Fi Obọ Họ KẸ Emaha re A Wo Otoriẹ Ukoko Jihova Ziezi

O RẸ were emaha re a riẹ eware. Dai roro kpahe enọ jọ nọ o sae jọnọ emaha Izrẹl evaọ Ijipti a nọ evaọ aso Ọnyavrẹ ọsosuọ na: ‘Fikieme a je bi kpe omogodẹ?’ ‘Fikieme ọsẹ mai ọ be rọ rehọ azẹ wholo unuẹthẹ?’ ‘Bovẹ ma be nya?’ Oware nọ Jihova ọ ta kẹ esẹ iviuwou emọ Izrẹl inọ a ru u dhesẹ inọ enọ yena e were riẹ. Jihova ọ vuẹ rai kpahe ehaa Ọnyavrẹ nọ a te hai ru no umuo oke yena vrẹ inọ: “Ọtẹrọnọ emọ rai e nọ owhai nọ, ‘Eme egagọ enana i dikihẹ kẹ?’ Wha ve yo nọ, ‘Yọ iwẹ-Ọnyavrẹ ỌNOWO na, keme na ọ nya iwou ahwo Izrẹl nọ e jọ eva otọ Ijipti vrẹ, eva okenọ o ro kpe ahwo Ijipti ọ jẹ se inuwou mai ba.’” (Ọny. 12:24-27) Oke ofa jọ, Jihova ọ kareghẹhọ esẹgbini orẹwho Izrẹl oware nọ u ro wuzou re a za enọ nọ emọ rai e nọ kpahe “ijaje avọ iziegwae” nọ Jihova ọ kẹ rai na.—Izie. 6:20-25.

 O rrọ vevẹ inọ Jihova ọ gwọlọ nọ emọ iviuwou Izrẹl a tẹ nọ enọ kpahe egagọ uzẹme, u fo re a kẹ ae iyo nọ i re ru oware na vẹ ae ẹro—iyo nọ e rẹ wọ ae you Jihova wọhọ Ọghẹnẹ gbe Osiwi rai. Ere ọvona Jihova ọ gwọlọ nọ ma ru kẹ emọ mai nẹnẹ. Edhere jọ nọ esẹgbini i re ro fi obọ họ kẹ emọ wo uyoyou udidi kẹ Jihova gbe ahwo riẹ họ, ẹkwoma obọ nọ a re fihọ kẹ ai wo otoriẹ ukoko Jihova ziezi gbe irere nọ a re wo no ọruẹrẹfihotọ ukoko na ze. Fikiere, joma ta kpahe idhere jọ nọ a sai ro fi obọ họ kẹ emaha wo otoriẹ ukoko Jihova ziezi.

Ukoko nọ Wha Rrọ

U fo re emọ ra a riẹ ukoko nọ uviuwou ra u bi kuomagbe ziezi. Re onana o sae lọhọ, o gwọlọ nọ whai esẹgbini na wha rẹ wha emọ na lele oma kpohọ iwuhrẹ ukoko na kpobi. Evaọ ere oruo, yọ wha bi ru lele uzi nọ Jihova o jie kẹ emọ Izrẹl inọ: ‘Koko ahwo na họ, ezae, eyae, gbe emaha na . . . , re a yo je wuhrẹ epanọ a rẹ rọ dhozọ ỌNOWO na Ọghẹnẹ rai, wha vẹ jẹ yọrọ oma epanọ wha re ro ru eme uzi nana, re emọ rai, nọ a re riẹ e he, a ve yo je wuhrẹ epanọ a rẹ rọ dhozọ ỌNOWO na Ọghẹnẹ rai.’—Izie. 31:12, 13.

A rẹ sae rọ Ẹme Ọghẹnẹ mu emọ họ ewuhrẹ evaọ oke emaha. Pọl ukọ na ọ ta kpahe Timoti nọ: “Whọ riẹ ikere ẹri na nọ anwọ oke emaha ze.” (2 Tim. 3:15) Nọ ma tẹ rrọ iwuhrẹ evaọ obọ Ọgwa Uvie, emaha esese dede a rẹ gaviezọ oware nọ a be ta jẹ tubẹ riẹ ile Uvie na ẹmẹrera. A rẹ jọ etẹe  wuhrẹ epanọ a re ro rovie je se Ebaibol gbe ebe nọ a kere no Ebaibol ze, je rri rai avọ adhẹẹ. Ofariẹ, a rẹ jọ iwuhrẹ mai muẹrohọ uruemu aghae jọ nọ a re ro vuhu Ileleikristi uzẹme—uvi uyoyou. Jesu ọ ta nọ: “Mẹ kẹ owhai uzi okpokpọ, nọ, whai ohwo o you ohwo wọhọ epanọ me you owhai, re whai ohwo o you ohwo. Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:34, 35) Uvi ufuoma gbe uyoyou osasa nọ a rẹ ruẹ evaọ obọ Ọgwa Uvie u re duobọte emaha udu, yọ u re fi obọ họ kẹ ai se iwuhrẹ enya gboja.

Wha tẹ be hai kaki te Ọgwa Uvie jẹ daji omojọ nọ ewuhrẹ o te kuhọ no, o te kẹ emọ ra uvẹ mu usu kugbe inievo na. Ukpenọ whọ rẹ kẹ ae uvẹ mu usu kugbe emọ ibe rai ọvo, kọ u gbe fo re who fi obọ họ kẹ ae riẹ inievo nọ e rrọ unuikpe sa-sa? Emọ ra a te mu usu kugbe inievo nọ e kpako, a ti wo erere no eriariẹ gbe areghẹ rai ze. Wọhọ epanọ Uzaya, ovie ọmoha nọ o je su Juda o wo erere evaọ usu riẹ kugbe Zekaraya nọ ọ rọ ‘ozodhẹ Ọghẹnẹ wuhrẹ iẹe’ na, ere ọvona usu kugbe otu nọ e gọ Jihova kri no avọ ẹrọwọ u bi fi obọ họ kẹ emaha buobu nẹnẹ. (2 Irv. 26:1, 4, 5) Evaọ obọ Ọgwa Uvie, whọ sai je ru emọ ra riẹ oware nọ ubrukpẹ-ebe hayo ekọbọdo-ebe, ebọdo ovuẹ, gbe eware efa e rrọ rọkẹ.

Ukoko Akpọ-Soso Na

U fo re a fi obọ họ kẹ emaha riẹ inọ ukoko rai na yọ abọjọ ọrọ ukoko akpọ-soso nọ ikoko sa-sa nọ i bu te idu udhusoi (100,000) i ru via. Dhesẹ eware sa-sa kpahe ukoko na kẹ emọ ra, te eruẹrẹfihotọ sa-sa erọ ukoko na, gbe oghẹrẹ nọ emaha a sae rọ tha eruẹrẹfihotọ nana uke. Vuẹ ae oware nọ o soriẹ ze nọ whọ be hae rọ rehọ ọwhọ rẹro ikokohọ, gbe iweze ọsẹro ọnyawariẹ.—Rri ẹkpẹti na “Eware Jọ nọ A rẹ Ta Ẹme Kpahe Evaọ Etoke Uwuhrẹ Ebaibol Uviuwou,” evaọ ẹwẹ-obe avọ 28.

Nọ uvẹ na o tẹ romavia, zizie esẹro ọnyawariẹ, imishọnare, ahwo uviuwou Ebẹtẹle, gbe inievo efa nọ e rrọ iruo odibọgba oke-kpobi ziọ uwou rai kẹ emuọriọ. Who roro ho inọ inievo nana a wo uvẹ kẹ emaha ha. A be daoma raro kele oriruo Jesu, ọnọ ọ jẹ whẹtiẹ emaha họ oma ẹsikpobi je lele ae ta ẹme. (Mak 10:13-16) Eyo ikuigbe iyẹrẹ evawere erọ iruo Uvie na gbe oghọghọ nọ inievo nana a be jọ iruo Ọghẹnẹ wo, o rẹ sae wọ emọ ra ru odibọgba oke-kpobi na họ utee rai re.

Eme ọfa wha rẹ sai ru wọhọ uviuwou ro fi obọ họ kẹ emọ ra riẹ ukoko Jihova ziezi? Eware jọ ena: Wha ru ei fihọ omaa wọhọ uviuwou re wha se obe na Jehovah’s Witnesses—Proclaimers of God’s Kingdom. Fi ẹgba họ ẹzi omarọkẹ, omaurokpotọ, gbe ẹrọwọ ọgaga nọ idibo Jihova a dhesẹ no. Dhesẹ epanọ Jihova ọ rọ rehọ ae vuẹ emamọ usi na nya otọakpọ na soso duwu. Rehọ ividio nọ ukoko Jihova u ru no ro wuhrẹ emọ ra eware sa-sa kpahe oke nọ u kpemu gbe oke mai na. O tẹ lọhọ kẹ owhai, wha weze kpohọ uwou ogha nọ o rrọ orẹwho rai hayo makọ erẹwho efa dede. Iweze itieye na i re fi obọ họ kẹ emọ ra ruẹ ọruẹrẹfihotọ nọ abọ otọakpọ orọ ukoko Jihova evaọ otọ ẹruọsa odibo ẹrọwọ na u ru no nọ a be rọ rehọ emu abọ-ẹzi gbe ọkpọvio kẹ inievo na wariẹ akpọ na họ, wọhọ epanọ o jọ evaọ ikpe-udhusoi ọsosuọ.—Mat. 24:45-47; Iruẹru 15:22-31.

Ru Uwuhrẹ na Lele Otoriẹ Emọ na Omomọvo

Nọ who bi wuhrẹ emọ ra na, kareghẹhọ oghẹrẹ nọ Jesu o ro wuhrẹ ikọ riẹ. Ọ ta kẹ ae ẹdẹjọ nọ: “Me wo eware buobu nọ  mẹ hẹ ta kẹ owhai, rekọ wha sae wha ae enẹna ha.” (Jọn 16:12) Jesu o wuhrẹ ilele riẹ vrẹ epanọ ẹgba rai o mu hu. Ukpoye, o je wuhrẹ ai uzẹme na ẹmẹrera re a sai wo otoriẹ eware na ziezi. Ere ọvona re, who wuhrẹ emọ ra vrẹ epanọ ẹgba rai o mu hu. Whọ tẹ be hai wuhrẹ emọ ra umumutho eware kpahe ukoko na n’oke t’oke, u ti ru nọ a te rọ gwọlọ riẹ eware efa kpahe ukoko na je ru nọ uwuhrẹ utiona o te rọ jọ oware omawere kẹ ae. Nọ oke o be nyaharo avọ iyero ekpokpọ nọ e be romavia na, whọ sae wariẹ eware jọ nọ a wuhrẹ no vẹre je ru ai vẹ viere.

Ukoko Ileleikristi na u re fi obọ họ ru usu mai kugbe Ọghẹnẹ ga, yọ u re fi obọ họ kẹ izoge nọ e be rọ ọwhọ w’obọ evaọ iruẹru ukoko na wo ẹgba nọ a rẹ rọ dadamu wọso isiuru akpọ Setan. (Rom 12:2) Ma wo evaifihọ inọ whọ te ruẹ evawere ilogbo nọ who bi fi obọ họ kẹ emọ ra wo otoriẹ ukoko Jihova ziezi na. Ajọ Ọghẹnẹ ọ ghale omodawọ ra re emọ ra a dadamu ukoko na gbe Ọghẹnẹ oyoyou nọ ma be gọ na.

[Ẹkpẹti/Uwoho nọ o rrọ ẹwẹ-obe avọ 28]

Eware Jọ nọ A rẹ Ta Ẹme Kpahe Evaọ Etoke Uwuhrẹ Ebaibol Uviuwou

Enana yọ eware jọ kpahe ọruẹrẹfihotọ ukoko Jihova nọ wha rẹ sae ta ẹme kpahe evaọ etoke Uwuhrẹ Ebaibol Uviuwou rai.

▪ Wha kiẹ ikuigbe ukoko nọ wha rrọ na. Oghẹrẹ vẹ gbe oke vẹ o rọ t’ohọ? Egwa Uvie sa-sa vẹ ukoko na u jo ru iwuhrẹ no? Evaọ onana, o rẹ sai kiehọ re who zizie ohwo jọ nọ ọ rrọ ukoko na kri no ziọ uwou ra re ọ kẹ iyo enọ emọ ra.

▪ Ru ẹjiroro iwuhrẹ ukoko sa-sa gbe ikokohọ vẹ kẹ emọ ra, gbe epanọ a sai ro wo erere no ai ze.

▪ Wha ta kpahe ẹjiroro isukulu sa-sa nọ ukoko Jihova u wo. Wha ta kpahe eware nọ a rọ ẹro ruẹ no nọ i dhesẹ emamọ iyẹrẹ nọ i bi no iruẹru inievo nọ i nwrotọ no isukulu nana ze no.

▪ Fi obọ họ kẹ emọ esese ra re a ruẹ epanọ u wuzou te re a jọ iwhowho-uvie nọ i re wobọ evaọ usiuwoma ota ẹsikpobi. Dhesẹ epanọ abọ owo rai o sai ro fiba iyẹrẹ akpọ-soso nọ a re kere fihọ Yearbook of Jehovah’s Witnesses na.

▪ Fodẹ uvẹ-iruo odibọgba oke-kpobi sa-sa nọ i rovie họ kẹ izoge evaọ ukoko Jihova. Uzou avọ 10 orọ obe na A Koko Omai Họ re Ma Ru Oreva Jihova yọ emamọ oria jọ nọ whọ sae jọ ruẹ evuẹ itienana.

▪ Fi obọ họ kẹ emọ ra wo otoriẹ oware nọ o soriẹ nọ ukoko na u je bi ru eware jọ evaọ edhere nọ u wo ohẹriẹ no onọ a rẹro riẹ. Ru ae riẹ oware nọ u gbe ro fo ho re a ru eware evaọ edhere obọrai nọ u wo ohẹriẹ no orọ ukoko Jihova, makọ evaọ eware esese. Dhesẹ epanọ ẹnyalele ekpọvio ekpako ukoko na o sai ro fiba ọruẹrẹfihotọ owowa ukoko na.

[Uwoho]

Emọ ra a re wo erere nọ a te bi mu usu kugbe inievo nọ e rrọ iruo odibọgba na kri no

[Iwoho nọ e rrọ ẹwẹ-obe avọ 26]

Wọhọ epanọ o jọ evaọ Izrẹl anwae, esẹgbini a rẹ daoma re a kẹ emọ rai iyo nọ i re vẹ ae ẹro okenọ emọ e tẹ nọ enọ kpahe ukoko Jihova