Wo Ajọwha Kẹ Egagọ Uzẹme
Wo Ajọwha Kẹ Egagọ Uzẹme
“Ivuẹvu na i ghine bu, rekọ iruiruo e rẹ kakao.”—MAT. 9:37.
1. Ẹvẹ who re dhesẹ oware nọ o kpata?
WHỌ be rọ omoto wọ aye nọ eva-eyẹ e be da kpohọ ẹsipito. Ẹvẹ whọ rẹ dhẹ omoto na? Whọ rẹ dhẹ vẹrẹ vẹrẹ. Who bi kpohọ oria jọ nọ u wuzou gaga, rekọ oke o be va owhẹ abọ no. Kọ eme who re ru? Who re siawọ vẹrẹ vẹrẹ! Ẹhẹ, whọ tẹ gwọlọ ru oware jọ nọ u wuzou gaga yọ oke o be va owhẹ abọ no, oma o rẹ kpakpa owhẹ. Oghẹrẹ ẹgba jọ ọ rẹ ruọ owhẹ oma, whọ vẹ dawo ẹgba ra kpobi re whọ sai ru oware na gba. Enẹ oware nọ o kpata o rrọ!
2. Iruo vẹ e mae kpata kẹ Ileleikristi uzẹme nẹnẹ?
2 Iruo nọ e mae kpata kẹ Ileleikristi uzẹme nẹnẹ họ ẹta usiuwoma Uvie na gbe ilele nọ a re ru evaọ erẹwho na kpobi. (Mat. 24:14; 28:19, 20) Mak, olele na, ọ wariẹ eme ọ Jesu nọ ọ ta nnọ usiuwoma na a rẹ “kake vuẹ,” koyehọ, taure urere na o tẹ te ze. (Mak 13:10) Yọ ere u fo inọ o rẹ ginẹ jọ. Jesu ọ ta nọ: “Ivuẹvu na i ghine bu, rekọ iruiruo e rẹ kakao.” A rẹ raha oke ivuẹvu hu; ivuẹvu na i re kuhọ no re ezi na ọ tẹ te vrẹ.—Mat. 9:37.
3. Eme inievo buobu a ru no fiki ẹkpata usiuwoma na?
3 Fikinọ ma rri iruo usiuwoma ota na wuzou gaga, ma rẹ rọ oke gbe ẹgba mai kpobi kẹ iruo na. U woma gaga inọ ere inievo mai buobu a bi ru. Ejọ i ru uzuazọ rai lọhọ no re a jọ ekobaro, imishọnare, hayo re a ru iruo evaọ Ebẹtẹle. Iruo i bu rai abọ gaga. Ẹsejọhọ a kpairoro vrẹ eware buobu no, a te je wo use-abọ sa-sa. Ghele na, Jihova ọ be ghale ae ziezi. Ma ghọghọ kẹ ae. (Se Luk 18:28-30.) Dede nọ inievo jọ a be sai ru iruo ọkobaro ho, a be dawo ẹgba rai kpobi evaọ usiuwoma ota na, onọ u kugbe emọ rai nọ a bi fi obọ họ kẹ re a ruẹsi wo esiwo.—Izie. 6:6, 7.
4. Fikieme otujọ a gbẹ be rọ ta usiuwoma na kpata kpata ha?
4 Wọhọ epanọ ma ruẹ no na, iruo nọ e rrọ kpata kpata i wo umuo oke nọ a re ro ru ai. Oke urere na ma be rria na, yọ eme Ebaibol gbe eware nọ e be jọ akpọ via i dhesẹ onana. (Mat. 24:3, 33; 2 Tim. 3:1-5) Ghele na, ohwo ọvo ọ riẹ uzedhe oke nọ urere na o te rọ ze he. Nọ ọ jẹ fodẹ “oka” nọ u ti dhesẹ inọ “urere akpọ na” o kẹle no, Jesu ọ ta nọ: “Rekọ ẹdẹ ọyena gbe oke oyena ohwo ọvo ọ riẹ hẹ, makọ ikọ nọ e rọ obọ odhiwu, hayo Ọmọ dede, rekọ Ọsẹ na ọvo.” (Mat. 24:36) Fikinọ ma riẹ ẹdẹ na ha, o rẹ jọ bẹbẹ kẹ otujọ re a ruabọhọ usiuwoma na nọ a rẹ ta kpata kpata, maero otẹrọnọ u kri no nọ a be rọ tae. (Itẹ 13:12) Kọ o be hae jọ ere k’owhẹ ẹsejọ? Eme ọ rẹ sai fi obọ họ kẹ omai rọ ẹkpata ruabọhọ iruo nọ Jihova Ọghẹnẹ avọ Jesu Kristi a kẹ omai nẹnẹ?
Roro Kpahe Oriwiruo Mai, Jesu
5. Ẹvẹ Jesu o ro dhesẹ inọ ọ riẹ nnọ iruo usiuwoma ota na e rrọ kpata kpata?
5 Jesu Kristi họ ọnọ ọ mai ru iruo Ọghẹnẹ kpata kpata. Oware jọ nọ o wha onana ze họ iruo e jariẹ obọ buobu, yọ ikpe esa gbe ubro ọvo o wo. Rekọ iruo nọ Jesu o ru evaọ etoke yena e vrẹ enọ ohwo-akpọ jọ o ru no. O dhesẹ odẹ gbe ẹjiroro Ọsẹ riẹ via kẹ amọfa, o whowho emamọ usi Uvie na, ọ fere eviẹhọ gbe iwuhrẹ erue erọ isu egagọ na via, ọ tẹ jẹ kpare esuo Jihova kpehru makọ rite uwhu. Ọ jẹ rọ ẹgba riẹ kpobi nya ẹkwotọ na duwu, je wuhrẹ ahwo, fi obọ họ kẹ ae, je siwi enọ e jẹ mọ. (Mat. 9:35) Ohwo ọvo nọ o ru iruo tere no evaọ omoke utioye ọ rrọ họ. Jesu ọ rọ udu riẹ kpobi dhe iruo na.—Jọn 18:37.
6. Eme Jesu ọ rọ karo evaọ uzuazọ?
6 Eme ọ wọ Jesu rọ udu dhe iruo odibọgba na? Jesu ọ jọ eruẹaruẹ Daniẹl riẹ epanọ ọ te ta usiuwoma na kri te. (Dan. 9:27) Fikiere, wọhọ epanọ ma ta no na, odibọgba otọakpọ riẹ u ti kuhọ “eva abọvo ẹkpoka na,” hayo evaọ ikpe esa gbe ubro. Nọ ọ nwane dhẹ eketekete ruọ Jerusalẹm no evaọ ezi okpakpọ ukpe 33 C.E., Jesu ọ ta nọ: “Okenọ a rẹ rọ kẹ Ọmọ ohwo oro, u te no.” (Jọn 12:23) Dede nọ Jesu ọ riẹ inọ uwhu riẹ o kẹle no, orọnikọ fiki onana ọ jẹ rọ rehọ ajọwha ta usiuwoma na ha. Ukpoye, ọ jẹ rehọ uvẹ kpobi ru oreva Ọsẹ riẹ je dhesẹ uyoyou kẹ amọfa. Uyoyou yena o wọ riẹ salọ ilele, wuhrẹ ai, je vi ai kpohọ usiuwoma ota. O ru ere re a sae ruabọhọ iruo nọ o muhọ na yọ a ti ru iruo nọ e rro vi enọ o ru.—Se Jọn 14:12.
7, 8. Eme ilele Jesu a vuhumu okenọ o ru etẹmpol na fo, kọ fikieme Jesu o ro ru ere?
7 Oware jọ nọ o via evaọ uzuazọ Jesu u dhesẹ inọ o gine wo ajọwha. Oware na o via evaọ obọ emuhọ odibọgba riẹ, evaọ ezi ehaa Ọnyavrẹ ọrọ ukpe 30 C.E. Jesu avọ ilele riẹ a ziọ Jerusalẹm a tẹ jọ etẹmpol na ruẹ “enọ e be zẹ iruẹ gbe igodẹ gbe irueruẹ, gbe inwene-igho nọ e keria.” Eme Jesu o ru, kọ eme onana o kareghẹhọ ilele riẹ?—Se Jọn 2:13-17.
8 Oware nọ Jesu ọ jọ etẹe ru gbe eme nọ ọ ta e kareghẹhọ ilele na eme ọ olezi Devidi jọ inọ: “Oriori uwou ra ọ re omẹ re.” (Ol. 69:9) Fikieme? Keme oware nọ Jesu o ru na o rẹ sae wha uwhu sei. Eki nọ ehreki a jẹ jọ etẹmpol na tho o jẹ wha ugho se izerẹ, ikere-ebe, gbe amọfa nọ i wuzou evaọ etẹmpol na. Fikinọ Jesu ọ raha ekọ ku ai, o ru oma riẹ họ ọwegrẹ isu egagọ na. Wọhọ epanọ ilele Jesu a vuhumu gbagba na, ‘oriori kẹ uwou Ọghẹnẹ,’ hayo ọwhọ nọ o wo kẹ egagọ efuafo, u dhesẹ oma via. Rekọ eme u dhesẹ re ohwo o wo oriori, hayo ọwhọ kẹ iruo? Kọ ohẹriẹ jọ o rrọ onana avọ iruo nọ a re ru kpata kpata?
Ohẹriẹ nọ O Rrọ Ẹkpata gbe Ọwhọ
9. Eme họ ọwhọ?
9 Obe jọ u dhesẹ ọwhọ wọhọ ẹzẹ hayo ajọwha nọ a re ro ru oware. A rẹ sae ginẹ rehọ eme yena dhesẹ odibọgba Jesu. Enẹ Olezi 69:9 o se evaọ Ebaibol ọ Today’s English Version: “O Ọghẹnẹ, ọwhọ nọ me wo kẹ uwou ra o be jọ eva mẹ tua wọhọ erae.” Evaọ evẹrẹ jọ, ẹme nọ a wo kẹ “ọwhọ” u wo abava nọ otofa riẹ o rrọ “udu ororo,” wọhọ ẹsenọ udu na o be to. Agbẹta nọ ilele na a rọ kareghẹhọ eme ọ Devidi na nọ a ruẹ oware nọ Jesu o ru eva etẹmpol na. Rekọ eme o koko erae họ Jesu udu, wọhọ odẹme, onọ o wọ riẹ le ehreki na no etẹmpol na?
10. Wọhọ epanọ a jọ Ebaibol dhesẹ iẹe, eme họ “oriori” hayo ọwhọ?
10 Ẹme na “oriori” hayo ọwhọ nọ ọ rrọ olezi nọ Devidi o kere na a rehọ e riẹ no ẹme Hibru ze nọ a fa ẹsibuobu wọhọ “ihri” evaọ eria efa Ebaibol na. Ebaibol Isoko e fa ẹme nana “ọre-ihri.” (Se Ọnyano 20:5; 34:14; Joshua 24:19.) Obe jọ o ta kpahe ẹme nana nọ: “A rẹ rehọ iẹe dhesẹ usu ọzae avọ aye nọ a rrọ orọo . . . Wọhọ epanọ ihri-eriọ e rẹ lẹliẹ ọzae hayo aye riẹ gwọlọ inọ ọye ọvo ọrivẹ-orọo riẹ o re rri na, ere Ọghẹnẹ ọ rẹ gwọlọ inọ ọye ọvo idibo riẹ a rẹ gọ.” Fikiere, otofa ọwhọ evaọ Ebaibol họ ẹzẹ hayo ajọwha kẹ oware jọ, wọhọ ajọwha nọ iriughe i re wo nọ a tẹ be fa obọro na. Ọwhọ hayo ihri nọ Devidi o wo na yọ emamọ, keme ọ gwọlọ inọ ohwo ọvo ọ rẹ wha afuẹwẹ se odẹ Ọghẹnẹ hẹ.
11. Eme ọ wọ Jesu ru eware nọ o ru evaọ okenọ ọ jọ otọakpọ?
11 Ilele Jesu a roro gba inọ eme ọ Devidi na i kie kpahe oware nọ Jesu o ru eva etẹmpol na. Jesu ọ dawo ẹgba riẹ kpobi evaọ iruo na orọnikọ fiki epanọ ọ riẹ inọ umutho oke jọ ọvo o wo ho rekọ fiki adhẹẹ nọ o wo kẹ odẹ Ọsẹ riẹ gbe ọwhọ nọ o wo kẹ egagọ efuafo. Nọ ọ ruẹ afuẹwẹ gbe ekela nọ a be wha se odẹ Ọghẹnẹ, o kẹ riẹ uye gaga, ọ tẹ j’owọ re ọ kpọ eware vi. Nọ Jesu ọ ruẹ inọ isu egagọ a bi kienyẹ je gboja kẹ iwhrori na, ọwhọ ọ wọ riẹ fi obọ họ kẹ ahwo na, ọ tẹ jẹ whọku ekpehre isu egagọ na.—Mat. 9:36; 23:2, 4, 27, 28, 33.
Wo Ajọwha kẹ Egagọ Uzẹme
12, 13. Eme isu egagọ Kristẹndọm a ru no enẹna kpahe (a) odẹ Ọghẹnẹ? (b) Uvie Ọghẹnẹ?
12 Uruemu enọ i se oma rai eg’Ọghẹnẹ nẹnẹ u tube yoma vi orọ ahwo oke Jesu. Wọhọ oriruo, kareghẹhọ inọ oware ọsosuọ nọ Jesu o wuhrẹ ilele riẹ inọ a lẹ kẹ họ odẹ Ọghẹnẹ, inọ: “Odẹ ra ojọ ọrẹri.” (Mat. 6:9) Kọ isu egagọ inẹnẹ a bi wuhrẹ ahwo re a riẹ odẹ Ọghẹnẹ, ru odẹ na fo hayo rọ ọghọ kẹe? Ijo, ukpoye a rehọ iwuhrẹ erue raha odẹ Ọghẹnẹ no, iwuhrẹ wọhọ Esanerọvo, ẹwẹ nọ o re whu hu, gbe erae ehẹle, be lẹliẹ ahwo rri Ọghẹnẹ wọhọ ẹsenọ a rẹ sae riẹ kpahe iẹe he, wọhọ ẹsenọ ọ rrọ eva gaga, jẹ wọhọ ẹsenọ eva e rẹ were iẹe nọ uye o tẹ be bẹ ahwo. Yọ a rehọ uruemu uyoma gbe eviẹhọ rai wha afuẹwẹ se Ọghẹnẹ no. (Se Ahwo Rom 2:21-24.) Ofariẹ, a dawo ẹgba rai kpobi no re a ko odẹ oma Ọghẹnẹ dhere ahwo, tube si odẹ na no Ebaibol rai no. A tẹ be rọ ere whaha ahwo re a siọ Ọghẹnẹ ba esikẹle jẹ siọ usu ba ewo kugbei.—Jem. 4:7, 8.
13 Oware ofa nọ Jesu o wuhrẹ ilele riẹ họ re a lẹ kpahe Uvie Ọghẹnẹ, inọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Mat. 6:10) Dede nọ isu egagọ Kristẹndọm a be hae lẹ olẹ yena, a tuduhọ ahwo awọ no re a roma kẹ isuẹsu ahwo-akpọ gbe ikoko efa. Yọ a bi rri enọ e be daoma ta usiuwoma Uvie na wọhọ ahwo nọ a fioka ha. Fikiere, ahwo buobu nọ a se oma rai Ileleikristi a gbẹ be ta uvumọ ẹme kpahe Uvie Ọghẹnẹ hẹ, kabikọ re a fi ẹrọwọ rai họ Uvie na.
14. Oghẹrẹ vẹ isu egagọ Kristẹndọm a ro kiukeku Ẹme Ọghẹnẹ no?
14 Nọ Jesu ọ jẹ lẹ se Ọghẹnẹ, ọ ta vevẹ inọ: “Ẹme ra uzẹme.” (Jọn 17:17) Yọ okenọ Jesu ọ jọ otọakpọ, o dhesẹ inọ ọ te rọ ‘ọrigbo nọ o wo ẹrọwọ avọ areghẹ na’ ro mu re ọ rehọ emu abọ-ẹzi ko ahwo riẹ. (Mat. 24:45) Dede nọ isu egagọ Kristẹndọm a re se oma rai iwuhrẹ Ẹme Ọghẹnẹ, kọ a bi ru iruo nọ Olori na ọ ta nọ a ru na gba? Ijo. A re ru wọhọ ẹsenọ eme Ebaibol na e rrọ erue hayo iku-esia gheghe. Ukpenọ isu egagọ na a rẹ rọ emu abọ-ẹzi kuọ uthuru rai, re a rọ ere kẹ ae omosasọ je ru ai wo otoriẹ ẹme Ọghẹnẹ, a te bi wuhrẹ ai eriariẹ ahwo-akpọ. Ofariẹ, a bi kiukeku itee uruemu nọ Ọghẹnẹ o fihọ, a te bi ru lele enọ ae omarai ọvo a fihọ.—2 Tim. 4:3, 4.
15. Ẹvẹ eware iyoma nọ isu egagọ Kristẹndọm a ru no kpahe odẹ Ọghẹnẹ o rrọ owhẹ oma?
15 Fiki eware iyoma nọ isu egagọ Kristẹndọm a ru no nọ a bi se odẹ Ọghẹnẹ fihọ, ahwo buobu a gbe wo isiuru kpahe Ebaibol na hayo Ọghẹnẹ ọgọ họ. A kie ruọ ofẹ Setan gbe uyerakpọ omuomu riẹ no. Kọ nọ whọ be ruẹ je yo kpahe eware itieye na nọ e be via n’ẹdẹ ruọ ẹdẹ na, ẹvẹ o be jọ owhẹ oma? Nọ whẹ odibo Jihova whọ tẹ ruẹ ekela nọ a be wha se odẹ Ọghẹnẹ, kọ oma o rẹ wọ owhẹ re who si ekela na noi? Nọ whọ tẹ ruẹ ahwo udu-oruọzewọ nọ a be viẹhọ jẹ whare, kọ oma o gbẹ wọ owhẹ re whọ kẹ ae omosasọ? Nọ Jesu o ruẹ enọ e “rọ oyoya, a tẹ jẹ vaha wọhọ igodẹ nọ i wo othuru hu,” orọnikọ ohrọ rai o riẹe ọvo ho, rekọ “o te mu ai eware ibuobu họ ewuhrẹ.” (Mat. 9:36; Mak 6:34) U fo re ma wo ajọwha kẹ egagọ uzẹme wọhọ epanọ Jesu o wo.
16, 17. (a) Eme ọ rẹ wọ omai ta usiuwoma na avọ ajọwha? (b) Eme ma te ta kpahe evaọ uzoẹme nọ o rrọ aro na?
16 Nọ ma tẹ be rọ ajọwha ta usiuwoma na, ẹme Pọl nọ ọ rrọ 1 Ahwo Timoti 2:3, 4 na u ti wo obọdẹ otofa kẹ omai. (Sei.) Orọnikọ fikinọ ma rrọ edẹ urere na ọvo ma je wo ajọwha ha, rekọ fikinọ ma riẹ inọ oreva Ọghẹnẹ o rrọ. Ọ gwọlọ inọ ahwo a wo eriariẹ uzẹme na re a sae gọe je wo eghale riẹ. Ma be dawo ẹgba mai kpobi evaọ usiuwoma ota na, orọnikọ fikinọ oke o whoma re no ọvo ho rekọ fikinọ ma gwọlọ rọ orro kẹ odẹ Ọghẹnẹ je fi obọ họ kẹ amọfa ru oreva riẹ. Ma wo ajọwha kẹ egagọ uzẹme.—1 Tim. 4:16.
17 Mai ahwo Jihova ma wo eriariẹ egbagba kpahe ẹjiroro Ọghẹnẹ rọkẹ ahwo-akpọ gbe akpọ na. Ma riẹ epanọ ma re ro fi obọ họ kẹ ahwo re a wo evawere gbe uvi ẹruore. Ma rẹ sae vuẹ ae oware nọ a re ru enẹna re a sae zọ evaọ okenọ a te raha Setan avọ uyerakpọ omuomu riẹ no. (2 Tẹs. 1:7-9) Jọ oma o lọhọ omai hi fikinọ ẹdẹ Jihova ọ be jọ omai obọ lehie hrọ, ukpoye, eva e rẹ were omai inọ oke o gbẹ riẹ nọ ma re ro wo ajọwha kẹ egagọ uzẹme. (Mae. 7:7; Hab. 2:3) Ẹvẹ ma sai ro wo ajọwha otiọye? Onana ma te ta kpahe evaọ uzoẹme nọ o rrọ aro na.
Kọ Whọ Sae k’Iyo Enọ Nana Vevẹ?
• Eme ọ wọ Jesu rọ udu dhe iruo odibọgba na?
• Eme họ otofa “oriori” hayo ọwhọ evaọ Ebaibol na?
• Eme ma be ruẹ nẹnẹ nọ o rẹ wọ omai wo ajọwha kẹ egagọ uzẹme?
[Enọ Uwuhrẹ]
[Uwoho nọ o rrọ ẹwẹ-obe avọ 8]
Jesu ọ tẹrovi eruo oreva Ọsẹ riẹ gbe uyoyou udhesẹ kẹ amọfa
[Uwoho nọ o rrọ ẹwẹ-obe avọ 10]
Ma re wo ajọwha kẹ egagọ uzẹme