Uzizie Rọkẹ Ohwo Kpobi!

KPORO

Uzizie Rọkẹ Ohwo Kpobi!

UZIZIE rọkẹ eme? Onọ who re ro weze kpohọ uwou ogha Isẹri Jihova jọ, onọ a re se Ebẹtẹle. Ma wo iwou ogha udhusoi gbe ikpegberee (118) evaọ ekwotọ sa-sa wariẹ akpọ na họ. Iruo nọ a be jọ iwou ogha na ru e rẹ were ahwo nọ e be hai weze kpohọ eria nana ẹsikpobi.

Nọ ọmoha jọ nọ a je wuhrẹ Ebaibol kugbe ọ ruẹ ahwo buobu nọ a be rọ ajọwha gbe evawere ruiruo kẹ Jihova evaọ uwou ogha Mexico, eva e were riẹ te epanọ ọ rọ nọ inọ: “Eme me re ru re mẹ sae ziọ etenẹ?” A ta kẹe nọ: “Orọ ọsosuọ, whọ rẹ họ-ame. U te no ere no, u re woma re whọ jọ ọkobaro—ọtausiuwoma oke-kpobi.” Ọmoha na o ru epanọ a ta kẹe na, ikpe ivẹ nọ i lele i rie, a te ziziei kpohọ Ebẹtẹle Mexico, yọ o vrẹ ikpe 20 no nọ ọ rọ rrọ etẹe ru iruo.

Eme Họ Ebẹtẹle?

Evaọ ẹvẹrẹ Hibru, otofa “Bẹtẹl” hayo “Ebẹtẹle” họ “Uwou Ọghẹnẹ.” (Emu. 28:19) Evaọ iwou ogha sa-sa, a be rọ ijini kporo Ebaibol gbe ebe nọ e ta kpahe Ebaibol, jẹ be rehọ obufihọ abọ-ẹzi kẹ ikoko Isẹri Jihova nọ i bu vrẹ idu udhusoi (100,000) wariẹ akpọ na họ. Inievo-emezae gbe erọ emetẹ nọ i te enwenọ idu udhe (20,000) nọ i no ekwotọ gbe ovioma sa-sa ze e be jọ Ebẹtẹle ru iruo wariẹ akpọ na họ—be rọ udu kpobi gọ Jihova je bi ru iruo kẹ inievo abọ-ẹzi rai. Te enọ e raha ikpe buobu no evaọ iruo na gbe izoge nọ ẹgba ọ gbẹ rrọ oma a gbẹ rrọ iruo na. Evaọ owọwọ sa-sa gbe urere-oka, ahwo uviuwou Ebẹtẹle a re kuomagbe ibe Isẹri Jihova kẹ iwuhrẹ gbe usiuwoma ota evaọ ikoko ekẹloma nọ a ghale rai fihọ. A rẹ jẹ rehọ uvẹ rai ru uwuhrẹ Ebaibol omobọ-ohwo, zaharo, je ru eware obọrai efa.

A rẹ kẹ ahwo uviuwou Ebẹtẹle umugho jọ rọkẹ araha rai k’amara k’amara. A rẹ reawere emamọ emu, yọ iwou rai e rrọ fuafo jẹ rrọ kpatiẹ. A bọ iwou Ebẹtẹle wọhọ ikpiwou edafe he. Dede na, i wo umutho eware nọ a gwọlọ. O rẹ kẹ ahwo nọ i weze kpohọ Ebẹtẹle evawere nọ a tẹ ruẹ oghẹrẹ nọ a be rẹrote iwou gbe otọ na, gbe epanọ a bi ru eware kpobi kpatiẹ; o rẹ jẹ kẹ ae evawere nọ a tẹ ruẹ ẹwo gbe ẹzi okugbe nọ ọ rrọ uviuwou Ebẹtẹle na. Ohwo kpobi ọ rẹ tẹrovi ọvuọ iruo riẹ, dede na oyena o rẹ whaha ae ohwohwo nọ a rẹ whẹtiẹ h’oma ha. A rẹ jọ Ebẹtẹle rri ahwo jọ kpehru vi ejọ họ, ẹsejọhọ fiki oghẹrẹ uyero ohwo hayo iruo nọ o bi ru. Iruo kpobi evaọ Ebẹtẹle i wuzou, o make rrọ iruo orufuọ, ẹruorote ekakọ, emu othere, ebe-ikporo hayo iruo ọfisi. Ahwo uviuwou Ebẹtẹle a re ru iruo evaọ okugbe ọvo rọ tha odibọgba Isẹri Jihova uke.—Kọl. 3:23.

Joma Ta Kpahe Ahwo Uviuwou Ebẹtẹle Jọ

Joma roma totọ ta ẹme kpahe ahwo nọ i ru uviuwou akpọ-soso nana via. Eme ọ wọ rai jiroro inọ a rẹ jọ Ebẹtẹle ru iruo? Joma ta kpahe oniọvo-ọmọzae nọ a re se Mario. Evaọ okenọ Mario o ro zihe ruọ omọvo Isẹri Jihova, o je ruiruo evaọ ekọmpene jọ nọ a re jo ku imoto evaọ Germany, yọ o wo uvẹ nọ o re ro te ọkwa ologbo evaọ ekọmpene na. Nọ ọ họ-ame no, u kri hi ọ tẹ fialoma via re ọ jọ Ebẹtẹle orẹwho riẹ ru iruo evaọ oka ovo. A fi rie họ oria nọ a rẹ jọ rehọ ijini kporo ebe re ọ jọ etẹe fi obọ họ. Mario ọ ruẹ ohẹriẹ ulogbo nọ o rrọ udevie ahwo uviuwou Ebẹtẹle nọ o je lele ruiruo na gbe ibe iruiruo riẹ evaọ obọ ekọmpene na. Fikiere, o te fi obe họ re o zihe ruọ omọvo uviuwou Ebẹtẹle. Dede nọ imoni gbe egbẹnyusu riẹ buobu a jẹ sai wo otoriẹ oware nọ o soriẹ ze nọ Mario ọ rọ jiroro nana ha, ọ be rọ evawere ru iruo evaọ Ebẹtẹle Germany enẹna.

Ibuobu i kpohọ isukulu ilogbo hayo wo iruo obọ taure a te ti kpohọ Ebẹtẹle he. Ere o jọ kẹ Abel, ọnọ ọ jọ Ebẹtẹle Mexico ru iruo te ikpe 15 no. Ọ ta nọ: “Ebẹtẹle i wuhrẹ omẹ eware buobu no. Me wuhrẹ epanọ a rẹ rọ rehọ ijini ilogbo nọ e vọ avọ onaa ro kporo ebe no. Mẹ riẹ nọ eriariẹ nana e rẹ sai fi obọ họ kẹ omẹ wo igho buobu otẹrọnọ me no Ebẹtẹle, rekọ mẹ te sai wo oware nọ mẹ rrọ etenẹ reawere riẹ na ha—uzuazọ ududhomẹ avọ evawere, nọ o kare awaọruọ gbe ẹzi omuhrowo nọ e da eria iruo buobu fia evaọ obọ otafe. Mẹ ruẹ nọ me wo ewuhrẹ nọ o mai woma kpaobọ no, onọ u fi obọ họ ru edikihẹ abọ-ẹzi mẹ ga no je ru omẹ wo eriariẹ kpahe eware sa-sa evaọ uzuazọ. Makọ iyunivasiti nọ e mae viodẹ kpaobọ e hẹ sae kẹ omẹ irere abọ-ẹzi nọ me wo no na ha.”

Iweze Kpohọ Ebẹtẹle E rẹ Sae Bọ Owhẹ Ga

Iweze kpohọ Ebẹtẹle e rẹ sai ru usu ohwo kugbe Ọghẹnẹ ga. Enẹ o via kẹ Omar, evaọ obọ Mexico. Oni riẹ ọ rọ Ebaibol na wuhrẹ iẹe no emaha ze. Rekọ nọ Omar o te ikpe 17 no, ọ tẹ siọ iwuhrẹ ukoko gbe usiuwoma ota ba. Ukuhọ riẹ, o te duomahọ uzuazọ ọfariẹ gbe efe ole. Uwhremu na nọ Omar o je ru iruo evaọ ekọmpene nọ i wobọ kpahe ekwakwa ẹmeọta, ọ jọ omọvo ahwo ekọmpene na nọ i kpohọ Ebẹtẹle Mexico nyai dhesẹ ekwakwa rai jọ. Omar ọ ta nọ: “Kẹsena ahwo ẹko-iruo nọ ma dhesẹ ekwakwa na kẹ na a tẹ rehọ omai nya uwou-ogha na wariẹ. Eware nọ mẹ ruẹ gbe uruemu ezi nọ a dhesẹ kẹ omẹ o lẹliẹ omẹ roro kpahe oghẹrẹ uzuazọ nọ me bi yeri, onọ o rọwo kugbe edhere Jihova ha. Ababọ okioraha, mẹ tẹ wariẹ mu iwuhrẹ ukoko họ jẹ ta nọ a wuhrẹ Ebaibol kugbe omẹ. Emerae ezeza nọ i lele i rie, mẹ tẹ họ-ame. Me yere Jihova gaga rọkẹ ọwhọ nọ me wo rono iweze mẹ kpohọ Ebẹtẹle ze.”

Masahiko, evaọ Japan, yọ omọfa nọ a jọ uviuwou Ileleikristi yọrọ. Dede na, o te muhọ eroro inọ izi uzuazọ Oleleikristi e ga hrọ. O te du oma kpobi họ iruẹru isukulu jẹ siọ iwuhrẹ ukoko gbe usiuwoma ota ba. Masahiko ọ ta uwhremu na inọ: “Ẹdẹjọ, uviuwou mai gbe inievo jọ evaọ ukoko na a tẹ jiroro nọ a re weze kpohọ Ebẹtẹle. Fikinọ ahwo uviuwou mẹ a suobọhọ nọ mẹ rẹ nya re, mẹ tẹ dhugbẹ nya. Me wo uduotahawọ nọ a jẹ rehọ omai nya wariẹ na. Omakugbe inievo Ileleikristi efa evaọ etoke iweze na o kẹ omẹ omawere nọ mẹ re jọ udevie egbẹnyusu obọ akpọ mẹ wo ẹdọvo ho. Isiuru uzuazọ Oleleikristi uyero e tẹ ruọ omẹ oma, mẹ tẹ yare nọ a ru uwuhrẹ Ebaibol kugbe omẹ.” Enẹna, Masahiko ọ rrọ ọgbodibo oke-kpobi evaọ ukoko riẹ.

Oniọvo-ọmọtẹ jọ evaọ France ọ kua kpohọ Moscow evaọ Russia nyai ru iruo. Fikinọ ọ jọ obei ruẹ Isẹri Jihova ha, edikihẹ abọ-ẹzi riẹ o te muhọ ewhrehe. O te duomahọ uruemu uyoma, jẹ rehọ ọzae nọ ọ rrọ Osẹri hi. Kẹsena, oniọvo-ọmọtẹ jọ nọ o no obọ France ze ọ tẹ nyaze te rue riẹ, aimava a te weze kpohọ Ebẹtẹle evaọ St. Petersburg, evaọ Russia. Oniọvo nana nọ o whrehe no vẹre na o kere nọ: “A dede omai rehọ ziezi evaọ obọ Ebẹtẹle, yọ onana u duobọte omẹ udu. A rẹ ruẹ obọ udhedhẹ nọ o jọ etẹe hẹ. Mẹ ruẹ imuẹro ẹzi Jihova. Mẹ riẹ oware nọ u tubẹ lẹliẹ omẹ no ukoko Jihova ha. Nọ me no iweze Ebẹtẹle te uwou no, mẹ tẹ lẹ kẹ obufihọ Jihova je mu Ebaibol na họ ero wuhrẹ emọ mẹ avọ ọtamuo ọgaga.” U te no obufihọ abọ-ẹzi efa nọ o rẹ sae jọnọ a kẹ Osẹri nana nọ o whrehe no vẹre na, iweze riẹ kpohọ Ebẹtẹle u fi obọ họ kẹe gaga, o ru ẹnyaharo abọ-ẹzi ziezi uwhremu na.

Kọ ẹvẹ kpahe ahwo nọ e riẹ Isẹri Jihova tere he nọ i weze kpohọ Ebẹtẹle? Evaọ 1988, Alberto nọ ọ jẹ hae dhogbo esuo-ohrowo o weze kpohọ Ebẹtẹle Brazil. O kẹ riẹ evawere gaga nọ ọ ruẹ iruo nọ e be nyaharo owowa, oria kpobi o jọ fuafo, yọ a je ru oware ovo dhere he. Taure ọ tẹ nwani weze kpohọ Ebẹtẹle, Alberto o kpohọ oria isukulu egagọ jọ nọ oniọvo aye riẹ ọ jẹ rrọ ukọ-ọghẹnẹ. Alberto ọ ruẹ ohẹriẹ ulogbo. Ọ ta nọ: “Oware kpobi a je ru dhere evaọ oria isukulu egagọ na.” Nọ ọ nwani no iweze Ebẹtẹle na ze no, ọ tẹ rọwo nọ a wuhrẹ Ebaibol kugbei, o te si oma no esuo-ohrowo, yọ enẹna ọ rrọ ọkpako ukoko.

Weze Kpohọ Ebẹtẹle!

Ahwo buobu a daoma gaga no re a weze kpohọ uwou ogha nọ o rrọ orẹwho rai. Wọhọ oriruo, evaọ Brazil, Paulo avọ Eugenia a koko igho ikpe ene soso re a sae ruẹ ugho hwosa omoto nọ ọ rẹ wọ ae edẹ ivẹ dhẹ emaele idu ivẹ (2,000) kpohọ Ebẹtẹle nọ ọ rrọ orẹwho yena. Aimava a ta nọ: “Iweze na e were oma kẹhẹ. Enẹna, ma wo otoriẹ ukoko Jihova ziezi no. Nọ ma tẹ ta kẹ emọ-uwuhrẹ Ebaibol mai kpahe iruo nọ a rrọ Ebẹtẹle ru, ẹsejọ a rẹ nọ omai nọ, ‘Kọ wha te obei no ẹdẹjọ?’ Enẹna, ma rẹ sai yo nọ Ee.”

Kọ uwou ogha hayo Ebẹtẹle e rrọ orẹwho ra hayo orẹwho jọ nọ o kẹle owhẹ? Ma zizie owhẹ nọ who weze kpohọ iẹe. Avro ọ riẹ hẹ, a te rọ oma-osasa dede owhẹ rehọ, yọ who ti wo irere abọ-ẹzi buobu nọ who te weze kpohọ Ebẹtẹle.