Kọ Whọ Ruọ Eriosehọ Ọghẹnẹ no?

“Ẹme Ọghẹnẹ ọ rẹjọ bẹdẹ, avọ iruo.”—HIB. 4:12.

1. Edhere jọ vẹ ma sae rọ ruọ eriosehọ Ọghẹnẹ nẹnẹ, rekọ fikieme oyena o sae rọ jọ bẹbẹ?

EVAỌ uzoẹme nọ o vrẹ na, ma ruẹ nọ re ma sae ruọ eriosehọ Ọghẹnẹ, ma re ru lele ẹjiroro riẹ. Oyena o sae jọ bẹbẹ. Wọhọ oriruo, nọ ma tẹ riẹ nọ Jihova o mukpahe oware jọ nọ o rẹ were omai, evaọ oke ọsosuọ ma rẹ gwọlọ veghe uzou. Oyena u dhesẹ nọ ma rẹ daoma wuhrẹ ẹmeoyo. (Jem. 3:17) Evaọ uzoẹme nana, ma te ta kpahe oke nọ o sae rọ jọ bẹbẹ k’omai re ma yoẹme kẹ Ọghẹnẹ no udu ze.

2, 3. Re ma jọ ghaghae kẹ Jihova, omodawọ vẹ ma rẹ ruabọhọ?

² Ẹvẹ who bi ru lele ohrẹ nọ a be jọ ukoko na k’omai te? Ebaibol ọ ta nọ o rrọ oreva Ọghẹnẹ re o koko “efe erẹwho na kpobi” họ kẹ oma riẹ. (Hag. 2:7) Evaọ uzẹme, ibuobu mai a jọ ghaghae kẹ Ọghẹnẹ hẹ okenọ ma ri kurẹriẹ hẹ. Rekọ uyoyou nọ ma wo kẹ Ọghẹnẹ gbe Ọmọ ọghaghae riẹ o wọ omai ru inwene evaọ uruemu mai re ma sai ru Ọghẹnẹ eva were. Uwhremu na, nọ ma ru ẹnyaharo ziezi no, ma tẹ te họ-ame.—Se Ahwo Kọlọsi 1:9, 10.

 ³ Rekọ nọ ma tẹ họ-ame no orọnikọ yọ ma fi sebaẹgba kparobọ no ho. Ma ti gbe lele sebaẹgba muabọ nọ ma gba ha na. Rekọ o rẹ sai mu omai ẹro inọ Jihova ọ te ghale omodawọ mai otẹrọnọ ma gba riẹ mu jẹ be gbẹ daoma re ma ru ei eva were.

Nọ A tẹ Kẹ Omai Ohrẹ

4. Idhere esa vẹ a sae rọ k’omai ohrẹ no Ebaibol ze?

⁴ Re ma sai fi iruemu iyoma mai kparobọ, ma re vuhu ai mu. Ẹme nọ a ru evaọ obọ Ọgwa Uvie hayo uzoẹme jọ evaọ obe mai jọ o rẹ sai dhesẹ uruemu uyoma jọ nọ ma wo via. Evaọ abọdekọ riẹ, otẹrọnọ ẹme otiọye o fi omai ozọ vrẹ, hayo orọnọ ma se ku ẹme otioye na rekọ ma fi rie họ iruo ho, Jihova ọ sae rọ ibe Oleleikristi jọ rọ ẹme na kẹ omai ohrẹ.—Se Ahwo Galesha 6:1.

5. Fodẹ eware jọ nọ e rẹ sae lẹliẹ omai kpahe ẹme thọthọ nọ a tẹ k’omai ohrẹ, jẹ fodẹ oware nọ ekpako ukoko a jẹ gbẹ daoma fi obọ họ k’omai.

⁵ O rẹ sae jọ bẹbẹ re ma jẹ ohrẹ nọ ohwo-akpọ jọ ọ k’omai rehọ, o tẹ make rọnọ ọ rọ ẹwo kẹ omai ohrẹ na. Ghele na, wọhọ epanọ Ahwo Galesha 6:1 o ta, Jihova o juzi kẹ ekpako ukoko re a rọ “ẹzi oma-urokpotọ” kpọ omai họ. Ma te lele ohrẹ nọ a kẹ omai, ẹsiẹe ma te mae rọ jọ ghaghae kẹ Ọghẹnẹ. Nọ ma tẹ be lẹ, ma rẹ ta kẹ Ọghẹnẹ ẹsikpobi inọ ma gba ha. Rekọ nọ ohwo jọ o te dhesẹ oware uyoma jọ nọ ma ru k’omai, ma vẹ gwọlọ gu unoma, ru wọhọ ẹsenọ oware nọ ma ru na u yoma tere he, roro nọ ohwo na o mukpahe omai, hayo siọ ohrẹ na fikinọ oghẹrẹ nọ a rọ k’omai ohrẹ na o were omai hi. (2 Iv. 5:11) Yọ otẹrọnọ ohrẹ na u kie kpahe ohwo uviuwou mai jọ, ẹgọ gbe osẹ mai, hayo oghẹrẹ aruọzaha jọ nọ ọ rẹ were omai rekiyọ Jihova o mukpahe iẹe, ma sae rọ evedha kpahe ẹme kẹ ọnọ ọ kẹ omai ohrẹ na evaọ oghẹrẹ nọ u re ro gbei unu. Rekọ nọ udu mai u te kpotọ no, oghẹrẹ nọ ma rọ kpahe ẹme kẹ ohwo na o rẹ kẹ omai uye, ma vẹ jẹ ruẹ nọ ohrẹ na u kiehọ kẹ omai.

6. Ẹvẹ ẹme Ọghẹnẹ ọ rẹ rọ fere “ẹjiroro obọ eva” ohwo via?

⁶ Ikere nọ o rrọ obọ emuhọ uzoẹme nana o kareghẹhọ omai inọ ẹme Ọghẹnẹ ọ vọ “avọ iruo.” Ẹhẹ, ẹme Ọghẹnẹ ọ rẹ wọ ahwo ru inwene evaọ uzuazọ. Wọhọ epanọ o fi obọ họ k’omai ru inwene taure ma tẹ họ-ame na, ere o re gbe fi obọ họ k’omai nọ ma tẹ họ-ame no. Evaọ ileta nọ Pọl o kere se ahwo Hibru, ọ ta nọ ẹme Ọghẹnẹ “o re duwu lafiẹ udevie ẹwẹ gbe ẹzi te ezo-oma, gbe eriare ighogho obọ enwa, gbe eva ekiẹ jẹ riẹ ẹjiroro obọ eva.” (Hib. 4:12) Koyehọ nọ ma te wo otoriẹ ẹjiroro nọ Ọghẹnẹ o wo k’omai ziezi, owojẹ mai kpahe ẹjiroro na u re dhesẹ oghẹrẹ ohwo nọ ma ginẹ rrọ. Kọ oghẹrẹ nọ ma bi dhesẹ oma mai kẹ amọfa ere ma ginẹ rrọ? (Se Matiu 23:27, 28.) Roro kpahe owọ nọ whọ rẹ jẹ evaọ iyero nọ e rrọ aro na.

Jọ Ukoko Jihova O Dhẹ Siọ Owhẹ ba Ha

7, 8. (a) Eme o sae jọnọ o lẹliẹ Ileleikristi ahwo Ju jọ ruabọhọ ekoko Uzi Mosis na? (b) Fikieme ma sae rọ ta nọ owojẹ rai o wọso ẹjiroro Jihova?

⁷ Ibuobu mai a rẹ sae ta eme nọ e rrọ Itẹ 4:18 na uzuzou, inọ: “Edhere enọ i kiẹrẹ ọ wọhọ elo irioke, nọ u re he lo gahọ ri te udevie uvo.” Eme yena i dhesẹ nnọ nọ oke o be nyaharo na, ma ti wo ẹnyaharo evaọ uruemu mai gbe otoriẹ mai orọ ẹjiroro Ọghẹnẹ.

⁸ Wọhọ epanọ ma wuhrẹ evaọ  uzoẹme nọ o vrẹ na, nọ Jesu o whu no, o jọ bẹbẹ kẹ Ileleikristi ahwo Ju buobu re a siọ Uzi Mosis ba ekoko. (Iruẹru 21:20) Dede nọ Pọl ọ rọ onaa dhesẹ kẹ ae inọ Ileleikristi a gbẹ rrọ otọ Uzi na ha, ejọ evaọ usu rai a rọwo ghele he. (Kọl. 2:13-15) Ẹsejọhọ a je roro nọ a te bi koko abọjọ Uzi na, a te rọ ere whaha ukpokpoma. Oghẹrẹ kpobi kẹhẹ, Pọl o kere se Ileleikristi nọ e jọ ukoko obọ Hibru jẹ vuẹ ae vevẹ inọ otẹrọnọ a ru lele ẹjiroro Ọghẹnẹ hẹ, a rẹ sae ruọ eriosehọ Ọghẹnẹ hẹ. * (Hib. 4:1, 2, 6; se Ahwo Hibru 4:11.) Re a sai wo ọjẹrehọ Jihova, a re vuhumu inọ Jihova ọ be rọ oghẹrẹ ofa su ahwo riẹ evaọ oke yena.

9. Uruemu vẹ u fo nọ ma re dhesẹ nọ a te ru inwene evaọ otoriẹ mai kpahe iwuhrẹ Ebaibol jọ?

⁹ Evaọ oke mai na, inwene buobu e roma via no evaọ otoriẹ mai kpahe iwuhrẹ Ebaibol jọ. Onana o rẹ k’omai uye he; u re ru omai fievahọ utu ọrigbo nọ o wo ẹrọwọ avọ areghẹ na ziezi. Nọ Ugboma Esuo na u te vuhumu nọ otoriẹ mai kpahe iwuhrẹ Ebaibol jọ o thọ, a rẹ kpọe vi. Dede nọ ahwo jọ a te ta eme iyoma kpahe utu ọrigbo na fikinọ a ru inwene, a rẹ daezọ oyena ha. Oware nọ o mae rrọ ae oja họ re a ru lele ẹjiroro Ọghẹnẹ. Nọ a te ru inwene kpahe otoriẹ mai orọ iwuhrẹ Ebaibol, kọ whọ be jẹ ae rehọ?—Se Luk 5:39.

10, 11. Eme otujọ a ru nọ ukoko na o ta nọ a rọ idhere ekpokpọ ta usiuwoma, kọ eme ma rẹ sai wuhrẹ no onana ze?

¹⁰ Joma ta kpahe oriruo ọfa jọ. Evaọ oware wọhọ ikpe udhusoi nọ e vrẹ, inievo jọ nọ i wo onaa ẹmeọta ziezi a roro nọ a te koko ahwo họ jẹ kẹ ae evuẹ nọ a ruẹrẹhọ ziezi họ edhere nọ ọ mai woma nọ a rẹ rọ ta usiuwoma na. O rẹ were inievo na oma re a t’ẹme evaọ ogbotu, yọ o rẹ were ejọ nọ ahwo a tẹ be koyẹ kẹ ae. Rekọ uwhremu na, ukoko na u te ti vuhumu inọ Jihova ọ gwọlọ nọ ahwo riẹ a rọ idhere sa-sa ta usiuwoma na, onọ u kugbe usiuwoma n’uwou ruọ uwou. Inievo jọ nọ i wo onaa ẹmeọta ziezi a rọwo inwene nana ha. Evaọ okafe, a wọhọ ahwo nọ a kru ukoko na ga ziezi nọ a rọ oma rai kpobi kẹ iruo Ọghẹnẹ. Rekọ uwhremu na nọ ẹjiroro Ọghẹnẹ kpahe usiuwoma ota na u vẹ no, oghẹrẹ ahwo nọ a ginẹ rrọ u te dhesẹ oma via. Uruemu rai o were Jihova ha. Uwhremu na, a te kie no ukoko na.—Mat. 10:1-6; Iruẹru 5:42; 20:20.

¹¹ Orọnikọ ma be ta nọ o jọ lọlọhọ kẹ enọ e daji ukoko na re a ta usiuwoma n’uwou ruọ uwou hu. O jọ use-abọ kẹ ibuobu, maero evaọ oke ọsosuọ. Rekọ a roma kpotọ. Uwhremu na, usiuwoma n’uwou ruọ uwou na o tẹ te reria ae oma no, yọ Jihova ọ ghale rae ziezi. Kọ eme who re ru otẹrọnọ ukoko na o ta nọ whọ dawo abọjọ usiuwoma ota na nọ o rẹ were owhẹ tere he? Kọ o te were owhẹ re whọ dawo oware nọ who ri ru ẹdẹvo ho?

Okenọ Ohwo nọ Ma You O te Kie No Ukoko

12, 13. (a) Fikieme Jihova ọ rọ ta nọ a si orumuomu nọ o kurẹriẹ hẹ no ukoko? (b) Ẹbẹbẹ vẹ esẹgbini Ileleikristi jọ a rẹriẹ ovao dhe, kọ eme o ru ẹbẹbẹ na rrọ gaga?

¹² Ababọ avro, mai kpobi ma rọwo inọ re ma sai ru Ọghẹnẹ eva were, ma rẹ jọ fuafo evaọ ugboma, uruemu, gbe abọ-ẹzi. (Se Taitọs 2:14.) Rekọ ẹsejọ iyero  jọ e rẹ sai ru ei bẹbẹ re ma ru ere. Wọhọ oriruo, ma rehọ iẹe inọ ọsẹgboni jọ nọ a rrọ ukoko a wo ọmọzae ọvo, rekọ uwhremu na ọmọ na o te kie no ukoko. Fikinọ ‘omaweromẹ uzioraha’ o were ọmọzae nana vi emamọ usu nọ o re wo kugbe Jihova gbe ọsẹgboni riẹ, a te si ei no ukoko.—Hib. 11:25.

¹³ Oware nọ o via na o kẹ ọsẹgboni na uye gaga. A riẹ inọ Ebaibol ọ ta nọ ma “sioma no ahwo nọ a se oma rai ahwo Kristi nọ i bi bruẹnwae, hayo e nọ e be gbọ oke, hayo e nọ e be gọ edhọ, hayo enọ e be ta erue, egba-idieda hayo ijihẹ—wha lele ohwo otiọye na re-emu dede he.” (1 Kọr. 5:11, 13) Ọsẹgboni na a riẹ re inọ “ohwo” nọ a jọ etenẹ ta inọ a siomano na ọ sae jọ ohwo uviuwou rai nọ ọ be rria kugbe ai hi. Rekọ a you ọmọzae rai na gaga! Fiki uyoyou ogaga nọ a wo kẹ ọmọ na, a sai roro nọ: ‘Kọ ẹvẹ ma sai ro fi obọ họ kẹ ọmọ mai na zihe bru Jihova otẹrọnọ ma siomanoi riẹriẹriẹ? Kọ o gbẹ te mai woma re ma si kẹle iẹe?’ *

14, 15. Eme esẹgbini Ileleikristi a rẹ kareghẹhọ nọ a tẹ gwọlọ t’ẹme kugbe ọmọ rai nọ a sino ukoko?

¹⁴ Ma wo ọdawẹ kẹ esẹgbini nọ e rẹriẹ ovao dhe ẹbẹbẹ yena. Evaọ uzẹme, ọmọ rai o wo uvẹ nọ ọ rẹ rọ salọ uzuazọ nọ u je rie, yọ ọ salọ nnọ o re yeri ekpehre uzuazọ viukpọ emamọ usu nọ o re wo kugbe ọsẹgboni riẹ gbe ibe Ileleikristi. Evaọ abọdekọ riẹ, ọsẹgboni riẹ a rẹ sai ru oware ovo kpahe onana ha. Agbẹta nọ o be rọ kẹ ae uye tere na.

¹⁵ Kọ eme esẹgbini iyoyou yena a re ru? Kọ a ti ru lele uzi Jihova na? Evaọ uzẹme, iyero jọ e sae roma via evaọ uviuwou rai nọ o jọ gwọlọ nọ a rẹ t’ẹme kugbe ọmọ rai. Kọ oyena u re ru ai roro nọ u fo re a t’ẹme kugbei ẹsikpobi? Nọ a tẹ be jẹ iroro oware nọ a re ru, o gwọlọ nọ a kareghẹhọ epanọ Jihova ọ rehọ ẹme na. Ẹjiroro Jihova họ re ukoko riẹ o jọ fuafo, gbe nnọ re orumuomu na o bruoma kpiroro. Kọ ẹvẹ esẹgbini Ileleikristi a sai ro ru lele ẹjiroro yena?

16, 17. Eme ma rẹ sai wuhrẹ no oriruo Erọn ze?

¹⁶ Erọn, oniọvo Mosis, ọ rẹriẹ ovao ku uyero obẹbẹ jọ kpahe emezae ivẹ riẹ. Roro kpahe epanọ o jariẹ oma nọ emezae riẹ Nedab avọ Abihu a dhe idhe nọ a wo udu riẹ hẹ kẹ Jihova, nọ o lẹliẹ Jihova kpe aimava. Ababọ avro, uwhu rai o lẹliẹ usu nọ emezae ivẹ yena a wo kugbe ọsẹgboni rai kuhọ. Rekọ oware ofa jọ o gbẹ riẹ. Jihova ọ ta kẹ Erọn avọ emezae  riẹ nọ i kiọkọ inọ: ‘Wha siọ eto uzou rai ba whọhọwhọhọ họ, wha bẹre iwu rai gbe he fiki uweri, re wha seba ewhuo, re ofu ọ siọ Ọghẹnẹ ba emu kẹ ahwo na kpobi.’ (Izerẹ 10:1-6) Ẹme na ọ rrọ vevẹ. Uyoyou nọ ma wo kẹ Jihova o rẹ ga vi onọ ma wo kẹ ahwo uviuwou mai nọ i kie no ukoko no.

¹⁷ Nẹnẹ, nọ ohwo ọ tẹ raha uzi, Jihova o re kpei ẹsiẹsiẹ hẹ. Uyoyou o be wọe kẹ ae uvẹ re a kurẹriẹ no uruemu uyoma rai. Rekọ ẹvẹ o rẹ jọ Jihova oma otẹrọnọ ọsẹgboni a be whẹtiẹ ọmọ rai nọ o kurẹriẹ hẹ nọ a sino ukoko no h’oma?

18, 19. Eghale vẹ i re te ahwo uviuwou otẹrọnọ a bru usu no omoni rai nọ a sino ukoko?

¹⁸ Ahwo buobu nọ a sino ukoko okejọ a rọwo inọ usu nọ ahwo uviuwou gbe egbẹnyusu rai a bru no ai oye u fi obọ họ kẹ ae bruoma kpiroro. Aye jọ ọ ta nọ ojọ evaọ usu eware nọ ọ rọ gwọlọ zihe ziọ ukoko na họ “usu nọ oniọvo eva riẹ o bru noi evaọ okenọ a si ei no ukoko.” Ọ ta nọ “ọkpọvio Ikereakere na nọ oniọvo riẹ o lele oye u fi obọ họ kẹe gwọlọ nọ o re zihe ze.”

¹⁹ Eme ma rẹ sai wuhrẹ no ẹme nana ze? Inọ ma rẹ daoma gaga re ma ru lele ohrẹ Ebaibol. U re mu omai ẹro ziezi inọ izi Ọghẹnẹ e rrọ rọkẹ ewoma mai.

“Ẹme Ọghẹnẹ Ọ Rẹjọ Bẹdẹ”

20. Idhere ivẹ vẹ a sae rọ f’otọ eme nọ e rrọ Ahwo Hibru 4:12? (Rri oruvẹ-obotọ na.)

²⁰ Nọ Pọl o kere nọ “ẹme Ọghẹnẹ ọ rẹjọ bẹdẹ,” orọnikọ Ebaibol dẹẹ ọ jẹ ta kpahe he. * Eme nọ e wariẹ ẹme yena họ i dhesẹ nọ ọ jẹ ta kpahe eyaa Ọghẹnẹ. Ẹme nọ Pọl ọ be ta na họ Ọghẹnẹ o re koko eyaa riẹ kpobi. Jihova ọ kẹ imuẹro onana nọ ọ ta nọ: “Ẹme nọ o no unu mẹ ze . . . o re zihe bru omẹ tha ababọ họ, rekọ o re ru . . . oware nọ mẹ rehọ fiki riẹ vi ei na gba.” (Aiz. 55:11) Fikiere, ma re bru okpakpa ha otẹrọnọ eware e be nya epanọ ma gwọlọ họ. Jihova o “gbe bi ru iruo rite enẹna” re ẹjiroro riẹ ọ sai rugba.—Jọn 5:17.

21. Ẹvẹ obe Ahwo Hibru 4:12 o sae rọ jọ uduotahawọ kẹ inievo nọ e kpako no nọ e rrọ usu “otu obuobu” na?

²¹ Inievo mai buobu nọ e rrọ usu “otu obuobu” na a gọ Jihova ziezi ikpe buobu no. (Evia. 7:9) Ibuobu rai a rẹro inọ a te kpako ho re akpọ Ọghẹnẹ ọ tẹ ze. Ghele na, dede nọ a kpako no enẹna, a gbẹ be rọ ọwhọ gọ Ọghẹnẹ. (Ol. 92:14) A vuhumu inọ eyaa Ọghẹnẹ e rẹ seba erugba ha, yọ Jihova o bi ru epanọ eyaa riẹ i re ro rugba. Nọ Ọghẹnẹ o se ẹjiroro riẹ gboja gaga na, ma re ru ei eva were otẹrọnọ ma se ẹjiroro riẹ gboja re. Evaọ etoke ẹdẹ avọ ihrẹ nana nọ ma rrọ na, Jihova o gbe bi serihọ, avọ imuẹro inọ ẹjiroro riẹ o ti ru gba, gbe nnọ ahwo riẹ a ti ru lele ẹjiroro na. Kọ who bi ru ere? Kọ whọ rueva eriosehọ Ọghẹnẹ no?

[Oruvẹ-obotọ]

Kọ Whọ Kareghẹhọ?

• Eme o gwọlọ mi omai re ma sae rueva eriosehọ Ọghẹnẹ nẹnẹ?

• Nọ ma riẹ oware nọ Ọghẹnẹ ọ gwọlọ mi omai no na, eme ma re ru re ma sai ru ei eva were?

• Iyero vẹ i re ru ei bẹbẹ k’omai re ma ru oware nọ Ebaibol ọ ta, kọ fikieme o rọ r’oja re ma yoẹme?

• Idhere ivẹ vẹ a sae rọ f’otọ eme nọ e rrọ Ahwo Hibru 4:12 na?

[Enọ Uwuhrẹ]

[Uwoho nọ o rrọ ẹwẹ-obe avọ 31]

Ọsẹgboni na a be vioja