Inoma—Ẹvẹ Jihova O Rri Rai?

ỌZAE na ọ ta nọ: “Aye nọ whọ rọ kẹ omẹ re mẹ avọ iẹ ma gbẹ jọ, ọye ọ kẹ omẹ ubi-ure na mẹ tẹ re iẹe.” Aye na ọ ta nọ: “Oriọvọ o liẹliẹ omẹ họ mẹ jẹ re iẹe.” Eme nana nọ Adamu avọ Ivi, ọsẹgboni ọsosuọ mai a ta kẹ Ọghẹnẹ na họ emuhọ unoma-uguo nọ o reria ohwo-akpọ obọ n’otọ avọ otọ ze no.—Emu. 3:12, 13.

Oziẹ nọ Jihova o brukpe Adamu avọ Ivi fiki aro nọ a keke họ ghẹmeeyo kẹe na u ru rie vẹ inọ ọ jẹ unoma rai na rehọ họ. (Emu. 3:16-19) Kọ oyena o rẹ lẹliẹ omai ku ei họ inọ Jihova ọ rẹ jẹ uvumọ unoma rehọ vievie he? Manikọ inoma jọ e riẹ nọ ọ rẹ jẹrehọ? O tẹ rrọ ere, ẹvẹ ma sae rọ riẹ oghẹrẹ inoma nọ ọ rẹ jẹrehọ gbe enọ ọ rẹ jẹrehọ họ? Re ma sae riẹ uyo na, joma kake gwọlọ otofa ẹme na, unoma.

Unoma yọ oware nọ ohwo ọ rẹ ta inọ o lẹle riẹ ru oware jọ, hayo nọ o gbe ro ru oware jọ họ, hayo nọ o gbe ti ro ru oware jọ họ. Unoma o sae jọ uvi riẹ, nọ u gine te epanọ o sae rọ wha oware ze, nọ o rẹ sae ginẹ jọ unu-uwou, onọ a rẹ sae rọ fiki riẹ re ohrọ ohwo hayo rọvrẹ ohwo. Dede na, wọhọ epanọ orọ Adamu avọ Ivi o jọ na, unoma o sae jẹ jọ orọ ẹghẹ—ẹme eviẹhọ nọ a rẹ rọ ko uzẹme dhere. Nọ inoma buobu e rẹ whoma họ abọ eviẹhọ na, ẹsibuobu a re viẹro ku ohwo nọ o te bi gu unoma.

Nọ ma te bi gu unoma—maero evaọ eware nọ i wobọ kpahe egagọ Ọghẹnẹ—o gwọlọ nọ ma rẹ yọroma ziezi re ma siọ ‘omobọ mai ba ẹviẹhọ.’ (Jem. 1:22) Fikiere, joma ta kpahe iriruo gbe ehri-izi Ebaibol jọ nọ i re fi obọ họ kẹ omai “dawo oma he wuhrẹ onọ o rẹ were Ọnowo na.”—Ẹf. 5:10.

Oware nọ Ọghẹnẹ O Rẹro Riẹ mi Omai

Ma rẹ jọ Ẹme Ọghẹnẹ ruẹ ugogo ijaje jọ nọ ọ gwọlọ nọ idibo riẹ a re koko. Wọhọ oriruo, ujaje Kristi inọ ilele riẹ a nyai “wuhrẹ ahwo erẹwho kpobi” na yọ ujaje nọ o rrọ kẹ Ileleikristi uzẹme kpobi rite inẹnẹ. (Mat. 28:19, 20) Evaọ uzẹme, ekoko ujaje yena u wuzou te epanọ Pọl ukọ na ọ rọ ta nọ: “Ure yoma kẹ omẹ mẹ gbẹ ta usiuwoma ha!”—1 Kọr. 9:16.

Dede na, ahwo jọ nọ ma bi wuhrẹ Ebaibol kugbe anwọ etoke krẹkri ze na a gbe bi si uke kpemu evaọ owojẹ usiuwoma ota Uvie Ọghẹnẹ. (Mat. 24:14) Efa jọ nọ i je w’obọ evaọ iruo usiuwoma na a seba no. Inoma jọ vẹ ahwo otiọnana a re gu ẹsejọ? Evaọ oke nọ u kpemu, eme Jihova o ru kpahe ahwo nọ i je si uke kpemu evaọ ẹmeoyo kẹ ugogo ijaje nọ ọ kẹ?

Inoma nọ Ọghẹnẹ Ọ rẹ Jẹrehọ Họ

“O rrọ bẹbẹ.” Maero rọkẹ ahwo nọ ozọ u re mu gaga, o rẹ sae wọhọ nọ usiuwoma ota o rrọ bẹbẹ. Dede na, roro kpahe oware nọ ma rẹ sai wuhrẹ no oriruo Jona ze. A kẹ riẹ iruo jọ nọ o rri nọ e gahrọ—Jihova ọ vuẹ riẹ nọ ọ nyai whowho ovuẹ ọraha nọ o bi ti te Ninẹve. Oware nọ o soriẹ nọ ozọ uwou yena nọ a vi Jona na u je ro mu ei o rẹ bẹ ẹriẹ hẹ. Ninẹve ọ jọ okpẹwho-esuo Asiria, yọ a riẹ ahwo Asiria wọhọ ahwo egeva. Ẹsejọhọ Jona ọ jẹ jọ udu riẹ ta nọ: ‘Ẹvẹ mẹ te sae rọ ta ẹme  evaọ udevie ahwo nana? A gbe ti ru omẹ oware jọ?’ O raha oke he, ọ tẹ dhẹ nyai siomano. Rekọ Jihova ọ jẹ unoma Jona rehọ họ. Ukpoye, Jihova ọ wariẹ ta kẹe inọ ọ nyai whowho ovuẹ na kẹ ahwo Ninẹve. Kẹsena Jona ọ tẹ rọ aruọwha nya uwou nọ a vi rie na, yọ emamọ iyẹrẹ i no rie ze.—Jona 1:1-3; 3:3, 4, 10.

Otẹrọnọ who bi roro inọ ewhowho emamọ usi na o rrọ bẹbẹ kẹ owhẹ, kareghẹhọ inọ “Ọghẹnẹ ọ rẹ sai ru eware kpobi.” (Mak 10:27) O rẹ sai mu owhẹ ẹro inọ Jihova ọ te kẹ owhẹ ẹgba nọ whọ tẹ be hae yare obufihọ riẹ, yọ ọ te ghale owhẹ nọ whọ be daoma wo aruọwha nọ whọ rẹ rọ wha iruo odibọgba ra haro na.—Luk 11:9-13.

“O be ruọ omẹ hẹ.” Eme whọ rẹ sai ru otẹrọnọ who wo isiuru kẹ iruo odibọgba na ha? Kareghẹhọ nọ Jihova ọ rẹ sai duobọte owhẹ udu je ru owhẹ wo isiuru na. Pọl ọ ta nọ: “Ọghẹnẹ ọrọ eva rai ru iruo, [re wha jowọ] eva iroro te iruo rọ kẹ awere ezi riẹ.” (Fil. 2:13) Fikiere, whọ rẹ sae yare Jihova re o fi obọ họ kẹ owhẹ wo isiuru nọ who re ro ru oreva riẹ. Ere Devidi ovie na o ru. Ọ lẹ Jihova nọ: “Ru omẹ nya evaọ uzẹme ra.” (Ol. 25:4, 5, NW) Whọ rẹ sai ru epọvo na re ẹkwoma udu kpobi nọ whọ rẹ rọ lẹ Jihova nọ o fi obọ họ kẹ owhẹ wo isiuru nọ who re ro ru oware nọ o rẹ were iẹe.

Uzẹme, nọ oma o tẹ rrọ omai no hayo nọ ma te wo oghẹrẹ elọhoma jọ, o rẹ sae gwọlọ oma-ogbahọ ẹsejọ re ma sai kpohọ ewuhrẹ evaọ obọ Ọgwa Uvie hayo wobọ evaọ usiuwoma ota na. O tẹ via enẹ, kọ o rẹ nwani dhesẹ nọ ma gine you Jihova ha? O rrọ ere he. O jọ oware abọ-omuo re kẹ idibo Ọghẹnẹ nọ i wo ẹrọwọ evaọ oke nọ u kpemu re a sai ru oreva Ọghẹnẹ. Wọhọ oriruo, Pọl ọ ta nọ re ọ sai yoẹme kẹ uzi Ọghẹnẹ, ọ jẹ hae ‘ta họ oma riẹ obọ.’ (1 Kọr. 9:26, 27) Fikiere, o tẹ make rọnọ ma be gbomahọ re ma sae wha iruo odibọgba na haro, o rẹ sai mu omai ẹro inọ Jihova ọ te ghale omai. Fikieme? Fikinọ emamọ ẹjiroro o be wọ omai dao oma kpobi ru oreva Ọghẹnẹ na—uyoyou nọ ma wo kẹ Jihova. Ẹkwoma ere oruo, ma te sae ruẹ uyo kẹ Ọghẹnẹ nọ ọ rẹ kpahe fihọ use-abọ Setan inọ idibo Ọghẹnẹ a te vro Ọghẹnẹ otẹrọnọ odawọ u te rai.—Job 2:4.

“Me wo uvẹ hẹ.” Otẹrọnọ whọ be jọ odibọgba na wobọ họ fikinọ o rrọ owhẹ oma inọ eware i bu owhẹ abọ hrọ, o roja enẹna re whọ wariẹ roro kpahe eware nọ u fo nọ whọ rẹ rọ karo evaọ uzuazọ. Jesu ọ ta nọ: “Wha kake guọlọ uvie riẹ.” (Mat. 6:33) Re whọ sai lele ehri-uzi yena, o rẹ sae gwọlọ nọ who ru uzuazọ ra lọhọ hayo sino oke nọ whọ be hae raha kẹ arozaha omawere, re whọ rehọ oke yena wobọ evaọ odibọgba na. Uzẹme, arozaha omawere gbe eware itieye na efa i kiehọ, rekọ i te eware nọ ma re ro gu unoma ha inọ eye e whaha omai abọ owo evaọ odibọgba na. Isiuru Uvie na e rẹ jọ oware ọsosuọ kẹ odibo Ọghẹnẹ.

 “Me te kẹ iruo na ha.” O rẹ sae jọ owhẹ oma inọ who te ohwo nọ ọ rẹ jọ ọgbodibo emamọ usi na ha. Idibo Jihova jọ nọ i wo ẹrọwọ nọ a gbiku rai fihọ Ebaibol na a je roro inọ a te ahwo nọ a re ru iruo nọ Jihova ọ kẹ rai hi. Wọhọ oriruo, roro kpahe Mosis. Okenọ Jihova ọ kẹ Mosis iruo jọ, Mosis ọ ta nọ: “O ỌNOWO mẹ, mẹ rọ ọgbẹme he makọ enẹna hayo anwọ okenọ whọ rọ ta kẹ odibo ra; rekọ mẹ rẹ sae ta ẹme he, ẹrọo mẹ ọ rẹ gbẹgbẹdẹ.” Dede nọ Jihova ọ kẹ riẹ imuẹro inọ ọ te jọ kugbei, Mosis ọ ta ghele inọ: “O, Ọnowo mẹ, mẹ lẹ owhẹ, vi omọfa.” (Ọny. 4:10-13) Eme Jihova o ru?

Jihova ọ wọ iruo na no Mosis uzou hu. Dede na, o vi Erọn lele Mosis re o fi obọ họ kẹe ru iruo na. (Ọny. 4:14-17) Ofariẹ, Jihova ọ jọ kugbe Mosis nọ o je ru iruo na jẹ kẹe oware kpobi nọ ọ gwọlọ re ọ sai ru iruo nọ ọ kẹ riẹ na ziezi. O rẹ sai mu owhẹ ẹro nẹnẹ re inọ Jihova ọ te rọ ẹkwoma ibe Ileleikristi nọ i wo onaa jẹ kpako ziezi ro fi obọ họ kẹ owhẹ evaọ iruo odibọgba na. Maero, Ẹme Ọghẹnẹ ọ kẹ omai imuẹro inọ Jihova o ti ru omai te kẹ iruo nọ ọ kẹ omai nọ ma ru na.—2 Kọr. 3:5; rri ẹkpẹti na  “Etoke nọ Mẹ Mai Wo Evawere Evaọ Uzuazọ.”

“Ohwo jọ o ru eva dha omẹ.” Ahwo jọ a rẹ kẹ uvẹ re oware odada nọ amọfa a ru rai i ru ai siọ usiuwoma ota hayo iwuhrẹ ukoko ba ẹnya, bi roro nọ Jihova ọ te jẹ unoma rai rehọ inọ oye o whaha e rai abọ owo evaọ iruẹru egagọ riẹ. Dede nọ eva e rẹ sae ginẹ dha omai nọ a te ru omai oware odada, kọ  oyena ginọ emamọ unoma nọ o rẹ whaha omai abọ owo evaọ iruẹru egagọ Ileleikristi? O sae jọnọ eva e jẹ dha Pọl avọ ibe ọg’Ọghẹnẹ riẹ nọ a re se Banabas nọ avro nọ ọ jọ udevie rai o zihe ruọ “ẹwhọ ọwhawha.” (Iruẹru 15:39) Kọ ọjọ evaọ aimava na ọ rọ fiki oyena siọ iruo odibọgba na ba? Vievie!

Epọvo na, nọ ibe Oleleikristi jọ o te ru owhẹ oware jọ nọ o be da owhẹ, u fo re whọ kareghẹhọ inọ Setan, ọnọ ọ gwọlọ mu owhẹ lọ na họ ọwegrẹ ra, orọnikọ oniọvo abọ-ẹzi ra nọ ọ gba ha na ha. Dede na, Ẹdhọ ọ te sae kparobọ họ nọ who te “mudhe kẹe, dikihẹ ga eva orọwọ ra.” (1 Pita 5:8, 9; Gal. 5:15) Who te wo oghẹrẹ ẹrọwọ otioye, oware odada ovuọvo o te sai whrehe iei hi.—Rom 9:33.

Nọ Uyero Mai O Gbẹ be Kẹ Omai Uvẹ Wobọ Ziezi Hi

Umutho iriruo nana nọ ma ta ẹme te na i fi obọ họ kẹ omai ruẹ inọ u wo unoma ovo nọ ohwo o re gu hu inọ oye o whaha e riẹ ẹmeoyo kẹ ugogo izi Jihova, nọ o kẹre te ewhowho emamọ usi na. Dede na, o rẹ sai gine wo eware jọ nọ e rẹ whae ze nọ ma gbẹ sai ru tere evaọ odibọgba na ha. Ẹruorote ewha-iruo efa nọ Ikereakere na e gwọlọ mi omai o rẹ sai ru nọ oke nọ ma re ro wobọ evaọ iruo usiuwoma ota na o jẹ kawo. Ofariẹ, ẹsejọ o sae ginẹ jọnọ oma o be rrọ omai hayo ẹyao o kru omai hotọ te epanọ ma gbẹ be sai wobọ ziezi evaọ egagọ Jihova ha. Uyero mai o tẹ rrọ ere, Ẹme Ọghẹnẹ ọ kẹ omai imuẹro inọ Jihova ọ riẹ isiuru mai gbe ọnyaba mai.—Ol. 103:14; 2 Kọr. 8:12.

Fikiere, o gwọlọ nọ ma re dhesẹ orimuo re ma siọ omobọ mai hayo amọfa ba ebrukpe evaọ ẹme nana. Pọl ukọ na o kere nọ: “Whẹ ono nọ ore bruoziẹ odibo omọfa? Eva aro olori riẹ ọvo o je dikihẹ hayo ekie.” (Rom 14:4) Ukpenọ ma rẹ rehọ uyero mai wawọ orọ amọfa, u fo re ma kareghẹhọ inọ “mai kpobi ma ti . . . gu ọvuọ ẹkẹunu riẹ kẹ Ọghẹnẹ.” (Rom 14:12; Gal. 6:4, 5) Nọ ma tẹ be ta inoma mai kẹ Jihova evaọ olẹ, o gwọlọ nọ ma re ru ere avọ ‘iroro efuafo.’—Hib. 13:18.

Oware nọ Ẹgọ Jihova O be rọ Kẹ Omai Evawere

Mai kpobi ma rẹ sae gọ Jihova avọ evawere makọ oghẹrẹ kpobi nọ uyero mai o rrọ kẹhẹ keme izi riẹ e ga hrọ họ, yọ e vọ avọ erere. Fikieme ma jẹ sae ta ere?

Ẹme Ọghẹnẹ ọ ta nọ: “Whọ se ewoma ba e ru kẹ enọ u te he, okenọ who wo ogaga nọ who re ro ru ei.” (Itẹ 3:27) Eme whọ jọ itẹ nana vuhumu kpahe izi Ọghẹnẹ? O rrọ oreva Jihova ha inọ whọ rẹ rova re whọ ruẹsi ru epanọ ibe Oleleikristi ra o bi ru, ukpoye ọ gwọlọ nọ who ru utho onọ ‘who wo ogaga riẹ’ evaọ egagọ riẹ. Ẹhẹ, mai kpobi ma rẹ sae rehọ udu kpobi gọ Jihova—makọ oghẹrẹ kpobi nọ ẹgba mai o mu kẹhẹ.—Luk 10:27; Kọl. 3:23.

[Ẹkpẹti/Uwoho nọ e rrọ ẹwẹ-obe avọ 14]

 “Etoke nọ Mẹ Mai Wo Evawere Evaọ Uzuazọ”

O tẹ make rọnọ ma wo ebẹbẹ ugboma hayo iroro, u fo ho re ma nwane jọ udu mai ku ei họ kpatakpata inọ oyena o te whaha omai abọ owo vọvọ evaọ odibọgba na. Wọhọ oriruo, roro kpahe oware nọ o via kẹ Ernest, oniọvo-ọmọzae Oleleikristi mai jọ evaọ Canada.

Ernest o wo ẹbẹbẹ jọ nọ u ru nọ ọ be rọ ta ẹme gba ziezi hi, yọ ọ jẹ hae dhomovuọ gaga. Fikinọ ọ nwa okpoma uke, o te no iruo ebabọ nọ o je ru. Dede nọ omonwa nana u fi rie họ ọmo, onana o kẹ riẹ uvẹ ziezi wobọ evaọ odibọgba na. Uduotahawọ nọ a jẹ jọ iwuhrẹ ukoko kẹ inievo na inọ a fialoma via kẹ iruo ọkobaro obufihọ u duobọte oniọvo nana udu. Dede na, o je roro inọ o te ohwo nọ o re ru iruo ọkobaro obufihọ họ.

Re ọ ruẹsi dhesẹ via kẹ omariẹ inọ ẹgba riẹ o te iruo ọkobaro obufihọ họ, o te fi obe họ kẹ amara ọvo. Akpọ o gbe rie unu gaga nọ ọ ruẹ nọ ọ sai ru ọkobaro obufihọ amara yena gba ziezi. Kẹsena, ọ tẹ ta kẹ omariẹ nọ, ‘Mẹ riẹ nọ mẹ rẹ gbẹ sai ru ei ofa ha.’ Re ọ sai dhesẹ iẹe via nọ ginọ ere, ọ tẹ wariẹ fi obe họ kẹ amara ọfa—yọ wọhọ epaọ ọsosuọ, o ru rie gba.

Ernest o ru iruo ọkobaro obufihọ ẹgbukpe soso, rekọ ọ ta nọ, “U mu omẹ ẹro ziezi inọ mẹ rẹ sai ru iruo ọkobaro oke-kpobi hi.” Re ọ ruẹsi je dhesẹ via nọ ẹgba riẹ o gine te ere he, o te fi obe họ kẹ iruo ọkobaro oke-kpobi. U gbe rie unu nọ ọ ruẹ nọ ọ sai ru iruo ọkobaro oke-kpobi na ukpe ososo. Ọ tẹ jiroro nọ ọ rẹ ruabọhọ iruo na, yọ ọ reawere iruo na ikpe ivẹ soso bẹsenọ o ro whu fiki omonwa riẹ na. Dede na, taure o te ti whu, ọ jẹ hae ta kẹ ahwo nọ a weze bru ei ze avọ irui oviẹ inọ, “Ikpe yena nọ mẹ rọ gọ Jihova wọhọ ọkobaro na họ etoke nọ mẹ mai wo evawere evaọ uzuazọ.”

[Uwoho nọ o rrọ ẹwẹ-obe avọ 13]

Ma rẹ sai fi ezadhe kpobi nọ e rẹ sae whaha omai abọ owo evaọ odibọgba na kparobọ

[Uwoho nọ o rrọ ẹwẹ-obe avọ 15]

O rẹ were Jihova nọ ma tẹ be rehọ udu kpobi gọe, ẹkwoma eruo utho kpobi nọ uyero mai o kẹ uvẹ riẹ