‘Iruo Riẹ I Lele i Rie’

THEODORE JARACZ, nọ ọ jọ omọvo Ugboma Esuo Isẹri Jihova o ku iruẹru otọakpọ riẹ họ evaọ ohiohiẹ Edesa-Oka, June 9, 2010. Ikpe 84 ọ kpako te, yọ o whu siọ aye riẹ nọ a gbẹ jọ orọo te ikpe 53 ba. Amọfa nọ o whu seba họ, oniọvo-ọmọtẹ ọkpako riẹ, kugbe ọmọzae gbe emetẹ ivẹ nọ oniọvo riẹ o yẹ.

A yẹ Brọda Jaracz evaọ September 28, 1925 evaọ ẹwho nọ a re se Pike County, Kentucky, U.S.A., yọ ọ họ-ame wọhọ oka omauromudhe riẹ kẹ Jihova nọ ọ jọ ikpe 15, evaọ August 10, 1941. Ikpe ivẹ nọ i lele i rie, nọ ọ jọ ikpe 17 ọ tẹ ruọ iruo ọkobaro oke-kpobi, owojẹ nọ o jọ emuhọ ọrọ uzuazọ odibọgba oke-kpobi riẹ nọ o joma rehọ ikpe 67.

Evaọ 1946, nọ ọ jọ ikpe 20, Brọda Jaracz o te kpohọ eklase avọ ihrẹ Isukulu Ebaibol ọ Giliad ọrọ Watchtower. Nọ o nwrotọ no isukulu na ze no, a te vi ei kpohọ iruo ọsẹro ọnyawariẹ evaọ ẹkwotọ Cleveland, Ohio evaọ America. Evaọ 1951, a tẹ kẹe owha-iruo ẹruorote uwou ogha Isẹri Jihova nọ o rrọ Australia. Obe-ẹgbukpe Isẹri Jihova orọ 1983 o niyẹrẹ inọ Brọda Jaracz “ọ jọ uduotahawọ ulogbo kẹ inievo nọ e jọ orẹwho na soso ẹkwoma ajọwha nọ ọ jẹ rọ kobaro evaọ usiuwoma ota gbe onọ ọ jẹ rọ ruẹ nọ iruẹru Uvie na e nya owowa.”

Nọ Brọda Jaracz o zihe kpobọ America no, ọ tẹ rọo Melita Lasko evaọ December 10, 1956. Nọ a nwane rọo no, a te vi ai kpohọ iruo ọsẹro ọnyawariẹ, a tẹ jẹ roma totọ gbodibo evaọ ibrotọ gbe ikogho nọ i ru abọ ologbo ọrọ orẹwho America. Evaọ ubrobọ ekuhọ ukpe 1974, a tẹ rehọ Brọda Jaracz mu wọhọ omọvo Ugboma Esuo Isẹri Jihova.

Ma te kareghẹhọ Brọda Jaracz ẹsikpobi wọhọ odibo Jihova nọ ọ roma kpobi kẹ jẹ dadamu usu riẹ kugbe Jihova, jẹ rọ ẹzi omarọkẹ kpobi tẹrovi iruo Uvie na. Ọ jọ ọzae uwou-orọo nọ o wo uyoyou gbe ẹzi ẹruọsa, gbe ohwo nọ ọ jọ gaga evaọ abọ-ẹzi, ọnọ ọ jẹ hae rọ isiuru amọfa karo. (1 Kọr. 13:4, 5) Isiuru nana e jẹ hai dhesẹ oma via ẹsikpobi evaọ ọdawẹ nọ o wo kẹ amọfa, onọ ọ jẹ hae rọ gwọlọ nọ a re-ohrọ ahwo jẹ rẹrote ai kpobi ẹrẹrẹ. U te no ere no, uyoyou nọ o rẹ hiẹ hẹ gbe ọdawẹ nọ o wo kẹ ahwo o jẹ hai dhesẹ oma via evaọ ajọwha nọ o wo kẹ iruo odibọgba na.

Dede nọ o da omai gaga inọ omọvo uviuwou Ebẹtẹle nana nọ o wo ẹzi iruo gaga na, ọnọ ahwo uviuwou Ebẹtẹle gbe inievo akpọ soso a you gaga na ọ va omai abọ, ẹzi omarọkẹ nọ Brọda Jaracz ọ rọ dadamu iruo odibọgba riẹ kẹ Jihova anwọ ikpe buobu ze na o kẹ omai evawere. Ma wo evaifihọ inọ ‘o kru ẹrọwọ riẹ ri bọwo ẹdẹ uwhu, je wo etu uvie uzuazọ na no.’ (Evia. 2:10) U mu omai ẹro re inọ ‘iruo riẹ i lele i rie.’—Evia. 14:13.