“Uvi Ọsẹro gbe Ogbẹnyusu Ọghaghae”

JOHN (JACK) BARR, ọnọ ọ jọ omọvo Ugboma Esuo ọrọ Isẹri Jihova, o whu evaọ ohiohiẹ Ẹdẹ-Ọmaha, December 4, 2010. Ọ kpako te ikpe 97. A dhesẹ i rie wọhọ “uvi ọsẹro gbe ogbẹnyusu ọghaghae.”

A yẹ Brọda Jack Barr evaọ Aberdeen, Scotland, ọye họ ọmaha evaọ emọ esa nọ ọsẹgboni riẹ a yẹ. Ọsẹgboni riẹ a jọ ikpodhiwu. Brọda Barr ọ jẹ hae rọ evawere gbiku kpahe oghẹrẹ nọ uviuwou rai o jọ okenọ ọ gbẹ jọ ọmaha; eva e were riẹ fiki obọdẹ oriruo nọ ọsẹgboni riẹ a fihọ kẹe.

Nọ o te ikpe ikpegbọ no, o jọ bẹbẹ kẹe gaga re ọ ta ẹme kẹ erara. Rekọ ọ daoma gaga re o fi ẹbẹbẹ nana kparobọ, fikiere evaọ uvo Ẹdoka jọ evaọ 1927, nọ ọ jọ ikpe 14, ọ tẹ ta kẹ ọsẹ riẹ inọ ọ ruẹrẹ oma kpahe no re o lele iei kpohọ usiuwoma n’uwou ruọ uwou. Ere o ro muọ odibọgba riẹ họ. No ẹdẹ ọyena rite ẹdẹ uwhu riẹ, Brọda Barr ọ jẹ rrọ ọwhọ ta usiuwoma na.

Fiki asidẹnte jọ nọ oni riẹ o wo nọ o je ti kpei no, o tẹ whai ze nọ Jack o ro roro gaga kpahe ẹjiroro uzuazọ, evaọ 1929 ọ tẹ rehọ oma riẹ mudhe kẹ Jihova, ọ tẹ te họ-ame nọ uvẹ na u rovie evaọ 1934. Evaọ 1939, o te zihe ruọ omọvo uviuwou Ebẹtẹle evaọ obọ London, England. Ere ọ rọ ruọ iruo odibọgba oke-kpobi nọ o ru evaọ ikpe nọ i bu te 71.

Evaọ October 29, 1960, Brọda Barr ọ tẹ ruọ oware nọ o se “obọdẹ usu” nọ ọ rọo Mildred Willett, oniọvo-ọmọtẹ nọ ọ rrọ iruo ọkobaro gbe imishọnare kri no, nọ o wo ọwhọ gaga. Ahwo kpobi a riẹ Brọda Barr avọ aye riẹ wọhọ ọzae avọ aye nọ a jọ emamọ oriruo nọ a se egagọ Jihova gboja ziezi, bẹsenọ Mildred, aye riẹ nọ ọ rrọ okpodhiwu, o ro whu evaọ October 2004. Aimava na a jẹ hai se Ebaibol kugbe kẹdẹ kẹdẹ bẹsenọ aye riẹ o ro whu.

Rọ kẹ ahwo nọ a riẹ Brọda Barr, a te yo odẹ na a rẹ kareghẹhọ ọzae nọ ọ rẹ kẹ emamọ ohrẹ no Ebaibol ze. O je ru iruo gaga, ọsẹro nọ ọ jọ yoyou avọ ororokẹ, jẹ jọ emamọ ogbẹnyusu. Whọ rẹ jọ ẹme gbe olẹ riẹ ruẹ inọ o se ukoko na gboja gaga gbe nnọ o wo usu okpekpe kugbe Jihova.

Dede nọ o be d’omai inọ oniọvo mai nana o whu siọ omai ba no, eva e be were omai inọ o wo osa obọ odhiwu riẹ no, osa nọ o je rẹro riẹ gaga nọ ọ jẹ hae t’ẹme kpahe ẹsikpobi. O rri uvẹ-ọghọ nana ghare gaga.—1 Kọr. 15:53, 54. *

[Oruvẹ-obotọ]