Uwou-Eroro Oyibo nọ A rọ Eme Elọlọhọ Kere

EVA e were omai nọ ma bi ro woro inọ ma bi ti wo Uwou-Eroro oyibo nọ a rọ eme elọlọhọ kere. Ma ti woi evaọ ukpe ovo. Yọ otẹrọnọ o were ahwo, ma te ruabọhọ ekere riẹ. Izoẹme uwuhrẹ na e te jọ eva riẹ, yọ o tẹ lọhọ, ma te hae jariẹ wo izoẹme efa. U mu omai ẹro inọ onana u ti fi obọ họ kẹ Isẹri Jihova buobu evaọ abọ-ẹzi. Evaọ oghẹrẹ vẹ?

Oyibo yọ ẹvẹrẹ nọ inievo mai a be jẹ evaọ erẹwho wọhọ Fiji, Ghana, Kenya, Liberia, Nigeria, Papua New Guinea, gbe Solomon Islands. Dede nọ inievo mai nọ e rrọ erẹwho nana a wo ẹvẹrẹ obọ rai, Oyibo ibuobu rai a re ro ru iwuhrẹ jẹ rọ ta usiuwoma. Rekọ Oyibo nọ a rẹ ta o lọhọ vi onọ ma bi ro kere ebe mai. Ofariẹ, inievo mai a kwa kpohọ erẹwho nọ a rẹ jọ jẹ ẹvẹrẹ Oyibo dede nọ a riẹ Oyibo tere he. Yọ ukoko nọ o rẹ rọ ẹvẹrẹ rai ru ewuhrẹ o rrọ obei hi.

Izoẹme nọ ma re wuhrẹ koka koka evaọ Uwuhrẹ Uwou-Eroro Na họ ugogo edhere nọ ma be rọ riẹ kpahe ẹgọ Ọghẹnẹ. Fikiere, re ohwo kpobi o wo erere no Uwuhrẹ Uwou-Eroro Na ze, eme elọlọhọ a ro kere Uwou-Eroro Oyibo nana. Uke Uwou-Eroro nana u ti wo ohẹriẹ. Unu ọ izoẹme-esese, idhe-eme, enọ ọkiẹkpemu, gbe iwoho nọ e rrọ Uwou-Eroro Oyibo nọ a bi wuhrẹ anwẹdẹ na eye e te jọ ọkpokpọ na. Fikiere onọ ohwo o kru kpobi evaọ usu ivẹ na, ọ rẹ sai w’obọ evaọ Uwuhrẹ Uwou-Eroro Na. Re whọ ruẹ ohẹriẹ nọ o rrọ Uwou-Eroro Oyibo ivẹ na, rri oriruo obotọ na, onọ a rehọ no edhe-ẹme avọ 2 ọrọ uzoẹme ọsosuọ uvitha Uwou-Eroro nana ze.

Irẹro mai họ, Uwou-Eroro nana o te kuyo elẹ ahwo buobu nọ a be lẹ se Jihova nọ: “Kẹ omẹ eriariẹ, re mẹ ruẹse wuhrẹ ijaje ra.” (Ol. 119:73) U mu omai ẹro inọ ahwo nọ a riẹ Oyibo tere he gbe emaha nọ e rrọ ikoko Oyibo a te hae sae ruẹrẹ oma họ kẹ Uwuhrẹ Uwou-Eroro Na ziezi koka koka. Ma yere Jihova inọ fikinọ o you idibo riẹ kpobi, ọ be rọ ẹkwoma ‘ọrigbo nọ o wo ẹrọwọ avọ areghẹ na’ rehọ emu abọ-ẹzi ko omai ziezi.—1 Pita 2:17; Mat. 24:45.

Ugboma Esuo orọ Isẹri Jihova