Jihova Ọ rẹ Gaviezọ Oviẹ Owhrori

WỌHỌ epanọ Solomọn, ovie owareghẹ Izrẹl oke anwae o muẹrohọ, “eware idudhe e rẹ via kẹ [omai] kpobi.” (Ọtausi. 9:11, NW) Oware okpẹtu hayo odawọ ogaga o rẹ sai kpomahọ uzuazọ mai yoyoma. Wọhọ oriruo, o rẹ kẹ ọkora gaga nọ ohwo uviuwou ohwo o te whu idudhe. Ekpoka gbe emerae nọ i lele i rie, ọkora gbe uweri e rẹ sae ga te epanọ i re ro mi ohwo iroro. Onana o rẹ sae ga te epanọ o re ro roro nọ o gbe te ohwo nọ ọ rẹ lẹ se Jihova ha.

Evaọ uyero utioye na, ohwo na ọ rẹ gwọlọ uduotahawọ, ororokẹ gbe uyoyou. Eme ọ ọso-ilezi nana e rẹ kẹ uduotahawọ: “ỌNOWO na ọ be yọrọ enọ i re kie, ọ vẹ jẹ kpare enọ e rọ oma kpotọ.” (Ol. 145:14) Ebaibol na e ta kẹ omai nọ “ibiaro ỌNOWO na e rẹ nya akpọ na re re o dhesẹ ẹgba riẹ rọ kẹ enọ i wo eva efuafo rọ kpahe iẸe.” (2 Irv. 16:9) Ọ rrọ “kugbe ahwo nọ a wo eva owhrori gbe ẹzi omaurokpotọ, re [ọ] jaja ẹzi enọ erọ omakpotọ jẹ jaja eva iruori.” (Aiz. 57:15) Ẹvẹ Jihova ọ be rọ rehọ uketha gbe omosasọ kẹ otu omaurokpotọ hayo iwhori nọ ọyawọ ọ rrọ oma?

“Ẹme nọ A rẹ Ta Evaọ Ẹruoke”

Edhere jọ nọ Jihova ọ rẹ rọ kẹ omai obufihọ ẹruoke họ, ẹkwoma inievo Ileleikristi na. A hrẹ Ileleikristi inọ a hae “ta udu họ enọ udu u re bro [hayo, enọ e rrọ ọkora] awọ.” (1 Tẹs. 5:14) Eme ọ ọdawẹ gbe uyoyou nọ i no obọ ibe Ileleikristi nọ i wo ẹwo ze e rẹ sai ru udu kie ohwo vi nọ ọ tẹ rrọ otọ ọyawọ hayo uweri. Ẹme uduotahawọ kpẹkpẹe dede ọ rẹ sae rọ uduotahawọ kẹ ohwo nọ udu u whrehe no. Ẹsejọhọ, ẹme ororokẹ otiọye na ọ rẹ sai no obọ ohwo nọ ọ ruẹ uye ọkpọ edada evona no ze. Hayo o sae jọ eme orimuo erọ ogbẹnyusu nọ ọ rọ ẹro ruẹ eware buobu no evaọ uzuazọ. Jihova ọ rẹ sae rọ idhere itiena sasa ohwo nọ ọ rrọ otọ ọyawọ oma.

Roro kpahe Alex, ọkpako ukoko nọ ọ rọo no obọ, ọnọ ẹyao nọ o wo ifue he o mi aye kpe. Ọsẹro ọnyawariẹ jọ nọ o wo ọdawẹ gaga ọ gba riẹ mu inọ ọ rẹ ta eme uduotahawọ kẹ Alex. Aye o whu ku ọsẹro ọnyawariẹ na oke nọ u kpemu, rekọ ọ wariẹ rọo no. Ọsẹro ọnyawariẹ na ọ ta epanọ uwhu aye riẹ na o kẹ riẹ idhọvẹ te. Ọ ta inọ udu o jẹ hai kiei vi nọ ọ tẹ rrọ kugbe inievo efa evaọ odibọgba na gbe evaọ obọ iwuhrẹ. Rekinọ ọ tẹ ruọ uwou jẹ kare ẹthẹ gboma no, ọkora ọ vẹ dae oma fia. Alex ọ ta nọ:  “Me kuẹwẹ nọ mẹ riẹ inọ kpakọ ọkora mẹ na o rrọ oware aghẹruẹ hẹ, amọfa a wo oghẹrẹ edada itienana no re.” Avro ọ riẹ hẹ, “ẹme nọ a rẹ ta evaọ ẹruoke” o rẹ sae kẹ omosasọ evaọ etoke edada.—Itẹ 15:23.

Oma o wọ ọkpako ukoko Oleleikristi ọfa jọ nọ ọ riẹ ahwo buobu nọ ọrivẹ-orọo o whu ku no ta ẹme uduotahawọ kẹ Alex re. Avọ ọdawẹ gbe ẹwo, ọ ta kẹ Alex inọ Jihova ọ riẹ epanọ oware o da omai te gbe ẹgwọlọ mai. O fibae nọ: “Otẹrọnọ evaọ obaro whọ ruẹ nọ whọ gwọlọ ọrivẹ-orọo, ọwariẹ-rọo yọ ọruẹrẹfihotọ oyoyou Jihova nọ uvẹ riẹ u rovie fihọ.” Uzẹme, orọnikọ ohwo kpobi nọ ọrivẹ-orọo o whu ku, nọ ọ gwọlọ wariẹ rọo o wo uvẹ nọ ọ sae rọ wariẹ rọo ho. Rekọ nọ Alex o roro kpahe ẹme oniọvo na, ọ tẹ ta nọ, “Re a kareghẹhọ owhẹ inọ onana yọ ọruẹrẹfihotọ Jihova u re fi obọ họ kẹ owhẹ whaha iroro obrukpe inọ whọ tẹ rọo omọfa evaọ obaro kiyọ who bi gbabọkẹ eyaa orọo ra avọ ọrivẹ ra hayo ọruẹrẹfihotọ Jihova kpahe orọo.”—1 Kọr. 7:8, 9, 39.

Devidi ọso-ilezi na, nọ ọ rọ ẹro ruẹ ebẹbẹ gbe edawọ buobu ọ ta nọ: “Ibiaro ỌNOWO i bi ri ikiẹrẹe, ezọ riẹ i bi yo eviẹ rai.” (Ol. 34:15) Evaọ uzẹme, Jihova ọ rẹ sae rọ eme orimuo erọ ibe Ileleikristi nọ e kpako ziezi je wo ọdawẹ rọ kuyo olẹ owhrori evaọ ẹruoke. Ọruẹrẹfihotọ Jihova yena o re fi obọ họ gaga.

Obufihọ Rono Iwuhrẹ Ukoko Ileleikristi Ze

Ohwo nọ ọkora ọ rrọ oma ọ rẹ sai wo eriwo ọthọthọ kpahe omariẹ nọ u re ru nọ o re ro si oma no ahwo. Dede na obe Itẹ 18:1 o kẹ unuovẹvẹ inọ: “Ọnọ ọ hẹriẹ oma ọ gwọlọ nọ ọye ọvo ọ rẹ jọ, re o mukpahe oziẹ okiẹrẹe kpobi.” Alex ọ ta nọ: “Nọ ọrivẹ-orọo o te whu ku owhẹ, iroro obrukpe e rẹ vọ owhẹ udu.” Alex ọ kareghẹhọ inọ ọ jẹ hae nọ omariẹ nọ: “’Kọ u wo oware ofa jọ nọ mẹ hai ru? Kọ mẹ hae daoma gbe dhesẹ ororokẹ gbe orimuo viere?’ Mẹ gbẹ gwọlọ nọ mẹ rẹ jọ goli hi. Mẹ gwọlọ jọ ababọ ọrivẹ hẹ. O rrọ bẹbẹ re ohwo ọ whaha iroro  itienana keme kẹdẹ kẹdẹ whọ rẹ kareghẹhọ inọ whọ rrọ goli.”

Oware nọ ohwo nọ ọkora ọ da oma fia ọ mae gwọlọ kpobi họ, omakugbe amọfa nọ o rẹ kẹ ọbọga. A rẹ jọ iwuhrẹ Ileleikristi wo onana t’obọ ziezi. Ma rẹ jọ iwuhrẹ nana gaviezọ kẹ eme Ọghẹnẹ nọ e rẹ kẹ uduotahawọ gbe ọbọga.

Iwuhrẹ Ileleikristi i re fi obọ họ kẹ omai wo eriwo owowa kpahe uyero mai. Nọ ma be gaviezọ je roro kpahe eria Ebaibol nọ a bi se na, u re ru omai tẹrovi ugogo avro nọ ọ mai wuzou kpaobọ na—ẹkpare kpehru esuo Jihova gbe erufuọ odẹ riẹ—orọnikọ ebẹbẹ mai ọvo ho. Ofariẹ, etoke yena nọ ma be rọ gaviezọ kẹ uwuhrẹ abọ-ẹzi na, ma re wo ọbọga nọ ma rọ riẹ inọ o tẹ make rọnọ amọfa a riẹ ẹbẹbẹ nọ ma rẹriẹ ovao dhe he hayo epanọ oware jọ o be kẹ omai uye te he, Jihova ọ riẹ. Ọ riẹ inọ “eva nọ i wo uweri e rẹ lọhọ ẹzi oma.” (Itẹ 15:13) Ọghẹnẹ uzẹme na ọ gwọlọ fi obọ họ kẹ omai, imuẹro nana e rẹ kẹ omai ajọwha gbe ẹgba thihakọ.—Ol. 27:14.

Nọ ewegrẹ a rọ suẹe, Devidi ovie na o bo se Ọghẹnẹ nọ: ‘Oma o rrọ ẹzi mẹ no; iroro udu mẹ e raha no.’ (Ol. 143:4) Uye ogaga u te te ohwo, u re mi ohwo ẹgba gbe iroro, tube si udu no ohwo awọ. Ẹsejọ odawọ o sae jọ orọ ẹyao ọgaga hayo ẹyao nọ o kru ohwo fihọ otọ. Dede na, o rẹ sai mu omai ẹro inọ Jihova o ti fi obọ họ kẹ omai thihakọ. (Ol. 41:1-3) Dede nọ Ọghẹnẹ ọ rẹ rọ edhere igbunu tọlọ ẹyao no omai oma nẹnẹ hẹ, ọ rẹ kẹ ohwo nọ ọ be mọ areghẹ gbe ẹgba nọ o re ro thihakọ. Kareghẹhọ nọ okenọ ebẹbẹ i si nyẹ Devidi, o bo se Jihova. Ọ ta nọ, “Me . . . roro eware no who ru no; me te wo awere kẹ iruo nọ abọ ra o ru.”—Ol. 143:5.

Eme nana nọ ma rẹ ruẹ evaọ Ẹme Ọghẹnẹ nọ o gie ẹwolẹ ku na u dhesẹ nọ Jihova ọ riẹ edada mai. Eme yena e kẹ imuẹro inọ ọ be gaviezọ kẹ elẹ mai. Ma tẹ rẹroso Jihova, ‘o re ti fiobọhọ kẹ omai.’—Ol. 55:22.

“He Dhe Ẹlẹlẹ”

Obe Jemis 4:8 o ta nọ: “Bigba Ọghẹnẹ o re ti bigba owhẹ.” Edhere jọ nọ ma re ro bigba Ọghẹnẹ họ ẹkwoma olẹ. Pọl ukọ na ọ ta udu họ omai awọ nọ ma “he dhe ẹlẹlẹ.” (1 Tẹs. 5:17) O tẹ make rrọ bẹbẹ re ma riẹ onọ ma rẹ ta evaọ olẹ, “ẹzi na ọvo ọ rọ omai ẹ lẹ kẹ, avọ imidio nọ a sae ta ha.” (Rom 8:26, 27) Jihova ọ riẹ epanọ o rrọ omai oma.

Aye jọ nọ a re se Monika, ọnọ o wo usu okpekpe utioye kugbe Jihova, ọ ta nọ: “Ẹkwoma olẹ, isase Ebaibol, gbe uwuhrẹ omobọ ohwo, Jihova o zihe ruọ Ogbẹnyusu nọ ọ mae kpekpe omẹ oma no. Usu mẹ kugbei u mu omẹ ẹro te epanọ mẹ be rọ ruẹ iruo abọ riẹ evaọ uzuazọ mẹ ẹsikpobi. O rrọ oware omosasọ nọ mẹ rọ riẹ inọ mẹ gbẹ make be sae ta epanọ oware o rrọ omẹ oma dẹẹ hẹ, ọ riẹ oware nọ o be da omẹ. Mẹ riẹ nọ uyoyou-ẹwo gbe eghale riẹ e basa ha.”

Fikiere, oghẹrẹ kpobi nọ o rrọ, joma jẹ eme uyoyou gbe uduotahawọ ibe Ileleikristi mai rehọ, fi ehrẹ iwoma gbe eme ọbọga nọ ma be hai yo evaọ iwuhrẹ Ileleikristi họ iruo, jẹ hai horie eva mai kẹ Jihova evaọ olẹ. Eware iwoma nana nọ Jihova ọ be hae kẹ omai evaọ ẹruoke na yọ edhere nọ o bi ro dhesẹ kẹ omai inọ o you omai. Fikinọ o wo erere otiọna no, Alex ọ ta nọ, “Ma te bi ru ẹkabọ mai ẹkwoma eroruiruo eruẹrẹfihotọ kpobi nọ Jihova Ọghẹnẹ ọ be rọ bọ omai ga evaọ abọ-ẹzi, ma ti wo ‘ogaga ulogbo nọ othesiwa’ nọ ma re ro thihakọ odawọ kpobi.”—2 Kọr. 4:7.

[Ẹkpẹti/Uwoho nọ o rrọ ẹwẹ-obe avọ 18]

Omosasọ kẹ Owhrori

Obe ilezi o vọ avọ eme nọ i dhesẹ edada gbe idhọvẹ ohwo-akpọ sa-sa, kugbe eme imuẹro buobu nọ i dhesẹ nọ Jihova ọ rẹ gaviezọ oviẹ owhrori nọ idhọvẹ akpọ i si nyẹ. Roro kpahe ilezi nana:

“Eva ẹbẹbẹ mẹ me bo se ỌNOWO; mẹ tẹ viẹ kẹ Ọghẹnẹ mẹ, re o fiobọhọ kẹ omẹ. Ọ jọ eva uwou egagọ-ode riẹ yo uru mẹ, o yo oviẹ mẹ re.”—Ol. 18:6.

“ỌNOWO ọ kẹle enọ i wo eva owhrori, o [re] siwi enọ a nwẹ eva ẹzi.”—Ol. 34:18.

“[Jihova o re] siwi enọ eva rai e raha, ọ [rẹ] gba emela rai.”—Ol. 147:3.

[Uwoho nọ o rrọ ẹwẹ-obe avọ 17]

“Ẹme nọ a rẹ ta evaọ ẹruoke” ọ rẹ kẹ omosasọ evaọ oke uye!