Epanọ Ẹtanigbo Na O Ro Siwi Omai
Epanọ Ẹtanigbo Na O Ro Siwi Omai
“Ọnọ ọ rọwo Ọmọ na o wo uzuazọ ebẹdẹ bẹdẹ; rekọ ọnọ o yo ẹme Ọmọ na ha ọ rẹ sae ruẹ uzuazọ họ, rekọ ofu Ọghẹnẹ ọ riẹ uzou.”—JỌN 3:36.
1, 2. Ẹjiroro jọ vẹ a rọ kaki kere emagazini ọ Zion’s Watch Tower na?
UWOU-ERORO avene nọ a kere evaọ amara Akpe ọrọ ukpe 1879 o ta nọ: “Ọmọ-uwuhrẹ Ebaibol kpobi nọ ọ roma totọ se Ebaibol na ọ rẹ ruẹ epanọ uwhu Kristi u wuzou te.” Uzoẹme na u te ku ẹme na họ enẹ: “Ma rẹ whaha oware kpobi nọ u re dhesẹ inọ Kristi ọ rọ uwhu riẹ ta omai no igbo ho.”—Se 1 Jọn 2:1, 2.
2 Ẹjiroro jọ nọ a rọ kaki kere emagazini ọ Zion’s Watch Tower evaọ amara Ahrẹ ọrọ ukpe 1879 họ re o thọ uwuhrẹ ẹtanigbo na uke. Emagazini nana o jọ emuore ẹruoke keme kẹle ukpe 1900, ahwo buobu nọ i se oma rai Ileleikristi a wo avro sọ uwhu Jesu o sae ta omai no igbo izieraha. (Mat. 24:45) Eva oke yena, ahwo buobu a te muọ uwuhrẹ eghrorotha na họ ẹrọwo, uwuhrẹ nọ o wọso uzẹme na inọ ma kie no ẹgbagba no. Enọ i re wuhrẹ uwuhrẹ yena a rẹ ta inọ ahwo-akpọ a bi wo ẹnyaharo gbe nnọ a gwọlọ ẹtanigbo ho. Ohrẹ nọ Pọl ukọ na ọ rọ kẹ Timoti na o nwani kiehọ gaga, inọ: “Sẹro oware nọ a rọ kẹ owhẹ na. Si oma no eme ogbẹta nọ e kare erọ Ọghẹnẹ, jegbe avro ogbẹvrọ nọ a re se ugbese nọ eriariẹ: keme ahwo jọ nọ a rehọ oma rai kẹ oyena a nya edhere orọwọ na thọ no.”—1 Tim. 6:20, 21.
3. Enọ vẹ ma be te ta ẹme kpahe?
3 U muẹro inọ whọ gwọlọ kie no “edhere orọwọ na” ha. Fikiere, u ti woma re ma roro kpahe enọ nana: Fikieme mẹ rọ gwọlọ ẹtanigbo na? Eme ẹtanigbo na o rehọ mi Jihova gbe Jesu? Ẹvẹ mẹ rẹ sai ro wo erere no ọruẹrẹfihotọ nana nọ o rẹ sae thọ omẹ no ofu Ọghẹnẹ na ze?
Esiwo no Ofu Ọghẹnẹ
4, 5. Eme o dhesẹ nọ ofu Ọghẹnẹ ọ rrọ uyerakpọ omuomu nana uzou?
4 Ebaibol gbe eware nọ e via kẹ ahwo-akpọ no i dhesẹ inọ anwẹnọ Adamu ọ rọ raha uzi, ‘ofu Ọghẹnẹ ọ rrọ ahwo-akpọ uzou.’ (Jọn 3:36) Ere o ginẹ rrọ keme ahwo-akpọ kpobi a bi whu. Esuo oyoma Setan ọ be sae thọ ahwo-akpọ no okpẹtu hu, yọ uvumọ egọmeti ọ re sai ru ẹgwọlọ ahwo riẹ kpobi gba ha. (1 Jọn 5:19) Ẹmo, ethube, gbe uvuhu e gbẹ be lahiẹ ahwo-akpọ.
5 Fikiere, o rrọ vevẹ inọ Jihova ọ be ghale uyerakpọ omuomu nana ha. Pọl ọ ta nọ: ‘Ofu Ọghẹnẹ o bi no odhiwu ze kẹ enọ e riẹ riẹ hẹ.’ (Rom 1:18-20) Fikiere, enọ e ruabọhọ izieraha rai a te ruẹ uye uruemu uyoma rai. Nẹnẹ, ofu Ọghẹnẹ o bi dhesẹ oma via evaọ evuẹ ẹdhoguo nọ ma bi whowho kpahe akpọ Setan, yọ evuẹ nana e rrọ ebe mai buobu nọ a kere no Ebaibol ze.—Evia. 16:1.
6, 7. Iruo vẹ Ileleikristi nọ a rọ ẹzi wholo na a be kobaro riẹ, kọ uvẹ vẹ u gbe rovie fihọ kẹ enọ e rrọ otọ esuo Setan?
6 Kọ onana u dhesẹ nọ u lehie hrọ no re ohwo o siomano otọ isuẹsu Setan re o bru Ọghẹnẹ ze? Ijo, keme uvẹ u gbe rovie fihọ nọ ahwo a sai ro wo ọjẹrehọ Jihova. Ileleikristi nọ a rọ ẹzi wholo na, nọ e rrọ “unuẹworo Kristi” na a be kobaro evaọ iruo usiuwoma ota, be rọ ẹkwoma riẹ ta kẹ ahwo kpobi nọ: “Wha za oma bru Ọghẹnẹ ze.”—2 Kọr. 5:20, 21.
7 Pọl ukọ na ọ ta nọ Jesu o “si omai [no] ofu nọ ọ be tha na.” (1 Tẹs. 1:10) Ofu urere yena nọ Jihova o ti mu na o te wha ọraha ebẹdẹ bẹdẹ se irumuomu nọ i kurẹriẹ hẹ. (2 Tẹs. 1:6-9) Ono ọ te zọ? Ebaibol e ta nọ: “Ọnọ ọ rọwo Ọmọ na o wo uzuazọ ebẹdẹ bẹdẹ; rekọ ọnọ o yo ẹme Ọmọ na ha ọ rẹ sae ruẹ uzuazọ họ, rekọ ofu Ọghẹnẹ ọ riẹ uzou.” (Jọn 3:36) Ẹhẹ, evaọ oke ukuhọ uyerakpọ nana, ahwo kpobi nọ e rrọ uzuazọ nọ i fi ẹrọwọ họ Jesu gbe idhe ẹtanigbo na a ti wo uzuazọ.
Erere nọ Ẹtanigbo na Ọ Wha Ze
8. (a) Obọdẹ uzuazọ vẹ Adamu avọ Ivi a hai yeri? (b) Oghẹrẹ vẹ Jihova o ro dhesẹ nọ ọye yọ Ọghẹnẹ uvi-ẹdhoguo?
8 A ma Adamu avọ Ivi gbagba. O hae jọnọ a yoẹme kẹ Ọghẹnẹ, enẹna yọ te ai te omai emọ rai ma rrọ omaweromẹ evaọ Aparadase. U yoma gaga inọ ọsẹgboni ọsosuọ mai a keke aro fihọ thuzi Ọghẹnẹ. Fiki onana, a te bruoziẹ uwhu ebẹdẹ bẹdẹ kpe ai je le ai no Aparadase ọsosuọ na. Nọ Adamu avọ Ivi a muọ emọ họ eyẹ, uzioraha u te ti kpomahọ uyẹ ohwo-akpọ kpobi, uwhremu na ọzae avọ aye ọsosuọ na a tẹ who je whu. Onana u dhesẹ nọ Jihova ọ ta gba. Ofariẹ, Jihova yọ Ọghẹnẹ uvi-ẹdhoguo. Jihova ọ vẹvẹ Adamu unu inọ ọ tẹ re ubiure aghọ na o ti whu—yọ ere o ginẹ jọ.
9, 10. (a) Fikieme emọ Adamu a bi ro whu? (b) Ẹvẹ ma sae rọ rria bẹdẹ bẹdẹ?
9 Mai emọ Adamu ma reuku ugboma sebaẹgba, onọ u re ru omai raha uzi, u ve je whu. Nọ Adamu o ru umuomu, mai kpobi ma te zihe ruọ irumuomu dede nọ a ri yẹ omai hi. Fikiere oziẹ uwhu nọ a brukpe Adamu na u te omai re. Otẹrọnọ Jihova o si uwhu no ababọ ẹtanigbo koyehọ ọ ta ọrue. O wọhọ nọ Pọl ọ be ta eva mai kpobi nọ ọ ta nọ: “Keme ma riẹ nọ uzi họ orọ ẹzi, rekọ mẹ uwo gheghe, nọ a zẹ fihọ otọ uzioraha. O! Ovuogho nọ omẹ rọ! Ono ọ rẹ sai ti si omẹ no oma uwhu nana?”—Rom 7:14, 24.
10 Jihova Ọghẹnẹ ọvo họ ọnọ ọ rẹ sae ruẹrẹ eware họ re ọ rehọ edhere nọ o fo siwi omai no uzioraha gbe uwhu ebẹdẹ bẹdẹ. O ru onana ẹkwoma Ọmọ oyoyou riẹ nọ o vi no obọ odhiwu ze re a yẹi wọhọ ohwo ọgbagba, ọnọ ọ rẹ sae rehọ uzuazọ riẹ ta omai no igbo. Wo ohẹriẹ no Adamu, Jesu o kru ẹgbakiete riẹ. Evaọ uzẹme, “o ru oware uyoma ovo ho.” (1 Pita 2:22) Fikiere, Jesu ọ hae sai wo aye, a ve yẹ emọ egbagba. Rekọ, ọ kuvẹ re ewegrẹ Ọghẹnẹ a kpei re ọ sae ta emọ Adamu nọ e gba ha no uzioraha, re enọ i fi ẹrọwọ họ iẹe a sai wo uzuazọ ebẹdẹ bẹdẹ. Ikereakere na e ta nọ: “Keme Ọghẹnẹ ọvo ọ rọ, obruthe ọvo ọ tẹ rọ udevie Ọghẹnẹ avọ ahwo, Kristi Jesu họ ohwo na, Ọye ọ rehọ oma riẹ ta ahwo kpobi.”—1 Tim. 2:5, 6.
11. (a) Oriruo vẹ whọ rẹ sai ro dhesẹ erere idhe ẹtanigbo na? (b) Amono a ti wo erere no ẹtanigbo na ze?
11 Re ma riẹ erere nọ ẹtanigbo na ọ wha ze, joma rehọ oriruo ahwo nọ a fi igho họ ebanke, rekọ enọ i wo ebanke na a tẹ re igho ahwo na no. Fiki onana, a te mu enọ i wo ebanke na fihọ uwou-odi ikpe buobu. Kọ eme ọ rẹ via kẹ enọ i fi igho rai họ ebanke na? Uye o rẹ bẹ ae ajokpanọ ọdafe jọ ọ dẹ ebanke na ọ tẹ hwa igho nọ ebanke na i kru ahwo na kpobi zihe kẹ ae. Epọvo na re, Jihova Ọghẹnẹ avọ Ọmọ oyoyou riẹ a dẹ emọ Adamu rehọ, a tẹ rọ fiki azẹ Jesu si ai no igbo uzioraha nọ Adamu ọ wha ze. Oye jabọ nọ Jọn Ọhọahwo-Ame na ọ rọ ta kpahe Jesu nọ: “Ri Omogodẹ Ọghẹnẹ, ọ nọ ọ wha izieraha akpọ na vrẹ!” (Jọn 1:29) Makọ enọ i whu no dede a rrọ usu enọ a wha izieraha rai vrẹ.
Oware nọ Ẹtanigbo na O Rehọ
12, 13. Eme ma rẹ sai wuhrẹ no unevaze nọ Abraham ọ jẹ te rọ rehọ Aiziki dheidhe ze?
12 O lọhọ họ re ma wo otoriẹ oware nọ ẹtanigbo na o rehọ mi Ọsẹ obọ odhiwu mai gbe Ọmọ oyoyou riẹ. Rekọ iku jọ e rrọ Ebaibol na nọ i re fi obọ họ kẹ omai roro kpahe onana. Wọhọ oriruo, roro oghẹrẹ nọ o jọ Abraham oma okenọ ọ jọ edhere jẹ nya edẹ esa bi kpohọ Moraya nọ Ọghẹnẹ ọ ta kẹe inọ: “Rehọ ọmọzae ra na, ọmọzae ọvo ra na Aiziki, ọnọ who you, re whọ nya kpo otọ obọ Moraya, whọ jọ etẹe rehọ iẹe dhe-idhe emahọ evaọ ugbehru jọ nọ me re ti dhesẹ kẹ owhẹ.”—Emu. 22:2-4.
13 Abraham o te ti te oria na. Dai roro epanọ o jẹ da Abraham te nọ ọ gba abọ gbe awọ Aiziki, ọ jẹ rehọ iẹe kiẹzẹ ehru agbada-idhe nọ ọye ọvo ọ bọ. Ababọ avro, o da riẹ t’enwa nọ ọ kpare amagha nọ o bi ti ro kpe ọmọ riẹ. Dai roro epanọ o jọ Aiziki oma nọ o bi rẹro okenọ amagha na o ti ro tei uriohọ na. Idudhe na, ẹnjẹle Jihova ọ tẹ nwane da Abraham obọ ji. Ikuigbe Abraham avọ Aiziki nana i fi obọ họ kẹ omai wo otoriẹ oware nọ o rehọ mi Jihova nọ ọ kuvẹ re idibo Setan a kpe Ọmọ Riẹ. Oma nọ Aiziki o ro kpotọ kẹ ọsẹ riẹ u dhesẹ unevaze nọ Jesu ọ rọ ruẹ uye je whu kẹ omai.—Hib. 11:17-19.
14. Eme ọ via kẹ Jekọp nọ u re fi obọ họ kẹ omai riẹ oware nọ ẹtanigbo na o rehọ?
14 Ma rẹ sae jẹ rehọ oware jọ nọ o via kẹ Jekọp ro dhesẹ oware nọ ẹtanigbo na o rehọ. Evaọ usu emọ Jekọp kpobi, Josẹf họ ọnọ Jekọp ọ mai you. Fiki onana, inievo Josẹf kpobi a tẹ jẹ riẹe ihri je mukpahe iẹe. Ghele na, Josẹf ọ rọwo inọ ọsẹ riẹ o vi ei re ọ nyae ruẹ oghẹrẹ nọ eware e rrọ kẹ inievo riẹ. Eva oke yena, oria nọ a be jọ sẹro igodẹ Jekọp na o rehọ ikilomita udhusoi (100) thabọ no uwou rai. Dai roro epanọ o da Jekọp te nọ emọ riẹ edekọ a rehọ ewu Josẹf nọ azẹ ọ vọ bru ei ze. O bo nọ: “Nọ ewu ọmọ mẹ. Arao ojihẹ jọ o kpe rie ri no. U wo ẹvẹ hẹ, a za Josẹf ehehẹhẹ no.” Onana o da Jekọp, o te weri Josẹf edẹ buobu. (Emu. 37:33, 34) Orọnikọ epanọ oware o rẹ da ahwo-akpọ ere o rẹ da Jihova ha. Rekọ nọ ma te roro kpahe oware nọ o via kẹ Jekọp na o sai fi obọ họ kẹ omai dina riẹ epanọ o da Ọghẹnẹ te nọ a gboja kẹ Ọmọ oyoyou riẹ a te je kpei.
Erere nọ Ma Wo no Ẹtanigbo na Ze
15, 16. (a) Ẹvẹ Jihova o ro dhesẹ inọ ọ jẹ idhe ẹtanigbo na rehọ? (b) Didi erere who wo no ẹtanigbo na ze no?
15 Jihova Ọghẹnẹ ọ rehọ ugboma ẹzi kpare Ọmọ riẹ no uwhu ze. (1 Pita 3:18) Jesu ọ tẹ roma via kẹ ilele riẹ edẹ 40, jẹ bọ ẹrọwọ rai ga jẹ be ruẹrẹ ai họ kẹ iruo usiuwoma ota na. O te muvrẹ kpobọ odhiwu. Ọ tẹ rọ aghare azẹ riẹ se Ọghẹnẹ re ọ rọ fiki azẹ riẹ fi obọ họ kẹ ilele riẹ nọ i fi ẹrọwọ họ idhe ẹtanigbo na. Jihova Ọghẹnẹ o dhesẹ nọ ọ jẹ ẹtanigbo na rehọ nọ ọ kẹ Jesu udu re o ku ẹzi ọfuafo na ku ilele riẹ nọ i kokohọ Jerusalẹm evaọ ẹdẹ Pẹntikọst 33 C.E.—Iruẹru 2:33.
16 Ilele Jesu nana nọ a rọ ẹzi wholo no na a te muọ amọfa họ ẹtakẹ inọ a họ-ame evaọ odẹ Jesu Kristi re a rọ izieraha rai vrẹ rai, re a sae vabọ no ofu Ọghẹnẹ. (Se Iruẹru Ikọ Na 2:38-40.) No ẹdẹ ọyena vrẹ rite inẹnẹ na, ima ahwo buobu no erẹwho kpobi ze a be gọ Ọghẹnẹ fiki ẹrọwọ nọ a fihọ idhe ẹtanigbo Jesu. (Jọn 6:44) Obọnana ma be te kuyo enọ ivẹ jọ: Kọ fiki iruo iwoma mai a rọ kẹ omai ẹruore uzuazọ ebẹdẹ bẹdẹ? Nọ obọdẹ ẹruore nana u te omai obọ no na, kọ o lọhọ re ma ku ei fiẹ?
17. Ẹvẹ who re rri uvẹ-ọghọ nọ whọ rọ rrọ ogbẹnyusu Ọghẹnẹ?
17 Ma fo ahwo nọ Jesu o re whu kẹ hẹ. Ghele na, fikinọ ima ahwo buobu nẹnẹ a fi ẹrọwọ họ iẹe, a zihe ruọ egbẹnyusu Ọghẹnẹ no avọ ẹruore uzuazọ ebẹdẹ bẹdẹ evaọ otọakpọ aparadase. Rekọ fikinọ ma rrọ egbẹnyusu Jihova nẹnẹ o nwani dhesẹ inọ ma te jọ egbẹnyusu riẹ ribri hi. Re ma vabọ no ofu Ọghẹnẹ evaọ obaro, ma re gbe wo ovuhumuo kẹ ẹtanigbo Kristi Jesu.—Rom 3:24; se Ahwo Filipai 2:12.
Gbẹ Hai Fi Ẹrọwọ họ Ẹtanigbo Na
18. Eme ẹrọwọ nọ ma re fihọ ẹtanigbo na o kẹre te?
18 Ikere nọ a si uzoẹme nọ ma bi wuhrẹ na no ze, Jọn 3:36, u dhesẹ inọ ẹrọwọ nọ ma re fihọ Olori na, Jesu Kristi, u kugbe ẹme nọ ma re yo kẹe. Ovuhumuo kẹ ẹtanigbo na o rẹ wọ omai fi iwuhrẹ Jesu họ iruo, te eware nọ o wuhrẹ kpahe uruemu. (Mak 7:21-23) ‘Ofu Ọghẹnẹ o bi bru’ enọ e ruabọhọ ọfariẹ-ogbe, ẹkoko-ose, gbe “egbegbe kpobi” ze, onọ o kẹre te uruemu ọ eriwo ifoto ẹbẹba.—Ẹf. 5:3-6.
19. Ẹvẹ ma sai ro dhesẹ inọ ma fi ẹrọwọ họ ẹtanigbo na?
19 Ovuhumuo mai kẹ ẹtanigbo na o rẹ lẹliẹ omai wo obọ ziezi evaọ iruo ezi. (2 Pita 3:11) Joma ruẹrẹ oke họ nọ ma rẹ rọ lẹ kẹse kẹse, wuhrẹ Ebaibol, kpohọ iwuhrẹ, ru uwuhrẹ Ebaibol uviuwou, jẹ ta usiuwoma. Yọ, ajọ ma siọ “oware uwoma gbe ọghoruo ba ha, keme iwẹgọ i tieyena e rẹ were Ọghẹnẹ gaga.”—Hib. 13:15, 16.
20. Didi eghale enọ i fi ẹrọwọ họ ẹtanigbo na a rẹ sai rẹro rai?
20 Okenọ Jihova ọ te raha uyerakpọ omuomu nana, eva e te were omai thesiwa inọ ma fi ẹrọwọ họ ẹtanigbo na je dhesẹ ovuhumuo kẹe. Yọ evaọ akpọ ọkpokpọ na, ma ti yere Ọghẹnẹ bẹdẹ bẹdẹ kẹ ọruẹrẹfihotọ nana nọ o ro siwi omai no ofu riẹ na.—Se Jọn 3:16; Eviavia 7:9, 10, 13, 14.
Ẹvẹ Whọ te k’Uyo?
• Fikieme ma rọ gwọlọ ẹtanigbo na?
• Eme ẹtanigbo na o rehọ mi Jihova gbe Jesu?
• Irere vẹ ẹtanigbo na ọ wha ze?
• Ẹvẹ ma re ro fi ẹrọwọ họ idhe ẹtanigbo na?
[Enọ Uwuhrẹ]
[Uwoho nọ o rrọ ẹwẹ-obe avọ 13]
Uvẹ nọ ma re ro kurẹriẹ bru Jihova ze u rovie fihọ
[Iwoho nọ e rrọ ẹwẹ-obe avọ 15]
Ma te roro kpahe ikuigbe Abraham, Aiziki, gbe Jekọp i re fi obọ họ kẹ omai riẹ epanọ ẹtanigbo na ọ ghare te