Ewo Ọjẹrehọ Ọghẹnẹ U Re Su Kpohọ Uzuazọ Ebẹdẹ Bẹdẹ

“Whẹ họ ọnọ ọ rẹ ghale enọ ikiẹrẹe, O ỌNOWO; whọ rehọ aruoriwo ruru ei, wọhọ ojese.”—OL. 5:12.

1, 2. Didi oware Elaeja ọ yare mi aye-uku obọ Zarẹfat, kọ imuẹro vẹ ọ kẹ riẹ?

OHỌO u je kpe aye na avọ ọmọ riẹ, yọ ere ohọo u je kpe ọruẹaro Ọghẹnẹ re. Nọ aye-uku obọ Zarẹfat nana ọ be gwọlọ koko erae họ na, Elaeja ọruẹaro na ọ tẹ ta kẹe inọ ọ kẹe ame gbe ebrẹdi. Ọ rọwo inọ ọ rẹ kẹe ame, rekọ emu nọ o kiọkọ uwou na kpobi họ “eme-emu nọ ọ rọ evaọ akana, gbe emewhri nọ ọ rọ eva ololo.” Ọ tẹ ta kẹ ọruẹaro na inọ emu nọ o kiọkọ o tulo ho, fikiere ọ rrọ rọkẹ ọyomariẹ avọ ọmọ riẹ ọvo.—1 Iv. 17:8-12.

² Elaeja o te si ikẹ inọ: “Kaki ru omojọ ro se omẹ, re who te ru ora gbe orọ ọmọzae ra. Keme enẹ ỌNOWO na Ọghẹnẹ Izrẹl ọ tae, ‘akana emu na o re re he, gbe ololo ewhri na ọ rẹ kpọ họ.’”—1 Iv. 17:13, 14.

3. Onọ vẹ mai kpobi ma rẹriẹ ovao ku?

³ Fiki ayare Elaeja na, o gwọlọ nọ aye-uku na ọ rẹ jẹ uvi iroro jọ. Kọ ọ sai fi eva họ Jihova inọ ọ te ko ọyomariẹ avọ ọmọ riẹ, manikọ emu na ọ rrọ aye na oja vi emamọ usu nọ o re wo kugbe Ọghẹnẹ? Mai kpobi ma rẹriẹ ovao ku ọkpọ onọ yena. Kọ ewo ọjẹrehọ Jihova ọ mae rrọ omai oja vi ekwakwa efe? Ma wo ẹjiroro kpobi nọ ma re ro fi eva họ jẹ gọ Ọghẹnẹ. Yọ re ma sai wo ọjẹrehọ riẹ, o gwọlọ eware jọ mi omai.

‘Who Te Ọnọ A rẹ Gọ’

4. Fikieme Jihova o ro te ọnọ ma rẹ gọ?

⁴ Jihova o wo udu nọ o re ro rẹro inọ ahwo-akpọ a rẹ gọe. Ikọ-odhiwu riẹ a  dhesẹ inọ ere o ginẹ rrọ nọ a ta nọ: “Who teri, eyo Ọnowo nọ o re mie oro gbe adhẹẹ gbe ogaga, keme whẹ ọ ma eware na kpobi, jegbe fiki awere ra a rọ rọ, a rọ mae na.” (Evia. 4:11) Fikinọ Jihova ọ ma eware kpobi, o te ọnọ ma rẹ gọ.

5. Fikieme uyoyou Ọghẹnẹ o jẹ wọ omai gọe?

⁵ Ẹjiroro ọfa nọ ma rẹ rọ gọ Jihova họ, uyoyou riẹ u wo ibe he. Ebaibol e ta nọ: “Koyehọ Ọghẹnẹ ọ rehọ uwoho riẹ ma ohwo, evaọ uwoho oma Ọghẹnẹ ọ rọ ma ae; ọzae gbe aye ọ ma rae.” (Emu. 1:27) Ọghẹnẹ ọ ma ahwo-akpọ avọ uvẹ nọ ọ kẹ rai nọ a rẹ rọ salọ onọ a re ru. Fikinọ Jihova ọ kẹ omai uzuazọ, ọye họ Ọsẹ ahwo-akpọ kpobi. (Luk 3:38) Wọhọ epanọ emamọ ọsẹ o re ru, Ọghẹnẹ ọ kẹ omai eware nọ ma gwọlọ kpobi re ma sae reawere uzuazọ. “O bi ru ọre riẹ vatha” je bi “vi oso ze” re emu ọ ruẹse vọ otọakpọ na, re otọakpọ na o jẹ jọ wowoma.—Mat. 5:45.

6, 7. (a) Didi uye Adamu ọ wha se emọ riẹ? (b) Eme idheidhe Kristi i ti ru kẹ enọ e gwọlọ ọjẹrehọ Ọghẹnẹ?

⁶ Jihova o siwi omai no igbo uzioraha re. Nọ Adamu ọ thọ uzi, ọ tẹ wọhọ ọzae nọ o tho igho mi ahwo uviuwou riẹ, ọ tẹ rehọ igho na fi edhọ. Nọ Adamu o veghe uzou kẹ Jihova, ọ tẹ rọ ere raha evawere ebẹdẹ bẹdẹ ku emọ riẹ. Fiki oriobọ riẹ, emọ riẹ a tẹ rrọ igbo sebaẹgba. Fikiere, ahwo-akpọ kpobi a rẹ mọ, rioja, ukuhọ riẹ a ve whu. O gwọlọ osohwa re a tẹ ta ohwo no igbo, yọ Jihova ọ hwosa na re ma sai no otọ igbo uzioraha. (Se Ahwo Rom 5:21.) Jesu Kristi o ru oreva Ọsẹ riẹ nọ ọ “rọ uzuazọ riẹ ta ibuobu” no igbo. (Mat. 20:28) Kẹle na, enọ i wo ọjẹrehọ Ọghẹnẹ kpobi a ti wo erere vọvọ no ẹtanigbo na ze.

⁷ Oware nọ Jihova o ru no re ma sai yeri emamọ uzuazọ evawere a rẹ ruẹ unu gbiku riẹ hẹ. Ma te wo ọjẹrehọ riẹ, ma te sae ruẹ epanọ o ti ro si uye nọ ahwo-akpọ a be ruẹ n’otọ. Jihova o ti gbe dhesẹ kẹ omai epanọ ọ rẹ rọ “hwosa kẹ e nọ e guọlọ e riẹ.”—Hib. 11:6.

‘Ahwo Ra A te Kẹ Owhẹ Okẹ nọ U No Eva Ze’

8. Eme oware nọ o via evaọ oke Aizaya u wuhrẹ omai kpahe ẹgọ Ọghẹnẹ?

⁸ Re ma wo ọjẹrehọ Ọghẹnẹ o gwọlọ inọ ma rẹ rehọ ufuoma iroro-ejẹ mai ru iruo ziezi. Onana o rrọ ere keme Jihova ọ rẹ gba ohwo ọvo họ gọe he. Evaọ oke Aizaya, Ọghẹnẹ ọ nọ inọ: “Ono me re viẹ, ono ọ rẹ nya kẹ omai?” Jihova o bru ọghọ họ ọruẹaro na oma nọ ọ kẹe uvẹ salọ sọ ọ rẹ nya uwou na hayo ọ rẹ nya ha. Dai roro epanọ eva e were Aizaya te nọ ọ ta nọ: “Mẹ na! Vi omẹ.”—Aiz. 6:8.

9, 10. (a) Oghẹrẹ vẹ u fo inọ ma rẹ rọ gọ Ọghẹnẹ? (b) Fikieme u je fo re ma rọ eva kpobi gọ Jihova?

⁹ Ahwo-akpọ a rẹ sae salọ sọ a rẹ gọ Ọghẹnẹ hayo a rẹ gọe he. Jihova ọ gwọlọ re ma rehọ udu obọ mai gọe. (Se Joshua 24:15.) Enọ e rẹ rọ ẹgo gọ Ọghẹnẹ gbe enọ e rẹ gwọlọ ru ahwo-akpọ ọvo eva were, Ọghẹnẹ ọ rẹ jẹ ae rehọ họ. (Kọl. 3:22) Ọghẹnẹ ọ te jẹ omai rehọ họ otẹrọnọ ma kuvẹ re ilale akpọ na e whaha omai ‘eva kpobi’ nọ ma rẹ rọ gọe. (Ol. 119:2) Jihova ọ riẹ inọ re ma rọ eva kpobi gọe o rẹ kẹ omai erere. Mosis ọ tuduhọ emọ Izrẹl awọ inọ a salọ uzuazọ ẹkwoma  eyou nọ a re “you ỌNOWO na Ọghẹnẹ rai, [a ve] je yo uru riẹ, jẹ dhẹ gbalọ iẹe.”—Izie. 30:19, 20.

¹⁰ Devidi ovie Izrẹl ọ so ole kẹ Jihova nọ: “Eva edẹ isuẹsu ra ahwo ra a jẹ te kẹ owhẹ okẹ nọ u no eva rai ze eva ehru igbehru ọrẹri na. Ugbeyẹ ra u re ti bru owhẹ tha wọhọ igrigri irioke.” (Ol. 110:3) Ilale efe gbe akpọriọ ọvo ahwo buobu a be raha oke rai kẹ nẹnẹ. Rekọ rọkẹ enọ i you Jihova, egagọ riẹ a rọ karo. Ọwhọ nọ a be rọ ta usiuwoma na u dhesẹ oware nọ a rọ karo evaọ uzuazọ. A fi eva rai kpobi họ Jihova inọ ọ te kẹ ae eware nọ a gwọlọ.—Mat. 6:33, 34.

Idheidhe nọ E rẹ Were Ọghẹnẹ

11. Erere vẹ emọ Izrẹl a re rẹro riẹ nọ a te dheidhe kẹ Jihova?

¹¹ Evaọ oke emọ Izrẹl, ahwo Ọghẹnẹ a jẹ hae rọ erao dheidhe re ọ sae jẹ ae rehọ. Obe Iruo-Izerẹ 19:5 o ta nọ: “Okenọ wha bi ti dhe idhe udhedhẹ kẹ ỌNOWO na wha ve dhei re wha jọ enọ a rẹ rehọ.” Ma jọ obe Ebaibol ọvona se nọ: “Wha te rehọ okẹ akpẹwẹ ro se ỌNOWO na kẹ okẹ na wọhọ epanọ ọ rẹ jai miẹ.” (Izerẹ 22:29) Nọ emọ Izrẹl a te dhe emamọ idhe evaọ agbada-idhe Jihova, iwiri nọ i bi kunye kpohọ ehru na “i re gbore awere kẹ” Ọghẹnẹ uzẹme na. (Izerẹ 1:9, 13) O rẹ were iẹe nọ ahwo riẹ a tẹ be rehọ idheidhe rai dhesẹ inọ a you rie. (Emu. 8:21) Ma rẹ jọ idhe nana ruẹ oware jọ nọ u kie kpahe omai nẹnẹ. Jihova ọ rẹ jẹ enọ i dhe emamọ idhe kẹe rehọ. Oghẹrẹ idhe vẹ ma rẹ sai dhe nẹnẹ? Roro kpahe eria ivẹ jọ evaọ uzuazọ: uruemu mai gbe ẹmeunu mai.

12. Eware vẹ e rẹ lẹliẹ iruo ohwo tu Ọghẹnẹ oma?

¹² Evaọ ileta nọ Pọl ukọ na o kere se ahwo Rom, ọ ta nọ: “Wha ru oma rai rọ iwẹ e kpokpọ gbe ọrẹri o nọ Ọghẹnẹ ọ rẹ jẹrehọ, nọ e rọ egagọ Ẹzi rai.” (Rom 12:1) Re Ọghẹnẹ ọ sae jẹ ohwo rehọ, o re ru oma riẹ ọrẹri kẹ Ọghẹnẹ. Ọ rẹ jẹ iruo ohwo rehọ họ otẹrọnọ ohwo na o bi gbe oma riẹ ku ẹkwoma eware wọhọ utaba, isigareti, imu egaga, gbe idi nọ a rẹ da vrẹta. (2 Kọr. 7:1) Ofariẹ, nọ orọnọ “ogberedha ọ [be] rahuzi kpahe oma obọ riẹ” na, iruo kpobi nọ ogbọfariẹ o bi ru evaọ ukoko na i re tu Jihova oma. (1 Kọr. 6:18) Re ohwo ọ sai ru Ọghẹnẹ eva were, ọ rẹ jọ ‘fuafo eva uruemu riẹ kpobi.’—1 Pita 1:14-16.

13. Fikieme u je fo re ma jiri Jihova?

¹³ Idheidhe efa nọ e rẹ were Jihova họ  ẹmeunu mai. N’otọ avọ otọ ze, enọ i you Jihova a rẹ ta ẹme ezi riẹ evaọ oria kpobi. (Se Olezi 34:1-3.) Se Olezi avọ 148 rite 150 re whọ ruẹ unuẹse nọ ilezi nana e tuduhọ omai awọ inọ ma jiri Jihova. Evaọ uzẹme, “ujiro u fo kẹ ikiẹrẹe.” (Ol. 33:1) Yọ Jesu Kristi, ọnọ ọ rrọ Oriwiruo mai na, ọ fodẹ epanọ o r’oja te re ma rọ ẹkwoma usiuwoma ota jiri Ọghẹnẹ.—Luk 4:18, 43, 44.

14, 15. Eme Hosia ọ ta kẹ emọ Izrẹl inọ a ru, kọ eme Jihova o ru?

¹⁴ Ọwhọ nọ ma rẹ rọ ta usiuwoma o re dhesẹ inọ ma you Jihova gbe nnọ ma gwọlọ ọjẹrehọ riẹ. Wọhọ oriruo, roro kpahe uduotahawọ nọ Hosia ọruẹaro na ọ kẹ emọ Izrẹl, enọ e siọ egagọ Jihova ba je mu edhọ họ ẹgọ. (Hos. 13:1-3) Hosia ọ ta kẹ ae re a lẹ Jihova nọ: “Si umuomu kpobi no; who mi o nọ uwoma. Ma vẹte rehọ igbenu mai jiri owhẹ.”—Hos. 14:1, 2.

¹⁵ Igbenu nọ a re ro jiri Jihova họ eme ezi nọ a rẹ ta kpahe iẹe. Eme Jihova o ru kpahe eme ajiri itieye na? Ọ ta nọ: “Me reti you” rai. (Hos. 14:4) Jihova ọ rọ vrẹ enọ i jiri odẹ riẹ, ọ jẹ rae rehọ, o te je se ai gb’oma.

16, 17. Nọ ẹrọwọ ọ tẹ wọ ohwo ta usiuwoma na, ẹvẹ Jihova o re rri iruo riẹ?

¹⁶ Re a jọ ẹgbede jiri Jihova yọ abọjọ egagọ uzẹme n’otọ ze. Orro nọ ọ rẹ rọ kẹ Ọghẹnẹ uzẹme na o jọ ọso-ilezi na oja te epanọ ọ rọ lẹ Ọghẹnẹ nọ: “O ỌNOWO, mi okẹ ujiro mẹ.” (Ol. 119:108) Kọ ẹvẹ kpahe inẹnẹ? Aizaya ọ ruẹaro kpahe ogbotu ahwo jọ evaọ oke mai na inọ: “A re ti whowho ujiro ỌNOWO na via. . . . A rẹ te nyaze avọ ọjẹrehọ evaọ aroẹri [Ọghẹnẹ].” (Aiz. 60:6, 7) Evaọ orugba eme yena, ima ahwo buobu nẹnẹ a be “rehọ okẹ iwẹegọ ejiro rọ kẹ Ọghẹnẹ kẹse kẹse, koyehọ, ma rẹ rọ enu mai jiri odẹ riẹ.”—Hib. 13:15.

¹⁷ Kọ ẹvẹ kpahe owhẹ? Kọ who bi ru iruo nọ Ọghẹnẹ ọ rẹ jẹrehọ? O gbẹ rrọ ere he, kọ whọ sai ru inwene jọ re who mu Jihova họ ejiri evaọ ẹgbede? Nọ ẹrọwọ ọ tẹ wọ owhẹ muọ usiuwoma họ ẹta, iruo ra e te “were ỌNOWO na vi eruẹ-ọzae” nọ who re ro dheidhe kẹe. (Se Olezi 69:30, 31.) Jọ u mu owhẹ ẹro inọ “ore awere” ujiro ra u ti te Jihova oma gbe nnọ ọ te jẹ iruo ra rehọ. (Izik. 20:41) Eva nọ e te were owhẹ evaọ oke yena a re gbiku riẹ hẹ.

‘ỌNOWO Ọ te Ghale Ikiẹrẹe’

18, 19. (a) Ẹvẹ ahwo buobu nẹnẹ a rri Ọghẹnẹ ọgọ? (b) Eme ekufiẹ aruoriwo Ọghẹnẹ o re su kpohọ?

¹⁸ Iroro ahwo buobu nẹnẹ e wọhọ erọ otujọ evaọ oke Malakae, enọ e jẹ ta nọ: ‘Ọghẹnẹ ọgọ yọ uye ọvọvẹ. Didi ewoma o re te omai nọ ma te koko ijaje riẹ?’ (Mal. 3:14) Fiki efe nọ a bi le, a je roro inọ Ọghẹnẹ ọ sai ti ru ẹjiroro riẹ gba ha hayo inọ izi riẹ i kiekpo no.  Rọkẹ ae, usiuwoma ota na yọ okioraha gbe uye-oruẹ gheghe.

¹⁹ Obọ ọgbọ Idẹn iroro ethọthọ itieye na i muhọ no ze. Setan họ ọnọ ọ bẹbẹ Ivi họ re o rri obọdẹ uzuazọ nọ Jihova ọ kẹ riẹ na kuẹku re o je veghe uzou kẹe. Nẹnẹ, Setan ọ be bẹbẹ ahwo họ roro inọ erere ọ riẹ hẹ re a ru oreva Ọghẹnẹ. Rekọ Ivi avọ ọzae riẹ a tẹ te ruẹ inọ, aruoriwo Ọghẹnẹ nọ a kufiẹ na u dhesẹ inọ a ku uzuazọ rai fiẹ no. Ere o te via kẹ enọ i lele oriruo rai nẹnẹ.—Emu. 3:1-7, 17-19.

20, 21. (a) Eme aye-uku obọ Zarẹfat na o ru, kọ eme o no rie ze? (b) Oghẹrẹ vẹ ma sae rọ rehọ aro kele aye-uku obọ Zarẹfat na, kọ fikieme?

²⁰ Dai rri ohẹriẹ nọ o rrọ udevie oware nọ o via kẹ Adamu avọ Ivi avọ onọ o via kẹ aye-uku obọ Zarẹfat ọnọ Elaeja ọ yare emu na. Nọ Elaeja ọ ta ẹme kẹ aye na no, aye na ọ tẹ kake jọ umutho emu nọ o wo na ghale omojọ kẹ ọruẹaro na. Jihova o te ru eyaa nọ Elaeja ọ ya kẹ aye na gba. Ikuigbe na e ta nọ: “Aye na . . . te Elaeja, gbe ọmọzae aye na, te unuwou riẹ soso a tẹ re emu na edẹ buobu. Akana emu na o re he, hayo ololo ewhri na o re gbe he, wọhọ epa ẹme nọ ỌNOWO na ọ rehọ unu Elaeja ta.”—1 Iv. 17:15, 16.

²¹ Umutho ahwo jọ ọvo nẹnẹ a rẹ sai ru oware nọ aye-uku obọ Zarẹfat na o ru na. Ọ rọ ẹro riẹ kpobi so Ọghẹnẹ esiwo na, yọ Ọghẹnẹ o vu rie wa ha. Iku nana gbe efa evaọ Ebaibol na i dhesẹ inọ Jihova o te ọnọ ma re fi eva họ. (Se Joshua 21:43-45; 23:14.) Ikuigbe Isẹri Jihova nẹnẹ e kẹ imuẹro inọ ọ rẹ nya siọ enọ e gọ riẹ ba ha.—Ol. 34:6, 7, 17-19. *

22. Fikieme ma rẹ rọ daoma wo ọjẹrehọ Ọghẹnẹ ababọ okioraha?

²² Ẹdẹ nọ Ọghẹnẹ o ti ro gu enọ e rrọ “akpọ na soso” ẹdhọ ọ kẹle no. (Luk 21:34, 35) Ma rẹ vabọ noi hi. Oware ovuovo o rrọ akpọ na ha nọ o ghare vi eme nana nọ Oguẹdhọ nọ Ọghẹnẹ o ro mu ọ te ta kẹ ahwo inọ: “Wha nyaze, enọ Ọsẹ mẹ ọ ghale, wha te reuku uvie nọ a ruẹrẹ kẹ owhai.” (Mat. 25:34) Ẹhẹ, Jihova ‘ọ rẹ ghale enọ ikiẹrẹe, jẹ rehọ aruoriwo ruru ai wọhọ ojese.’ (Ol. 5:12) Kọ ma gbẹ daoma re ma wo ọjẹrehọ Ọghẹnẹ?

[Oruvẹ-obotọ]

Kọ Whọ Kareghẹhọ?

• Fikieme Jihova o ro te ọnọ ma rẹ rọ eva mai kpobi gọ?

• Didi egagọ Jihova ọ rẹ jẹrehọ nẹnẹ?

• Eme họ otofa igbenu nọ ma re ro jiri Ọghẹnẹ, kọ fikieme ma re ro jiri ei?

• Fikieme ma rẹ rọ daoma wo ọjẹrehọ Ọghẹnẹ?

[Enọ Uwuhrẹ]

[Uwoho nọ o rrọ ẹwẹ-obe avọ 13]

Iroro vẹ o gwọlọ inọ aye-uku na ọ rẹ jẹ fiki ayare ọruẹaro Ọghẹnẹ?

[Uwoho nọ o rrọ ẹwẹ-obe avọ 15]

Erere vẹ o re te omai otẹrọnọ ma bi jiri Jihova?

[Uwoho nọ o rrọ ẹwẹ-obe avọ 17]

Eva nọ who fihọ Jihova o te jọ uvrẹvru hu