Me Du Oma Họ Iruo Evaọ Ukoko Jihova

Ikuigbe Vernon Zubko

AYỌRỌ omẹ evaọ ọko nọ ahwo a je jo kporo idhu nọ o kẹle iwhre nọ a re se Stenen evaọ ubrotọ Saskatchewan, evaọ Canada. Ọsẹgboni mẹ, Fred avọ Adella a je ru iruo gaga re a ruẹ nọ a ru ẹgwọlọ abọ-ẹzi gbe ọrọ abọ-iwo mai emọ na gba—mẹ, oniọvo-ọmọtẹ ọkpako mẹ nọ a re se Aurellia gbe inievo emaha mẹ nọ a re se Alvin, Allegra, gbe Daryl. Rite inẹnẹ ma gbe wo ovuhumuo kẹ ọsẹgboni mai fiki uzẹme na nọ a ro wuhrẹ omai.

Ọsẹ mai, nọ ọ rrọ okpodhiwu, ọ jọ ọtausiuwoma nọ ọ kare ozodhẹ. Ọ jọ ọgba-iruo, yọ evaọ oke ovona ọ jẹ hai ru ahwo kpobi riẹ inọ ọye yọ omọvo Isẹri Jihova. Ẹsikpobi ọ jẹ hai se isẹri kpahe uzẹme na. Uduowha gbe ajọwha riẹ evaọ iruo Uvie na e rẹ thọrọ omẹ ẹro ho. Ẹsibuobu ọ jẹ hae vuẹ omẹ nọ, “Jọ owhreze evaọ iruo ukoko Jihova, u ti ru nọ ebẹbẹ buobu e te rọ thọ owhẹ wa.”

Kẹse kẹse ma jẹ hai kpohọ isẹri-ise iyẹrẹ evaọ iwhre Stenen gbe emewho nọ e kẹle riẹ. Onana o jẹ hae jọ bẹbẹ kẹ omẹ ẹsejọ. Otu nọ o re thuethu a jọ ewho yena kpobi, nọ e jẹ hae wọ bru omai emaha na ze te rehọ omai je ijewhẹ. Oware jọ o via ẹdẹjọ okenọ mẹ jọ ikpe eree, me dikihẹ ubiozọ jọ avọ emagazini Uwou-Eroro Na gbe Awake! nọ me kru họ obọ, kẹsena izoge jọ a te su wariẹ omẹ họ. A te fru etu ọkpokpọ nọ me kuhọ no omẹ uzou, jẹ rehọ iẹe hwa ehru umure jọ nọ o jọ etẹe. Oware nọ Ọghẹnẹ o re ru na, oniọvo jọ nọ ọ kpako no nọ o je muẹrohọ omẹ ọ ruẹ oware nọ o jẹ via na. Ọ tẹ nyaze jẹ nọ omẹ nọ, “Vern, eme ọ be via?” Emọ na e tẹ dhẹ. Dede nọ oware nọ o via na o kẹ omẹ idhọvẹ, u wuhrẹ omẹ inọ ohwo ọ tẹ rrọ isẹri-ise iyẹrẹ, u fo re ọ hai no oria ruọ oria ukpenọ o re mudhe oria ovo wọhọ ure. Eware yena nọ me wuhrẹ evaọ okenọ mẹ gbẹ jọ ọmaha na i fi obọ họ kẹ omẹ wo uduowha nọ a rẹ rọ ta usiuwoma n’uwou ruọ uwou.

Mẹ avọ Alvin, oniọvo mẹ, ma họ-ame evaọ May 1951. Ikpe ikpegbesa mẹ jọ oke yena. Mẹ gbẹ be kareghẹhọ inọ Brọda Jack Nathan nọ ọ kẹ ovuẹ ame-ọhọ na ọ ta udu họ omai awọ inọ ma jọ amara ọvuọvo o vo omai vievie he ababọ ẹme nọ ma rẹ ta kpahe Jihova kẹ amọfa. * Evaọ oke yena, uviuwou mai o rehọ iruo ọkobaro wọhọ utee nọ o mai woma nọ ohwo o re le. Fikiere, nọ me nwrotọ no isukulu no, mẹ tẹ kwa kpohọ ẹwho nọ a re se Winnipeg, Manitoba evaọ 1958, re mẹ jọ obei ru iruo ọkobaro. Dede nọ obọ nọ mẹ jẹ hai fihọ kẹ ọsẹ mẹ evaọ okọ ire ebẹrọ uviuwou mai na o jẹ hae were iẹe, ọyomariẹ avọ oni mẹ a tuduhọ omẹ awọ inọ mẹ ruọ iruo ọkobaro oke-kpobi, yọ a whobọhọ onya mẹ na.

 Uwou Okpokpọ avọ Ọrivẹ Ọkpokpọ

Evaọ 1959 uwou ogha u je zizie ohwo kpobi nọ ọ rẹ sai ru ere re ọ kwa kpohọ ubrotọ Quebec, oria nọ a jọ gwọlọ etausiuwoma gaga. Mẹ tẹ kwa kpohọ ẹwho Montreal. O jọ enwene ologbo kẹ omẹ. O jọ oware okpokpọ kẹ omẹ, kemena me je wuhrẹ epanọ a rẹ ta ẹvẹrẹ French gbe oghẹrẹ uzuazọ rai nọ u wo ohẹriẹ no omai gaga. Ọsẹro ọnyawariẹ mai ọ ta kẹ omẹ nọ, “Whọ ta vievie he inọ, ‘Enẹ ma re ru ei evaọ obọ ẹwho mẹ.’” Ohrẹ yena u fi obọ họ kẹ omẹ ziezi.—1 Kọr. 9:22, 23.

Ọkobaro ọfa ọ jọ kugbe omẹ hẹ nọ ma gbe je ru iruo na okenọ mẹ kwa kpohọ ubrotọ Quebec. Rekọ oniọvo-ọmọtẹ jọ nọ a re se Shirley Turcotte, ọnọ mẹ avọ iẹe ma riẹ oma no vẹre evaọ ẹwho Winnipeg, o te ti zihe ruọ ọrivẹ mẹ nọ ma rọo evaọ February 1961. Uviuwou nọ u you Jihova ziezi oye ọyomariẹ o no ze re. Dede na, mẹ riẹ evaọ oke yena ha inọ ọ te jọ obufihọ ulogbo kẹ omẹ evaọ abọ uduotahawọ gbe uketha nọ oke o be nyaharo na.

Usiuwoma Ota Nya Gaspé Duwu

Ikpe ivẹ nọ ma rọo no, a tẹ rehọ omẹ avọ aye mẹ mu ekobaro obọdẹ evaọ ẹwho Rimouski, Quebec. Evaọ ezi okpakpọ, uwou ogha o tẹ ta kẹ omai inọ ma kpohọ erẹ usiuwoma ota nya ẹkwotọ Gaspé duwu, onọ o rrọ akotọ unueri evaọ ofẹ ovatha-ọre Canada. Iruo mai họ re ma kọ ibi uzẹme na, te oghẹrẹ kpobi nọ o rẹ lọhọ te. (Ọtausi. 11:6) Ma tẹ kwa omoto mai vọ avọ emagazini odu ọvo (1,000) gbe enwenọ ebe egba ene (400), te emuore te iwu, ma tẹ ruọ edhere kẹ erẹ usiuwoma ota nọ o rehọ omai amara ọvo. Ma rọ oma totọ ta usiuwoma evaọ iwhre esese kpobi nọ e rrọ ẹkwotọ Gaspé. A jọ oria iredio ẹkwotọ na vẹvẹ ahwo unu inọ Isẹri Jihova a be ziọ ẹkwotọ na, a tẹ jẹ vuẹ ae inọ a rehọ ebe mai hi. Dede na, ibuobu ahwo na a wo otoriẹ owhowhovia na thọ, a je roro nọ a be jọ iredio na ta ewoma ebe mai, u te ru nọ a rọ rehọ ebe na.

Evaọ ikpe yena, ufuoma usiuwoma ota o jọ oware okpokpọ evaọ abọjọ Quebec, yọ ẹsibuobu iporisi e jẹ hae da omai ji nọ ma tẹ rrọ usiuwoma. Onana o via kẹ omai evaọ okpẹwho jọ nọ ahwo a jẹ jọ rehọ ebe mai evaọ enwenọ uwou kpobi. Alakpa jọ ọ ta kẹ omai nọ ma lele ie kpohọ ogege iporisi, ma te ru ere. Mẹ tẹ te ruẹ nọ elọya okpẹwho na ọye ọ ta nọ a whaha omai usiuwoma ota. Fikinọ ọga elakpa na ọ jariẹ ẹdẹ yena ha, mẹ tẹ kẹ elọya na ileta nọ a vi no uwou ogha Toronto ze nọ o ta kpahe udu nọ ma wo nọ ma sae rọ ta usiuwoma. Nọ elọya na o se ileta na no, ọ tẹ ta ẹsiẹvo nọ: “Iviena, mẹ gwọlọ ẹbẹbẹ ọvo ho. Orikogho ichọche ẹwho na ọye ọ ta kẹ omẹ nọ mẹ whaha owhai usiuwoma ota.” Fikinọ ma gwọlọ nọ ahwo ẹkwotọ na a vuhumu inọ uzi egọmeti o kẹ uvẹ kẹ iruo usiuwoma na, ma te zihe ababọ okioraha kpohọ oria nọ alakpa na ọ jọ whaha omai usiuwoma ota na, ma tẹ ruabọhọ usiuwoma na ota.

Okiokiọ riẹ nọ ma zihe nyae ruẹ ọga elakpa na, eva e dha riẹ gaga nọ o yo inọ a whaha omai usiuwoma ota. Alakpa na ọ jọ ifonu whọku elọya na gaga! Alakpa na ọ tẹ ta kẹ omai nọ oke kpobi nọ ma wo ẹbẹbẹ, joma se ọyomariẹ ovavo, inọ o ti fi obọ họ kẹ omai. Dede nọ mai yọ erara yọ ma re nwane riẹ ẹvẹrẹ French ẹta tere he, ma ruẹ nọ ahwo na a rrọ wowou yọ a re dede erara rehọ. Rekọ u je gbe omai unu inọ, ‘Kọ a te sae riẹ uzẹme na ẹdẹjọ?’ Ma ruẹ uyo onọ nana nọ ikpe jọ e ruemu no, okenọ ma ro zihe nyae bọ Egwa Uvie evaọ ẹkwotọ Gaspé. Ma ruẹ nọ ibuobu ahwo nọ ma ta usiuwoma kẹ na a zihe ruọ inievo mai no enẹna. Ginọ Jihova họ ọnọ o re ru ei rro.—1 Kọr. 3:6, 7.

Ma Wo Oghale Jọ

Ma yẹ Lisa, ọmọtẹ mai, evaọ 1970. Oghale nana nọ Jihova ọ kẹ omai na u fiba evawere mai. Mẹ, Shirley aye mẹ, gbe Lisa, ma wobọ evaọ ebabọ Egwa Uvie buobu. Nọ Lisa o nwrotọ no isukulu no, ọ ta nọ: “Mọmi, Dadi, nọ orọnọ fiki mẹ wha ro no iruo odibọgba oke-kpobi evaọ omoke jọ na, mẹ te daoma rọ vọ ẹta oke na ẹkwoma ẹruọ iruo ọkobaro.” Lisa o  ru iruo ọkobaro vrẹ ikpe 20, yọ enẹna ọyomariẹ avọ ọzae riẹ Sylvain a gbẹ rrọ iruo na. Aimava a wo uvẹ-ọghọ nọ a ro wobọ evaọ iruo ebabọ sa-sa wariẹ akpọ na họ. Wọhọ uviuwou, utee mai họ re ma yeri uzuazọ olọlọhọ jẹ rehọ oma kẹ iruo Jihova. Ẹme nọ Lisa ọ ta evaọ okenọ ọ rọ ruọ iruo ọkobaro o rẹ thọrọ omẹ ẹro ho. Ẹhẹ, ẹme yena u ru nọ mẹ rọ wariẹ ruọ odibọgba oke-kpobi na evaọ 2001, yọ mẹ gbẹ rrọ iruo ọkobaro na. Iruo ọkobaro na i gbe bi wuhrẹ omẹ epanọ me re ro fi eva họ Jihova evaọ oware kpobi, je yeri uzuazọ olọlọhọ nọ o vọ avọ evawere gbe evevọwẹ.

Iruo Ebabọ E Gwọlọ Uyoyou, Omaurokpotọ, gbe Ẹrọwọ

Jihova o wuhrẹ omẹ no inọ ma tẹ rehọ oma kẹ jẹ rọ unevaze rehọ iruo kpobi nọ ọ kẹ omai, ma re wo eghale buobu. Me rri rie fihọ uvẹ-ọghọ ulogbo nọ mẹ rọ rrọ omọvo Ogbẹgwae Ebabọ Ubrotọ je bi ru iruo kugbe inievo na evaọ ebabọ Egwa Uvie evaọ ubrotọ Quebec gbe eria efa.

Dede nọ inievo nana jọ nọ e fialoma via na a wo uvẹ-ọghọ nọ a rẹ rọ jọ obaro Ọgwa Uvie kẹ ovuẹ hẹ, a re lo wọhọ isi evaọ okenọ a tẹ be bọ Ọgwa Uvie. Inievo eghaghae nana a rọ udu kẹ iruo na, yọ onaa iruo rai u re dhesẹ oma via evaọ etoke ebabọ. Ẹsikpobi iyẹrẹ nọ i re no onana ze họ uwou uwowoma nọ a rẹ jọ gọ Jihova.

Ahwo jọ a nọ omẹ no inọ, “Iruemu aghae vẹ a rẹ mae gwọlọ evaọ oma ohwo nọ ọ gwọlọ fialoma via kẹ ebabọ Ọgwa Uvie?” Wọhọ epanọ me muẹrohọ, orọ ọsosuọ, o gwọlọ nọ ohwo na o re you Jihova avọ Ọmọ riẹ gbe inievo na. (1 Kọr. 16:14) Orọ avivẹ, o gwọlọ nọ o re wo omaurokpotọ gbe ẹrọwọ. Nọ eware e gbẹ be nya epanọ ma gwọlọ họ—yọ o rẹ ginẹ via ere ẹsejọ—ohwo nọ o wo omaurokpotọ ọ rẹ gbẹ nya lele ọruẹrẹfihotọ ukoko na. Ẹrọwọ ọ rẹ wọe fialoma via kẹ iruo ebabọ efa evaọ obaro.

Me Yere Jihova

Dede nọ ọsẹ mẹ o whu evaọ 1985, ohrẹ nọ ọ kẹ omẹ inọ mẹ jọ owhreze evaọ ukoko Jihova o rẹ thọrọ omẹ ẹro ho. Wọhọ idibo Jihova efa nọ i whu je kpohọ odhiwu no kẹ iruo nọ Ọghẹnẹ ọ kẹ rai, avro ọ riẹ hẹ inọ ọsẹ mẹ o wo iruo v’obọ evaọ obei. (Evia. 14:13) Obọnana, oni mẹ ọ rrọ ikpe udhone gbe ikpegbihrẹ. Fikinọ okie o kie rie, ọ gbẹ be sae ta ẹme wọhọ epaọ ọsosuọ họ; ghele na, ọ gbẹ riẹ eria Ebaibol sa-sa fihọ uzou. Evaọ ileta riẹ se omai, ọ rẹ wariẹ eme ikereakere sa-sa jẹ ta udu họ omai awọ inọ ma ruabọhọ gọ Jihova avọ ẹrọwọ. O be kẹ omai emọ na evawere gaga nọ ma ro wo ọsẹgboni oyoyou otiọye!

Me yere Jihova re kẹ Shirley, aye mẹ nọ ọ jọ ọrivẹ mẹ nọ ọ vọ avọ ẹrọwọ. Ọ be hai si ohrẹ nọ oni riẹ ọ kẹ riẹ te iroro ẹsikpobi inọ, “Vern o ti wo iruo buobu evaọ ukoko na, yọ o gwọlọ nọ who ti wuhrẹ epanọ whọ sai ro ru ei lọhọ kẹe wo uvẹ kẹ amọfa.” Nọ ma ruọ orọo ikpe udhuvẹ gbe izii nọ i kpemu, ma gba riẹ mu inọ ma te jọ kugbe rite oke owho, gọ Jihova; yọ otẹrọnọ ma zọ ruọ akpọ ọkpokpọ na, ma te wariẹ maha kugbe jẹ ruabọhọ egagọ Jihova bẹdẹ bẹdẹ. Ẹhẹ, ma ginẹ rrọ “owhreze iruo Ọnowo na.” (1 Kọr. 15:58) Jihova ọ be ginẹ rẹrote omai jẹ be ruẹ nọ oware uwoma ovo o kare omai hi.

[Oruvẹ-obotọ]

[Uwoho nọ o rrọ ẹwẹ-obe avọ 31]

“Wọhọ uviuwou, utee mai họ re ma yeri uzuazọ olọlọhọ jẹ rehọ oma kẹ iruo Jihova”