọ ma rẹ daoma jọ fuafo evaọ ugboma na, ere ọvona ma rẹ kuvẹ re ẹme Ọghẹnẹ o ru omai fo. Onana o gwọlọ nọ ma re se Ebaibol na je kpohọ iwuhrẹ ẹsikpobi. O tẹ jẹ gwọlọ nọ ma rẹ daoma koko izi Ọghẹnẹ evaọ uzuazọ mai. Ere oruo u re fi obọ họ kẹ omai fi iroro iyoma kparobọ jẹ whaha ogbekuo nọ ọ rrọ akpọ nana. (Ol. 119:9; Jem. 1:21-25) O rrọ omosasọ re ma riẹ inọ ẹme Ọghẹnẹ ọ rẹ sai ‘ru omai fo’ no izieraha ilogbo dede.—1 Kọr. 6:9-11.
17. Re ma sae jọ fuafo, ohrẹ Ebaibol vẹ ma re fihọ iruo?
17 Kọ whọ be kuvẹ re ẹme Ọghẹnẹ o ru owhẹ fo? Wọhọ oriruo, eme who re ru nọ a tẹ vẹvẹ owhẹ unu kpahe aruọzaha ogbekuo nọ e rrọ akpọ na? (Ol. 101:3) Kọ whọ be whaha usu okpekpe nọ who re mu kugbe ibe emọ-isukulu ra hayo ibe iruiruo ra nọ e rrọ ukoko ho? (1 Kọr. 15:33) Kọ whọ be ginẹ dawo ẹgba ra kpobi re who siobọno uruemu uyoma jọ nọ o rẹ sai ru owhẹ jọ gbegbe evaọ aro Ọghẹnẹ? (Kọl. 3:5) Kọ who bi siomano eme ọ esuo-ohrowo akpọ nana gbe ẹzi ethathọ orẹwho ohwo nọ e da aruọzaha buobu fia nẹnẹ na?—Jem. 4:4.
18. Oghẹrẹ vẹ ẹfuọ abọ-ẹzi gbe uruemu o sai ro fi obọ họ kẹ omai wo ẹvi evaọ iruo ivuẹvu na?
18 Ẹmeoyo ra evaọ eware nana o rẹ wha irere buobu ze. Jesu o kele Ileleikristi nọ a rọ ẹzi wholo dhe egha-ire nọ ọ ta nọ: ‘Kogha kogha nọ o rọ omẹ nọ o mọ ibi hi, Ọsẹ mẹ o re si ei no, kogha kogha nọ o rọ omẹ nọ o mọ ibi, ọ rẹ ruẹ riẹ, re o gbẹ mọ ibi vi ere.’ (Jọn 15:2) Whọ tẹ be kuvẹ re Ebaibol i ru owhẹ fo, whọ te mọ ibi vi epaọ anwẹdẹ.
Eghale Enẹna gbe Erọ Obaro
19. Eghale vẹ i te ilele Jesu fiki omodawọ rai evaọ iruo ivuẹvu na?
19 Uwhremu na, evaọ Pẹntikọst 33 C.E., a te ku ẹzi ọfuafo ku ilele Jesu nọ e kezọ kẹ uwuhrẹ riẹ re a jọ isisẹri “rite ọnyaba akpọ na.” (Iruẹru 1:8) Kẹsena ejọ rai a tẹ jọ utu ugboma esuo, ejọ imishọnare, gbe esẹro ọnyawariẹ, yọ a kobaro evaọ usiuwoma ota na “rọ kẹ enọ a ma kpobi evaọ akpọ na.” (Kọl. 1:23) A re gbiku eghale nọ i te rai hi gbe evawere nọ a wha se amọfa!
20. (a) Eghale vẹ i te owhẹ no fiki obọ nọ who wo ziezi evaọ iruo ivuẹvu na? (b) Eme whọ gbamu inọ who re ru?
20 Ẹhẹ, ma tẹ be roma kpotọ, bi dhesẹ ajọwha, je koko izi Ọghẹnẹ, ma ti wobọ ziezi evaọ iruo ivuẹvu nọ e rrọ otọ na. Dede nọ idhọvẹ e da akpọ na fia fiki efe gbe omaweromẹ nọ ahwo a bi le, ma wo uvi oghọghọ gbe evevọwẹ. (Ol. 126:6) Maero, iruo mai “eva Ọnowo na e rọ ivrẹvru hu.” (1 Kọr. 15:58) Jihova Ọghẹnẹ, Olori ivuẹvu na, ọ te ghale omai bẹdẹ bẹdẹ rọkẹ ‘iruo mai gbe uyoyou nọ ma bi dhesẹ kẹ odẹ riẹ.’—Hib. 6:10-12.
[Oruvẹ-obotọ]
^ edhe-ẹme 8 Ọtadhesẹ etalẹnte na ọ mai duobọte oghẹrẹ nọ Jesu o bi yeri kugbe ilele riẹ nọ a rọ ẹzi wholo na, rekọ ọtadhesẹ na u kie kpahe Ileleikristi kpobi.
Kọ Whọ Kareghẹhọ?
Nọ whọ be daoma wo obọ ziezi evaọ iruo ivuẹvu na . . .
• fikieme o rọ r’oja re who dhesẹ omaurokpotọ?
• ẹvẹ whọ sai ro wo jẹ yọrọ ajọwha?
• fikieme o rọ r’oja re whọ jọ fuafo evaọ abọ-ẹzi gbe uruemu?
[Enọ Uwuhrẹ]
[Uwoho nọ o rrọ ẹwẹ-obe avọ 17]
Omaurokpotọ u re fi obọ họ kẹ omai ru uzuazọ mai lọlọhọ nọ ma rẹ rọ tẹrovi iruẹru Uvie Ọghẹnẹ