Who Wo Ẹjiroro nọ Whọ rẹ rọ Ghọghọ

EMAMA Jihova kpobi e rrọ kpatiẹ, no ekakao nọ a rẹ sae rọ ibiaro gheghe ruẹ hẹ rite eko-isi nọ e rro thesiwa. Onana o gbunu hu keme Ọmemama na yọ Ọghẹnẹ nọ ọ rrọ kpatiẹ. (1 Kọr. 14:33) Oware ofa nọ u gbunu họ epanọ Ọghẹnẹ ọ ruẹrẹ egagọ riẹ họ. Roro kpahe eware nọ Jihova o ru no. Ọ ruẹrẹ ahwo-akpọ gbe ijẹle ima buobu họ re a jọ ukoko ehrugbakpọ riẹ, enọ i wo ufuoma iroro-ejẹ, re a jọ okugbe ọvo evaọ egagọ uzẹme. U gbunu kẹhẹ!

Evaọ oke emọ Izrẹl, Jerusalẹm o dikihẹ kẹ abọ otọakpọ ọrọ ukoko Ọghẹnẹ, yọ etẹe etẹmpol Jihova gbe ovie nọ Ọghẹnẹ o ro mu e jọ. Enẹ ohwo Izrẹl jọ nọ a mu kpohọ igbo Babilọn ọ ta kpahe okpẹwho ọrẹri na: “Jọ ẹrọo mẹ ọ tamu omẹ unu, otẹrọnọ mẹ gbẹ kareghẹhọ owhẹ hẹ, orọnọ mẹ gbẹ rehọ Jerusalem ru uzou oghọghọ mẹ hẹ.”—Ol. 137:6.

Kọ ere who rri ukoko Ọghẹnẹ nẹnẹ? Kọ o be wha oghọghọ se owhẹ vi oware ofa kpobi? Kọ emọ ra a riẹ epanọ abọ otọakpọ ọrọ ukoko Ọghẹnẹ u ro muhọ gbe iruo nọ u bi ru? Kọ a riẹ inọ a rrọ abọjọ ọrọ okugbe inievo akpọ-soso ọrọ Isẹri Jihova? (1 Pita 2:17) Re ahwo uviuwou ra a sai rri ukoko Jihova ghaghae ziezi, kọ wha gbẹ rọ eware nọ ma ta fihọ obotọ na ro ru Uwuhrẹ Ebaibol Uviuwou rai ẹsejọ?

Kareghẹhọ “Oke Anwae”

Kukpe kukpe, emọ Izrẹl a re kokohọ kẹ ehaa Ọnyavrẹ na. Okenọ a to ehaa na họ, Mosis ọ ta kẹ ahwo na nọ: “Eva okenọ o be tha ọmọzae ra ọ vẹ te nọ owhẹ nọ, ‘Kọ eme onana u dhesẹ?’ Whọ vẹ ta kẹ ẹe nọ, ‘Obọ ogaga ỌNOWO na ọ rọ rehọ omai no obọ Ijipti ze, no uwou igbo nọ ma jọ.’” (Ọny. 13:14) Oware nọ Jihova o ru kẹ emọ Izrẹl no o rẹ thọrọ ae ẹro ho. Ababọ avro, esẹ buobu evaọ Izrẹl a ru lele ohrẹ Mosis na. Nọ ikpe buobu e vrẹ no, ohwo Izrẹl jọ ọ lẹ nọ: “O Ọghẹnẹ, ma rehọ ezọ mai yo, esẹ mai e ta kẹ omai no, iruo no who ru evaọ edẹ rai, evaọ oke anwae.”—Ol. 44:1.

Rọkẹ izoge buobu nẹnẹ, ikuigbe Isẹri Jihova evaọ ikpe buobu nọ i kpemu e rẹ sae wọhọ “oke anwae.” Eme whọ rẹ sai ru re ikuigbe na i vẹ emọ ra ẹro ziezi? Re a sai ru ere, esẹgbini jọ a rehọ ebe mai jọ ta ẹme kugbe emọ rai no, ebe wọhọ Jehovah’s Witnesses—Proclaimers of God’s Kingdom, Yearbook, ikuigbe uzuazọ inievo mai nọ e rrọ emagazini mai, gbe ebe efa nọ a kere ikuigbe Isẹri Jihova fihọ, kugbe DVD ọkpokpọ mai nọ o ta kpahe ahwo Ọghẹnẹ erọ ọgbọna. Ividio mai nọ e ta kpahe ukpokpoma nọ u te inievo mai nọ e rrọ obọ Russia gbe Germany u wuhrẹ iviuwou re a rẹroso Jihova evaọ oke edawọ. Wha rẹ sai rri ividio itieye na evaọ Uwuhrẹ Ebaibol Uviuwou rai. O te lẹliẹ ẹrọwọ emọ ra ga otẹrọnọ a nyaku edawọ.

Rekọ u re kru emaha ẹbẹ hẹ nọ who te bi gbiku anwae kẹ ae. Fikiere ru re emọ ra a kpahe fihọ ikuigbe na. Wọhọ oriruo, whọ rẹ sae ta kẹ ọmọ ra re ọ salọ orẹwho nọ o were riẹ, ọ vẹ kiẹ kpahe epanọ iruẹru Isẹri Jihova i ro muhọ evaọ orẹwho na, jẹ ta  eware nọ ọ kiẹ via kẹ uviuwou na soso. Ẹsejọhọ inievo nọ e gọ Ọghẹnẹ kri no a rrọ ukoko ra enọ e rẹ sai kuomagbe owhai evaọ etoke uwuhrẹ Ebaibol uviuwou rai. Whọ sae ta kẹ ọmọ ra jọ re ọ kiẹ inievo yena riwi re a ta eware nọ e via kẹ ae anwẹnọ a ro kurẹriẹ. Hayo whọ sae ta kẹ ọmọ ra re ọ drọ ifoto uwou ogha jọ, okokohọ akpọ-soso, hayo itepu nọ a jẹ hae rọ ta usiuwoma n’uwou ruọ uwou.

Riẹ Oghẹrẹ nọ ‘Kabọ Kabọ O bi Ru Iruo’ Riẹ

Pọl ukọ na ọ rehọ ukoko Ileleikristi na dhesẹ “oma na kpobi, [onọ] o whẹgbe je ko kugbe eva ọwhẹgbe kpobi nọ a rọ ze, okenọ kabọ kabọ o te bi ru iruo ziezi ovẹ kẹ oma na oro gbe ekokohọ eva uyoyou.” (Ẹf. 4:16) Ma tẹ riẹ epanọ ugboma ohwo-akpọ u re ru iruo, u re ru omai jiri Ọnọ ọ ma omai na je wo adhẹẹ kẹe. Epọvo na re, ma tẹ riẹ epanọ ukoko na u bi ru iruo, “ubu areghẹ Ọghẹnẹ” u re gb’omai unu.—Ẹf. 3:10.

Jihova o dhesẹ epanọ ukoko riẹ, te ọrọ abọ obọ odhiwu, o rrọ. Wọhọ oriruo, ọ ta kẹ omai inọ Jesu Kristi họ ohwo nọ o dhesẹ eware ididi kẹ, Jesu o ‘te ru ai via kẹ ukọ-odhiwu riẹ nọ o vi se Jọn odibo riẹ.’ (Evia. 1:1, 2) Otẹrọnọ Ọghẹnẹ o dhesẹ epanọ abọ ukoko riẹ nọ a rẹ ruẹ hẹ o rrọ, kọ ọ gbẹ gwọlọ re ma riẹ kpahe epanọ abọ ukoko riẹ nọ ọ rrọ otọakpọ u bi ru iruo?

Wọhọ oriruo, otẹrọnọ ọsẹro okogho o bi ti weze ziọ ukoko rai kẹle, kọ wha gbẹ ta kpahe ewha-iruo esẹro ọnyawariẹ? Ẹvẹ a bi ro fi obọ họ kẹ omai omomọvo? Enọ efa nọ ma rẹ sae ta kpahe họ: Fikieme o rọ r’oja re ma niyẹrẹ usiuwoma ota mai? Ẹvẹ ukoko na u bi ro wo ugho nọ a be rọ wha iruo na haro? Iruo sa-sa vẹ Ugboma Esuo na o be rẹrote, kọ ẹvẹ o be rọ k’omai emuore abọ-ẹzi?

Nọ ma tẹ riẹ epanọ a ruẹrẹ idibo Jihova họ, ma re wo erere evaọ idhere esa jọ: O rẹ lẹliẹ omai wo edẹro kẹ enọ i bi ru iruo fiki mai na. (1 Tẹs. 5:12, 13) U re ru omai nya lele ọruẹrẹfihotọ nọ a fihọ evaọ ukoko na. (Iruẹru 16:4, 5) Ofariẹ, u re ru omai fievahọ enọ e be rẹrote omai na nọ ma tẹ riẹ izi Ebaibol nọ e be kpọ iroro-ejẹ gbe ọruẹrẹfihotọ rai.—Hib. 13:7.

“Nya Eria Adhẹzọ Riẹ Wariẹ”

“Nya Zayọn wariẹ, nyae ghelie họ, kele iwou ikpehru riẹ. Fiẹrohọ igbẹhẹ riẹ, whọ vẹ jẹ nya eria adhẹzọ riẹ wariẹ; re whọ ruẹ iku gbekẹ ige nọ e be tha.” (Ol. 48:12, 13) Ọso-ilezi na ọ jọ ikere yena tuduhọ emọ Izrẹl awọ re a bi kẹle Jerusalẹm je riwi ei ziezi. Kọ who gbe roro nọ iviuwou nọ i kpohọ Jerusalẹm rọkẹ ehaa nọ a jẹ hai ru kukpe kukpe, jẹ ruẹ etẹmpol oride na, a ruẹ eware iwoma buobu nọ e rẹ thọrọ ae ẹro ho? Ababọ avro, a rehọ eware nọ a ruẹ na gbiku kẹ ige efa.

Roro kpahe ovie-aye obọ Shiba, ọnọ ọ jẹ kake vro eme nọ o yo kpahe esuo gbe areghẹ Solomọn. Fikieme ọ rọ rọwo uwhremu na inọ eme nọ o yo na ginọ uzẹme? Ọ ta nọ: “Iyayo na i mu omẹ ẹro bẹsenọ mẹ rọ nyaze te rehọ ibiaro mẹ ruẹ na ha.” (2 Irv. 9:6) Ẹhẹ, eware nọ ma “rehọ ibiaro” mai ruẹ i re kpomahọ omai gaga.

Ẹvẹ whọ sai ro fi obọ họ kẹ emọ ra “rehọ ibiaro” rai ruẹ nọ ukoko Jihova u gine gbunu gaga? Otẹrọnọ uwou ogha ọrọ Isẹri Jihova ọ rrọ orẹwho nọ whọ be rria, daoma weze kpohọ etẹe. Wọhọ oriruo, oria nọ a jọ yọrọ Mandy avọ Bethany o rehọ emaele egba izii (900) thabọ no uwou ogha nọ o rrọ orẹwho rai. Ghele na, ọsẹgboni rai a jẹ hae rehọ ae kpohọ etẹe kẹse kẹse, maero nọ emetẹ ivẹ rai Mandy avọ Bethany a jọ emaha. Emọ na e ta nọ: “Taure ma te ti kpohọ Ebẹtẹle nyai rri ughe na, ma je roro nọ  ahwo nọ a kpako no ọvo a re kpohọ Ebẹtẹle nyai ru iruo. Rekọ nọ ma te obei, ma tẹ ruẹ emoha nọ i bi ru iruo kẹ Jihova, yọ a be reawere iruo na! Ma ruẹ nọ ukoko Jihova o rro gaga vi onọ ma be ruẹ evaọ oria nọ ma be rria, yọ oke kpobi nọ ma kpohọ Ebẹtẹle, ajọwha nọ ma rẹ rọ gọ Jihova ziezi ọ rẹ ruọ omai oma.” Eware nọ Mandy avọ Bethany a ruẹ kpahe ukoko na o wọ rai muọ iruo ọkobaro họ, yọ a tube zizie ai re a ru iruo omoke jọ evaọ Ebẹtẹle.

Ma wo eware efa nọ i bi fi obọ họ kẹ omai wo otoriẹ ukoko Jihova ziezi, enọ emọ Izrẹl oke anwae a wo ho. Umutho ikpe nọ e vrẹ na, ividio gbe DVD oghoghẹrẹ i te Isẹri Jihova obọ, enọ e ta kpahe abọ sa-sa ọrọ ukoko Ọghẹnẹ, ividio wọhọ: Jehovah’s Witnesses—Organized to Share the Good News, Our Whole Association of Brothers, To the Ends of the Earth, gbe United by Divine Teaching. Nọ te owhẹ gbe uviuwou ra wha tẹ ruẹ omodawọ inievo mai nọ e rrọ obọ Ebẹtẹle, enọ e dhogbo bru enọ eware okpẹtu e via kẹ, gbe enọ e be ruẹrẹ iruẹru ikokohọ họ, u ti ru owhai wo edẹro gaga kẹ okugbe-inievo akpọ-soso mai na.

Ukoko kpobi orọ Isẹri Jihova u bi wo obọ evaọ ẹta usiuwoma na gbe obufihọ kẹ inievo ukoko na. Ghele na, daoma re te owhẹ te uviuwou ra wha hae rehọ oke kareghẹhọ “imoni ra nọ erọ akpọ na soso.” Onana u ti fi obọ họ kẹ owhẹ gbe emọ ra “dikihẹ ga eva orọwọ” na, je vuhumu inọ who wo ẹjiroro nọ whọ rẹ rọ ghọghọ.—1 Pita 5:9.

 [Ẹkpẹti/Uwoho nọ e rrọ ẹwẹ-obe avọ 18]

Ukoko Ọghẹnẹ U Fo re Ma Riẹe Ziezi

Ma wo ebe buobu nọ i re fi obọ họ kẹ omai wuhrẹ kpahe ikuigbe ukoko Jihova gbe oghẹrẹ nọ u bi ru iruo. Enọ nọ e rrọ obotọ na e rẹ sai fi obọ họ kẹ owhẹ muhọ.

☞ Oghẹrẹ vẹ iruo esẹro ọnyawariẹ i ro muhọ evaọ oke mai na?—Jehovah’s Witnesses—Proclaimers of God’s Kingdom, ẹwẹ-obe avọ 222-227.

☞ Eme ọ via evaọ ẹdẹ nọ a se nnọ “Ẹdẹ Emaha Na” eva okokohọ ubrotọ nọ a ru evaọ 1941?—Jehovah’s Witnesses—Proclaimers of God’s Kingdom, ẹwẹ-obe avọ 86, 88.

☞ Oghẹrẹ vẹ A Ruẹrẹ Ugboma Esuo na Họ?—Uwou-Eroro Na ọrọ May 15, 2008, ẹwẹ-obe avọ 29.