Kọ U Fo re Izoge A Họ-Ame?

CARLOS, * oniọvo-ọmọzae jọ nọ ọ be rria obọ Philippines ọ ta nọ: “Eva e be were omẹ gaga inọ ọmọtẹ mẹ o muọ Jihova họ ẹgọ no, yọ mẹ riẹ nọ eva e be were ọmọtẹ mẹ na re.” Ọsẹ jọ evaọ obọ Grisi ọ ta nọ: “Eva e be were omẹ avọ aye mẹ inọ emọ esa mai a họ-ame wọhọ Isẹri Jihova evaọ okenọ a gbẹ jọ izoge. A bi wo ẹnyaharo abọ-ẹzi, yọ eva e be were ae inọ a be gọ Jihova.”

Eva e rẹ sae ginẹ were esẹgbini gaga nọ emọ rai a tẹ họ-ame, rekọ ẹsejọ uduama u re lele oghọghọ na. Oni jọ ọ ta nọ: “Eva e jẹ were omẹ rekọ udu u je bru omẹ re.” Kọ fikieme o rọ jọ oni yena oma ere? Ọ ta nọ: “Mẹ riẹ nọ obọnana, ọmọ mẹ ọ te niyẹrẹ uzuazọ nọ o yeri kẹ Jihova.”

U fo re uzoge kpobi o fi utee họ inọ ọ rẹ gọ Jihova wọhọ Osẹri nọ ọ họ-ame no. Ghele na esẹgbini Ileleikristi a rẹ sai roro nọ, ‘Mẹ riẹ nọ ọmọ mẹ o wo ẹnyaharo ziezi no, ghele na, kọ o kruga te epanọ ọ sae rọ whaha iruemu iyoma jẹ jọ fuafo evaọ aro Jihova?’ Efa a rẹ sae nọ oma rai nọ, ‘Kọ ọmọ mẹ ọ te gbẹ rọ oghọghọ gbe ajọwha gọ Ọghẹnẹ nọ ọ tẹ rẹriẹ ovao dhe odawọ ilale efe?’ Kọ ekpọvio Ebaibol vẹ e rẹ sai fi obọ họ kẹ esẹgbini riẹ sọ emọ rai a te kẹ ame-ọhọ no?

Owojẹ Ọsosuọ họ, A rẹ jọ Ilele Jesu

Ebaibol ọ fodẹ epanọ ohwo ọ rẹ kpako te re ọ tẹ họ-ame he, rekọ o dhesẹ epanọ edikihẹ abọ-ẹzi ohwo nọ o te kẹ ame-ọhọ no ọ rẹ jọ. Jesu ọ ta kẹ ilele riẹ nọ: “Wha wuhrẹ ahwo erẹwho kpobi, wha họ ae ame.” (Mat. 28:19) Fikiere, ame-ọhọ ọ rrọ rọkẹ enọ a wuhrẹ no nọ i zihe ruọ ilele Jesu no.

Ono họ olele? Obe na Insight on the Scriptures u ru rie vẹ inọ: “Re ohwo ọ jọ olele orọnikọ ọ rẹ rọwo iwuhrẹ Kristi ọvo ho, rekọ o re ru lele ai.” Kọ enọ e gbẹ dina maha a sae jọ uvi ilele Jesu? Oniọvo-ọmọtẹ jọ nọ ọ rrọ imishọnare evaọ obọ Latin America vrẹ ikpe 40 no o kere kpahe  ọyomariẹ gbe inievo-emetẹ ivẹ riẹ inọ: “Dede nọ ma gbẹ maha evaọ oke yena, ma wo areghẹ te epanọ ma rọ riẹ inọ ma gwọlọ gọ Jihova jẹ rria evaọ Aparadase. Omauromudhe mai u fi obọ họ k’omai mugba kẹ edawọ nọ i re te izoge. O da omai hi inọ ma roma mudhe evaọ okenọ ma gbẹ jọ emaha.”

Ẹvẹ whọ sae rọ riẹ sọ ọmọ ra o zihe ruọ olele Jesu no? Ebaibol ọ ta nọ: “Ọmaha dede ọ rẹ rehọ uruemu riẹ dhesẹ oma riẹ, makinọ o bi ru uvioware gbe onọ ukiete.” (Itẹ 20:11) Joma ta kpahe iruemu jọ nọ i re dhesẹ nọ uzoge o bi ru “re ahwo kpobi a ruẹ ẹnyaharo” riẹ wọhọ olele.—1 Tim. 4:15.

Oware nọ U re Dhesẹ Sọ Ọmọ Ra Yọ Olele

Kọ ọmọ ra ọ be hai yoẹme kẹ owhẹ? (Kọl. 3:20) Kọ ọ be hai ru iruo nọ a kẹ riẹ evaọ uwou na? Ebaibol ọ ta nọ okenọ Jesu ọ jọ ikpe 12, o je “yo ẹme” kẹ ọsẹgboni riẹ. (Luk 2:51) Evaọ uzẹme, uvumọ ọmọ ọ rẹ sai yoẹme kẹ ọsẹgboni riẹ gbagba nẹnẹ hẹ. Rekọ uvi Ileleikristi a rẹ “rọ kpahe ithihi” Jesu kpekpekpe. Fikiere, izoge nọ e gwọlọ họ-ame e rẹ jọ enọ i bi yoẹme kẹ esẹgbini rai.—1 Pita 2:21.

Roro kpahe enọ nana: Kọ ọmọ ra ọ be “kake guọlọ uvie” na ẹkwoma usiuwoma ota? (Mat. 6:33) Kọ ọ be hae rọ unevaze ta usiuwoma na manikọ whọ rẹ gbae họ kpohọ usiuwoma, whọ vẹ jẹ gbae họ ta usiuwoma nọ wha te te unuẹthẹ? Kọ o se owha-iruo riẹ gboja wọhọ owhowho-uvie nọ ọ re họ-ame he? Kọ o rrọ isiuru riẹ re o zihe bru ahwo nọ ọ ta usiuwoma kẹ? Kọ ọ be hai ru re ibe emọ-isukulu gbe iticha riẹ a riẹ inọ ọye yọ Osẹri Jihova?

Kọ o be hae jariẹ oja re o kpohọ iwuhrẹ ukoko? (Ol. 122:1) Kọ ọ be hae k’iyo evaọ Uwuhrẹ Uwou-Eroro Na gbe Uwuhrẹ Ebaibol Ukoko? Kọ ọ be rọ ajọwha w’obọ evaọ Isukulu Odibọgba Esuo-Ọghẹnẹ na?—Hib. 10:24, 25.

Kọ ọmọ ra ọ be daoma jọ fuafo evaọ uruemu ẹkwoma ekpehre usu nọ ọ be whaha evaọ obọ isukulu hayo eria efa? (Itẹ 13:20) Oghẹrẹ ile, ifimu, ighe etẹlivisiọno, aruọzaha ividio, gbe evie-evuẹ Itanẹte vẹ e rẹ were iẹe? Kọ ẹmeunu gbe uruemu riẹ i dhesẹ nọ ọ gwọlọ koko izi Ebaibol?

Ẹvẹ ọmọ ra ọ riẹ Ebaibol na te? Kọ ọ sae rọ eme obọ riẹ ta eware nọ wha wuhrẹ evaọ Uwuhrẹ Ebaibol Uviuwou rai? Kọ ọ sae ta kpahe ugogo iwuhrẹ Ebaibol vevẹ kẹ amọfa? (Itẹ 2:6-9) Kọ o wo isiuru kpahe isase Ebaibol gbe ebe nọ ọrigbo nọ o wo ẹrọwọ avọ areghẹ na o bi kere? (Mat.  24:45) Kọ ọ be hae nọ enọ kpahe iwuhrẹ Ebaibol gbe eria Ebaibol nọ o se?

Enọ yena i re fi obọ họ k’owhẹ riẹ epanọ ọmọ ra o wo ẹnyaharo abọ-ẹzi te no. Who te roro kpahe enọ yena no, whọ sai ku ei họ inọ u fo re ọmọ na o gbe wo ẹnyaharo evaọ eware jọ re ọ tẹ te họ-ame. Rekọ otẹrọnọ uzuazọ ọmọ na u dhesẹ nọ o zihe ruọ olele no jẹ roma mudhe kẹ Ọghẹnẹ no, whọ rẹ sae kẹe uvẹ re ọ họ-ame.

Izoge A rẹ Sai Jiri Jihova

Idibo Ọghẹnẹ buobu a gọ Ọghẹnẹ ziezi no emaha ze. Roro kpahe Josẹf, Samuẹle, Josaya, gbe Jesu. (Emu. 37:2; 39:1-3; 1 Sam. 1:24-28; 2:18-20; 2 Irv. 34:1-3; Luk 2:42-49) Yọ u muẹro nnọ a rọ Ikereakere na wuhrẹ emetẹ ene Filip nọ e jọ eruẹaro na ziezi no emaha ze.—Iruẹru 21:8, 9.

Oniọvo jọ evaọ obọ Grisi ọ ta nọ: “Mẹ họ-ame okenọ mẹ jọ ikpe 12. Eva e were omẹ inọ me ru ere. Mẹ họ-ame te ikpe 24 no, yọ anwọ ikpe 23 na mẹ rọ rrọ ọkobaro oke-kpobi. Nọ mẹ jọ ikpe 12, me wo eriariẹ Ebaibol te epanọ me wo enẹna ha. Rekọ evaọ oke yena, mẹ riẹ nọ me you Jihova jẹ gwọlọ nọ mẹ rẹ gọe bẹdẹ bẹdẹ. Eva e were omẹ inọ o fi obọ họ k’omẹ nọ mẹ gbẹ be rọ gọe.”

Ohwo ọ tẹ rọ uzuazọ riẹ dhesẹ inọ o zihe ruọ olele Jesu no, ọ make rrọ ọmaha hayo ọkpako, ọ rẹ họ-ame. Pọl ukọ na o kere nọ: “Keme iroro eva ohwo ọ rẹ rọ rọwa ọ vẹ rọ ere wo unuzou, ọ vẹ jẹ rehọ igbenu riẹ ta via, a vẹ rọ ere siwi ei.” (Rom 10:10) Nọ ọmọ nọ ọ be riẹ ru evaọ ukoko na ọ tẹ họ-ame, yọ okpoware tei te ọsẹgboni riẹ a ru na. Ajọ uvumọ oware o whaha owhai oghọghọ nọ u re no onana ze he.

[Oruvẹ-obotọ]

[Ẹkpẹti nọ o rrọ ẹwẹ-obe avọ 5]

Epanọ U fo nọ A re Rri Ame-Ọhọ

Esẹgbini jọ a re rri ame-ọhọ ọmọ rai wọhọ emamọ owojẹ nọ uye o rẹ sai no ze—wọhọ ewo obe-udu nọ a rẹ rọ dhẹ omoto. Kọ ame-ọhọ gbe egagọ Ọghẹnẹ i re fi uzuazọ ohwo họ ọza evaọ obaro? Ebaibol ọ k’uyo nọ ijo. Obe Itẹ 10:22 o ta nọ: “Oghale ỌNOWO na u re ru ohwo họ ọdafe, o re ku enuobro kugbe ei hi.” Yọ Pọl o kere se Timoti ọmoha na inọ: “Erere ologbo ọ ghinẹ rọ kẹ ohwo nọ o bi lele Ọghẹnẹ otẹrọnọ utho oware nọ o woi o rẹ dae ẹro.”—1 Tim. 6:6.

Uzẹme, re a gọ Jihova o lọhọ tere he. Ebẹbẹ buobu i te Jerimaya okenọ ọ jọ ọruẹaro Ọghẹnẹ. Ghele na, o kere nọ: “Eme ra i . . . zihe ruọ oghọghọ gbe evawere evaọ eva mẹ; keme odẹ ra a bi ro se omẹ, E ỌNOWO, Ọghẹnẹ ogbaẹmo.” (Jeri. 15:16) Jerimaya ọ riẹ inọ egagọ Ọghẹnẹ e be wha oghọghọ sei. Akpọ Setan ọ be wha ebẹbẹ ze. U fo re esẹgbini a fi obọ họ kẹ emọ rai vuhu onana mu.—Jeri. 1:19.

 [Ẹkpẹti/​Uwoho nọ o rrọ ẹwẹ-obe avọ 6]

Kọ U Fo re Ọmọ Mẹ Ọ Gbẹ Hẹrẹ Taure Ọ tẹ Họ-Ame?

Ẹsejọ, nọ emọ a tẹ maki te ame-ọhọ no, esẹgbini rai a rẹ sae jẹ iroro inọ a gbẹ hẹrẹ. Eme ọ rẹ sae whae ze?

Ozọ u bi mu omẹ inọ ọmọ mẹ ọ tẹ họ-ame, ọ rẹ sae thọ uzi ulogbo jọ a ve si ei no ukoko. Kọ o rrọ oware areghẹ re a roro inọ Ọghẹnẹ ọ te daezọ họ otẹrọnọ ọmọ nọ ọ gwọlọ họ-ame he o wo ekpehre uruemu? Solomọn ọ ta kẹ izoge na nọ: “Rekọ riẹ nọ evaọ [uruemu ra] kpobi Ọghẹnẹ ọ rẹ te rehọ owhẹ gu ẹdhọ.” (Ọtausi. 11:9) Pọl o kere eme nana se t’emaha t’ekpako inọ: “Mai kpobi ma ti . . . gu ọvuọ ẹkẹunu riẹ kẹ Ọghẹnẹ.”—Rom 14:12.

Eg’Ọghẹnẹ kpobi, te enọ e họ-ame no gbe enọ e re họ-ame he, a ti gu ọvuọ ẹkẹ unu rai kẹ Ọghẹnẹ. Ajọ o thọrọ owhẹ ẹro ho inọ Jihova ọ rẹ kuvẹ hẹ re “ẹdawọ nọ ọ ro vi” idibo riẹ o te ai. (1 Kọr. 10:13) Nọ a tẹ “jaja aro vi” je mugba kẹ edawọ, o rẹ sai mu ai ẹro inọ Ọghẹnẹ ọ te thọ ae. (1 Pita 5:6-9) Oni jọ nọ ọ rrọ Oleleikristi o kere nọ: “Emọ nọ e họ-ame no họ enọ e mai wo ẹjiroro nọ a rẹ rọ kẹnoma kẹ eware iyoma akpọ na. Ọmọ mẹ, ọnọ ọ họ-ame evaọ okenọ ọ jọ ikpe 15, ọ ta nọ ame-ọhọ ọ rẹ thọ ohwo. Ọmọ mẹ na ọ ta nọ: ‘U re mu owhẹ ozọ re whọ raha uzi Jihova.’ Ame-ọhọ ọ rẹ wọ ohwo ru oware nọ u woma.”

Whọ tẹ rọ ẹmeunu gbe uruemu wuhrẹ emọ ra re a yoẹme kẹ Jihova, u re mu owhẹ ẹro nọ a ti gbe ru ere nọ a tẹ họ-ame no. Itẹ 20:7 o ta nọ: “Ohwo okiẹrẹe nọ [ọ] be rehọ emamọ uruemu riẹ yerẹ—oghale u rete emọ riẹ nọ uno rie no!”

Mẹ gwọlọ re ọmọ mẹ o le eware jọ t’obọ tao. U fo re izoge a wuhrẹ epanọ a re ru iruo re a sae rẹrote omobọ rai evaọ obaro. Rekọ enwoma e rẹ sai noi ze nọ whọ tẹ be tuduhọ emọ ra awọ re a kpohọ isukulu ilogbo je le efe ukpenọ whọ rẹ kpọ ovao rai riwi egagọ Ọghẹnẹ. Rọ kpahe ‘ubi’ hayo ẹme Uvie na nọ o dhẹ ze he na, Jesu ọ ta nọ: “O nọ a kọ fihọ udevie inwe, onana họ ọ nọ o yo eme na, rekọ awa akpọ na ọruọ gbe eviẹhọ efe i te duwu ẹme na, o gbẹ mọ ibi hi.” (Mat. 13:22) Nọ whọ tẹ rọ ilale eware akpọ karo kẹ ọmọ, o rẹ sai kpe isiuru nọ ọmọ na ọ rẹ rọ gọ Ọghẹnẹ no.

Rọ kpahe izoge nọ uruemu rai u dhesẹ nọ a te kẹ ame-ọhọ no rekọ nọ esẹgbini rai a rọwo ho, ọkpako ukoko jọ ọ ta nọ: “Re a whaha ọmọ ame-ọhọ o rẹ sai kpe ọwhọ Ọghẹnẹ ọgọ no ọmọ na oma, o vẹ jẹ wha elọhoma sei.” Ọsẹro ọnyawariẹ jọ o kere nọ: “Uzoge na ọ rẹ sai roro inọ o te ohwo nọ ọ rẹ gọ Ọghẹnẹ hẹ. Ọ sae dhẹ lele akpọ na sọ a ti sei gb’ohwo.”

[Uwoho]

Kọ u fo re mẹ rehọ yunivasiti karo?

[Uwoho nọ o rrọ ẹwẹ-obe avọ 3]

Ọmaha ọ rẹ sae rọ uzuazọ riẹ dhesẹ inọ ọye yọ olele Jesu

[Uwoho nọ o rrọ ẹwẹ-obe avọ 3]

Omaruẹrẹhọ gbe obọ-uwo eva obọ iwuhrẹ

[Uwoho nọ o rrọ ẹwẹ-obe avọ 4]

Ẹmeoyo kẹ ọsẹgboni

[Uwoho nọ o rrọ ẹwẹ-obe avọ 4]

Usiuwoma ota

[Uwoho nọ o rrọ ẹwẹ-obe avọ 4]

Olẹ