Wuhrẹ Emọ Ra re A Kẹ Amọfa Adhẹẹ

ITẸ ahwo Germany jọ o ta nọ: “Ohwo nọ o si etu no uzou, ọ rẹ sae ruọ oria kpobi.” Evaọ eria buobu, a re rri rie wọhọ emamọ uruemu otẹrọnọ ọzae o si etu no uzou re ọ tẹ te ruọ uwou omọfa hayo yere ahwo. Fikiere, otofa itẹ nọ ma fodẹ evaọ obehru na họ, nọ ohwo o te wo emamọ uruemu, ahwo a re si kẹle iẹe.

O rẹ were oma kẹhẹ nọ emaha a te bi dhesẹ emamọ uruemu! Ọsẹro okogho jọ evaọ obọ Honduras nọ ọ be hai lele inievo nọ e rrọ unuikpe sa-sa kpohọ usiuwoma ọ ta nọ, “Me muẹrohọ no inọ uruemu ọmọ nọ a riẹ yọrọ u re duobọte ohwo nọ ma be ta usiuwoma kẹ vi eme nọ mẹ ta.”

Evaọ akpọ nana nọ adhẹẹ ọ rrọ họ na, o r’oja re ma riẹ epanọ ma re yeri kugbe amọfa ziezi. Ofariẹ, Ebaibol na e hrẹ omai inọ ma ru re ‘uruemu uzuazọ mai u te kẹ usiuwoma Kristi.’ (Fil. 1:27; 2 Tim. 3:1-5) O r’oja re ma wuhrẹ emọ mai re a hae kẹ amọfa adhẹẹ. Ẹvẹ a sai ro wuhrẹ ai re a kẹ amọfa adhẹẹ n’udu ze? *

Rọ Emamọ Uruemu Ra Wuhrẹ Ai Uruemu Ezi

Emọ a re wuhrẹ no oriruo amọfa ze. Fikiere uvi edhere nọ esẹgbini a sai ro wuhrẹ emọ rai emamọ uruemu họ, ae omarai a re dhesẹ emamọ uruemu. (Izie. 6:6, 7) Re whọ jiroro kugbe ọmọ ra kpahe emamọ uruemu o r’oja, rekọ oyena ọvo u te he. Fiba oyena, who re je dhesẹ emamọ uruemu.

Roro kpahe Paula, * ọnọ oni riẹ ọvo ọ yọrọ evaọ ukoko na. Re ọ rọ adhẹẹ kẹ ahwo kpobi o jọ uruemu riẹ. Fikieme? Ọ ta nọ, “Oni mẹ o fi oriruo na h’otọ k’omai, fikiere adhẹẹ ọrọkẹ amọfa o te zihe ruọ uruemu mai.” Oniọvo jọ nọ a re se Walter o wuhrẹ emezae riẹ re a hae rọ adhẹẹ kẹ oni rai nọ ọ rrọ ukoko ho. Ọ ta nọ, “Mẹ daoma wuhrẹ emezae mẹ re a kẹ oni rai adhẹẹ ẹkwoma eme iyoma nọ  mẹ rẹ ta kpahe aye mẹ hẹ.” Walter ọ jẹ rọ Ebaibol wuhrẹ emezae riẹ kẹse kẹse, yọ ọ lẹ kẹ obufihọ Jihova. Ọmọzae riẹ jọ ọ be jọ uwou ogha Isẹri Jihova ru iruo, ọdekọ kọ ọkobaro. Emezae riẹ na a wo uyoyou gbe adhẹẹ kẹ ọsẹgboni rai.

Ebaibol e ta nọ: “Ọghẹnẹ ọ rọ Ọghẹnẹ ukpokpoma ha rekọ ọrọ udhedhẹ.” (1 Kọr. 14:33) Jihova o re ru eware riẹ kpobi kpatiẹ. Ileleikristi a rẹ rọ aro kele iei ẹkwoma uwou rai nọ a re ru fihọ kpatiẹ. Esẹgbini jọ a wuhrẹ emọ rai re a rọ ohọ hwa ehwa rai ruẹrẹhọ taure a te kpohọ isukulu, re a fi iwu rai họ oria nọ u fo, re a je fi obọ họ evaọ iruo uwou. Emọ a te muẹrohọ inọ uwou na kpobi o rrọ kpatiẹ, onana u ti ru ai rẹrote ubrukpẹ rai jẹ ruẹrẹ ekwakwa rai họ ziezi.

Ẹvẹ emọ ra a bi rri eware nọ a be jọ obọ isukulu wuhrẹ ai? Kọ a bi dhesẹ ovuhumuo kẹ eware nọ iticha rai a bi wuhrẹ ai? Kọ whai esẹgbini na wha wo edẹro kẹ eware nọ iticha a bi wuhrẹ emọ rai? Uruemu nọ who wo kpahe iticha emọ ra gbe eware nọ a bi wuhrẹ ai evaọ obọ isukulu oye emọ na a ti wo re. Kọ whọ gbẹ tuduhọ emọ na awọ re a hai yere iticha rai? Re ohwo o dhesẹ edẹro kẹ emamọ oware nọ a ru kẹe yọ emamọ edhere nọ ọ rẹ rọ rehọ adhẹẹ kẹ amọfa, o make rrọ iticha, edọkita, hayo ọhreki. (Luk 17:15, 16) Ma jiri izoge Ileleikristi kpobi nọ i wo ohẹriẹ no ibe emọ-isukulu rai ẹkwoma adhẹẹ gbe emamọ uruemu nọ a bi dhesẹ.

Enọ e rrọ ukoko na kpobi a re fi emamọ oriruo h’otọ evaọ edhesẹ emamọ uruemu. U woma kẹhẹ inọ izoge Ileleikristi a bi dhesẹ emamọ uruemu ẹkwoma ẹta eme wọhọ “iviena” gbe “whẹ kobiruo.” Nọ inievo nọ e kpako no a tẹ be rọ adhẹẹ kẹ Jihova ẹkwoma ezọ nọ a rẹ gaviẹ evaọ obọ ewuhrẹ, emaha na a te rọ aro kele ai ru ere re. Emọ a rẹ sai wuhrẹ adhẹẹ nọ a rẹ rọ kẹ amọfa ẹkwoma emamọ uruemu inievo na nọ a re muẹrohọ evaọ obọ Ọgwa Uvie. Wọhọ oriruo, Andrew nọ ọ rrọ ikpe ene o wuhrẹ epanọ o re yere enọ e kpako no nọ ọ tẹ nya vrẹ rai.

Eme ọfa esẹgbini a rẹ sai ru ro fi obọ họ kẹ emọ rai riẹ oware nọ u fo nọ a re ru? U fo re esẹgbini a roma totọ rọ iriruo nọ e rrọ Ebaibol na wuhrẹ emọ rai.—Rom 15:4.

Rehọ Iriruo nọ E Rrọ Ebaibol Wuhrẹ Ai

Okenọ Jekọp avọ uviuwou riẹ a je zihe kpobọ ẹkwotọ Kenan nọ o je yo inọ Esọ o bi bru rai ze, u muẹro inọ o wuhrẹ emọ riẹ epanọ a re g’uzou kpotọ yere ọkpako. (Emu. 33:3, 6, 7) Kọ u gbe fo re who wuhrẹ ọmọ ra uyere wọhọ “mẹrigwẹ,” hayo uyere ọfa kpobi nọ a re yere evaọ oria nọ whọ be rria? Emọ nọ i wo emamọ uruemu e rẹ wha orro se Jihova gbe esẹgbini rai.

 Daoma rehọ ikuigbe Ebaibol wuhrẹ emọ ra ohẹriẹ nọ o rrọ adhẹẹ gbe orivo. Wọhọ oriruo, okenọ Ahazaya ovie oyoma Izrẹl ọ gwọlọ ruẹ Elaeja ọruẹaro na, o te vi “oletu ẹmo ahwo udhuvẹ gbe ikpe avọ [egbaẹmo] udhuvẹ gbe ikpe riẹ” re a nyai se Elaeja ze. Oletu na ọ tẹ rọ ẹgba ta kẹ ọruẹaro na inọ o lele iei. Ere u fo nọ ọ rẹ ta ẹme kẹ ọruẹaro Ọghẹnẹ hẹ. Eme Elaeja ọ ta? Ọ ta nọ: “Otẹrọnọ mẹ ohwo Ọghẹnẹ, jọ erae i no obọ ehru ze otọ te maha owhẹ avọ udhuvẹ gbe ikpe ra.” Yọ ere o ginẹ via. “Koyehọ erae i no obọ ehru ze, e tẹ mahe iẹe avọ udhuvẹ gbe ikpe riẹ.”—2 Iv. 1:9, 10.

Ovie na o te vi oletu ọfa avọ ahwo udhuvẹ gbe ikpe riẹ bru Elaeja. Oletu yena omariẹ ọ tẹ jẹ rọ ogaga ta kẹ Elaeja inọ o lele iei. Erae i te je no obọ ehru ze te mahe ae no. Kẹsena oletu avesa avọ ahwo udhuvẹ gbe ikpe riẹ a te bru Elaeja ze. Ọzae nana ọ ta ẹme avọ adhẹẹ. O do ku Elaeja ha, ukpoye o kiguẹ be lẹe nọ: “O [ohwo] Ọghẹnẹ, mẹ lẹ owhẹ, jọ uzuazọ mẹ, gbe uzuazọ idibo udhuvẹ gbe ikpe ra nana, o jọ ghaghae eva aro ra. Ri, erae i no obọ ehru ze te mahe iletu ẹmo ọsosuọ, erọ ahwo udhuvẹ gbe ikpe avọ udhuvẹ gbe ikpe rai no; rekọ enẹna jọ uzuazọ mẹ o jọ ghaghae eva aro ra.” Kọ ọruẹaro Ọghẹnẹ ọ te ginẹ lẹ re erae i no ehru ze te mahe oletu nana nọ ozọ u bi mu nọ ọ ta ẹme avọ adhẹẹ na? Vievie! Ukpoye, ẹnjẹle Jihova ọ ta kẹ Elaeja inọ jọ o lele oletu nana. (2 Iv. 1:11-15) Kọ oyena u gbe dhesẹ epanọ adhẹẹ nọ a rẹ rọ kẹ amọfa u wuzou te?

Okenọ egbaẹmo Rom a mu Pọl ukọ na evaọ obọ etẹmpol, ọ nwani mu ẹme họ ẹta ha. Avọ adhẹẹ, ọ nọ oletu na nọ: ‘Kọ whọ sae kẹ omẹ uvẹ re mẹ ta ẹme jọ kẹ owhẹ?’ Ọ tẹ kẹ Pọl uvẹ re o gu ẹkẹ unu riẹ.—Iruẹru 21:37-40.

Okenọ a jẹ rehọ Jesu gu ẹdhọ, a tehe riẹ ovao. Rekọ ọ riẹ ẹme nọ u fo nọ ọ rẹ kpahe nọ ọ ta nọ: “Mẹ tẹ ta ẹme oyoma, who se isẹi uyoma na; rekọ o tẹ rọ nọ mẹ ta uwoma, eme whọ jẹ tehe omẹ?” Jesu ọ ta ẹme oyoma ọvo nọ a sai ro kru ei hi.—Jọn 18:22, 23.

Ebaibol na e kẹ oriruo epanọ u fo nọ ma re ru nọ a tẹ whọku omai gbe epanọ ma rẹ rọwo iruthọ mai. (Emu. 41:9-13; Iruẹru 8:20-24) Wọhọ oriruo, Abigẹle o wounu fiki oware uyoma nọ ọzae riẹ, Nebale o ru Devidi. Orọnikọ o wounu ọvo ho rekọ ọ rehọ emuore buobu kẹ Devidi. Oware nọ Abigẹle o ru na o were Devidi te epanọ, nọ Nebale o whu no, Devidi ọ tẹ rehọ iẹe.—1 Sam. 25:23-41.

O r’oja re who wuhrẹ emọ ra re a kẹ amọfa adhẹẹ evaọ otọ uyero kpobi. Edhere nana nọ ma re ro ‘ru re elo mai o lo evaọ iraro ahwo’ o rẹ wha ‘ajiri se Ọsẹ mai nọ ọ rrọ obọ odhiwu.’—Mat. 5:16.

[Oruvẹ-obotọ]