Ẹgwae jọ nọ Ọ rẹ Thọrọ Ẹro Ho

“NỌ ẸGWAE nana o te kuhọ no, whọ te ta nọ, ‘Ẹgwae ẹgbukpe nana ọ rẹ thọrọ ẹro vievie he.’” Stephen Lett, omọvo Ugboma Esuo ọrọ Isẹri Jihova, ọ rehọ eme yena kpare isiuru enọ e jọ ẹgwae na. A kokohọ kẹ ẹgwae ẹgbukpe ọrọ avọ 126 ọrọ Watch Tower Bible and Tract Society of Pennsylvania, onọ a gba evaọ October 2, 2010, eva Ọgwa Okokohọ Isẹri Jihova nọ ọ rrọ Jersey City, New Jersey, U.S.A. Eware obọdẹ jọ vẹ a t’ẹme te evaọ ẹgwae nana?

Brọda Lett ọ jọ ẹme emuhọ ẹgwae na ta kpahe akẹkẹ Jihova, onọ a dhesẹ evaọ obe Izikiẹl na. Akẹkẹ nana nọ ọ rro thesiwa na o dikihẹ kẹ ukoko Ọghẹnẹ, yọ Jihova ọ be kpọe. Brọda Lett ọ ta nọ abọ obọ odhiwu ọrọ ukoko na, nọ ikọ-odhiwu i ru via na, o be dhẹ vẹrẹ gaga, wọhọ epanọ iroro Jihova e rẹ dhẹ vẹrẹ te. Ere ọvona abọ otọakpọ ọrọ ukoko Jihova Ọghẹnẹ o be dhẹ re. Brọda Lett ọ fodẹ eware evawere buobu nọ e via no kẹle na evaọ abọ otọakpọ ọrọ ukoko Ọghẹnẹ.

Wọhọ oriruo, a bi ku iwou ogha buobu kugbe enẹna, onọ u ti ru ei lọhọ re inievo buobu nọ e jọ iwou ogha yena a tẹrovi iruo usiuwoma ota na. Brọda Lett ọ tẹ tuduhọ ogbotu na awọ inọ a hae gbẹ lẹ roro Ugboma Esuo na nọ e rrọ ahwo ẹro utu ọrigbo na, re a gbẹ jọ enọ i wo ẹrọwọ avọ areghẹ.—Mat. 24:45-47.

Iyẹrẹ nọ E Kẹ Uduotahawọ gbe Ekiẹriwo nọ E Sasa Oma

Tab Honsberger, ọnọ ọ rrọ omọvo Ogbẹgwae Uwou-Ogha obọ Haiti, ọ niyẹrẹ urirẹ jọ kpahe otọ nọ o jọ orẹwho rai nuhu evaọ January 12, 2010, onọ ahwo nọ a bu te oware wọhọ idu egba esa (300,000) a jọ whu. Ọ ta nọ isu-ichọche a jẹ ta kẹ ahwo inọ Ọghẹnẹ họ ọnọ o kpe enọ i whu na fiki emuemu rai, ọ tẹ thọ erezi. Ghele na, otu igbulegbu idu buobu nọ e jọ uwou-odi a zọ nọ igbẹhẹ uwou-odi na i kie fiki otọ nọ u nuhu na. Rekọ nọ Isẹri Jihova a ta usiuwoma kẹ ahwo udu-oruọzewọ buobu kpahe oware nọ eware okpẹtu e be rọ via evaọ oke mai na, a te wo omosasọ. Wọhọ epanọ Brọda Honsberger ọ ta, oniọvo jọ nọ aye riẹ o whu evaọ otọ nọ o jọ Haiti nuhu na ọ ta nọ: “Mẹ gbẹ be viẹ rite inẹnẹ. Mẹ riẹ epanọ uweri mẹ u ti kri te he, rekọ eva e be were omẹ fiki uyoyou nọ ukoko Jihova u bi dhesẹ k’omẹ. Me wo ẹruore, yọ mẹ gba riẹ mu inọ me re fi obọ họ kẹ amọfa wo ẹruore nana.”

Mark Sanderson, ọnọ ọ rrọ omọvo uviuwou Ebẹtẹle obọ Brooklyn, ọ niyẹrẹ kpahe  Philippines. Oniọvo nana, ọnọ ọ jọ omọvo Ogbẹgwae Uwou-Ogha obọ Philippines, o je ru unu ohwohwẹ nọ ọ fodẹ ẹnyaharo nọ a bi wo evaọ odibọgba na, gbe nọ unu ọ iwuhrẹ Ebaibol i bu vi unu ọ iwhowho-uvie gaga. Ọ ta kpahe oniọvo jọ nọ a re se Miguel, ọnọ ohwo jọ o kpe ọmọ-oruọmọ riẹ. Miguel o ru nọ a ro mu ohwo na fihọ uwou-odi. Uwhremu na, nọ Miguel ọ jẹ ta usiuwoma kẹ ahwo uwou-odi, ọ tẹ nyaku ohwo nọ o kpe ọmọ-oruọmọ riẹ na. Dede nọ ozọ o jọ Miguel ẹro, ọ rọ unu kpotọ t’ẹme kẹe. Kẹsena o te muọ obe họ ewuhrẹ kugbe ọzae na, ọzae na o te ti kurẹriẹ. Ọ họ-ame no enẹna. Miguel avọ ọzae nana a zihe ruọ egbẹnyusu ekpekpe no, yọ ọ be dhogbo epanọ a re ro si ọzae na no uwou-odi ze. *

Brọda Mark Noumair, ọnọ ọ rrọ Ẹko-Iruo Isukulu Iruẹru Uvie Na, o te muọ ahwo họ ẹkiẹriwi. Ọ kiẹ imazeza riwi—Alex Reinmueller avọ aye riẹ Sarah, David Schafer avọ aye riẹ Krista, gbe Robert Ciranko avọ aye riẹ Ketra. Alex Reinmueller, ọnọ ọ rrọ ofiobọhọ kẹ Ogbẹgwae Ebe-Iwhowho, ọ ta kpahe epanọ o ro ru usu riẹ kugbe Ọghẹnẹ ga ziezi evaọ okenọ ọ jọ ikpe 15 je ru iruo ọkobaro evaọ obọ Canada, yọ ẹsibuobu ọye ọvo ọ jẹ hai kpohọ usiuwoma. Nọ a nọe kpahe inievo nọ e mai fi obọ họ kẹe wo ẹnyaharo evaọ Ebẹtẹle, Brọda Reinmueller ọ tẹ fodẹ inievo esa jọ, jẹ ta epanọ omomọvo rai o ro fi obọ họ kẹe. Sarah aye riẹ ọ ta kpahe usu riẹ kugbe oniọvo-ọmọtẹ jọ, ọnọ ọ jọ uwou-odi evaọ obọ China ikpe buobu fiki ẹrọwọ riẹ. Sarah ọ ta nọ ọ be rẹroso Jihova ẹsikpobi evaọ olẹ.

David Schafer, ọnọ ọ rrọ ofiobọhọ kẹ Ogbẹgwae Ewuhrẹ, ọ ta kpahe ẹrọwọ ọgaga nọ oni riẹ o wo, ọ tẹ jẹ ta kpahe inievo jọ nọ e tuduhọ iẹe awọ ru iruo ọkobaro obufihọ evaọ okenọ ọ rọ jọ uzoge. Krista aye riẹ ọ ta kpahe epanọ inievo jọ nọ i kri Ebẹtẹle no a ro fi obọ họ kẹe, yọ inievo nana a ‘wo ẹrọwọ evaọ eware esese’ wọhọ epanọ Jesu ọ ta.—Luk 16:10.

Robert Ciranko, ọnọ ọ rrọ ofiobọhọ kẹ Ogbẹgwae Ebe-Ikere, ọ rehọ evawere ta kpahe ọsẹgboni ọsẹ riẹ gbe ọsẹgboni oni riẹ, enọ e kwa kpohọ Hungary nọ e rrọ ikpodhiwu. Ikokohọ nọ o kpohọ evaọ etoke 1950 nọ ọ gbẹ jọ ọmaha i duobọtei udu, yọ evaọ oke yena ọ tẹ riẹ nọ ukoko Jihova o rro gaga orọnikọ ukoko nọ o rrọ ẹwho riẹ na ọvo ho. Ketra aye riẹ nọ ọ jọ ọkobaro ọ ta kpahe epanọ ọ  rọ gbaemu inọ ọ rẹ daji ukoko Jihova evaọ okenọ ikọ erue gbe ebẹbẹ efa e da ukoko nọ ọ jọ fia. O thihakọ, uwhremu na a tẹ rehọ iẹe mu ọkobaro obọdẹ je vi ei kpohọ ukoko jọ nọ okugbe ọ jọ ziezi.

Manfred Tonak ọ tẹ niyẹrẹ kpahe Ẹtiopia. Orẹwho nana o rrọ no etoke emọ Izrẹl ze, yọ obọnana, iwhowho-uvie idu izii (9,000) e rrọ orẹwho na. Ibuobu rai a be rria Addis Ababa, onọ o rrọ okpẹwho-esuo orẹwho na, yọ ejọ e be rria ewho nọ e kẹle Addis Ababa. Fikiere a gwọlọ iwhowho-uvie evaọ iwhre nọ e rrọ orẹwho na. Re onana o sae lọhọ, a te zizie Isẹri Jihova nọ e rrọ ahwo Ẹtiopia nọ e be rria orẹwho ofa re a kpozi te ta usiuwoma evaọ eria itieye na. Inievo buobu a gine kpozi, a tuduhọ inievo nọ e jọ Ẹtiopia awọ, yọ ahwo buobu a gaviezọ kẹ usiuwoma ota rai.

Abọjọ ẹgwae na nọ o siuru gaga họ okenọ ahwo sa-sa a t’ẹme kpahe Isẹri Jihova nọ e rrọ Russia gbe ẹdhọ nọ a gu evaọ ikpe buobu. Aulis Bergdahl, omọvo Ogbẹgwae Uwou-Ogha evaọ Russia ọ ta kpahe ukpokpoma nọ u te Isẹri Jihova evaọ Russia, maero kọ evaọ Moscow. Philip Brumley, ọnọ ọ rrọ Ẹko-Iruo Eriẹ-Izi evaọ uwou ogha obọ America ọ ta kpahe emamọ eware nọ e via kẹle na evaọ okenọ European Court of Human Rights (ECHR) a ro gu ẹdhọ eku izii nọ a wọ họ Isẹri Jihova uzou. Ekọto na o ruẹ nọ eware nọ a wọ họ inievo mai uzou na i w’otọ họ, yọ evaọ ẹsibuobu ekọto na o roma t’otọ dhesẹ oware nọ eku nọ a wọ họ inievo mai uzou na u ro w’otọ họ. Dede nọ a ri bru oziẹ na evaọ oke yena ha, Brọda Brumley ọ ta nọ, otẹrọnọ ma kparobọ evaọ ẹdhọ na, o te wha ẹnyaharo fihọ iruo mai evaọ erẹwho efa.

Nọ oniọvo na ọ nẹ emamọ iyẹrẹ nana no, Brọda Lett o te whowho inọ ekọto ọ ECHR o rọwo no inọ o rẹ keria kẹ ẹdhọ kpahe osa-uzou nọ o rrọ udevie egọmeti France avọ Isẹri Jihova. Evaọ usu edhọ buobu nọ a rẹ rọ ziọ ekọto okpehru nana, umutho jọ ọvo ekọto na o rẹ rọwo gu. Ekọto nana o gu edhọ Isẹri Jihova nọ i bu te 39 no, yọ evaọ usu edhọ nana, Isẹri Jihova a rease 37. Brọda Lett ọ tuduhọ idibo Jihova kpobi awọ inọ a lẹ se Jihova Ọghẹnẹ kpahe ẹme nana.

Richard Morlan, ọnọ ọ rrọ owuhrẹ ọrọ Isukulu Ekpako Ukoko họ ọnọ ọ niyẹrẹ urere. Ọ rọ ọwhọ ta kpahe isukulu na gbe emamọ eme nọ ekpako nọ i kpohọ isukulu na no a be ta kpahe isukulu na.

 Evuẹ Efa nọ Ahwo Ugboma Esuo na Jọ A Kẹ

Guy Pierce, ọnọ ọ rrọ omọvo Ugboma Esuo na, ọ kẹ emamọ ovuẹ kpahe uzoẹme ẹgbukpe ọrọ 2011, “Ru odẹ Jihova họ oria adhẹzọ.” (Zef. 3:12, NW) Ọ ta nọ dede nọ etoke nana yọ oke evawere rọkẹ ahwo Jihova evaọ idhere buobu, o rrọ oke nọ ohwo kpobi ọ rẹ rọ jaja aro vi. Ẹdẹ ologbo Jihova ọ kẹle no; ghele na, ahwo a gbe bi fi egagọ erue, isuẹsu, ekwakwa efe, gbe eware efa họ oria adhẹzọ rai. Re ma ruẹ uvi oria adhẹzọ, u fo re ma se odẹ Jihova, onọ u dhesẹ nọ ma rẹ riẹ ọnọ o wo odẹ na, rọ adhẹẹ odidi kẹe, fievahọ iẹe, jẹ rehọ eware nọ ma wo kpobi ro you rie.

David Splane, ọnọ ọ rrọ omọvo Ugboma Esuo na, ọ tẹ ta ẹme nọ o duobọte ohwo kpobi udu, onọ uzoẹme riẹ o rrọ “Kọ Whọ Ruọ Eriosehọ Ọghẹnẹ No?” Ọ ta nọ orọnikọ eriosehọ Ọghẹnẹ u dhesẹ nọ Ọghẹnẹ ọ siọ iruo ba no ho, keme tei te Ọmọ riẹ a “gbe bi ru iruo” evaọ etoke ẹdẹ eriosehọ ẹwoho yena re ẹjiroro Ọghẹnẹ kpahe eware nọ ọ ma fihọ otọakpọ na ọ sai rugba. (Jọn 5:17) Kọ ẹvẹ ma sae rọ ruọ eriosehọ Ọghẹnẹ? Re ma whaha uzioraha gbe iruo oriobọ yọ abọ jọ. Ma re fievahọ eyaa Ọghẹnẹ je yeri uzuazọ lele ẹjiroro riẹ, ma ve ru utho ẹgba mai kpobi rọ ruẹ nọ ẹjiroro na o rugba. Oyena o rẹ sae jọ use-abọ ẹsejọ, rekọ u fo re ma jẹ ohrẹ nọ ukoko Jihova o be k’omai rehọ, ma vẹ jẹ nya lele ọkpọvio kpobi nọ ukoko na o be k’omai. Brọda Splane ọ tẹ tuduhọ ogbotu na kpobi awọ re a dawo utho ẹgba rai kpobi re a ruọ eriosehọ Ọghẹnẹ.

Brọda Anthony Morris, ọnọ ọ rrọ omọvo Ugboma Esuo na ọye o ru ẹme urere nọ uzoẹme riẹ o rrọ “Eme Ma be Hẹrẹ?” Wọhọ epanọ ọsẹ ọ rẹ rọ unu ẹwo ta ẹme kẹ ọmọ riẹ na, ere Brọda Morris ọ rọ ta ẹme kẹ ogbotu na kpahe eware nọ e rrọ obaro tha, enọ idibo Ọghẹnẹ kpobi nẹnẹ a be rọ ọwhọ hẹrẹ. Usu eware nana họ, ubo “Udhedhẹ gbe omofọwẹ,” gbe ọraha egagọ erue. (1 Tẹs. 5:2, 3; Evia. 17:15-17) Brọda Morris ọ vẹvẹ unu inọ ma gbẹ yọroma ha, ma ti bo nọ, “Amagẹdọn ọna,” nọ ma te yo kpahe eware nọ i ru eruẹaruẹ yena gba ha. Ọ ta nọ ma rẹ rọ evawere thihakọ wọhọ epanọ Ebaibol ọ ta eva Maeka 7:7. Ọ tẹ jẹ tuduhọ ogbotu na awọ inọ a sikẹle Ugboma Esuo na wọhọ epanọ egbaẹmo i re sikẹle ohwohwo evaọ oke ẹmo na. Ọ ta nọ: “Wha kru oma ga, wha thihakọ, whai enọ e be hẹrẹ ỌNOWO na kpobi.”—Ol. 31:24.

Evaọ obọ ekuhọ ẹgwae na, a ru iwhowhovia obọdẹ jọ. Geoffrey Jackson, ọnọ ọ rrọ omọvo Ugboma Esuo na, o whowho nọ ma bi ti wo Uwou-Eroro Oyibo nọ a rọ eme elọlọhọ kere, onọ a kere kẹ inievo nọ e riẹ Oyibo tere he. Kẹsena Stephen Lett o te whowho nọ Ugboma Esuo na u ti ru ọruẹrẹfihotọ nọ a re ro weze bru esẹro ubrotọ gbe eyae rai evaọ America re a tuduhọ ae awọ. O te whowho nọ no oke yena vrẹ a bi ti se Isukulu Ewuhrẹ Odibọgba na Isukulu Ebaibol Rọkẹ Inievo-Emezae nọ E re Rọo Ho. O te je whowho nọ ma ti wo Isukulu Ebaibol Rọkẹ Ezae Ileleikristi avọ Eyae Rai. A te jọ isukulu nana wuhrẹ ezae avọ eyae rai re a wo onaa nọ a sai ro fi obọ họ ziezi evaọ ukoko Jihova. Brọda Lett o te je whowho nọ Isukulu Rọkẹ Esẹro Okogho gbe Erọ Ubrotọ avọ Eyae Rai, gbe Isukulu Rọkẹ Enọ E Rrọ Ogbẹgwae Uwou-Ogha avọ Eyae Rai, i bi ti wo eklase ivivẹ kukpe kukpe evaọ Patterson, yọ ọruẹrẹfihotọ ọ te jariẹ nọ enọ i kpohọ isukulu na no vẹre a te rọ wariẹ nya.

Brọda John E. Barr, ọnọ ọ rrọ ikpe 97, nọ ọ rrọ omọvo Ugboma Esuo na kri no, ọ tẹ lẹ olẹ urirẹ ro ku ẹgwae na họ. * Ohwo kpobi nọ ọ ziọ ẹgwae nana o vuhumu nnọ ẹgwae na ọ rẹ thọrọ ẹro ho.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 19]

Enọ e jọ ẹgwae na kpobi a reawere iyẹrẹ nọ a kẹ no erẹwho sa-sa ze

[Ẹme nọ a fi ẹgba họ nọ ọ rrọ ẹwẹ-obe avọ 20]

Jihova ọ ghale iruo usiuwoma ota na no evaọ Ẹtiopia