Kọ O Be Were Owhẹ re Who Se Ẹme Ọghẹnẹ?

ONIỌVO-ỌMỌTẸ jọ nọ a re se Lorraine ọ ta nọ: “Nọ me muọ Ebaibol họ ese ẹsikpobi, o jẹ hai fou omẹ eho. O jọ bẹbẹ re me wo otoriẹ eware nọ me je se, fikiere ẹsibuobu iroro mẹ e jẹ hae dhẹ no eware nọ me bi se.”

Amọfa a ta nọ evaọ oke ọsosuọ, isase Ebaibol e jẹ were ae oma ha. Ghele na, a ruabọhọ isase na keme a riẹ nọ ese Ikereakere Ẹri na yọ oware nọ u fo eruo. Marc ọ ta nọ: “Ma gbẹ yọroma ha, eware efa e rẹ sae rehọ oke nọ ma re ro se Ebaibol je ru iwuhrẹ omobọ mai. Re isase Ebaibol ikẹdẹ kẹdẹ o sae jọ abọjọ uruemu mẹ, mẹ lẹ jẹ daoma gaga.”

Eme whọ rẹ sai ru re whọ ruẹ nọ who se Ebaibol na gboja ziezi? Ẹvẹ whọ sae rọ reawere isase Ebaibol? Roro kpahe iroro-ejẹ nọ e rrọ aro na.

Itee gbe Onaa

Re who te muọ Ebaibol họ ese, lẹ je fi iroro ra kpobi họ isase na. Lẹ se Jihova re o fi obọ họ k’owhẹ wo ọwhọ kẹ ese Ẹme riẹ. Yare iẹe re o rovie udu gbe iroro ra re who wo otoriẹ ẹme riẹ ziezi. (Ol. 119:34) Who gbe ru onana ha, who ve ti muọ Ebaibol na họ ese ehruehru, uwhremu na o vẹ te bẹ owhẹ no. Lynn ọ ta nọ: “Ẹsejọ mẹ rẹ varioma te epanọ me gbe ro muẹrohọ eme jọ nọ i wuzou hu. Ẹsibuobu, ugogo eme na i re vẹ omẹ ẹro ho. Rekọ mẹ lẹ kẹ oma-oriẹsuo, yọ onana u bi fi obọ họ k’omẹ nọ iroro mẹ e gbẹ dhẹ no eware nọ me bi se he.”

Rri eware nọ who bi wuhrẹ ghaghae. Kareghẹhọ inọ ewo otoriẹ gbe efihiruo eme Ebaibol e rẹ kẹ owhẹ uzuazọ. Fikiere, daoma gaga re whọ ruẹ eme nọ whọ rẹ sai fihọ iruo evaọ uzuazọ. Chris ọ ta nọ: “Mẹ rẹ jọ Ebaibol na gwọlọ eme nọ i re ru omẹ vuhu iruemu iyoma nọ me wo. O rrọ oware omawere kẹ omẹ gaga inọ Ebaibol na gbe ebe mai buobu i wo evuẹ nọ e be k’omẹ erere, dede nọ enọ i kere i rai a riẹ omẹ hẹ.”

Fi itee nọ whọ rẹ sai le t’obọ họ kẹ oma ra. Daoma wuhrẹ oware okpokpọ jọ kpahe ahwo nọ iku rai e rrọ Ebaibol. Whọ rẹ sai wuhrẹ eware nọ e te were owhẹ kpahe ibuobu rai evaọ Insight on the Scriptures gbe Watch Tower Publications Index. Nọ who bi wuhrẹ kpahe ezae gbe eyae nọ a gbiku rai fihọ Ebaibol na, iriruo rai i ti duobọte owhẹ udu gaga.

Rri Ikereakere na no abọ sa-sa ze. (Iruẹru 17:2, 3) Sophia o je ru onana evaọ isase Ebaibol riẹ. Ọ ta nọ: “O rrọ isiuru mẹ re mẹ gwọlọ idhere ekpokpọ nọ mẹ rẹ rọ rehọ ikere na ru iruo evaọ odibọgba mẹ gbe evaọ oke ofa re mẹ sae rọ ududu t’ẹme kpahe iwuhrẹ Ebaibol. Uwou-Eroro Na u bi fi obọ họ k’omẹ ru onana.”—2 Tim. 2:15.

Jọ iroro ra ruẹ ikuigbe Ebaibol. Ahwo Hibru 4:12 o ta nọ ẹme Ọghẹnẹ ọ rrọ uzuazọ. Nọ who bi se Ikereakere na, rehọ iẹe  wọhọ ẹsenọ whọ jọ etẹe, be ruẹ eware nọ ahwo na a jẹ ruẹ, bi yo eware nọ a je yo, o vẹ jẹ jọ owhẹ oma wọhọ epanọ o jarae oma. Roro kpahe oghẹrẹ nọ eware nọ e via kẹ ae e rọ wọhọ enọ e be via k’owhẹ. Wuhrẹ no oware nọ a ru kpahe ebẹbẹ jọ ze. Onana u ti ru owhẹ wo otoriẹ ikuigbe Ebaibol, e vẹ jẹ jọ owhẹ uzou oke krẹkri.

Rehọ oke ziezi ro wuhrẹ kpahe Ikereakere nọ e rrọ gaga gbe oghẹrẹ nọ a jọ ebe mai f’otọ rai re who wo otoriẹ rai. Ruẹrẹ oke họ ziezi nọ who te bi wuhrẹ kpahe ikere itieye na. Whọ rẹ sae nyaku enọ jọ nọ i si owhẹ urru nọ whọ te gwọlọ kiẹ didi kpahe. Rri iruvẹ-obotọ, gbe eria Ebaibol efa nọ oria nọ who bi se na o riobọhọ. Who te wo otoriẹ oria nọ who se je fi ei họ iruo, ese Ẹme Ọghẹnẹ o te were owhẹ oma. Kẹsena whọ vẹ te ta wọhọ ọso-ilezi na inọ: “Isẹri-ise ra [Jihova] họ uku mẹ bẹdẹ, uzẹme, eye họ oghọghọ eva mẹ.”—Ol. 119:111.

Whọ varioma ha evaọ isase na. Iminiti hayo euwa nọ i kiehọ owhẹ oma whọ rẹ raha. Jẹ kareghẹhọ inọ whọ te ruẹrẹ oma kpahe kẹ iwuhrẹ ukoko. Raquel ọ ta nọ: “O rẹ jọ bẹbẹ k’omẹ ẹsibuobu re iroro mẹ e jọ uwuhrẹ na. Fikiere mẹ rẹ raha oke thethei ro ru uwuhrẹ na ha. Onana u re fi obọ họ k’omẹ wo erere ziezi no uwuhrẹ na ze.” Chris ọ ta nọ: “Nọ mẹ tẹ be varioma ru uwuhrẹ Ebaibol, udu mẹ u re gu omẹ ẹdhọ keme mẹ rẹ kareghẹhọ eware nọ me wuhrẹ tere he. Eware nọ me wuhrẹ i re te omẹ udu hu.” Fikiere, whọ varioma ha.

Wo isiuru gaga kẹ ẹme Ọghẹnẹ. Pita ukọ na ọ ta nọ: “Wọhọ emọ eboba, wha guọlọ ame-ivie Ẹzi, re wha rọ fiki riẹ ro bru usiwo.” (1 Pita 2:2) Ame-ivie ọ rẹ were ọmọ no eva oni riẹ ze. O re du wuhrẹ iẹe he. Rekọ Ikereakere na i dhesẹ inọ re ma wo isiuru kẹ ẹme Ọghẹnẹ, ma re wuhrẹ iẹe. Who te bi se makọ ẹwẹ-obe ọvo evaọ Ebaibol na kẹdẹ kẹdẹ, isiuru na e te nyaze. Oware nọ who je rri bẹbẹ vẹre na u ve ti mu owhẹ họ ẹwere.

Roro didi kpahe eria Ebaibol nọ who se. Who re je wo irere buobu nọ who te roro didi kpahe eware nọ who se. Onana u re fi obọ họ kẹ owhẹ riẹ epanọ eware jọ nọ whọ jọ Ebaibol na wuhrẹ i ro w’obọ kugbe  efa. U ti kri hi, who ve ti wo eriariẹ Ikereakere na kokodo ziezi.—Ol. 19:14; Itẹ 3:3.

Oke nọ Whọ Raha O Rrọ Uvrẹvru Hu

O gwọlọ omodawọ re ohwo ọ ruẹrẹ oke họ kẹ uwuhrẹ Ebaibol jẹ hai ru ei ẹsikpobi, rekọ irere nọ i re noi ze i re buobu. Onana u ti ru owhẹ wo otoriẹ Ikereakere na didi ziezi. (Hib. 5:12-14) Orimuo gbe areghẹ nọ who ti wo no Ikereakere na ze e te k’owhẹ evawere gbe udhedhẹ. Nọ ohwo o te wo eriariẹ Ebaibol je fi ai họ iruo, o rẹ wọhọ “ure uzuazọ” kẹe.—Itẹ 3:13-18.

Whọ tẹ be roma totọ wuhrẹ Ẹme Ọghẹnẹ, u re ru owhẹ wo otoriẹ. (Itẹ 15:14) Onana u re fi obọ họ k’owhẹ kẹ amọfa ohrẹ nọ u no Ebaibol ze. Otẹrọnọ eme nọ who se evaọ Ebaibol na gbe ebe ọ ‘ọrigbo nọ o wo ẹrọwọ avọ areghẹ na’ i bi kpomahọ iroro-ejẹ ra, who ti wo omofọwẹ nọ u re no obọ Jihova ze. (Mat. 24:45) Ẹme Ọghẹnẹ o ve ti kpomahọ kabọ kabọ uzuazọ ra. Ofariẹ, oware kpobi nọ who ru evaọ ukoko na u ve ti woma k’owhẹ.—Ol. 1:2, 3.

Uvi uyoyou nọ who wo kẹ Ọghẹnẹ o te wọ owhẹ ta oware nọ whọ rọwo kẹ amọfa. Onana o te wha irere se owhẹ re. Sophia ọ be daoma re ọ kareghẹhọ eria Ebaibol sa-sa nọ ọ rẹ rọ ruọ enọ ọ be ta usiuwoma kẹ oma, re o je wo onaa ziezi evaọ odibọgba riẹ. Ọ ta nọ: “Whọ tẹ ruẹ oma nọ u bi mu ahwo fiki eme nọ whọ be ta no Ebaibol ze, o rẹ kẹ evawere.”

Rekọ erere nọ ọ mae ro nọ ma te wo isiuru kpahe Ẹme Ọghẹnẹ họ, o rẹ lẹliẹ usu nọ ma wo kugbe Jihova jọ kpekpekpe. Uwuhrẹ Ebaibol o rẹ lẹliẹ owhẹ riẹ itee Ọghẹnẹ je wo otoriẹ uyoyou, ọghọruo, gbe uvi-oziẹ riẹ. Oware ofa nọ o rẹ kẹ erere je wuzou vi onana o riẹ hẹ. Se ewuhrẹ Ẹme Ọghẹnẹ gboja ziezi. Oke nọ whọ raha ro ru ere o rrọ uvrẹvru vievie he.—Ol. 19:7-11.

[Ẹkpẹti/Iwoho nọ e rrọ ẹwẹ-obe avọ 5]

ESE EBAIBOL: ITEE GBE ONAA

▪ Re who te muọ Ebaibol họ ese, lẹ je fi iroro ra kpobi họ isase na.

▪ Rri eware nọ who bi wuhrẹ ghaghae.

▪ Fi itee nọ whọ rẹ sai le t’obọ họ kẹ oma ra.

▪ Rri Ikereakere na no abọ sa-sa ze.

▪ Jọ iroro ra ruẹ ikuigbe Ebaibol.

▪ Rehọ oke ziezi ro wuhrẹ kpahe Ikereakere nọ e rrọ gaga gbe oghẹrẹ nọ a jọ ebe mai f’otọ rai re who wo otoriẹ rai.

▪ Whọ varioma ha evaọ isase na.

▪ Wo isiuru gaga kẹ ẹme Ọghẹnẹ.

▪ Roro didi kpahe eria Ebaibol nọ who se.

[Uwoho nọ o rrọ ẹwẹ-obe avọ 4]

Nọ who te bi se Ikereakere, rri oma ra wọhọ ẹsenọ whẹ oware na o via kẹ