Enọ Ahwo nọ A s’Ebe

Fikieme Jesu ọ rọ ta kẹ aye nọ a riẹ wọhọ ọrahauzi inọ a rehọ izieraha riẹ vrẹe no?—Luk 7:37, 48.

Nọ Jesu ọ keria re ọ re emu evaọ uwou ohwo Farisi jọ nọ a re se Saimọn, aye jọ ọ tẹ ziọ “emu obọ awọ riẹ.” Ọ tẹ rọ irui-oviẹ riẹ vuọ awọ Jesu jẹ rehọ eto uzou riẹ ririe ae. Kẹsena ọ tẹ viọlọ awọ na jẹ rehọ udẹ wholo ae. Ikuigbe Usiuwoma na e ta nọ ‘a riẹ aye na evaọ okpẹwho na wọhọ ọrahaizi.’ Uzẹme inọ ohwo-akpọ kpobi yọ ọrahaizi, rekọ ẹsibuobu Ikereakere na e rẹ rehọ ẹme na ọrahaizi dhesẹ ohwo nọ ọ rẹ jọ emuemu zue. Ẹsejọhọ aye na ọ jọ ogberẹ. Ohwo otiọye Jesu ọ ta kẹ nọ: “A rehọ izieraha ra vrẹ owhẹ no.” (Luk 7:36-38, 48) Eme Jesu o wo họ iroro? Nọ o rọnọ evaọ oke yena Jesu o ri whu uwhu ẹtanigbo kẹ izieraha ha na, kọ ẹvẹ erọvrẹ izieraha aye na o sae rọ lọhọ?

Nọ aye na o ririe jẹ rọ udẹ wholo awọ Jesu no, rekọ taure Jesu ọ tẹ te ta kẹe inọ a rọ izieraha riẹ vrẹe no, Jesu ọ rọ ọtadhesẹ jọ dhesẹ oware jọ nọ u wuzou gaga kẹ Saimọn, ọnọ a jọ uwou riẹ na. Jesu ọ rọ uzioraha dhesẹ osa ulogbo nọ ohwo ọ be sae hwa ha, ọ ta kẹ Saimọn nọ: “Whaọ omomigho jọ o wo eriosa ivẹ; ọjọ ọ riosa isele ẹgba-isoi, ọfa udhuvẹ gbe ikpe. Nọ a wo ugho ovo nọ a rẹ rọ hwa ha, ọ tẹ rehọ vrẹ ae ivẹ na. Kọ eriosa ivẹ na ọvẹ ọ rẹ mai yo yei?” Saimọn o te yo kẹe nọ: “Me roro nọ, ọnọ ọmae rọ vrẹ.” Jesu ọ tẹ ta kẹe nọ: “Whọ riẹ ta.” (Luk 7:41-43) Mai kpobi ma riosa Ọghẹnẹ, osa ẹmeoyo; okekpobi nọ ma ghẹmeeyo kẹe jẹ raha uzi, yọ osa na u bi vihọ. Enẹ ma be rọ riesa vọ uzou. Dede na, Jihova ọ wọhọ ohwo nọ o re momo igho kẹ ahwo, ọnọ o wo unevaze nọ ọ rẹ rọ kpairoro vrẹ esa nọ a kru rie. Oyejabọ nọ Jesu ọ rọ tuduhọ ilele riẹ awọ inọ a lẹ Ọghẹnẹ nọ: “Rehọ osoriọ mai vrẹ omai, wọhọ epanọ ma rọ vrẹ eriosa mai.” (Mat. 6:12) Obe Luk 11:4 u dhesẹ nọ esa nana yọ izieraha.

Eme Ọghẹnẹ o rri rọ rehọ izieraha vrẹ ahwo evaọ oke nọ u kpemu? Oziẹobro okiẹrẹe riẹ o gwọlọ nọ uwhu o rẹ jọ osa uzioraha. Oye o soriẹ nọ Adamu ọ jẹ rehọ uzuazọ riẹ rọ hwosa uzioraha riẹ. Dede na, evaọ otọ Uzi nọ Ọghẹnẹ ọ kẹ orẹwho Izrẹl, ohwo nọ ọ raha uzi ọ rẹ sai wo erọvrẹ uzioraha riẹ ẹkwoma arao nọ o re ro dhidhe kẹ Jihova. Pọl ukọ na ọ ta nọ: “Uzi o rọ azẹ o re ru eware kpobi fua, keme ababọ azẹ-ohwẹ ẹrọvrẹ izieraha ọ rẹ jọ họ.” (Hib. 9:22) Ahwo Ju a riẹ edhere ọfa nọ a sai ro wo erọvrẹ izieraha evaọ obọ Ọghẹnẹ hẹ. Fikiere, u re gbe omai unu hu inọ ahwo nọ e jọ kugbe Jesu evaọ ẹdẹ yena a go kpahe ẹme nọ ọ ta kẹ aye na. Enọ i je lele Jesu riemu na a jẹ go evaọ eva rai inọ: “Nọ ono, nọ ọ rẹ sae rehọ izieraha vrẹ?” (Luk 7:49) Nọ o rrọ ere na, fikieme a jẹ sae rọ izieraha aye nana rọ vrẹe?

Nọ imava-orọo ọsosuọ na e ghẹmeeyo kẹ Jihova no, eruẹaruẹ ọsosuọ evaọ Ebaibol na e ta kpahe ẹjiroro Jihova nọ ọ te rọ rehọ ‘ubi’ jọ ze, ọnọ Setan avọ ‘ubi’ riẹ a te rowo ithihrawọ. (Emu. 3:15) Ẹrowo ithihrawọ nana o roma via evaọ okenọ ewegrẹ Ọghẹnẹ a kpe Jesu. (Gal. 3:13, 16) Azẹ Kristi nọ o hwẹ họ ẹtanigbo ahwo-akpọ no uzioraha gbe uwhu. Nọ orọnọ oware ovo o rẹ sae whaha Jihova erugba ẹjiroro riẹ hẹ na, nọ ọ nwane ta ẹme nọ a kere fihọ Emuhọ 3:15 na no, o tẹ wọhọ ẹsenọ a hwa osa ẹtanigbo na no evaọ aro riẹ. No oke oyena vrẹ, ọ rẹ sae rọ vrẹ ahwo nọ i fi ẹrọwọ họ eyaa riẹ.

 Taure Jesu ọ tẹ te ziọ otọakpọ, u wo ahwo jọ nọ Jihova o se nọ a kiẹrẹe. Usu ahwo yena jọ họ Enọk, Noa, Abraham, Rehab, gbe Job. A rọ ẹrọwọ rẹro erugba eyaa Ọghẹnẹ. Jemis olele na o kere nọ: “Abraham ọ rọ ẹrosuọ Ọghẹnẹ jabọ nọ, a je kele iei gbe ẹrẹreokie.” Jemis ọ ta kpahe Rehab inọ: “Kọ ogbẹrọnọ epọvo na Rehab ogberẹ na ọ rọ rehọ fiki iruo wo unuzou?”—Jem. 2:21-25.

Devidi ovie Izrẹl ọ raha izi ilogbo sa-sa, rekọ o fi ẹrọwọ họ Ọghẹnẹ uzẹme na, je kurẹriẹ n’eva ze ẹsikpobi. Ofariẹ, Ikereakere na e ta nọ: “Ọghẹnẹ [ọ rọ Jesu] dhearo re ọ rọ fiki azẹ riẹ jọ ikiofu, re ahwo a rehọ ẹrọwọ rehọ iẹe. Onana, re u dhesẹ ẹrẹreokie Ọghẹnẹ, keme eva akothiho riẹ Ọghẹnẹ ọ jẹ kpare iroro vrẹ izieraha [evaọ oke nọ u kpemu]; eva oke nana a je vuhu ei muẹ nọ ọye oma riẹ o ghine kiẹrẹe ọ vẹ jẹ rọ unuzou kẹ ohwo nọ o fievahọ Jesu.” (Rom 3:25, 26) Fiki idhe ẹtanigbo nọ Jesu ọ te rọ uzuazọ riẹ dhe evaọ obaro, Jihova ọ rọ izieraha Devidi vrẹe ababọ oziẹobro okiẹrẹe Riẹ nọ o gbabọkẹ.

Ababọ avro, epọvo na o jọ kẹ aye nọ ọ rọ udẹ wholo awọ Jesu na. O je yeri uzuazọ ọfariẹ-ogbe vẹre, rekọ o kurẹriẹ no. O vuhumu inọ ọ gwọlọ ẹtanigbo rono uzioraha, yọ ọ rọ ẹkwoma owojẹ riẹ dhesẹ via inọ o gine wo ovuhumuo kẹ ohwo nọ Jihova ọ be te rọ ẹkwoma riẹ kẹ ẹtanigbo na. Dede nọ a ri dhe idhe na evaọ oke yena ha, u muẹro inọ o te seba ẹvia ha, onana o tẹ whae ze nọ o sae rọ lọhọ re a rọ izieraha ahwo nọ i kurẹriẹ, wọhọ aye yena, rọ vrẹ ae. Oyejabọ nọ Jesu ọ rọ ta kẹe nọ: “A rehọ izieraha ra vrẹ owhẹ no.”

Wọhọ epanọ ikuigbe nana i dhesẹ vevẹ na, Jesu o le erahaizi no oma ha. O ru ewoma kẹ ae. Yọ o rrọ isiuru Jihova re ọ rọ vrẹ erahaizi nọ i kurẹriẹ. Onana yọ omosasọ ulogbo kẹ omai ahwo-akpọ nọ e gba ha!

[Uwoho nọ o rrọ ẹwẹ-obe avọ 7]

A se rai nọ a kiẹrẹe