‘Joma Rehọ Idhe ỌNOWO na Ze’

NỌ OHWO o te ru ewoma kẹ owhẹ, oghẹrẹ vẹ who re ro dhesẹ edẹro ra? Roro kpahe oghẹrẹ nọ iletu-ẹmo Izrẹl a ro dhesẹ edẹro rai nọ a lele ahwo Midia fi ẹmo te uwou no. A kpohọ ẹmo na okenọ emọ Izrẹl a raha uzi no ẹkwoma abọ owo evaọ egagọ Ebale obọ Piọ. Ọghẹnẹ ọ kẹ ahwo riẹ obokparọ, a tẹ ghale eware nọ a kwa no ẹmo na ze kẹ egbaẹmo idu ikpegbivẹ (12,000) gbe ahwo Izrẹl nọ a kiọkọ kpobi. Wọhọ epanọ Jihova ọ ta kẹ ae, egbaẹmo na a rehọ abọjọ ekwakwa nọ i te rai kẹ izerẹ na, emọ Izrẹl nọ i kiọkọ a tẹ rehọ abọjọ enọ i te rai kẹ ahwo Livai.—Ik. 31:1-5, 25-30.

Dede na, iletu-ẹmo na a gwọlọ ru vrẹ ere. A ta kẹ Mosis nọ: “Idibo ra a kele ahwo ẹmo, nọ ma bi suẹ, ohwo ọvuọvo o vru no udevie mai hi.” Fikiere a tẹ rehọ igoru gbe emero sa-sa ru akpẹwẹ kẹ Jihova. Igoru nọ a ro ru akpẹwẹ na kpobi e gbẹdẹ te oware wọhọ ekpa isimeti ene.—Ik. 31:49-54.

 Nẹnẹ, oma o be wọ ahwo buobu dhesẹ edẹro kẹ eware nọ Jihova o ru kẹ ai no re. Ofariẹ, orọnikọ idibo Ọghẹnẹ nọ e roma mudhe kẹe no ọvo a bi dhesẹ oghẹrẹ edẹro itieye na ha. Muẹrohọ oriruo edraeva jọ nọ ọ wọ inievo jọ kpohọ afe-ughe nọ a jẹ jọ ru okokohọ akpọ-soso evaọ Bologna, Itali, evaọ 2009 jẹ wọ ae kpozi. Fikinọ ọ jẹ dhẹ omoto na dẹdẹ avọ ẹzi omaurokpotọ, inievo nọ e haya omoto riẹ na a te kere ekade uyere kẹe je fi ugho jọ ba kẹe avọ obe na Eme Ebaibol na O Gine Wuhrẹ? wọhọ onọ a ro yere iei. Edraeva na ọ tẹ kpahe kẹ ae nọ: “Mẹ be rehọ obe gbe ekade na avọ evawere, rekọ me bi zihe ugho na kẹ owhai keme mẹ gwọlọ rehọ iẹe ru unevaze kẹ owhai re wha rọ ruabọhọ iruo nọ wha bi ru na. Dede nọ mẹ rrọ omọvo Isẹri Jihova ha, mẹ gwọlọ ru unevaze nana keme mẹ ruẹ nọ uyoyou o be wọ owhai ru iruo nọ wha bi ru na.”

Whọ tẹ gwọlọ dhesẹ edẹro kẹ eware nọ Jihova o ru kẹ owhẹ no, unevaze nọ who re ru kẹ iruo akpọ-soso Isẹri Jihova yọ edhere jọ nọ who re ro ru onana. (Mat. 24:14) Idhere nọ otujọ a bi ro ru unevaze e rrọ ẹkpẹti na.

[Ẹkpẹti nọ ọ rrọ ẹwẹ-obe avọ 20, 21]

IDHERE NỌ OTUJỌ A BI RO RU AZỌHỌ UNEVAZE

AZỌHỌ UNEVAZE KẸ IRUO AKPỌ-SOSO

Ahwo buobu a wo omaa unuigho jọ nọ a re ro ru azọhọ unevaze fihọ ẹkpẹti nọ a kpoka họ nnọ “Iruo Akpọ-Soso.”

Kamara kamara, ikoko i re vi igho nọ a jọ ekpẹti nana ruẹ se uwou ogha Isẹri Jihova nọ o be rẹrote iruẹru orẹwho na. Ohwo ọ rẹ sai je vi azọhọ unevaze ovavo se uwou ogha Isẹri Jihova nọ o rrọ orẹwho riẹ. Ohwo nọ o bi vi echẹke o re kere fihọ iẹe inọ a hwa ugho na kẹ “Watch Tower.” A rẹ sae jẹ zọhọ ifiare hayo oghẹrẹ eware eghaghae itieye na efa. Ohwo nọ ọ zọhọ eware itieye na o re kere obe-ovuẹ okpẹkpẹe lele eware itieye na onọ u re dhesẹ inọ onana yọ ẹkẹ unevaze riẹ.

IDHERE SA-SA NỌ A SAI RO RU AZỌHỌ UNEVAZE

U te no ugho nọ a re ro ru azọhọ unevaze no, idhere efa e riẹ nọ a re ro ru azọhọ unevaze nọ a rẹ rọ wha iruo Uvie na haro evaọ akpọ-soso. Usu rai họ:

Insurance [Azọhọ kẹ Okpẹtu Idudhe]: Ahwo jọ a rẹ hwa igho fihọ ekọmpene Ishọranse n’oke t’oke re a te whu ekọmpene na e vẹ hwa unuigho nọ a ta mu kẹ ohwo nọ a kere nọ a hwa igho na kẹ. Ahwo jọ a rẹ sai kere inọ a hwa igho na kẹ Watch Tower. Amọfa a rẹ sai je kere inọ a hwa igho arutẹriọ rai kẹ Watch Tower.

Igho nọ A Fihọ Ebanke: Ahwo jọ a re kere inọ a te whu a hwa igho jọ nọ a wo fihọ ebanke hayo erere nọ o bi no igho rai jọ ze kẹ Watch Tower.

Shares, Debentures Stocks, and Bonds: Ahwo jọ a rẹ jẹ igho fihọ ebanke, ekọmpene, hayo iruẹru egọmeti jọ nọ ebanke hayo ekọmpene itieye a re kugbe rọ thueki rai, a ve kere inọ a hwa erere nọ o ti te ai kẹ Watch Tower hayo a rẹ sae ta inọ a hwa erere rai kẹ Watch Tower Bible and Tract Society of Pennsylvania nọ uwhu u te kpe ai.

Etọ Hayo Iwou: A rẹ sae zọhọ etọ hayo iwou nọ a rẹ sae zẹ; kpahe otọ nọ a bọ iwou fihọ no, ohwo ọ rẹ sae rehọ iwou na ru azọhọ kẹ ukoko na ọ vẹ nya siọ ofẹ nọ ọ gwọlọ rria ba bẹsenọ o re whu, o je whu no a vẹ rehọ uwou nọ ọ jẹ rria na kugbe. Re whọ tẹ te whobọhọ obe jọ inọ whọ gwọlọ rehọ uwou hayo otọ ra jọ ru azọhọ kẹ iruo akpọ-soso na, whọ rẹ jọ uwou ogha riẹ tao.

Obe Uku-Oghale gbe Oware nọ A Rọ Kẹ Ohwo Kru: Ohwo ọ rẹ sai kere inọ o te whu no a rehọ igho hayo ekwakwa riẹ jọ kẹ Watch Tower.

Ẹme na “idhere sa-sa nọ a sai ro ru azọhọ unevaze” u dhesẹ inọ oghẹrẹ azọhọ unevaze itienana o gwọlọ nnọ ohwo o re roro iei te.

Rọkẹ evuẹ efa, whọ rẹ sae rehọ adrẹse nọ ọ rrọ obotọ na kere se Uwou Ogha Isẹri Jihova nọ o rrọ Nigeria hayo rehọ ifonu lele ai t’ẹme hayo kere se uwou ogha nọ o rrọ orẹwho ra.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: 07080662020