Rọ Udu Ra Kpobi You Ẹrẹreokie

“Who you ẹrẹreokie.”—OL. 45:7.

1. Eme o ti fi obọ họ kẹ omai nya evaọ ‘edhere ẹrẹreokie’?

JIHOVA ọ be rọ ẹkwoma Ẹme gbe ẹzi ọfuafo riẹ su idibo riẹ ruọ ‘edhere ẹrẹreokie.’ (Ol. 23:3) Rekọ fikinọ ma gba ha, ma re reghe no edhere na ẹsejọ. Re ma sae kpọ edhere mai vi o gwọlọ omodawọ gaga. Kọ eme o ti fi obọ họ kẹ omai kparobọ? Wọhọ Jesu, ma re you oware uwoma uruo.—Se Olezi 45:7.

2. Eme họ ‘edhere ẹrẹreokie’?

² Eme họ ‘edhere ẹrẹreokie’? Itee ẹrẹreokie nọ Jihova o fihọ oye u re dhesẹ ‘edhere’ nọ ma rẹ nya. Evaọ evẹrẹ Hibru avọ Griki, otofa “ẹrẹreokie” họ “ekiete,” koyehọ epanọ ohwo ọ rẹ roma totọ koko ijaje. Nọ Jihova ọ rrọ Ọghẹnẹ nọ “ẹrẹreokie ọ rẹ were” na, idibo riẹ a rẹ rẹroso ẹe re o dhesẹ edhere ẹrẹreokie nọ a rẹ nya kẹ ae.—Ol. 33:5.

3. Ẹvẹ ma sai ro wuhrẹ kpahe ẹrẹreokie Ọghẹnẹ ziezi?

³ Re ma sai ru Ọghẹnẹ eva were ziezi, ma rẹ daoma koko izi riẹ. (Izie. 32:4) Re ma sai ru ere, ma rẹ roma totọ se Ebaibol re ma riẹ Jihova Ọghẹnẹ ziezi. Epanọ ma wuhrẹ kpahe Ọghẹnẹ je si kẹle iẹe te, ere uyoyou nọ ma wo kẹ ẹrẹreokie riẹ o rẹ rro te. (Jem. 4:8) Yọ nọ ma tẹ be jiroro nọ i wuzou evaọ uzuazọ, ma re fi eme Ebaibol họ iruo.

Gwọlọ Ẹrẹreokie Ọghẹnẹ

4. Eme ohwo kpobi nọ ọ be gwọlọ ẹrẹreokie Ọghẹnẹ o re ru?

⁴Se Matiu 6:33. Re ma gwọlọ ẹrẹreokie Ọghẹnẹ orọnikọ usiuwoma Uvie na ọvo ma rẹ ta ha. Re Jihova ọ sae jẹ egagọ mai rehọ, uruemu mai kẹdẹ kẹdẹ o rẹ rọwo kugbe itee ikpehru riẹ. Kọ eme ohwo kpobi nọ ọ be gwọlọ ẹrẹreokie Jihova o re ru? Ọ rẹ “wha ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie gbe ẹfuọ.”—Ẹf. 4:24.

5. Eme o ti fi obọ họ k’omai fi elọhoma kparobọ?

⁵ Nọ ma be daoma koko izi ikiẹrẹe Ọghẹnẹ na, udu u re whrehe omai ẹsejọ fiki ethobọ mai. Eme o re fi obọ họ kẹ omai fi elọhoma kparobọ re ma je you ẹrẹreokie? (Itẹ 24:10) Ma rẹ lẹ se Jihova kẹse kẹse avọ ‘emamọ eva gbe orọwọ nọ u muẹro.’ (Hib. 10:19-22) Te ma rrọ Ileleikristi nọ a rọ ẹzi wholo hayo enọ i wo ẹruore otọakpọ na, ma re fi ẹrọwọ họ idhe ẹtanigbo Jesu Kristi gbe ọkwa riẹ wọhọ Ozerẹ Okpehru mai. (Rom 5:8; Hib. 4:14-16) Uwou-Eroro ọsosuọ mai u dhesẹ epanọ azẹ Jesu o wo erere k’omai te. (1 Jọn 1:6, 7) Uwou-Eroro yena o ta nọ: “Uzẹme o rrọ inọ, nọ ohwo ọ tẹ rọ egalase ọwawae rri oware ọwawae evaọ oria nọ elo ọ rrọ, oware na o rẹ wọhọ ofuafo; fikiere, otẹrọnọ izieraha mai e make ware gaga, nọ ma tẹ rọ  ẹkwoma azẹ Kristi rri rai wọhọ epanọ Ọghẹnẹ o rri rai, e rẹ jọ fuafo.” (July 1879-E, ẹwẹ. 6) Ẹtanigbo nana nọ Jihova ọ rọ ẹkwoma uwhu Ọmọ oyoyou riẹ ru lọhọ k’omai na o gbunu kẹhẹ!—Aiz. 1:18.

Kiẹ Ẹgọ-Ẹmo Abọ-Ẹzi Ra Riwi

6. Fikieme o rọ r’oja re ma kiẹ ẹgọ-ẹmo abọ-ẹzi mai riwi?

⁶ U fo re ma wha ‘ẹgọ-ẹroo ọrọ ẹrẹreokie mai họ igbama’ ẹsikpobi, keme oyena yọ abọjọ nọ o wuzou evaọ ẹgọ-ẹmo abọ-ẹzi na. (Ẹf. 6:11, 14) Te ma roma mudhe kẹ Jihova obọ hayo ma rrọ ukoko na kri no, u fo re ma hae kiẹ ẹgọ-ẹmo abọ-ẹzi mai riwi ẹsikpobi. Fikieme? Keme a le Ẹdhọ avọ idhivẹri riẹ ziọ otọakpọ no. (Evia. 12:7-12) Ofu ọ rrọ Setan eva yọ ọ riẹ inọ oke nọ o wo u tulo ho. Oyejabọ nọ ọ be rọ wọso ahwo Ọghẹnẹ gaga na. Kọ ma gbẹ ruẹ oware nọ o rọ r’oja re ma wha ‘ẹgọ-ẹroo ọrọ ẹrẹreokie mai họ igbama’?

7. Ma te vuhumu inọ u gine fo re ma wha ‘ẹgọ-ẹroo ọrọ ẹrẹreokie mai họ igbama,’ eme ma re ru jẹ whaha?

⁷ Ẹgọ-ẹroo nọ a rẹ whẹhọ igbama ọ rẹ thọ udu na. Fikinọ ma gba ha, udu mai u wo ẹghẹ gbe uruemu ugbogbo. (Jeri. 17:9) Nọ orọnọ udu mai o rẹ gwọlọ eware iyoma na, o r’oja re ma kpọe. (Emu. 8:21) Ma te vuhumu inọ u gine fo re ma wha ‘ẹgọ-ẹroo ọrọ ẹrẹreokie mai họ igbama,’ ma re ku ei no oma evaọ ẹsejọ họ ẹkwoma eriwo eware nọ Ọghẹnẹ o mukpahe; yọ ma re roro kpahe eyoma oruo gbe he. Ma rẹ raha oke buobu kufiẹ ro rri etehe-ughe he. Ukpoye, ma rẹ gbẹ dawo ẹgba mai kpobi re ma ru oware nọ o rẹ were Jihova. O tẹ make rọnọ ekpehre iroro i ru omai zoruẹ eva ẹsejọ, Jihova o re fi obọ họ k’omai dikihẹ ga.—Se Itẹ 24:16.

8. Fikieme ma rọ gwọlọ “ojese orọwọ” na?

⁸ “Ojese orọwọ” na yọ abọjọ ọrọ ẹgọ-ẹmo abọ-ẹzi na. U re fi obọ họ k’omai “furie esagba erae imuomu na.” (Ẹf. 6:16) Ẹrọwọ gbe uyoyou udidi kẹ Jihova u ve fi obọ họ kẹ omai ru oware nọ u kiẹrẹe jẹ daji edhere nọ o bi su kpohọ uzuazọ ebẹdẹ bẹdẹ. Epanọ ma daoma you Jihova te, ere ma re rri ẹrẹreokie riẹ ghare te. Kọ ẹvẹ kpahe obroziẹ-iroro mai? Ẹvẹ o re ro fi obọ họ kẹ omai you ẹrẹreokie?

Yọrọ Emamọ Obroziẹ-Iroro

9. Erere vẹ o re te omai otẹrọnọ ma wo emamọ obroziẹ-iroro?

⁹ Okenọ ma họ-ame, ma yare Jihova inọ jọ ọ kẹ omai “emamọ eva.” (1 Pita 3:21) Fikinọ ma fi ẹrọwọ họ idhe ẹtanigbo na, azẹ Jesu o voro izieraha mai no, onọ u ru omai wo emamọ edikihẹ evaọ aro Ọghẹnẹ. Rekọ re ma gbe wo emamọ edikihẹ otioye, ma re wo emamọ obroziẹ-iroro.  Otẹrọnọ obroziẹ-iroro mai o re brukpe omai jẹ k’omai unuovẹvẹ ẹsejọ, eva e rẹ were omai inọ o bi ru iruo ziezi. Oyena u dhesẹ inọ obroziẹ-iroro mai o ri whu hu. (1 Tim. 4:2) Rekọ rọkẹ enọ e gwọlọ you ẹrẹreokie, obroziẹ-iroro na o wo iruo efa.

10, 11. (a) Kẹ oriruo jọ ro dhesẹ oware nọ u je fo re ma kezọ kẹ obroziẹ-iroro mai. (b) Fikieme eva e jẹ were omai otẹrọnọ ma you ẹrẹreokie?

¹⁰ Ma te ru oware uyoma, obroziẹ-iroro mai ọ sai brukpe omai. Uzoge jọ o vru no ‘edhere ẹrẹreokie’ na. O wo uruemu ifoto ẹbẹbẹ iriwo yọ o vovo ige. Udu u je brukpei nọ o te kpohọ iwuhrẹ, yọ nọ o te kpohọ usiuwoma o re rri oma riẹ wọhọ ọviẹwẹ, fikiere ọ tẹ siọ iwuhrẹ gbe usiuwoma ba. Ọ ta nọ: “Mẹ riẹ vẹre he inọ obroziẹ-iroro mẹ o ti gu omẹ ẹdhọ fiki eware nọ me je ru na.” O fibae nọ: “Oware wọhọ ikpe ene me yeri ekpehre uzuazọ.” O te mu epanọ o re ro zihe ziọ ukoko na họ eroro. Dede nọ o roro inọ Jihova o ti yo elẹ riẹ hẹ, ọ lẹ ghele jẹ yare erọvrẹ. Nọ u ri te iminiti ikpe he na, oni riẹ o te bru ei ze jẹ tuduhọ iẹe awọ inọ ọ wariẹ muọ iwuhrẹ họ ẹnya. O te kpobọ Ọgwa Uvie jẹ ta kẹ ọkpako ukoko jọ re o wuhrẹ obe kugbei. U kri hi, ọ tẹ họ-ame, yọ o yere Jihova nọ o ro siwi uzuazọ riẹ.

¹¹ Kọ ma gbẹ re ruẹ inọ o rẹ kẹ evawere gaga nọ ma te ru oware nọ u woma? Nọ ma bi wuhrẹ epanọ ma re ro you ẹrẹreokie je dhesẹ iẹe ziezi na, o te were omai gaga re ma ru oware nọ o rẹ were Ọsẹ obọ odhiwu mai. Yọ dai roro onana! Oke o be tha nọ ahwo-akpọ kpobi a ti ro wo emamọ obroziẹ-iroro; a te jọ gbagba wọhọ Ọghẹnẹ. Fikiere, joma ru re ẹrẹreokie ọ da udu mai fia re ma ru eva were Jihova.—Itẹ 23:15, 16.

12, 13. Ẹvẹ ma sai ro wuhrẹ obroziẹ-iroro mai?

¹² Eme ma rẹ sai ru ro wuhrẹ obroziẹ-iroro mai? Nọ ma tẹ kiẹ Ikereakere na gbe ebe ukoko na riwi, u re woma re ma kareghẹhọ inọ eva “ohwo nọ o kiẹrẹe o re roro didi epanọ ọ rẹ rọ kẹ uyo.” (Itẹ 15:28) Roro kpahe epanọ onana o sai ro fi obọ họ kẹ omai nọ ma tẹ rẹriẹ ovao ku ẹme iruo. O tẹ rrọ vevẹ inọ oghẹrẹ iruo jọ i kiehọ kẹ Ileleikristi hi, ibuobu mai a rẹ siọ iruo na wọhọ epanọ ọrigbo nọ o wo ẹrọwọ avọ areghẹ na o bi wuhrẹ omai na. Rekọ otẹrọnọ u mu omai ẹro ho sọ iruo na yọ enọ Oleleikristi ọ rẹ sai ru, ma rẹ roma totọ roro kpahe ehri-izi Ebaibol. * Onana o kẹre te amọfa nọ ma re ru zoruẹ hẹ. (1 Kọr. 10:31-33) Ehri-izi nọ ma rẹ mai roro kpahe họ enọ i w’obọ kugbe usu mai kugbe Ọghẹnẹ. U te mu omai ẹro inọ Jihova ọ ginẹ rrọ, ma rẹ nọ oma  mai nọ, ‘Kọ eva e te dha Jihova nọ mẹ tẹ rehọ iruo nana?’—Ol. 78:40, 41.

¹³ Nọ ma tẹ be ruẹrẹ oma kpahe kẹ Uwuhrẹ Uwou-Eroro Na hayo Uwuhrẹ Ebaibol Ukoko, u re fo re ma roro didi kpahe eware nọ ma bi se. Kọ ma be hae rọ ugidi si usi họ otọ uyo na ma vẹ la kpohọ edhe-ẹme ọfa? Otẹrọnọ ere ma be hai ru, o rẹ jọ bẹbẹ re uwuhrẹ na u ru uyoyou mai kẹ ẹrẹreokie jọ didi hayo re o lẹliẹ omai wo emamọ obroziẹ-iroro. Ma tẹ gwọlọ you ẹrẹreokie, ma rẹ roma totọ se Ebaibol na je roro didi kpahe oware nọ ma se. Re ma sae rọ udu mai kpobi you ẹrẹreokie, o gwọlọ omodawọ.

Ohọo gbe Uruame Ẹrẹreokie

14. Eme Jihova Ọghẹnẹ avọ Jesu Kristi a gwọlọ inọ ma wo nọ ma be gọ Ọghẹnẹ na?

¹⁴ Jihova Ọghẹnẹ avọ Jesu Kristi a gwọlọ re ma wereva nọ ma be gọ Ọghẹnẹ na. Eme ọ rẹ wha evawere se omai? Ẹrẹreokie nọ ma re you. Jesu ọ jọ Ovuẹ obọ Ugbehru na ta nọ: “Ahwo nọ ohọo gbe uruame ẹrẹreokie u re kpe eva e were ae, keme eva e rẹ te vọ ae.” (Mat. 5:6) Didi otofa eme nana i wo kẹ enọ e gwọlọ you ẹrẹreokie?

15, 16. Ẹvẹ eva e te rọ vọ enọ ohọo gbe uruame abọ-ẹzi u bi kpe?

¹⁵ Oyoma na họ ọnọ o bi su akpọ na. (1 Jọn 5:19) Whọ tẹ jọ orẹwho kpobi se obe-usi, who re se ku evega gbe ozighi nọ e d’akpọ fia. O rẹ da ahwo nọ a kiẹrẹe nọ a tẹ ruẹ oja nọ ahwo jọ a bi gbe kẹ amọfa. (Ọtausi. 8:9) Mai enọ e be gọ Jihova ma riẹ inọ ọye ọvo ọ rẹ sai ku ohọo gbe uruame abọ-ẹzi orọ enọ i you ẹrẹreokie họ. Ọghẹnẹ o ti kpe irumuomu no kẹle, enọ i you ẹrẹreokie a gbẹ te rioja ha fiki ekpehre uruemu ahwo oyoma. (2 Pita 2:7, 8) Ufuoma nọ oyena o te wha ze a re gbiku riẹ hẹ!

¹⁶ Mai idibo Jihova gbe ilele Jesu Kristi, ma riẹ inọ “eva e rẹ te vọ” enọ ohọo gbe uruame ẹrẹreokie u bi kpe kpobi. Eva e te vọ ae ziezi evaọ idhiwu ekpokpọ gbe akpọ ọkpokpọ nọ Ọghẹnẹ ọ ruẹrẹhọ na, enọ “ẹrẹreokie ọ be ria.” (2 Pita 3:13) Fikiere, jọ udu u whrehe omai hi inọ okienyẹ gbe ozighi i si ẹrẹreokie no akpọ Ẹdhọ nana no. (Ọtausi. 5:8) Jihova, Ọghẹnẹ Erumeru na, ọ riẹ oware nọ o be via, yọ kẹle na o ti siwi enọ i you ẹrẹreokie.

You Ẹrẹreokie re Who Wo Erere

17. Irere jọ vẹ ohwo o re wo nọ o te you ẹrẹreokie?

¹⁷Olezi 146:8 o fodẹ erere jọ nọ ohwo o re wo nọ o te you ẹrẹreokie. Ọso-ilezi na ọ so nọ: “ỌNOWO o you enọ ikiẹrẹe.” Dai roro iei. Erumeru na o re you omai nọ ma te you ẹrẹreokie. Fiki uyoyou Jihova, u mu omai ẹro inọ ọ te rẹrote omai nọ ma tẹ rọ isiuru Uvie na karo evaọ uzuazọ mai. (Se Olezi 37:25; Itẹ 10:3.) Evaọ obaro, ahwo nọ a you ẹrẹreokie ọvo a te rọ otọakpọ na reuku. (Itẹ 13:22) Rọkẹ ibuobu ahwo Ọghẹnẹ, osohwa nọ a ti wo fikinọ a you ẹrẹreokie họ evawere gbe  uzuazọ ebẹdẹ bẹdẹ evaọ aparadase otọakpọ. Makọ enẹna, enọ i you ẹrẹreokie Ọghẹnẹ a wo udhedhẹ iroro nọ o lẹliẹ okugbe rrọ iviuwou gbe ikoko rai.—Fil. 4:6, 7.

18. Eware iwoma vẹ ma rẹ sai ru nọ ma be hẹrẹ ẹdẹ Jihova na?

¹⁸ Nọ ma be hẹrẹ ẹtha ẹdẹ ologbo Jihova na, ma rẹ gbẹ gwọlọ ẹrẹreokie riẹ. (Zef. 2:2, 3) Fikiere, joma you idhere ikiẹrẹe Jihova Ọghẹnẹ ziezi. Onana o gwọlọ inọ ma rẹ wha ‘ẹgọ-ẹroo ọrọ ẹrẹreokie mai họ igbama’ re o thọ ubiudu ẹwoho mai. U te je fo re ma yọrọ emamọ obroziẹ-iroro, onọ o te wha evawere se omai je ru udu Ọghẹnẹ mai ghọghọ.—Itẹ 27:11.

19. Eme ma rẹ gbaemu inọ ma re ru, kọ eme ma te ta kpahe evaọ uzoẹme nọ o rrọ aro na?

¹⁹ “Ibiaro ỌNOWO na e rẹ nya akpọ na re re o dhesẹ ẹgba riẹ rọ kẹ enọ i wo eva efuafo rọ kpahe iẸe.” (2 Irv. 16:9) Eme yena e sasa oma kẹhẹ nọ ma bi ru oware nọ u kiehọ evaọ akpọ nana nọ ọ vọ avọ ozighi gbe emuemu na! Ginọ uzẹme inọ uruemu ezi mai o rẹ sai gbe enọ e riẹ Ọghẹnẹ hẹ unu. Rekọ irere buobu i bi te omai nọ ma bi koko izi Jihova na. (Aiz. 48:17; 1 Pita 4:4) Fikiere, joma wo evawere nọ ma be rọ udu mai kpobi you jẹ gwọlọ ẹrẹreokie na. Rekọ, onana o tẹ jẹ gwọlọ inọ ma re mukpahe emuemu. Uzoẹme nọ o rrọ aro na u ti dhesẹ oware nọ onana o gwọlọ mi omai.

[Oruvẹ-obotọ]

Ẹvẹ Whọ te k’Uyo?

• Ẹvẹ ovuhumuo kẹ ẹtanigbo na o re ro fi obọ họ kẹ omai you ẹrẹreokie?

• Fikieme o rọ r’oja re ma wha ‘ẹgọ-ẹroo ọrọ ẹrẹreokie mai họ igbama’ ẹsikpobi?

• Ẹvẹ ma sai ro wuhrẹ obroziẹ-iroro mai?

[Enọ Uwuhrẹ]

[Uwoho nọ o rrọ ẹwẹ-obe avọ 26]

Emamọ obroziẹ-iroro o re fi obọ họ kẹ omai jẹ emamọ iroro kpahe iruo