Enọ Ahwo nọ A s’Ebe

Jesu ọ ta kẹ ahwo nọ a jẹ gaviezọ kẹe nọ: “Epanọ Ọsẹ rai nọ ọ rọ obọ odhiwu ọ . . . gbunu, wha rẹ te gbunu re.” Oghẹrẹ vẹ ahwo-akpọ a sae rọ “gbunu” hayo jọ gbagba nẹnẹ?—Mat. 5:48.

Oware nọ u re fi obọ họ kẹ omai ruẹ uyo onọ nana họ, ewo otoriẹ oghẹrẹ nọ a rehọ eme na “gbunu” gbe “ẹgbagba” ro ruiruo evaọ Ebaibol na. Orọnikọ oware kpobi nọ a dhesẹ inọ o “gbunu” evaọ Ikereakere na u dhesẹ nọ o gba re he. Uzẹme, Jihova ọ gba re. Ahwo hayo eware e rẹ sae gba te umuo jọ. Ẹsibuobu, eme ọ ẹvẹrẹ Hibru gbe ọrọ Griki nọ a fa “gbunu” i dhesẹ epanọ oware o rẹ “gba unu,” oware nọ o “who te,” hayo “kare afuẹwẹ” rọwokugbe utee nọ a fihọ. A rẹ rehọ ẹme na ruiruo evaọ ẹmeọta ikẹdẹ kẹdẹ ro dhesẹ oware nọ o nyate utee nọ ahwo a rọwo fihọ. Wọhọ oriruo, ma rẹ sai dhesẹ ọka nọ ọ vọ ziezi inọ “ọka nọ ọ gbunu.”

Nọ a ma Adamu avọ Ivi, a gba evaọ abọ uruemu, abọ-ẹzi gbe ugboma. A jọ gbagba wọhọ epaọ utee Ọnọ ọ ma rai. Rekọ fiki aghẹmeeyo, a gbe te utee nana ha, a tẹ rọ enẹ ku ẹgbagba rai fiẹ, onọ u wholo emọ rai re. Enẹ uzioraha, sebaẹgba, gbe uwhu i ro no ẹkwoma Adamu te ahwo-akpọ kpobi.—Rom 5:12.

Rekọ wọhọ epanọ Jesu o ru rie vẹ evaọ Ovuẹ obọ Ugbehru na, makọ ahwo-akpọ sebaẹgba a rẹ sae gba te umuo jọ. Ọ jọ ovuẹ yena fodẹ utee orọ uyoyou ogbagba. Onana họ oghẹrẹ uyoyou nọ Ọghẹnẹ o wo kẹ ahwo-akpọ. Jesu ọ ta nọ: “You ewegrẹ rai lẹ kẹ enọ e be kẹ owhai uye. Re wha te jọ emezae Ọsẹ rai nọ ọ rọ obọ odhiwu; keme o bi ru ọre riẹ vatha ehru ahwo oyoma gbe ahwo owoma, o te [bi] vi oso ze ehru enọ i kiẹrẹe gbe enọ i kiẹrẹe he.” (Mat. 5:44, 45) Nọ ilele Jesu a te bi dhesẹ oghẹrẹ uyoyou utionana, yọ a be rọ aro kele oriruo ọgbagba Ọghẹnẹ.

Nẹnẹ, Isẹri Jihova wariẹ akpọ na họ a be daoma dhesẹ uyoyou utioye na kẹ amọfa. O rrọ isiuru rai re a fi obọ họ kẹ ahwo uyero kpobi, uyẹ, gbe egagọ kpobi re a wo eriariẹ egbagba erọ uzẹme Ebaibol na. Evaọ ekwotọ nọ i bu vi egba ivẹ gbe ọgba gbezeza (236), Isẹri na a bi ru uwuhrẹ Ebaibol kugbe ahwo nọ a bu vi ima ihrẹ (7,000,000) nọ i wo isiuru kpahe Ẹme Ọghẹnẹ.

Jesu ọ nọ inọ: “Wha te you otu nọ o you owhai, didi osaohwa wha wo? Makọ imiazọhọ dede a gbẹ rọ ere eruo ho? Wha te yere imoni rai ọvo, eme wha ro ru vi ahwo ọfa? Makọ ahwo Egedhọ dede a gbẹ rọ ere eruo ho?” (Mat. 5:46, 47) Ileleikristi uzẹme a rẹ rọ fiki oghẹrẹ isukulu nọ ahwo a nya hayo uyẹ nọ a no ze ro dhesẹ ọriẹwẹ kẹ otujọ siọ ejọ ba ha; yọ orọnọ ahwo nọ a rẹ sai ru zihe kẹ ae ọvo a re dhesẹ uyoyou kẹ hẹ. Ukpoye, a re fi obọ họ kẹ iyogbe, enọ e be mọ, emaha gbe ekpako-soso. Ẹkwoma ere oruo, Ileleikristi a rẹ sae raro kele uyoyou Jihova, rọ ere jọ gbagba evaọ abọ nana.

Kọ ma te sai te ẹgbagba nọ Adamu o kufiẹ na ẹdẹjọ? Ee, ẹkwoma ẹrọwọ nọ a re fihọ idhe ẹtanigbo Jesu, ahwo-akpọ nọ a bi yo ẹme kẹ Ọghẹnẹ a ti te ẹgbagba vọvọ evaọ otọ Esuo Odu-Ikpe Kristi na, okenọ ‘Ọmọ Ọghẹnẹ ọ te rọ raha iruo ukumuomu na.’—1 Jọn 3:8.