Lele Kristi, Osu Ọgbagba Na

ẸSIBUOBU, enọ i lele isu ahwo-akpọ a rẹ vioja. Rekọ oghẹrẹ nọ isuẹsu Kristi i re kpomahọ enọ e rrọ otọ riẹ u wo ohẹriẹ gaga. Jesu ọ ta nọ: “Whai e ruẹ uye gbe enọ e wha owha ogbẹgbẹdẹ kpobi, wha bru omẹ ze, mẹ rẹ kẹ owhai udhedhẹ. Rehọ owhowha mẹ wha, wha wuhrẹ mi omẹ, keme me re wowolẹ jegbọ eva i ro kpotọ, wha rẹ te ruẹ udhedhẹ kẹ izi rai.” (Mat. 11:28, 29) Isuẹsu Jesu e rẹ wha omosasọ ze. O wo isiuru kpahe iwhrori gbe enọ e be rioja, bi zizie ai re a rehọ owhowha riẹ. Kọ eme o gwọlọ re ma lele isuẹsu Jesu?

Pita ukọ na o kere nọ: “Kristi ọ ruẹ uye kẹ owhai no re, o te fi oriruo họ-otọ kẹ owhai re wha rọ kpahe ithihi riẹ.” (1 Pita 2:21) Ẹvẹ u wuzou te re ma lele ithihi Jesu? Dae rehọ iẹe nọ whẹ avọ amọfa jọ wha be nya otọ nọ a tọ ebọmbo fihọ vrẹ, yọ omọvo evaọ usu rai na ọ riẹ epanọ a sae rọ nya oria utioye vrẹ ababọ omonwa. Kọ whọ gbẹ rọ kpahe ithihi ohwo yena kpekpekpe? Epọvo na, re ma sae rria bẹdẹ bẹdẹ, ma re lele oriruo Jesu. Onana o gwọlọ nọ ma rẹ gaviezọ je yoẹme kẹe, ma ve je yoẹme kẹ enọ o ro mu evaọ ukoko na.

Gaviezọ je Yoẹme

Nọ Jesu ọ whoma ku Ovuẹ obọ Ugbehru riẹ họ no, ọ ta nọ: “Kohwo kohwo nọ o yo eme mẹ nana o te ru ai ọ rẹ te jọ wọhọ ohwo owareghẹ nọ ọ bọ uwou riẹ họ ehru utho; oso o hwẹze, [evo] e vọze, ifou i fou e tẹ tehe uwou na, u nwo ho, fiki epanọ a bọ e họ ehru utho.”—Mat. 7:24, 25.

Jesu ọ ta nọ ohwo nọ ọ gaviezọ je yoẹme kẹe yọ “ohwo owareghẹ.” Kọ ma be rehọ uvi ẹmeoyo mai dhesẹ nọ ma rri oriruo Kristi ghare gaga, manikọ ijaje Jesu nọ e lọhọ omai obọ ọvo ma bi koko? Jesu ọ ta nọ: “Me bi ru eware nọ e be were [Ọghẹnẹ] kẹse kẹse.” (Jọn 8:29) Joma daoma rọ aro kele oriruo yena.

Evaọ ikpe-udhusoi ọsosuọ, ikọ na a fi emamọ oriruo orọ omaurokpotọ kẹ isuẹsu Kristi h’otọ. Ẹdẹjọ Pita ọ ta kẹ Jesu nọ: “Ri ma siọ eware mai kpobi ba, ma te lele owhẹ.” (Mak 10:28) Evaọ uzẹme, ikọ na a rri isuẹsu Jesu ghare te epanọ a rọ nya siọ eware efa kpobi ba re a lele Jesu.—Mat. 4:18-22.

Yoẹme kẹ Enọ Kristi O ro Mu Na

Omoke jọ taure oke uwhu Jesu u te ti te, ọ fodẹ edhere ọfa nọ ma sai ro lele esuo riẹ. Ọ ta nọ: “Ọnọ ọ rehọ ọnọ me vi ọ rehọ omẹ.” (Jọn 13:20) Evaọ uzẹme, Jesu o se enọ a rọ ẹzi wholo na “imoni” riẹ. (Mat. 25:40) Nọ Jesu ọ kparoma kpobọ odhiwu no, ọ tẹ rehọ “imoni” riẹ mu re a rehọ ẹta riẹ, a tẹ rrọ “unuẹworo Kristi” bi zizie amọfa re a te ruẹrẹhọ kugbe Jihova Ọghẹnẹ. (2 Kọr. 5:18-20) Evuhumu isuẹsu Kristi o gwọlọ nọ ma rẹ roma kpotọ kẹ “imoni” riẹ.

 Fikiere o r’oja re ma kiẹ oma mai riwi sọ ma bi lele ithubro nọ e rrọ ebe ukoko na. Nọ ma te bi se Ebaibol je kpohọ iwuhrẹ ukoko ẹsikpobi, u re fi obọ họ k’omai kareghẹhọ eme nọ Kristi ọ ta. (2 Pita 3:1, 2) Nọ ma tẹ be re emu abọ-ẹzi ẹsikpobi yọ ma bi dhesẹ nọ ma se emu na gboja. Kọ ẹvẹ o be hae jọ omai oma otẹrọnọ a wariẹ ithubro jọ unuẹse jọ? Wọhọ oriruo Ebaibol ọ k’omai ohrẹ inọ “evaọ Ọnowo na” ọvo ma rẹ jọ rọo. (1 Kọr. 7:39) O vrẹ ikpe udhusoi no nọ ẹme nana ọ be hae rọ roma via evaọ Uwou-Eroro Na. Inievo Kristi a be rọ ehrẹ itienana gbe efa nọ a bi kere fihọ ebe mai ro dhesẹ nọ a gwọlọ nọ ma gọ Jihova ziezi. Ezọgaviẹ kẹ eme itienana yọ edhere jọ nọ ma re ro dhesẹ nọ ma bi lele Jesu Kristi, Osu ọgbagba mai na.

Obe Itẹ 4:18 o ta nọ: “Edhere enọ i kiẹrẹ ọ wọhọ elo irioke, nọ u re he lo gahọ ri te udevie uvo.” Ẹhẹ, isuẹsu Jesu e be nyaharo. Edhere ọfa nọ ma re ro dhesẹ nọ ma be roma kpotọ kẹ “imoni” Kristi họ, eva nọ e rẹ were omai nọ ‘ọrigbo nọ o wo ẹrọwọ avọ areghẹ na’ o te ru inwene jọ kpahe otoriẹ mai orọ oria Ebaibol jọ.—Mat. 24:45.

Ma re je dhesẹ nọ ma be roma kpotọ kẹ “imoni” Kristi nọ ma te bi yoẹme kẹ esẹro nọ a ro mu evaọ ukoko na. Pọl ukọ na ọ ta nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai.” (Hib. 13:17) Wọhọ oriruo, ọkpako ukoko jọ ọ rẹ sae tuduhọ omai awọ kpahe epanọ o r’oja te re ma ru Uwuhrẹ Ebaibol Uviuwou hayo k’omai ohrẹ kpahe abọjọ odibọgba mai. Ọsẹro ọnyawariẹ ọ sae kẹ omai emamọ ohrẹ jọ no Ebaibol ze kpahe oghẹrẹ uruemu jọ. Nọ ma tẹ be rọ unevaze fi ohrẹ utioye na h’iruo, u dhesẹ nọ ma bi lele Jesu, Osu mai.

Emamọ isuẹsu e rrọ akpọ na ha. Rekọ ma re wo omosasọ nọ ma te lele esuo Kristi. Fikiere, joma daoma re ma yoẹme kẹ Osu mai gbe enọ o bi ro ru iruo nẹnẹ.

[Iwoho nọ e rrọ ẹwẹ-obe avọ 27]

Kọ who bi fi ohrẹ Ebaibol na họ iruo inọ whọ ruọ orọo kugbe ohwo nọ ọ rrọ ukoko ho?