Omodawọ na O Rrọ Uvrẹvru Hu!

UWUHRẸ EBAIBOL UVIUWOU o r’oja re a sae yọrọ emọ “je wuhrẹ ai orọ Ọnowo na.” (Ẹf. 6:4) Rekọ whai esẹgbini wha riẹ inọ ẹkeria o re kru emaha na ẹbẹ hẹ. Kọ eme who re ru re a sae keria dhedhẹ evaọ oke uwuhrẹ na? Joma ta kpahe oware nọ esẹgbini jọ a ru no.

Oniọvo-ọmọzae nọ a re se George nọ ọ rrọ obọ America ọ ta nọ: “Okenọ emọ mai a gbẹ jọ emaha, mẹ avọ aye mẹ ma jẹ hae daoma fi eware ekpokpọ ba uwuhrẹ uviuwou mai. Ẹsejọ ma rẹ gọ egọ wọhọ ahwo oke emọ Izrẹl, ma vẹ rọ iku jọ nọ ma se evaọ Obe Ikuigbe Ebaibol Mẹ ro ru edrama. Ma rẹ tubẹ rọ imire kare egbọdọ, ekpọ, zuo ikete je ru eware efa rọkẹ edrama na. Ẹsejọ ma rẹ jẹ rehọ edẹ ahwo nọ e rrọ Ebaibol na rọ zaharo. Ma re je ku oware jọ wọhọ okọ Noa hayo ru ekiakiẹ kpahe etoke nọ eware jọ nọ a kere fihọ Ebaibol na e rọ via. Ẹsejọ ma rẹ jẹ drọ eware jọ nọ e via evaọ etoke Ebaibol. Obọnana ma be jiroro epanọ ma te rọ drọ abọ sa-sa ọrọ ẹgọ-ẹmo abọ-ẹzi nọ a jọ Ahwo Ẹfẹsọs 6:11-17 dhesẹ na, mai omomọvo evaọ uviuwou na ma vẹ ta kpahe abọjọ ẹgọ-ẹmo na. Enana kpobi i fi obọ họ k’omai reawere uwuhrẹ uviuwou mai no.”

Oni jọ nọ a re se Debi evaọ obọ America ọ ta nọ: “O jọ bẹbẹ k’omẹ avọ ọzae mẹ re ma wuhrẹ ọmọtẹ mai evaọ okenọ ọ jọ ikpe esa. Ẹdẹjọ nọ mẹ jẹ jọ Obe Ikuigbe Ebaibol Mẹ se iku ọ Aiziki avọ Rebeka do via, mẹ tẹ tọlọ emọ ibebi ivẹ, me te bi ru ai wọhọ ẹsenọ e be ta ẹme kẹ ohwohwo. Ọ jẹ gaviezọ gaga kẹ ẹme kpobi nọ mẹ jẹ ta. No umuo oke yena vrẹ, emọ ibebi ivẹ yena ma jẹ hae rọ ze re i dikihẹ kẹ ahwo nọ ma bi se kpahe evaọ ikuigbe Ebaibol. Nọ ma te se ikuigbe jọ no, ọmọtẹ mai ọ vẹ jọ uwou na gwọlọ emọ ibebi hayo eware efa ze re ma ro ru edrama iku nọ ma se na. O jẹ hae were iẹe gaga re ọ gwọlọ eware nọ i kiehọ ikuigbe na nọ ma re ro ru edrama na. Ekatọno ọsese gbe ufi owawae i dikihẹ kẹ uwou Rehab nọ ufi owawae o jọ. Omohọ othethei nọ a rọ variẹ ure u ve dikihẹ kẹ araomuomu oro nọ a fodẹ evaọ Ikelakele 21:4-9 na. U wo ẹkpa ologbo jọ nọ ma jẹ hai fi eware nana họ. O jẹ hae were omai eva nọ ma tẹ ruẹ ọmọ mai nọ ọ keria otuwou mai be kiẹ ẹkpa nọ eware ikuigbe Ebaibol na e rrọ eva. O jẹ hae k’omai evawere nọ ma tẹ ruẹ e riẹ nọ ọye ọvo ọ be rọ eware nana ro ru edrama Ebaibol.

Re a yọrọ emọ o rrọ bẹbẹ, yọ ẹsiẹvo ẹkpoka u te he re a wuhrẹ ai epanọ a rẹ rọ gọ Jihova. Rekọ uwuhrẹ Ebaibol uviuwou o rẹ sai fi obọ họ. Ababọ avro, omodawọ re ma wuhrẹ emọ mai o rrọ uvrẹvru hu.