Ru re “Edhere Ra O Kiehọ kẹ Owhẹ” Evaọ Oghẹrẹ Vẹ?

OHWO kpobi ọ rẹ gwọlọ re eware i “kiehọ” kẹe. Ahwo jọ a fe gaga a te je wo okpodẹ no. Efa a gwọlọ re eware i kiehọ kẹ ae rekọ o via ere he.

Ẹsibuobu, whọ tẹ gwọlọ le oware jọ t’obọ evaọ uzuazọ, whọ rẹ tẹrovi oware yena. Eware ivẹ efa nọ i wuzou họ whọ rẹ rehọ oke gbe ẹgba ra ro le oware na.

Ileleikristi buobu a ruẹ no inọ usiuwoma ota na nọ a rẹ jọ w’obọ vọvọ o rẹ kẹ ae evawere ziezi. Iruo odibọgba oke-kpobi o wha evawere se emaha gbe ekpako buobu no. Ghele na, usiuwoma ota na u re fou ahwo jọ ehoo, a ve fi ei họ oria avivẹ evaọ uzuazọ rai je le itee efa. Fikieme onana o sae rọ via? Eme who re ru re whọ sae tẹrovi oware nọ u gine wuzou? Kọ eme who re ru re “edhere ra o kiehọ kẹ owhẹ”?—Jos. 1:8.

Eware Efa nọ Emọ A re Ru nọ Isukulu E tẹ Fa No

Izoge Ileleikristi a tẹ be maki le eware efa, a rẹ rọ egagọ Ọghẹnẹ karo. Eware i re kiehọ kẹ enọ i ru ere, yọ u fo re a jiri ai.

Rekọ, izoge Ileleikristi jọ a rẹ kuvẹ re eware efa nọ a re ru nọ Isukulu e tẹ fa no e rehọ oke rai kpobi. Orọnikọ eware nana e thọ họ. Rekọ u fo re izoge Ileleikristi a nọ oma rai nọ: ‘Ẹvẹ eware yena e te rehọ oke mẹ te? Kọ oghẹrẹ ahwo vẹ me ti kuomagbe evaọ iruẹru nana? Oghẹrẹ uruemu vẹ ahwo nọ me ti kuomagbe a wo? Kọ eme onana o sae lẹliẹ omẹ tẹrovi evaọ uzuazọ?’ Whọ rẹ sai vuhumu inọ ohwo ọ rẹ sae roma kẹ eware itieye na te epanọ o gbe ro wo oke hayo ẹgba nọ ọ rẹ rọ gọ Ọghẹnẹ hẹ. Oyejabọ nọ o rọ gwọlọ nọ whọ rẹ rehọ eware nọ e mae r’oja karo.—Ẹf. 5:15-17.

Roro kpahe Wiktor. * Ọ ta nọ: “Nọ mẹ jọ ikpe 12, me kuomagbe ibe emọ-isukulu mẹ evaọ aruọzaha ebọro nọ a rẹ rọ obọ fa. A tẹ te kẹ omẹ ekẹ buobu keme mẹ jẹ daoma gaga evaọ aruọzaha na. Me wo uvẹ nọ mẹ hae rọ jọ ohwo nọ a riẹ odẹ.” Uwhremu na, oghẹrẹ nọ aruọzaha na o je kpomahọ edikihẹ abọ-ẹzi Wiktor o jẹ kẹe uye. Ẹdẹjọ, o kiero owezẹ nọ o je se Ebaibol. Ofariẹ, o gbe je wo evawere no usiuwoma ota ze tere he. Ọ ta haro nọ: “Aruọzaha na o je mi omẹ ẹgba mẹ kpobi, yọ u kri hi, me te ti vuhumu inọ u bi je mi omẹ ajọwha nọ me wo evaọ ukoko na. Mẹ riẹ nọ mẹ be dawo ẹgba mẹ kpobi evaọ ukoko na ha.”

Isukulu Ikpehru

O rrọ owha-iruo Oleleikristi re ọ rẹrote uviuwou riẹ, onọ u kugbe eware abọ-iwo nọ ọ rẹ kẹ ae. (1 Tim. 5:8) Kọ o ginẹ gwọlọ isukulu ikpehru re ohwo o te ru onana?

U re woma re ohwo o roro kpahe oghẹrẹ nọ isukulu ikpehru i re kpomahọ usu riẹ kugbe Jihova. Joma rehọ oriruo Ebaibol jọ dhesẹ onana.

Barọk ọ jọ okere-obe Jerimaya ọruẹaro na. Nọ oke jọ u te, ukpenọ Barọk ọ rẹ tẹrovi uvẹ-ọghọ nọ o wo evaọ egagọ Jihova, o te muọ isiuru ikpeware họ ewo. Jihova o muẹrohọ onana, ọ tẹ rọ ẹkwoma  Jerimaya vẹvẹ iẹe unu inọ: “Kọ whọ be gwọlọ ikpeware kẹ oma ra? Whọ gwọlọ ae he.”—Jeri. 45:5.

Eme họ “ikpeware” nọ Barọk ọ jẹ gwọlọ na? Ẹsejọhọ ọ gwọlọ okpodẹ evaọ udevie ahwo Ju erọ oke yena. Hayo o sae jọnọ efe ọ jẹ gwọlọ. Oghẹrẹ kpobi kẹhẹ, ọ gbẹ jẹ rọ eware abọ-ẹzi karo ho, eware nọ i re fi obọ họ kẹe si kẹle Jihova. (Fil. 1:10) Ghele na, o wọhọ nọ Barọk ọ gaviezọ kẹ unuovẹvẹ nọ Jihova ọ rehọ ẹkwoma Jerimaya kẹe, ọ tẹ zọ evaọ okenọ a raha Jerusalẹm.—Jeri. 43:6.

Eme ma rẹ sai wuhrẹ no ikuigbe nana ze? Ohrẹ nọ a kẹ Barọk na u dhesẹ nọ oware jọ o jọ oma riẹ thọ. Ọ jẹ gwọlọ ikpeware kẹ omobọ riẹ. Otẹrọnọ who wo iruo nọ whọ be rọ ko oma ra gbe uviuwou ra, kọ o ginẹ gwọlọ re whọ raha oke, igho, gbe ẹgba fihọ isukulu ikpehru re whọ ruẹsi ru ẹgwọlọ ra, orọ ọsẹgboni ra, hayo orọ omoni ra jọ gba?

Roro kpahe Grzegorz, ọnọ ọ riẹ kpahe ekọmputa. Nọ ibe-iruiruo riẹ a tẹzẹ iẹe, o te zihe kpohọ isukulu kẹ obọdẹ uwuhrẹ jọ. U kri hi, o gbe je wo oke kẹ eware abọ-ẹzi hi. Ọ kareghẹhọ inọ: “Onana o jẹ hae kẹ omẹ uye ẹsikpobi. Obroziẹ-iroro mẹ o je brukpe omẹ keme me gbe je le itee abọ-ẹzi nọ me fihọ kẹ oma mẹ hẹ.”

Iruo nọ I re Mi Ohwo Oke Kpobi No

Ebaibol ọ tuduhọ uvi Ileleikristi awọ re a jọ emamọ iruiruo gbe ega-iruo. Pọl ukọ na o kere nọ: “Rehọ eva awere, ru iruo kpobi nọ i te owhẹ, wọhọ ẹsenọ who bi ru ai kẹ Ọnowo na, orọnikọ ahwo ho.” (Kọl. 3:22, 23) Ghele na, dede nọ u woma re a ru iruo no eva ze, oware ofa o r’oja, oyehọ emamọ usu kugbe Jihova. (Ọtausi. 12:13) Otẹrọnọ iruo Oleleikristi i bi mi ei oke riẹ kpobi no, onana u ti ru ei fi eware abọ-ẹzi họ oria avivẹ evaọ uzuazọ.

Nọ Oleleikristi ọ tẹ be raha oke riẹ kpobi fihọ iruo riẹ, o ti gbe wo ẹgba kẹ eware abọ-ẹzi hi, yọ ọ te sai fi obọ họ kẹ uviuwou riẹ gbe he. Solomọn ovie na o muẹrohọ inọ ohwo ọ tẹ roma kẹ iruo abọ riẹ ga hrọ, o sae wọhọ “oma odawọ evaọ ofou” gheghe. Nọ Oleleikristi ọ tẹ roma kẹ iruo ga hrọ, o rẹ sae wha idhọvẹ sei. Ohwo otiọye na ọ rẹ sae jọ igbo iruo riẹ na te epanọ oma o rẹ rọ lọhọ iẹe no evaọ iruo na. Otẹrọ ere, kọ ohwo yena ọ sai gine wo “oghọghọ . . . je wo evawere eva iruo riẹ”? (Ọtausi. 3:12, 13; 4:6) Mai wuzou, kọ o ti gbe wo ẹgba nọ o ti ro ru ẹkẹ iruo riẹ evaọ uviuwou na je w’obọ evaọ eware abọ-ẹzi?

 Janusz, ọnọ ọ be rria obọ Europe, ọ jẹ raha oke riẹ kpobi fihọ iruo riẹ. Ọ kareghẹhọ inọ: “Ahwo obọ akpọ a je jiri omẹ keme mẹ jẹ riẹ iruo na ru gaga yọ mẹ jẹ rọ oma kẹ iruo na. Rekọ me je kie kpotọ evaọ abọ-ẹzi, yọ me gbe je kpohọ usiuwoma ota ha. U kri hi, mẹ tẹ siọ iwuhrẹ ba. Me te ti wo omorro te epanọ mẹ rọ siọ ohrẹ nọ ekpako ukoko a kẹ omẹ, me te je siomano ukoko na.”

Whọ rẹ Sai Ru re Eware I Kiehọ kẹ Owhẹ

Ma ta kpahe eware esa no nọ ohwo ọ rẹ rehọ oke riẹ kpobi le nọ e rẹ sae raha edikihẹ abọ-ẹzi riẹ. Kọ ọjọ o kpomahọ  owhẹ? Otẹrọ ere, enọ, eria Ebaibol, gbe eme nọ ahwo jọ a ta nọ ma be te fodẹ na i ti fi obọ họ k’owhẹ riẹ sọ eware i ti gine kiehọ kẹ owhẹ.

Eware efa nọ emọ a re ru nọ isukulu e tẹ fa no: Ẹvẹ whọ be roma kẹ eware itieye na te? Kọ e be rehọ oke nọ who je ro le eware abọ-ẹzi? Kọ whọ be ruẹ nọ o gbẹ be were owhẹ oma tere he re who kuomagbe ibe Ileleikristi ra? Otẹrọ ere, u fo re who lele oriruo Devidi Ovie na, ọnọ ọ lẹ Jihova inọ: “Wuhrẹ omẹ edhere nọ mẹ rẹ nya.”—Ol. 143:8.

Ọsẹro ọnyawariẹ jọ o fi obọ họ kẹ Wiktor, ọnọ ma fodẹ ẹsiẹ na. Ọsẹro na ọ ta kẹe nọ: “Whọ be hae rọ evawere t’ẹme kpahe aruọzaha ra na ga hrọ.” Wiktor ọ ta nọ: “Ẹme nọ ọsẹro na ọ ta na u ru omẹ roro gaga. Me te vuhumu inọ mẹ roma kẹ aruọzaha na ga hrọ no. U kri hi, mẹ tẹ fa usu no egbẹnyusu mẹ evaọ aruọzaha na, me te mu egbẹnyusu evaọ ukoko na.” Enẹna, Wiktor ọ be rọ ajọwha gọ Jihova evaọ ukoko riẹ. Ọ ta nọ: “Nọ mi egbẹnyusu ra evaọ ukoko na, ọsẹgboni ra, hayo ekpako ukoko sọ a muẹrohọ nnọ erozaha obọ isukulu i bi si owhẹ kẹle Jihova hayo ru owhẹ siomano Jihova.”

Kọ whọ gbẹ ta kẹ ekpako ukoko ra inọ whọ gwọlọ te kẹ ewha-iruo evaọ ukoko na? Kọ who gbe fi obọ họ kẹ enọ e kpako no evaọ ukoko na nọ e gwọlọ ohwo nọ a re lele t’ẹme hayo fi obọ họ kẹ ae dẹ oware evaọ obọ eki hayo ru iruo jọ evaọ uwou rai? Makọ epanọ whọ maha hayo kpako te kẹhẹ, ẹsejọhọ whọ rẹ sai ru iruo ọkobaro, ta eware nọ e be wha evawere se owhẹ kẹ amọfa.

Isukulu ikpehru: Jesu ọ vẹvẹ unu inọ ma rẹ ‘gwọlọ orro obọ mai’ hi. (Jọn 7:18) Oghẹrẹ kpobi nọ whọ gwọlọ kpohọ isukulu te kẹhẹ, kọ whọ rehọ eware abọ-ẹzi karo no?—Fil. 1:9, 10.

Grzegorz, ọnọ ọ riẹ kpahe ekọmputa ziezi na, o ru inwene jọ evaọ uzuazọ riẹ. Ọ ta nọ: “Nọ me roro ziezi kpahe ohrẹ nọ ekpako ukoko a kẹ omẹ, me te ru uzuazọ mẹ lọhọ. Me vuhumu inọ u fo ho re me kpohọ isukulu efa. Oyena o te rehọ oke gbe ẹgba mẹ.” Grzegorz o te kru iruẹru ukoko na ga ziezi. U kri hi, o te dhugbe kpohọ Isukulu Ebaibol Rọkẹ Inievo-Emezae nọ E re Rọo Ho. Ẹhẹ, ọ rehọ oke riẹ kpohọ isukulu ukoko na.—Ẹf. 5:16.

Iruo: Kọ whọ rehọ oma kẹ iruo ra te epanọ who gbe bi ro wo oke kẹ eware abọ-ẹzi hi? Kọ whọ be rehọ oke hai lele uviuwou ra t’ẹme ziezi? Kọ a tẹ k’owhẹ ẹme evaọ ukoko na, whọ be daoma ru ei ziezi? Kọ ẹvẹ kpahe ẹme nọ who re lele inievo na ta rọ bọ ae ga? “Dhẹozọ Ọghẹnẹ, who koko izi riẹ,” kẹsena Jihova ọ vẹ te ghale owhẹ, whọ vẹ jẹ “re awere iruo” ra.—Ọtausi. 2:24; 12:13.

Ekọ i kie kpe Janusz, ọnọ ma ta kpahe ẹsiẹ na. Nọ igho riẹ i vru re no nọ o je muọ esa họ ẹre no, o te bose Jihova. Janusz ọ tẹ te rọ eware abọ-ẹzi karo, yọ enẹna ọ rrọ ọkobaro oke-kpobi gbe ọkpako ukoko. Ọ ta nọ: “Uwhremu na nọ umutho eware nọ me wo e d’omẹ ẹro, jẹ be rọ ẹgba gbe oke mẹ le eware abọ-ẹzi, me te ti wo udhedhẹ gbe ufuoma.”—Fil. 4:6, 7.

Rehọ oke jọ kiẹ oma ra riwi ziezi kpahe eware nọ e rrọ owhẹ udu gbe enọ whọ be rọ karo. Whọ tẹ gwọlọ re eware i kiehọ kẹ owhẹ, whọ rẹ gọ Jihova. Rehọ egagọ Jihova karo evaọ uzuazọ ra.

O rẹ sae gwọlọ re who ru inwene jọ, tubẹ nya siọ eware jọ nọ e r’oja ha ba re whọ sai “dhesẹ oreva Ọghẹnẹ via, o nọ uwoma nọ a jẹrehọ nọ ojẹ gbunu.” (Rom 12:2) Rekọ whọ rẹ sai ru re “edhere ra o kiehọ kẹ owhẹ” ẹkwoma Ọghẹnẹ nọ whọ rẹ gọ no eva ze.

[Oruvẹ-obotọ]

[Ẹkpẹti/​Uwoho nọ o rrọ ẹwẹ-obe avọ 31]

Ẹvẹ Whọ Sai ro Ru re Eware I Kiehọ kẹ Owhẹ?

Nọ eware i bu owhẹ abọ gaga nẹnẹ na, eme who re ru re whọ sae rọ eware nọ i wuzou karo? Kiẹ iroro ra gbe eware nọ whọ rọ karo riwi ẹkwoma eroro kpahe enọ nọ e rrọ obotọ na:

EWARE EFA NỌ EMỌ A RE RU NỌ ISUKULU E TẸ FA NO

▪ Oghẹrẹ uruemu vẹ ahwo nọ who ti kuomagbe na a wo?

▪ Ẹvẹ oware nọ wha ti ru kugbe na o te rehọ oke ra te?

▪ Kọ iruẹru na e sai zihe ruọ eware nọ whọ be rọ karo evaọ uzuazọ ra?

▪ Kọ e te rehọ oke nọ who je ro ru eware abọ-ẹzi?

▪ Kọ oghẹrẹ ahwo vẹ who ti kuomagbe evaọ oware nọ wha ti ru na?

▪ Kọ ahwo nana a were owhẹ vi inievo ukoko na?

ISUKULU IKPEHRU

▪ Otẹrọnọ who wo iruo nọ whọ be rọ ko oma ra gbe uviuwou ra, kọ o ginẹ gwọlọ re whọ raha oke, igho, gbe ẹgba fihọ isukulu ikpehru?

▪ Kọ o ginẹ gwọlọ isukulu ikpehru re whọ tẹ ko oma ra gbe uviuwou ra?

▪ Kọ o te k’owhẹ uvẹ kpohọ ewuhrẹ?

▪ Kọ whọ rehọ eware abọ-ẹzi karo no?

▪ Kọ o gwọlọ re whọ bọ eva nọ who fihọ Jihova ga inọ ọ rẹ sae ko owhẹ?

IRUO

▪ Kọ iruo ra e be kẹ owhẹ uvẹ ‘ghọghọ je wo evawere’?

▪ Kọ iruo ra e be hae whọlọ owhẹ oma te epanọ who bi ro wo ẹgba kẹ iruẹru uviuwou ra gbe eware abọ-ẹzi hi?

▪ Kọ who bi wo oke ziezi nọ who re ro lele ahwo uviuwou ra ta ẹme?

▪ Kọ whọ be rehọ oma kẹ iruo ra te epanọ who gbe bi ro wo uvẹ kẹ iruẹru abọ-ẹzi hi?

▪ Kọ iruo ra e be k’owhẹ uvẹ ru ẹme nọ a k’owhẹ evaọ ukoko na ziezi?

[Uwoho nọ o rrọ ẹwẹ-obe avọ 30]

Jihova ọ vẹvẹ Barọk unu inọ ọ whaha ikpeware egwọlọ