Enọ Ahwo nọ A s’Ebe
Enọ Ahwo nọ A s’Ebe
Fikieme eva e jẹ rọ dha Mosis kẹ Ẹleaza avọ Itama, emọ Erọn, okenọ inievo rai Nedab avọ Abihu a whu no, kọ eme ọ lẹliẹ ofu riẹ kpotọ?—Izerẹ 10:16-20.
Nọ a nwane rehọ Erọn avọ emọ riẹ mu ọkwa ozerẹ no re a ru iruo evaọ uwou-udhu na, Jihova o te kpe emezae Erọn, Nedab avọ Abihu, keme a dheidhe nọ ọ kẹ udu riẹ hẹ. (Izerẹ 10:1, 2) Mosis ọ tẹ ta kẹ emọ Erọn edekọ inọ a weri inievo rai nọ i whu no na ha. U kri hi, Mosis ọ tẹ dheva kẹ Ẹleaza avọ Itama keme a re ẹwe idhe uzioraha na ha. (Izerẹ 9:3) Eme ọ lẹliẹ Mosis dheva?
Uzi nọ Jihova ọ rọ kẹ Mosis na o ta inọ ozerẹ nọ ọ rọ arao dheidhe uzioraha ọ rẹ re abọjọ arao na evaọ obeva uwou-udhu egagọ na. Ere oruo u dhesẹ inọ a rọ izieraha enọ a bi ro mu izerẹ na vrẹ rai no. Rekọ otẹrọnọ a rọ azẹ arao na jọ ruọ Oria Ọrẹri na, koyehọ ubrukpẹ ọsosuọ orọ aruẹri na, a rẹ re arao na ha. Ukpoye, a rẹ mahe iẹe.—Izerẹ 6:24-26, 30.
O wọhọ nọ, nọ emezae ivẹ Erọn na a whu no, Mosis ọ tẹ ruẹ nọ o r’oja re a ru lele ijaje Jihova kpobi. Nọ o yo inọ a mahe ẹwe nọ a ro dheidhe uzioraha na, ọ tẹ rọ evedha nọ Ẹleaza avọ Itama oware nọ a gbẹ rọ re arao na ha, keme a rehọ azẹ arao na kẹ Jihova evaọ Oria Ọrẹri na ha.—Izerẹ 10:17, 18.
Erọn ọ tẹ kẹ Mosis uyo onọ na, keme o wọhọ nọ ọye ọ vuẹ emezae riẹ inọ a mahe arao na. Fiki uwhu emọ ivẹ riẹ na, ẹsejọhọ Erọn o roro inọ o te were emezae riẹ nọ i kiọkọ họ re a re arao nọ a ro dheidhe uzioraha na evaọ ẹdẹ yena. O sae jẹ jọnọ o roro inọ o te were Jihova ha re a re arao na dede nọ a wo obọ kpahe uzioraha Nedab avọ Abihu na ha.—Izerẹ 10:19.
Ẹsejọhọ Erọn o roro nọ, nọ onana o rrọ ẹdẹ ọsosuọ nọ ahwo uviuwou riẹ a bi ru iruo wọhọ izerẹ na, a hae yọrọ oma gaga re a lele ijaje Ọghẹnẹ makọ evaọ eware nọ e mae kawo. Rekọ Nedab avọ Abihu a gbe odẹ Jihova ku no, yọ Ọghẹnẹ o kpe rai no. Fikiere, ẹsejọhọ Erọn o roro nọ uviuwou nọ oware uyoma utioye na o jọ via a rẹ sae re arao nọ a ro dheidhe ọrẹri hi.
O wọhọ nọ uyo nọ Erọn ọ kẹ na o vọ Mosis eva, keme ikere na e ta nnọ: “Nọ Mosis o ti yo onana no, ute mu ei ẹro.” (Izerẹ 10:20) Yọ o wọhọ nọ uyo nọ Erọn ọ kẹ o vọ Jihova eva re.
